by admin | 12 月 31, 2010 | 拉麵, 日式料理, 沙田
味吉拉麵館@沙田
31/12/2010 19:00
是日拉麵體驗，記憶猶新，非常難忘。
餐牌分別說明來自日本唔同地區嘅拉麵特色、由湯底、配菜、拉麵都有唔同。
羅列左唔同地區拉麵嘅歷史，起源，講究重點…佢，係一間拉麵博物館。
豬軟骨叉燒博多豬骨湯拉麵 ($68)
不嬲都酷愛特濃湯底，所以毫不猶豫飛去博多。一啖特濃豬骨湯，就係我一直追求緊嘅味道，「白、香、濃」已經代表晒一切，回味無窮，忍唔住一啖接一啖。配合入味柔軟既豬軟骨、肥瘦均勻嘅日式叉燒，軟滑嘅溏心味蛋，仲有煙韌既拉麵。完美演繹!
天婦羅炸蝦雜菜餅冷蕎麥麵 ($55)
排場夠勁，但出手略嫌小家。幸好天婦羅處理得好，材料豐富，有齊爽口明蝦、魚乾、雜菜等材料，脆口得黎但唔油膩。而蕎麥麵有香香嘅蕎麥味，口感彈牙，配泠麵汁味道一流。冷麵汁又夠講究，蔥、芥末、蘿蔔蓉、冷麵沾醬湯汁不特只，食完仲可以加熱湯調和，自製一碗醬汁清湯。
外加醬燒牛舌 ($26)，軟腍亦惹味非常，仲有些少青蔥提味。
「專門、講究、地道」係今餐嘅總結。
雖則我唔係專業人士，亦未食過正宗地道日本拉麵，起碼對呢間店係有咁嘅感覺。
百幾蚊埋單，係日本料理嘅公道價錢，呢個價錢，呢個質素，係合理嘅。
就算周不時行過味吉，都唔會有衝動想入去再食。可能怕間間店舖手勢唔同，或者怕日子久遠不進則退，擔心再食唔番果種嘅美味，希望呢個咁好嘅record唔好被replace。
好嘅餐廳，去一次就夠。而家可以做嘅，係再搜尋更好嘅餐廳。
因為呢一餐，令我愛上日本拉麵。
by admin | 12 月 25, 2010 | 深水埗, 點心
添好運點心專門店@深水埗
25/12/2010 19:30
添好運呢個名唔記得幾時開始突然冒起，幾乎等於一盎兩件嘅代名詞。
實在未能的起心肝去正店排四個鐘，今次去住深水埗新店止住痕。
好彩要朝拜呢間一粒星新店只需45分鐘耐性。餐紙選擇不算特別多，都係一般正路都有嘅點心。
臘腸滑雞飯 ($17)、免治牛肉腸 ($15)、排骨 ($12)、燒賣 ($19)、牛肉 ($12)、粉果 ($10)。講真一般質素，雖然無特別驚喜，但肯定真材實料，新鮮熱辣。
值得一提佢嘅蝦餃 ($19)，真正表現到咩叫晶瑩剔透、皮薄餡靚。一級棒!
酥皮焗叉燒包 ($14) 係此店必點名物。一上枱已經聞到陣陣牛油香味，保證新鮮出爐，熱辣辣。外層墨西哥皮酥酥脆脆，內餡嘅叉燒醬內真係有叉燒粒，同酥皮襯到絕。普通一個叉燒包，加左墨西哥皮，竟然會結合出如此驚喜嘅效果。就好似食完味吉陽一既料理，會忍唔住大叫「好~美~味~呀~~」咁。難怪在座每枱都最少叫番一兩碟打底，真係食兩個都唔夠。
老老實實，點心又唔係十分、非常、特別、極之咁好味。但一個驚喜度爆登，令人眼bling bling嘅酥皮焗叉燒包，已經能夠塞住你把口，足以補償番你浪費左45分鐘喺佢門口齋等冇得食嘅弱小心靈。
最後心甘情願拎張紅衫魚(二人同行價)找數。好滿足嘅聖誕夜。
網上有唔少人話深水埗始終都只係拷貝，點都唔夠旺角正店好。
嗯~睇黎點都要搵日花幾個鐘去旺角店一轉啦~
by admin | 12 月 25, 2010 | 尖沙咀, 日式料理
北海道十勝豚丼@尖沙咀
25/12/2010 14:00
聖誕日當然要食好啲!
網上搜尋過尖沙咀地帶覓食好去處，方便夜晚睇燈飾。
Target﹕港晶中心十勝豚丼
俾地圖欺騙，行左一個圈都未搵到，原來係商場外轉角位嘅地舖。
滑蛋吉列豬扒飯 ($48)
滿滿一碗飯配厚切豬扒。豬扒厚肉鬆嫰，口感一流。美中不足嘅係，滑蛋份量比較少，而且未做到滑嘅感覺。其實食滑蛋吉豬，重點不只在豬，好味嘅滑蛋會令整碗飯加分不少。十勝牌嘅豬係好食，但滑蛋尚有不少進步空間。
講起滑蛋，就會諗起佐敦間澳牛，條隊永遠都係咁長。點解啲人咁有耐性?? 真係要搵日趁下墟 。
十勝烤薄豬扒飯 ($38)
微焦嘅炭烤薄豬扒，配香濃網燒汁。薄切加
燒汁係聰明嘅配搭，豬扒非常入味香口，又唔肥膩。一啖飯一啖肉，
加埋伴碗嘅白蔥絲，味道岩岩好。應該係排喺豬肉榜榜首位置，都仲要企得幾穩陣。就俾個豬肉獎佢啦! 如果隻豬知道自己會死得咁好味，我估佢都會死得眼閉，阿門。
平均四十零蚊一個套餐，唔洗加一，有埋蜆肉味噌湯同凍豆腐沙律，喺尖沙咀區黎講，真係好到極，仲想點呀?! 聖誕日午餐食到咁嘅質素，一樂也。Happy到極點。
一間好嘅食肆，唔需要太多花巧嘅餐單，簡簡單單就好。只要做好主打一兩項重點推介，已經可以留住客人嘅胃口。
北海道十勝豚丼，我鍾意。
