綠林甜品@深水埗
25/4/2011 16:00
深水埗 = 男人地帶。我覺得。
綠林甜品 = 扮書局嘅名 + 最傳統嘅甜品 + 平到喊嘅價錢 = 女士relax嘅小空間。
豚組
嘉樂商場唱K嘅地方冇左，改為一個日本美食廊，有五、六間日本料理。今次有團購俾我試一試吉列專門店。為左隆重歧視呢間以日本頂級吉列作招徠嘅高檔餐廳，決定午餐以掃街輕食為主，好讓肚皮可以騰出空間黎放吉列。
豚組嘅兼覓係，食吉列食品的話，會俾個石磨你自己磨芝麻醬汁。店員姐姐仲會好親切咁為你介紹枱上各款醬汁，吉列豚醬、芥末味沙律汁、柚子味沙律汁，等你自己配搭。
牛肉咖哩石鍋烏冬
新鮮熱辣，以石鍋上菜令材料保持熱力，仲見到熱氣泡不斷爆發出黎，咖哩味隨住熱力上升，口水直流。適當時候請自行將肥牛肉片拎起，以免俾石鍋餘溫繼續加熱搞到過熟。識得咁做嘅話，牛肉係非常嫰滑入味。典型偏甜少辣日式咖哩湯已經夠好味，夠濃郁，夠香，配埋煙韌滑溜嘅讚岐烏冬，估計係可以單品索價$70或以上嘅高質素烏冬麵鍋，一試難忘。
厚切豚肉豬骨湯石鍋烏冬
豬骨湯底有肉味但不算太濃，係比較可口清澈嘅湯底。明顯給咖哩湯底比下去，可能吉列食品太熱氣，師傅係有意作個配合，調配比較清爽嘅湯。清嘅湯底更能夠食到烏冬嘅原味，烏冬粉白晶瑩，非常煙韌，亦食得出有好香嘅麵粉味。而厚切豚肉肥瘦層次分明，肉質爽滑，非常有肉味。豚肉經過輕微燒烤處理，肉同脂肪部份味道香濃，入口即溶，食完仲有陣陣餘香。
吉列白豚柳配椰菜絲
離奇地炸到咁勁都唔油膩，而且仲超酥、勁脆! 豚柳肉幾厚身，有肉味，但肉汁不足比較乾。配上自磨芝麻吉列醬，口感更舒服。再配埋清爽嘅椰菜絲跟柚子沙律汁，更加可以消膩。開始欣賞日本人嘅創意頭腦，求其搵啲麵包糠包住啲野黎炸，竟然可以成為美食。
環境舒適，坐得舒服，兩個人都被安排坐自成一閣嘅小梳化包箱，傾計一流。由食物、飲品到環境都好滿意，大滿足的說。
蜂買$55食一個套餐，有烏冬、吉列白豚柳同飲品，又唔洗加一。可以午、晚餐時段食，感覺上晚市來食更抵。呢間野一個下午茶都講緊四、五十蚊，晚餐係上百蚊一個餐，團購收你$55，我真係好多謝你。團購讓我用茶餐廳價錢 (而家是但一間茶餐廳晚市都要四五十蚊走唔甩呀!)，食到高檔野，that’s why，我鍾意團購，萬歲!!!
北海道脆皮雞排
炸雞扒由台灣飛到黎香港，過江龍紅唔紅得起，就要睇下佢道行夠唔夠高。北海道脆皮雞排並唔係來自北海道，同豪大大一樣，籍貫台灣，唔好扮日本人。
脆皮G脾排 ($24)
可能貪得意叫做G脾排，G排都係即叫即炸，客人可隨意自選味粉。我地貪心啲揀左海苔味、蒜味同起司粉。
件頭幾大，切開一塊塊都感覺到份量十足。係超級咁脆皮，漿粉較厚，食到脆皮嘅蛋漿味，而表層仲佈滿左味粉。雞扒只係夠厚身可取，食落唔夠嫰滑，肉汁一般，比較乾，而且冇乜肉味。要連皮食，藉住脆皮嘅味粉先可以吊番起個味。好彩我地夠貪心，一次過落左三種味粉。
整體黎講，味道一般。首次覺得食炸雞扒，個脆皮仲好食過件雞扒。而脆皮同雞肉係若即若離，程度介乎想分手又唔捨得之間。一邊食，個皮就一邊跌。食到尾段，大家都係覺得唔夾，決定左分開，最後變左甩皮雞。突然諗番起，麥太嘅紙包雞，我覺得呢件野似皮包雞皮包雞，但佢最後係會甩皮嘅。
嚐樂@九龍城
23/4/2011 21:00
九龍城完成點心晚餐後，繼續以甜品作結。又黎一個前所未有咁抵食嘅團購。用$15足足買到$50現金券。相信嚐樂係一間新開嘅甜品舖，以團購作宣傳，吸引到我呢啲貪平乜都敢試嘅人。
集購網介紹，推介芒果達人同黑咕嚕 。反正兩樣都岩食，就咁決定。
