糖蓮子@紅磡
20/3/2011 19:30
從開飯網團購得到半價$50現金券。老實講，呢間舖唔做泡毛，我真係唔識佢，亦都唔知點去。開飯網嘅相片好吸引，就去驗證一下。
碎朱古力梳乎里 ($30)
老闆未送到埋枱，已經聞到朱古力嘅香味。一個大杯，比想像中更大，梳乎里脹得高高，頂尖有少許焦焦，扭紋式旋轉，有層次感。表面灑左薄薄嘅糖霜同朱古力粉，整個構圖更靚。梳乎里即叫即造，熱辣辣，軟綿綿，好鬆軟，好似食雲咁。裡面比較濕潤，朱古力味稍為未夠。
濃情黑森林(朱古力芭菲) ($29)
一隻高杯，一層一層堆砌。果凍、特濃朱古力味雪糕、甜甜圈、水果、朱古力脆條、朱古力醬。色彩配搭運用得宜，美觀，吸引食欲。整體味道正常，因為完全係現成野，無調味技巧可言。
甜品嘅造型係非常美觀，呢間店嘅甜品係會令你影相影完一幅又一幅。
靚嘅甜品令人見到都開心，呢間店做到呢個效果，已經能夠俘虜一聚美少女嘅心。
優惠左埋單都係三十零蚊兩個甜品，好唔好食係其次，當佢藝術品咁欣賞，開心下都唔錯，就用對眼去品嚐啦。
時新快餐店@紅磡
20/3/2011 17:00
每次行過都唔為意嘅一間快餐店，估唔到係出名嘅人龍名店。賣漢堡包咋喎?!
係呀，自從港鐵賣廣告唔覺意泡毛埋漢堡包，人龍就越來越長，等就越來越耐。
親身感受人龍 = 門口企左不下三十人，落柯打後二十分鐘先有得食。
注意﹕ 店內廚師先生已經係摩打手出餐。
一個漢堡包即叫即製，邊等邊聽到吱吱喳喳嘅聲音，聞到肉扒嘅香味，空腹度一百巴仙。
熱辣辣、香噴噴，肉汁流晒出黎，忍唔住一啖接一啖。
肉扒鮮甜鬆軟多汁，好香嘅洋蔥味，有啲似煎肉餅，港式!
蛋係煎荷包蛋，港式!
芝士其實係bonus，可有可冇，如有半溶版的話更佳。
總結，配沙律汁係好味啲嘅。
淨係即叫即製已經能為美味指數倍升。
時新係一間令我心思思成日掛住想再食嘅餐廳。
試下搵日唔支持集團連鎖霸權，改行揀港式小店，可能驚喜無限。
權之助@太子
13/2/1011 13:30
13/3/2011 20:00
自2010年12月31日起，食過味吉豬仔真情演繹嘅特濃豬骨拉麵，愛上日本拉麵後，希望一山還有一山高，更加有條癮想搜尋心目中嘅終極拉麵。標榜日本師傅親自主理正宗日式拉麵，又有大量飲食雜誌嘅報導，權之助就係我嘅頭號目標。
13/2/201113:30
橫濱叉燒拉麵 ($58)
唔知頭唔知路，求其點左橫濱拉麵，因為佢話係特濃豬骨湯加雞湯，本希望試到終極豬骨濃湯。不得了，原來湯唔濃不特止，仲係有苦味!! 何解? 因為配菜竟然用波菜!! 味道偏苦嘅波菜，令到本來已經唔濃郁嘅湯底更可怕。有啲似阿媽靚湯之菠菜豬骨煲雞湯，而且仲要係雞味做主角，乜係日本湯底黎架咩? 叉燒係粉紅雪白，可想而知，味道極淡，但好在質地軟腍，都叫做食得落。放喺碗旁嘅紫菜係完全唔乾脆，未浸湯都已經腍晒。拉麵還好，都總算彈牙煙韌。
滑蛋豬扒飯定食
拉麵店竟然食飯係好過食麵。豬扒幾嫰滑，滑蛋真係滑蛋，但搞到豬扒唔脆係一個敗筆。但味道總算唔錯。
五粒星滿分，我俾夠兩粒，係俾個飯only。
OK，湯可能係正宗橫濱嘅中華湯底，係我唔識欣賞。而呢間店嘅名氣同霸氣，就憑一句「本店湯底較濃」嘅警告，我願意俾多次機會你，就試多次你個較濃嘅九州豬骨湯底。
13/3/201120:00
剛好事隔一個月，再去試多次。做番晒所有research，睇清楚邊款拉麵有好評。
博多叉燒味蛋拉麵 ($52) + 博多叉燒拉麵 ($58)
拉麵仍然係彈牙煙韌，我無意見。網友推介嘅溏心味蛋係內外都充滿醬汁味，睇黎都醃左有段時間，味道係好嘅，都做到半溏心效果，蛋黃係半型固的。但，蛋係凍嘅! 叉燒外型比上次討好，係半肥瘦，更加軟腍，但仍然係無味。湯底，係徹徹底底、完完全全、極終失望。豬骨味好淡好清，只有少許咸味，講不上濃郁，亦都無濃湯果種creamy嘅膠質感。我寧願俾出前一丁豬骨濃湯嘅味精湯包欺騙一下。
咁岩兩次去都係13號，兩個bad luck嘅數字，換黎兩次bad bad嘅經驗。
價錢唔係平呀，一個麵要成五六十蚊，而且質素係差，不知錯亦不能改，係絕對唔會再有第三次機會。最後只好再來一句﹕對不起，我要狠狠地劣評你!
