by admin | 6 月 9, 2011 | 2011大阪、神戶、和歌山五日遊, 旅遊, 日本, 關西
9/6/2011 (星期四)
第五日with 「I Miss U! Hello Kitty」
今日專登去酒店另一間餐廳食早餐，試下唔同野食。二樓嘅餐廳食嘅野大致差不多，比三十樓多左一啲日式小食。特別一提個冷盤三文魚，新鮮嘅三文魚配檸檬汁同橄欖油，好味，encore多次!完左早餐後去左田崎珍珠，興趣不大。
下站係shopping必到﹕ 道頓堀、心齋橋
點都要影下固力果先生嘅。
心齋橋有好多藥房、服裝店、百貨公司、電器舖，仲有好幾間零食店，瘋狂勁掃手信，買左好多章魚燒小食。
Sanrio 專門店，有三層樓慢慢行!
周圍行，仲八卦入左去パチンコ彈珠機舖睇人玩。
食街道頓堀全街有好多章魚燒食店、拉麵店、蟹食專門店，仲有好多好得意嘅立體招牌。
Starbucks 靚仔哥哥講飲frappuccino，又幾好飲wo。
叫左赤鬼一客八粒章魚燒500yen，新鮮熱辣、大大粒，章魚仲好大舊，醬汁、蛋黃醬都好味，但個粉皮好似太腍，有啲the皮。
第二間叫左本家日本第一章魚燒，一客十粒。500yen。都係新鮮熱辣，除左醬汁，仲有木魚片更加香味，章魚都好足料，粉糰比較實在，整體嘅口感較配合。兩人都支持呢間本家多啲。
大約下午三點，要離開大阪市區，向機場進發。行左一陣免稅店，又掃左啲手信。六點零鐘機，唔知點解呢程機dun到阿媽都唔認得，超chok。
豬肉餅飯、壽司、餐包、藍梅蛋糕。壽司有4-5件細細，件件都唔錯，藍梅蛋糕唔太甜，藍梅味夠。
雞扒飯，雞扒幾嫰滑，特別鍾意佢個燒汁，配雞扒真係一流。旁邊嘅配菜其實都好好味。
八點幾落機，正式完成五天大阪之旅。盡興而歸。
by admin | 6 月 8, 2011 | 2011大阪、神戶、和歌山五日遊, 旅遊, 日本, 關西
8/6/2011 (星期三)
第四日with 「See U Later! Hello Kitty」
第三晚嘅神戶博 (Kobe Portopia Hotel) 酒店，比早兩晚已經讚不絕口嘅紀南溫泉酒店更好。一個字﹕「豪」。
在落神戶商務地區，房間大之餘，仲有書枱，免費上網服務等，一間服務殷勤、舒適且高檔嘅商旅酒店 。(借post官網圖)
房間仲有個露台望到鐵路、神戶港灣海景，觀景非常開揚。
早餐係喺30樓嘅Sky Lounge，望住咁嘅風景食早餐，真係爽。
早餐有日式、西式供應。特別喜歡呢度嘅蛋類食物。半透明嘅洋蔥，配粒粒火腿，半溶芝士，用半生熟嘅嫰蛋包住，係出自日本師傅嘅即場表演煎奄列神技。藉得一提係此處有比香港多50億，共合150億個活性乳酸菌嘅益力多。
臨出發前，補充影一影呢個咁宏偉嘅酒店大堂。
嘆完一個豪嘅早餐之後，HP值升至100，係時候進入本團嘅戲肉﹕ 環球影城。
10:00 正式開門進場，人山人海wo，仲有好多學生係著住校服咁入場玩。
Task 1: The Amazing Adventures of Spider-Man – The Ride
只需等候15分鐘，已經可以玩到個個讚，十粒星推介嘅Spider-Man Ride。坐住車卡係室內路軌行駛，配合3D立體電影，由蜘蛛俠拉住架車周圍飛黎飛去打怪獸，不時有煙霧、爆炸、噴水場面。行車時碰碰撞撞，唔算好驚，但非常刺激，驚喜度爆燈。
Task 2: Back to The Future – The Ride
人開始漸多，等左約20分鐘。坐住電影內嘅超時空車，飛越過去未來嘅超動感影院。架車係原地升降嘅，所以驚極有限，而影片冇Spider-Man咁高清，先入為主，呢個只有8粒星推介。
Task 3: Backdraft
11:15 已經完成2個項目，走去Backdraft睇下表演。場內分三個場館，全日語對白，好彩略懂日語，都叫做聽得明。先講述Backdraft套戲嘅由來，現場拍攝特輯，演員訪問等，唔識日文真係會訓著呀。之後入到一個模擬拍攝場境，用光、聲效營造火警現場。最後，睇住一個倉庫起火，油罐爆炸、噴火，燒毀鐵柱，親身感受火光熊熊，熱辣辣，爆炸嘅震撼。
