十二點未夠到達觀光通，就喺商店街轉角，就有一間始創於1866年、非常古色古香嘅食肆。Tabelog 3.54，為長崎排隊名店。

兩層木造嘅建築物，食店裝潢都好有傳統和式風味，似足日本時代劇傳統食店。入店後要先除鞋，除鞋係為全店使用榻榻米。除鞋後侍者大哥會大力敲打木板，通知二樓嘅服務員接應安排入座。用餐區分為兩邊，一邊係和式席地而坐，亦可選擇洋式小矮櫈。黎得日本，當然要感受最傳統嘅方法啦!

 
 

吉宗係日本第一間販售茶碗蒸嘅店鋪，絕對係茶碗蒸元祖。好多本地人同旅人慕名而黎都係為左一碗蒸蛋，是日柯打一定非點不可。選擇左一客人氣御一人前、同日替角煮定食作為午餐。

 

御一人前 ¥1350

定食包括一碗茶碗蒸及三色飯，賣相非常靚。主角茶碗蒸好幼滑，表面同中間都無氣泡，成碗都蒸得好靚。入口更加不得了，蒸蛋雖然呈固體狀，但佢嘅柔軟度直情近似於濃湯。入口即化，蛋液自然滑入喉嚨，口感就好似薑汁撞奶一樣。食得出蒸蛋用上好多高湯，湯頭非常鮮味濃郁，無添加過份調味。加上好多高級配料，如白肉魚、雞肉、香菇、木耳、蝦、銀杏、魚板、烤星鰻等，非常豐富。無諗過茶碗蒸可以如此講究，如此美味。至於三色飯，三色配料係蛋絲、櫻花蝦鬆同雞肉鬆。賣相吸引不在話下，仲相當好味。味道偏甜，正好下飯。

 

角煮定食 ¥1080

特價嘅日替定食相當豐富，包括幾款前菜、沙律、一客細茶碗蒸、麵豉湯、豚角煮配白飯，仲有兩款甜品。豚角煮已經燉到入口即化嘅程度，雖然三層肥瘦相間，但係唔覺油膩感。豬肉本身甜味好足夠，加上鹹鹹甜甜嘅醬汁，正好下飯，加一點芥末仲可以增加層次感。

此餐埋單¥2430，港幣百幾蚊一餐已經感到相當豪華。此行一大得著係，完全顫覆左對茶碗蒸嘅傳統概念。再唔係定食嘅配菜，而係可以上枱作為主角一味。的確，仲相當飽肚滿足。