芒果達人﹕芒果味雪糕+芒果肉+芒果布甸+西米露+芒果醬 ($26)
芒果雪糕冰到有啲似雪芭，仍然充滿甜酸芒果味。新鮮芒果肉酸酸甜甜，芒果布甸夠滑溜，配上鮮甜芒果醬汁，再用椰汁西米露托底。一睇呢個配搭，就覺得似許留山嘅芒果甜品系列。但相對呢度感覺到較新潮兼年輕嘅風味，而且賣相絕佳。
黑咕嚕﹕朱古力雪糕+咖啡果凍+朱古力脆脆波+朱古力醬 ($24)
特濃朱古力雪糕配上脆卜卜朱古力波，再加上香濃朱古力醬，呢三樣組合已經能夠滿足到朱古力魔嘅口味。再加上煙韌嘅咖啡果凍，正好中和一下朱古力嘅濃味。一杯凍、甜、脆、滑、濃，充滿玩味、口感獨特嘅甜品組合。
埋單剛好$50，用團購券找數，一蚊都唔洗多俾，即係$15食到兩個甜品，抵到爤，食碗紅豆沙都唔止!!
呢間小店，呢個價位，呢個質素，正價食都係合理嘅。但係衰在地點差啲，九龍城甜品選擇太多，會唔會再去真係要睇緣份。
醬汁蒸鳳爪﹕普通一碟點心， 鳳爪係大大隻，醬汁係濃濃辣辣的，得意地用正方型蒸籠。
星星脆魚腸﹕外層係白白滑滑嘅腸粉，包住新鮮脆口嘅炸魚柳，有啲似春風得意腸嘅魚肉版。創意十足，但略嫌魚有少許腥味，而且炸粉過多。不過係超有心機地擺左甫士，讚。
黑魚子花菇蒸燒賣 ﹕蒸燒賣一樣都係足料大大粒，好香嘅冬菇味。呢度唔用蟹子，改為加黑魚子。黑魚子食落更加過癮，蒸煮後，仍然保持到索索聲、脆卜卜嘅口感，更有鮮味。
荀尖蝦餃皇﹕大粒足料! 皮薄得黎有彈性，蝦有鮮味而且爽口，調味剛好。但一籠得兩粒，一人分一粒，唔夠喉呀!
芝士焗饅頭﹕中式版蒜茸包，饅頭仔之上加芝士去焗，饅頭鬆軟，但芝士味不突出，蒜味亦不夠。似乎呢個fusion尚未成功，寧願食椰汁饅頭清清地算數。
Bayview Restaurant Sashimi Oyster Bar@銅鑼灣
10/4/2011 16:00
比較少玩嘅豬仔團購網，泡毛$88喺180度無敵維港海景餐廳食五星酒店級甜品放題。講到咁勁，吸引左我去買兩張。臨食之前上開飯網做下功課。
Bar乜鬼bar，咪就係一間樓上cafe，而且有不少劣評話團購中伏。抱住既然買左，就當食飽算數嘅沈重心情去食。
店舖提供17款甜品，並採取1.5小時，每次每人可叫四款嘅限速策略。有你冇你順序由頭食到落腳，全部都最少要試一次。
1. 法式焦糖布甸﹕食得出係即叫即焗，面層嘅焦糖好脆，但可能有少許過火，有些少可以接受嘅焦苦味。布甸好軟滑，蛋味、奶味都好出。整體唔錯，值得encore
2. 一口雙重朱古力布朗尼﹕外層係脆脆嘅，內層係濕濕地嘅朱古力蛋糕，好重朱古力味，好味，encore多次
3. 朱古力泡芙﹕明顯係現成製品，硬硬地一舊粉，內有少許忌廉，面層加朱古力醬
4.一口蘋果批﹕一細粒迷你版蘋果批，粉團包住蘋果蓉拎去炸，炸得幾脆，蘋果蓉味道唔錯，但同我地平時食嘅蘋果批完全唔同
5.木糠蛋糕﹕似乎係主打款式，木糠餅碎同奶油忌廉一層一層舖疊，外型討好，亦都夠實，唔會鬆散。整體味道唔錯，奶油味幾香，果真招牌
6.朱古力慕絲蛋糕﹕質地軟腍，朱古力味超濃，似乎係有少許苦味嘅特濃版本
7.Tiramisu﹕比較軟腍，可可、咖啡、酒味都好濃，但芝士味稍欠奉
8. 一口香蕉芝士蛋糕﹕同一口蘋果批差不多，內容改為香蕉。香蕉味道唔錯，但芝士味虛無。容我幫佢改名為一口炸香蕉餅會更合適
9. 朱古力心太軟﹕都係新鮮即焗，蛋糕部份都幾鬆軟，而內餡係非常之咁流心，朱古力醬味道還可以，有啲似麥提莎。但真係同網友所講一樣，食到有啲咸味，唔通好似食西瓜落鹽咁，用咸味黎帶出個甜味? 大師級技巧乎?