Task 4: Jaws
呢個算係排得最耐嘅遊戲，需時約三十分鐘。一船人出海遊覽，竟然不知不覺間進入鯊魚嘅巢穴，被鯊魚襲擊。逃亡時，遇上爆破，穿越一片火海。一個幾刺激、驚險嘅佈局，配合船長小姐嘅精湛演繹，好值得一去。但都係全日語對話嘅問題，唔明白嘅朋友，要俾多啲想像力。
Task 5: Animation Celebration
12:25，未夠鐘睇水上匯演，正諗住如何hea時間之際，服務員小姐好熱烈宣傳12:30有戲開場。一入去，以為係小朋友專屬卡通片劇場，有啲俾騙嘅感覺。一開場，有例牌的全日語真人對話加電視presentation。入到場內先知道，原來係真人配3D動畫嘅互動表演。漫畫家設計卡通中途，唔小心俾隻卡通人物啄木鳥飛左出現實世界搞搞震，人同卡通你追我逐，男主角仲俾啄木鳥吸左入卡通世界內。開心! 驚喜! 無論人定係卡通喺時間、位置上都配合得天衣無縫，無需戴3D眼鏡，已經做到立體嘅效果，真係好佩服影城喺動畫科技有咁嘅功力。
Task 6: Water World
準時13:30開場，水世界係一個充滿水花、爆破嘅海戰劇場。美女被捉，英雄打壞人嘅劇情，詳見1995年嘅電影未來手世界。神奇就神奇在，冇啦啦，突然間飛出一架飛機。從可來呀究竟?!最喜歡主持人將場內氣氛推到高點，會善用開場前時間同觀眾玩樂，小心唔跟住做就會俾人淋水。
Task 7: Terminator 2:3-D
一入場有紅衣小姐怒講十分鐘，估計係想帶觀眾入戲，以觀眾為對象，宣傳Cyber System嘅高科技，點知機械人反擊，真人演出配合3D電影，講述阿諾成功打敗機械人。
Task 8: Space Fantasy – The Ride
等左差不多三十分鐘，亦都非常之咁隆重其事，要將所以手提行李寄存入locker。Space Fantasy係室內過山車，四個人一架車，四周圍黑媽媽，只有少少閃星星。過山車速度都幾快，又有非常強勁嘅急速轉彎上落，離心力超強，好刺激。
時間已經係3:30pm，可以話想玩嘅遊戲都玩晒，有部份遊戲興趣不大，所以選擇skip。例如侏羅紀公園有強勁濕身，室外過山車嚴重唔敢玩等。行完Hello Kitty Store，見仲有時間，係時候精選第二round，再行番所有禮品店。
Task 9: The Amazing Adventures of Spider-Man – The Ride 第二次
Task 10: Universal Studios Cinema 4-D (Sesame Street 4-D Movie Magic)
超級咁厲害地，3D電影畫面做得好靚，配合香氣、噴水、吹泡泡，好好睇嘅一套電影。
Task 11: Back to The Future – The Ride 第二次
臨佢關門前最後衝入去玩多一次。
其他得意奇境﹕ Hello Kitty & Dear Daniel被蒸煮中
18:00 正式關門，離開環球影城，去對面嘅City Walk食飯。
去左ポームの樹食蛋包飯，今餐自費。完成一日狂奔，食飯一定要食好啲。
蟹肉薯飯餅配蛋包牛油飯﹕ 薯餅炸得香脆，蛋滑溜溜，蛋味勁香。
漢堡扒配蛋包茄汁飯﹕ 漢堡鬆軟多汁，茄汁炒飯好香，牛肉汁亦非常濃味，配蛋一流。
商場內有個章魚小丸子食廊，包括幾間大阪出名嘅章魚燒名店，仲有精品專買店。
離開嘅時候開始日落了。
夜晚就去左神戶嘅碼頭，睇神戶夜景同神戶塔。
by admin | 6 月 7, 2011 | 2011大阪、神戶、和歌山五日遊, 旅遊, 日本, 關西
7/6/2011 (星期二)
第三日with「I’m Happy! Hello Kitty」
浸完溫泉訓得特別舒服，今早可以八點先食早餐。