太安樓蛋記@筲箕灣
13/3/2011 15:00
第一次俾阿蘇勁讚，第二次俾阿蘇勁踩，開飯網劣評指數暴升。究竟佢發生咩事？
11/3/2011 (星期五)
第二日去路環睇熊貓，順面去埋澳門另一間葡撻專門店。
可能因為路途遙遠，冇乜人會選擇平日去食，所以買番黎嘅安德魯葡撻，係唔熱嘅。
雖然如此，佢個皮仍然係好鬆化，好酥、好脆，脆到咬一啖，跌一啖落街。感覺上，呢間嘅酥皮比瑪嘉烈更出色。雖然只係微暖，但個蛋餡仍然係好香濃。相信如果係新鮮出爐熱辣辣的話，一定更好。
老實說，雖然係好味，但兩間其實差唔多，如果要山長水遠走入黎的話，咁不如去番瑪嘉烈算數。
完成路環之旅，午飯時間當然係官也街附近最好。選擇左大利來記菠蘿豬扒包。
只需等五分鐘就可以送入口。大大塊豬扒相當鬆化惹味，配菠蘿包係更好味。
但整體好似不及上次黎食，冇左上次果種感動嘅衝擊。唔怪得知，越來越多劣評，睇黎下次再黎搵第二間算。
晚餐喺福隆新街解決，選揀左祥記麵家。
蝦子撈粗、牛雜蝦子撈麵
金沙鯪魚球配蜆蚧汁
外層用米粉包住來炸，炸得非常香脆，外面乾爽，內面仍有肉汁，魚肉一啲都唔腥。炸到咁勁，但食落都唔覺油膩，好野!
蜆蚧汁係超咸，蚧味好濃，只需沾少少，已經可以充滿晒成粒鯪魚球。
你買我買團購優惠$369去澳門，包來回船票+觀光塔入場券+觀光塔自助餐。
好彩記得一早book定，可以搶到食自助晚餐。自助晚餐正價都要$300，真係乜都抵番晒!!
10點幾落船先去永安咖啡室食個早午餐。
對上一次睇《水舞間》想黎食，但摸左一個大門釘，今次終於有口福啦。
咸牛脷通心粉 ($28)
咸牛脷係好腍，真係好腍，幾乎入口即溶。
好入味，但唔會過咸，夾雜左牛嘅膻味同咸味。
通粉係阿蘇激讚嘅有坑紋通粉，係幾彈牙喎。
湯係淡淡地，但加左每張枱都有嘅秘製咖哩油，成個感覺唔同晒。佢有啲似加辣版嘅沙爹醬，加一匙已經無得頂，多左種香濃嘅辣味，送麵好拍檔!
加一匙就夠啦，加太多就會太辣。
蒜蓉焗肉丁公仔麵 ($23)
熱盤可以一試幾款唔同嘅葡國菜，好似馬介休球、葡汁焗魚等。
幾乎試食晒所有甜品，有好幾款蛋糕，芝士蛋糕、tiramisu、蘋果批等。仲有焦糖布甸、朱古力泡芙、朱古力噴泉。當然唔少得澳門出名嘅木槺布甸，好味到食左兩杯。仲有其他細細杯裝嘅朱古力慕思、水果啫喱杯同雪糕。