by admin | 4 月 5, 2011 | 樓上cafe, 甜品
Pancake Colours Cafe & Bar@旺角
5/4/2011 15:00
大班人吹水聚會，多數去旺角區嘅樓上cafe。只需數十蚊價錢，有得食，有得飲，仲有得玩，兼有得坐。瓊華樓上嘅一間cafe，宮廷式嘅裝修幾骨子，適逢開飯網搵到八五折Qpon，可以食個下午茶，hea足一個下午。
黑朱古力美式班戟 $34
叫得pancake colours，相信班戟都算係招牌菜。餐廳提供兩款班戟，今日選擇左比較飽足嘅美式班戟。傳說中嘅美式班戟就係熱香餅，香餅煎到微微脹起，夾層加上忌廉，將兩件重疊。面層加一個超凍嘅朱古力雪糕球，再灑上黑朱古力碎。
雪糕係普遍貨色，勝在夠凍唔易溶。而朱古力碎幾夠濃味，令甜品生色不少。重點嘅香餅都幾鬆化，有陣陣蛋香、牛油味，加埋忌廉，係一個好豐富，好可觀嘅下午茶。
亦想順便分享朋友們嘅下午茶。
公司三文治、煙三文魚蒜蓉多士看似都幾豐富，睇落材料都幾新鮮，聽聞味道不錯。
另一款提供嘅班戟係法式班戟，薄薄嘅蛋皮，包住超厚一層忌廉，再捲成一卷，忌廉魔唔好錯過。
甜品賣相係超吸引，同menu係有足足95%相似度。一個跟飲品嘅下午茶餐價錢大約三十幾蚊，而開飯網周時都有八五折優惠券，分分鐘hea足三個鐘嘅價錢都唔洗三十蚊。一大班人gathering的話，呢度都不失為一個好地方。
有網友投訴呢度上菜慢。其實咁嘅服務，正好岩晒一啲行飽街冇野做想搵地方hea時間嘅人。總好過有啲餐廳，明明連野都未食完，就不停有waiter想搶住收你個碟，希望早啲Pang你走。有心hea時間的話，根本唔會介意佢出菜有幾慢，而趕時間嘅朋友亦唔適合去樓上cafe食飯。hea係樓上cafe嘅專利。
by admin | 4 月 3, 2011 | 快餐, 沙田, 西餐, 麵包
Triple O’s by White Spot@沙田
3/4/2011 19:00
Triple O’s俾我嘅印象係一個漢堡包餐竟然要成七十蚊，有乜咁富貴呀﹖ 咁多間分店都有一百個好評，咁厲害﹖ 你買我買做半價買現金券團購，第一時間去試下。
燒牛肉漢堡
包包夾住高貴嘅燒牛肉，配甜甜酸酸有啲似沙律醬、芝士嘅汁。包係好味，牛肉係入味，但可
惜近乎全熟，有啲鞋口。但整體黎講，好滿足。
原味牛肉漢堡
點左最受網友歡迎嘅包包，希望食到最original，最傳統嘅漢堡包。一個包份量十足，一大塊牛肉漢堡扒、配蕃茄、生菜、酸瓜，再加埋酸酸甜甜嘅醬汁。麵包甜甜地，好軟熟，配酸酸地嘅醬汁好夾。所有材料都好新鮮，平時唔多食生蕃茄、生生菜嘅小妹，都唔客氣食晒成個包。酸瓜放喺包嘅外面，好讓唔食酸瓜嘅朋友可以好方便咁掉左佢。一向都喜歡酸瓜，佢嘅存在，令人更加開胃，又可以解膩。食一啖漢堡扒，更可以感覺到肉汁流出黎，而肉味濃郁。總結係得兩個字「好味」。
其中一個餐配薯條，一個配洋蔥圈。粗身薯條夠大份，新鮮熱辣，好香薯仔味，一啲都唔油膩，有少許鹽，唔洗落茄汁齋食都唔錯，咁當然落茄汁係更好啦。
洋蔥圈就得幾個圈，但洋蔥味十分之香，半透明、半脆、半腍嘅洋蔥好吸引食欲。
食完一個大滿足嘅漢堡餐，總結係好味，但都係冇電視框一定唔會再去。
即使喺你買我買團購$25買左$50現金券，補番差價一個餐都要四十幾蚊。電視框左之後，以四十幾蚊食到一個餐，係值呢個價，好味但未至於令人O咀。
但講緊正價係要成七十蚊一餐，大拿拿人均消費七十蚊係可以食到好多野，食日本料理都仲得，而我嘅首選並唔會係junk food。只限有團購先會去，walk in應該no way。