繼續去酒店地下宴會廳食自助早餐，款式同昨日一樣。好明顯無左一半人流，相信係參加日本本地旅行團啲歐巴桑同歐吉桑已經一早走晒了。
趁未出發，喺酒店周圍行，影一影出面嘅海景小教堂。
今晚將會出神戶市區，要同呢間溫泉酒店道別。
可惜今日落住微雨，要拿拿聲走人。開車時，酒店派左三位職員施展米奇手喪bye追車送別。
第一站紀州備長炭發見館。近來先知道炭除左用黎燒之外，仲有咁多功能。一間蚊型博物館唔洗半粒鐘行晒，叫做見識下紀州最出名嘅黑炭頭。
第二站黑潮市場，係一個專賣新鮮海產嘅魚市場，仲有少許食店，都有唔少人幫襯。
但可能因為早前嘅核事故，市場內明顯係冇乜人行，只有2個旅行團同少量本地人。
萬眾期待嘅黑潮市場午餐喺二樓嘅餐廳解決。有沙律、壽司、炸雞、煮牛肉、仲有啫喱做甜品，團體餐黎講，已經好滿足。壽司新鮮不在話下，連煮牛肉都做得出色，非常軟腍入味，好比牛肉飯專門店吉野家。
知道12:30有場吞拿魚解體，食飽後落番海鮮賣場等睇戲。喺日本祭典音樂之下，睇住有型嘅師傅將一條大大嘅吞拿魚解體。完騷後，仲有得試食肥美新鱗嘅吞拿魚，相信係魚骨之間刮出黎嘅肉。
黑潮市場外仲個一個歐陸色彩嘅遊樂場物體，但好似日久失修，不去也罷。
大約一個多鐘車程就去到有馬。先去有馬玩具博物館，6層高嘅小小博物館，睇到唔同時代嘅玩具。
有馬溫泉係日本三大名泉之一。有馬古典溫泉街，窄窄嘅街道，充滿日本風情。全街有好多大大小小嘅溫泉旅館，仲有免費嘅足湯。
離開有馬，向神戶市區進發。到達神戶嘅shopping旺區，三宮。不需要導遊嘅指示，以我們強勁嘅腳骨力，相信比團友發掘多十倍景點。三宮中心街、地下街、神戶國際會館、神戶Sogo、南京街。
行行下見肚餓，喺Sogo地下超市見到好多人排隊。跟風買左個神戶薯餅。的確軟綿綿，好香、好脆、好好味。
夜晚去到一間比較清靜嘅日式燒烤餐廳食飯，自助任燒，爽呀。
黎到神戶，點可以唔試下神戶牛呀。加料6900yen一客A4級神戶牛柳，有兩大塊。燒到七成熟，好鬆軟，有牛味，亦好肥美。但可能我一向都唔好牛，覺得驚喜度不足，但試下無妨。
是晚下榻神戶博酒店。
by admin | 6 月 6, 2011 | 2011大阪、神戶、和歌山五日遊, 旅遊, 日本, 關西
6/6/2011 (星期一)
今朝要晨咁早起，0800要開車出發。with「Thank You! Hello Kitty」
哇，一起身，拉開窗簾原來係咁既景色，Sea View+小教堂景。
昨晚黑媽媽乜都睇唔到，原來陽光下風景係咁靚。今早趕住去玩，未有時間影清楚。
落樓下食個早餐先。一個大宴會廳，又係壯觀! 自助型式任夾，有日式、洋式、日式。未有心機學習日本人食飯做早餐咁正宗，但幾鍾意食酒店嘅日式小食，好似厚燒玉子、日式炒麵都唔錯。難得日本酒店做西式早餐都算幾好，香腸真係好好味， 但pancake就麻麻了。
挑戰地獄小食﹕ 納豆。貪得意拎左一細盒黎食。噢，食一粒已經頂唔順。對唔住，我唔識欣賞呢pat黏液。
食完早餐，08:00開車，今日第一程車將由酒店去到整個行程嘅最南部，車程要三個多小時。個半鐘一個中途站落車鬆鬆，放下水，買下嘢飲。
再多一個鐘多啲 (時間已經係11:00啦) 就正式到達今日第一個check point﹕ 那智瀑布。世界遺產來呵~
影到好似模型公園咁….但….這是實境拍攝來的! 想再睇清楚個瀑布，可以一人付出300日元，上去神社旁嘅小山路。
經過那智瀑布延命長壽水
到達瀑布前嘅一個觀景平台，近距離睇瀑布，感受瀑布嘅水花。那智瀑布，係日本三大瀑布之一，係一條又高又窄，高度落差最大嘅瀑布。同一般超闊、浩瀚宏偉嘅瀑布，例如台灣十分瀑布唔同。少一份磅礡嘅氣勢，多一種優雅秀麗。勿論佢幾有名，呢度真係好舒服，空氣好，深入大自然嘅感覺。
山上仲有小神社，可以祈福參拜。
回程小小祈福紀念品。入口旁邊仲有幾間店舖，專賣小食手信。歐巴桑們好落力請人試食，最後食左黑糖味雪糕，買左黑糖糯米糍，支持下日本經濟!
