今日七日遊選擇入住大阪新阪急酒店。用後感覺非常良好，值得推薦。
地點方便
行程包括大阪及京都，交通以阪急為主打，所以住梅田就最方便。酒店正正係阪急梅田站上蓋，更直結地下街出入口，實在超級方便。周邊遊樂地點亦唔少，有地下街、Yodabashi。食肆又多，三分鐘到達新梅田食道街，想食乜都有。
服務周到
酒店係一個大集團旗下，新阪急係一間幾具規模嘅商務酒店，都好多外國人入住。所以接待處職員英文唔錯，亦好有禮貌，溝通絕無問題。臨走前寄行李亦相當安全，登記後行李會放入儲物間，唔會就咁放大堂。
房間企理
呢間酒店開業已達五十年，雖然明顯唔算新，但絕對唔殘舊。Semi Double房間比想像中大，一張大床，有書枱有櫃，就算攤開晒兩個喼都仲有位行。而且非常乾淨企理，每日嘅打掃都好整齊。
價錢
一個字抵! 親身感受後覺得比抵更抵。六晚Semi Double不連早餐總數$5380，平均一人$2690。價錢黎講抵，就其地點可以慳到唔少車費，無得頂。
參考
大阪新阪急酒店 www.hankyu-hotel.com/hotel/osakashh
0 Comments