10. 藍梅窩夫格餅﹕格餅好一般，唔鬆軟，淋上冇藍梅粒嘅藍梅醬
11. 荷蘭雲呢拿忌廉泡芙﹕明顯係現成製品，硬硬地一舊粉，內有少許忌廉
12. 士多啤梨泡芙﹕同上
13. 朱古力冬甩﹕基本味道同上，只係面層塗左朱古力，雪硬左嘅成品
14. 朱古力脆皮忌廉條﹕同上
15. 黑森林蛋卷﹕好明顯係嘉頓迷你瑞士卷切件上，誠意不足
16. 芒果蛋卷﹕同上
17. 原味梳乎利﹕焗得好鬆軟，表面焦焦好吸引。蛋白味幾香，但有幾粒砂糖未完全溶晒，請俾多兩分心機打蛋
整體黎講，今次團購並唔算中伏，反而借機想幫佢地平反。
先利申﹕我同Bayview絕冇利益關係，亦唔係打手賣廣告，只係食完感覺良好，想拔刀相助
Q﹕有網友話餐廳嚴重限速，出菜慢，只能夠食到2rounds
A﹕出菜唔快係理解嘅，你要人地新鮮即叫即製，又唔俾時間人，咁你想點? 而我地嘅記錄係﹕每款由頭起先叫一次兩個人分，當做試味。再精選其中六、七款，每款每人食左1至2次，咁算食到幾多round? 總之我好飽。
Q﹕總結網友大部份劣評係講﹕食物細細粒，孤寒到死，選擇又少，味道又唔得，食西餅好過咁話
A﹕人家講到明係一口甜品，唔細粒，請問你可以食到幾大粒? 而細細粒正好俾你食多幾轉，細粒唔係放題最佳晒史嗎? 選擇少，我認同，得十七款係少。味道就見仁見智，有部份係好唔得，誠意不足，但招牌幾款確實係做得出色，有本事可以怒食，橫掂唔洗加錢。
Q﹕網友小姐鬧爆話餐廳唔俾窗口位佢坐，睇唔到180度全海景咁話
A﹕我想話我都坐唔到窗口位，但我都望到個海景。人家舖仔細細，坐得果十零人，唔係你坐窗口就佢坐架啦。人家又冇呃你，佢真係有全海景，至於係唔係180度咁無敵，未度過唔知，本人亦都唔care。
Q﹕好多人就呻$88咁嘅質素，原價要$168，又話咩酒店級，完係唔值，再外加十個感嘆號
A﹕團購最邪惡之處係將個正價誇大，令你覺得你得到咁多折扣好抵。如果話俾你知呢餐原價係$880，而家你一折就食到，唔通你會覺得好味左? 定係你真係用$880呢個價去評論? 有咁大隻青蛙隨街跳麼? 其實最中肯嘅係用優惠價同該餐嘅質素做性價比，原價只不過係考慮下次再去嘅可能性。團購係俾機會你用優惠價試食，好味的話，客人會願意用正價再幫襯，呢個先係成功嘅宣傳，相信亦係團購嘅其中一個目的。
$88一人價錢食呢一餐，係合理嘅，至少我倆係咁認為。焦糖布甸、布朗尼、Tiramisu、木糠蛋糕、朱古力慕絲同心太軟我係覺得唔錯。以同一個質素，一個正常晒史，求其一間甜品舖作價四十蚊一款走唔甩。計算Bayview每款甜品平均晒史比正常細一半有多，就以$15一款黎計，以上六款各食到一次已經番本。未計街邊甜品舖冇海景俾你睇，又未計你飲左唔多覺，人家送嘅一杯沙冰特飲，更未計侍應姐姐仔走出走入送餐幾次都繼續笑住為你落單嘅殷勤服務，咁你霸左人地個位粒幾鐘吹水吹水再吹水，呢個樓上cafe嘅最低消費又點計先?
$88係合理嘅，並非中伏。
但….講咁耐，正價$168我係唔會再去的。多謝各位。