再多大半個鐘車，就到左串本嘅橋杭岩。幾十塊岩石好似跨海大橋嘅橋墩，天然奇景。有趣嘅日本民間傳說，詳見維基百科。
進入第三個check point﹕串本海中公園
入館玩之前先食午餐，串本海中公園嘅餐廳。有炸雞沙律、前菜小食、一個味噌湯火鍋(海鮮、魚肉丸、豚肉、拉麵等)，仲有碗珍珠米飯。真豐富，又拉麵，又白飯，點食得晒?! 其他野麻麻地，無乜特別。火鍋味道係ok的，材料幾新鮮，但湯越煲越咸，快啲食飽去玩好過。
海中公園，顧名思義係海中嘅公園，離不開睇下水族生物，睇下海景。有水族館、海中展望塔、海中観光船。
精選館內幾隻騎呢怪﹕
一張被跌左落水
水中菊花園，拜山咩?!
識擺舖士嘅海星星
海龜館，一個大水池養左20幾隻大大海龜。場內仲有BB龜池，好可愛呢~
離開海龜館，室外地方有個海中展望塔，係可以行樓梯落水深6.3米嘅海底睇魚。
魚就冇乜野好睇，但個海岸就一流。
繼續坐車去到南紀白濱嘅三段壁。
36米嘅地底有個洞窟，可以落去參觀，近距離睇到巨浪拍岸，非常震撼。
仲有長期經海浪沖洗，產生唔同形狀，唔同顏色嘅岩石。
喺三段壁展望平台…除左「一望無際」之外，無其他更貼切嘅形容詞。
終於俾我地預上日本最最最傳統嘅刨冰。100日元一大杯，但真實同樣本似乎好有出入。算吧，總算過下癮。
千疊敷﹕參觀一千張榻榻米大嘅岩石，如果係日落時間的話就一流。
完成晒今日五大個check points，坐足一日車。返酒店小休，期待今晚嘅懷石料理。食懷石料理，梗係要着番浴衣啦。
酒店三樓充滿和式設計
懷石料理
每一碟都好精緻，一餐非常可觀、非常享受嘅晚餐。左上起﹕海鮮湯鍋配烏冬、味噌雜菜雞肉鍋、梅子、煎魚、醬燒豚骨、雜錦天婦羅、白汁焗豆腐扒、鮮橙、茶碗蒸蛋、刺身、前菜三小碟、白飯
刺身好鮮甜
超香濃白汁焗豆腐扒
絕不油膩天婦羅，如果更脆就好了
得意三小味，有粒梅、一件魚、一舊肉
自費600yen 一杯，超冰凍、一飲會上癮嘅梅酒! very goood!!!
露天温泉岩風呂「紀州みなべ千里浜温泉」
紀州南部備長炭 黒湯
臨訓前走去浸浸溫泉。借post網上圖。呢度除左有大浴場外，仲有岩泉、備長炭黑湯，女士場仲有軟水浴。溫度適中，露天浸溫泉，仲有少許清涼晚風，簡直唔捨得走。
沖完涼走左去溫泉浴場隔離嘅喫茶店食大阪最出名嘅和歌山拉麵。690yen。浸完溫泉全身溫意，飲番杯冰水，食番個拉麵，日本人嘅夜生活，我感受到了。日本拉麵比香港食嘅煙韌、實在。薄薄幾片叉燒冇需太花巧已經存在感十足。味噌湯濃而不膩，不客氣完食，一滴不留。正宗日本拉麵初體驗，完美!
完成一整日沿海參觀，食盡日式風情晚餐，滿足咁返房訓。
by admin | 6 月 5, 2011 | 2011大阪、神戶、和歌山五日遊, 旅遊, 日本, 關西
5/6/2011 (星期日)
陽光普照嘅一日，兩口子出發了。with 「Let’s Celebrate! Hello Kitty」
香港國際機場，相信日日都係咁多人。
喺機場禁區太刻薄先食過醒神早餐。快餐店唔會好食得去邊，志在趁未上得機，填飽個肚。機場大家樂早餐，抵食。
真好彩! 派到二人窗口位。三個幾鐘飛機，見盡不少棉花糖。
幾鍾意坐國泰，鍾意佢嘅飛機餐。是日空中午餐主菜﹕照燒雞扒飯、咖哩海鮮飯。照燒汁同咖哩都係甜甜嘅日式風味，配飯一流。配餐飲、餐包、櫻花冷麵、雞蛋布丁。加埋最鍾意的蘋果汁。
櫻花冷麵非常清涼，冷麵醬汁好鮮味，自加紫菜碎同wasabi，搞一搞變成另一種風味。雞蛋布丁蛋味十足，彈度十足，但稍為結實左小小。空中午餐來說，已經十分之好。好鍾意個碗仔!!好靚呵~
14:00 大阪關西國際空港到着，坐無人駕駛列車去出境大堂，車程3分鐘咋!
YEAH! Kansai!! 日本嘅空氣! 好和風嘅宣傳板!
等齊團友途中，影番張靚相先!
大阪之旅第一站﹕ りんくうタウンRinku Town
就喺機場附近，一個area有幾座唔同主題嘅商場。
Rinku Premium Outlets名牌專門店Outlet
略為行左一陣就走左，始終不好名牌，而且價錢唔算平。
Rinku Pleasure Town 悠閒樂園
有兒童遊樂場、生活雜貨、服裝、精品小店、餐廳等，比較適合我地兩個大細路。
仲見到有哥哥仔街頭賣藝添。行完Rinku Town 即刻坐車向和歌山縣進發。
19:00 向酒店方向嘅中途站，喺一間唔知叫乜名，似乎係間民宿嘅鄉郊餐廳食晚飯，餐廳外仲有一間小舖頭賣水果、小食同精品。
是日晚餐包括﹕ 味噌豚肉鍋、雜錦天婦羅、刺身、壽司、櫻花冷豆腐、梅子及備長炭烏冬、西瓜。搭飛機搭到呆晒，第一個晚餐無乜味覺。唔算好好，但叫做幾好。印象中，梅子烏冬味道幾香幾特別，原來和歌山縣最盛產梅子。烏冬小小酸酸甜甜，難得非常彈牙。豚肉鍋熱辣辣，配味噌非常香濃。
再坐多約一個鐘車，就到達我們今晚同明晚嘅酒店，紀州南部ロイヤルホテル (紀州南部皇都溫泉酒店)。
由於是晚太累，無影相就速速返房。一入房，驚嘆，房間竟然係咁大間!!!!!
借post酒店官網房間介紹圖，exactly就係呢款房間。之前經常聽人講，日本嘅酒店好細間架，開左個喼就無路行。但呢一間房令我驚嘆x10000000! 仲大間過上次去台灣自遊行住果間!!!
貪得意換左日式浴衣落酒店大堂上網。是晚未敢浸溫泉，早抖一日。
by admin | 6 月 4, 2011 | 2011大阪、神戶、和歌山五日遊, 旅遊, 日本, 關西
竟然………
無懼幅射，勇闖日本!
本來想五月去東京自遊行，一個大地震加核電廠爆炸，令人怕怕，打退堂鼓。
辛苦計劃左九成既行程變做廢紙，睇黎我同日本無緣無份，灰晒。
多得傳媒嘅威力，一個個睇到人眼金金嘅特級優惠旅行團廣告，一篇篇不怕死繼續遊日本嘅勇士評論，蒙蔽晒所有日本嘅負面新聞。
最後，我俾錢了。
日本，我來啦!
