元気寿司@尖沙咀
26/2/2012 18:15

香港人鍾意排隊，亦鍾意等位，喺元気門口就可以見證到。唔知點解任何時候都可以堆滿人朝，改名做人気寿司都不為過。

燒三文魚 ($16)
三文魚一塊薄片，差唔多覆蓋晒成舊飯面，賣相討好。燒三文魚原來係連皮三文魚，魚皮部份輕輕燒過，魚肉仍然保持原汁原味，造成半生熟效果。三文魚非常新鮮肥美，連皮食口感較一般煙韌，經過火炙後，仲帶點炭燒風味。而壽司飯都捏得唔錯，帶輕微甜醋味，造型平平整整，夠結實，起碼沾醬油嘅時候，唔會散晒，跌晒落水。

炙燒黑椒三文魚 ($13)
仲以為三文魚燒到焦焦黑黑，原來係蛋黃醬灑上黑椒粒，再經過炙燒，就係招牌菜三文魚三味嘅其中一味。三文魚經過火炙後，部份油脂溶化，相對油膩感較少，七成熟嘅三文魚更加腍滑，仲暖暖地，比凍食刺身壽司有另類感覺。配合埋微酸嘅蛋黃醬，味道更加豐富，炙燒嘅焦香味濃郁，可惜黑椒味道唔明顯。十三蚊兩件，抵到震。

煙三文魚 ($16)
三文魚三味嘅另一款，魚身一樣肥美，白橙相間，上面加左少許蛋黃醬同生洋蔥，睇落同一般三文魚壽司分別唔大。但一入口，就食到一陣濃烈嘅煙熏味，原來煙三文魚做成壽司，味道都唔錯。

三文魚皮手卷 ($13)
人人都話元気嘅手卷最抵食，大大件夠飽肚，就試一個三文魚皮手卷。手卷最緊要嘅紫菜認真唔錯，起碼夠新鮮，夠乾身。兩塊三文魚皮炸得乾身，但食落無乜味，只知道自己食緊炸物，脆脆地咁啦。聽講最好食嘅手卷係軟殼蟹手卷，可惜對蟹真係興趣不大。

花の戀 ($22×2)
睇見隔離枱件花之戀幾大件、幾靚，又跟風叫兩件黎試下。廿二蚊一件原來都唔少野，有三大塊新鮮肥美嘅三文魚，中間壽司飯面仲有黃蛋醬，而蟹子都落得相當重手。大大件，要分幾啖先食得晒。

辣味三文魚軍艦 ($13)
除左一般壽司之外，亦有唔少軍艦選擇。三文魚份量唔少，切成小粒舖滿整個飯面。辣味係加左辣椒，輕微嘅麻辣，非常惹味刺激。

芥辣八爪魚軍艦 ($13)
煙韌嘅八爪魚粒撈埋Washabi ，勁入味勁攻鼻，愛食芥辣的話，一定好鍾意。

蒲燒鰻魚 ($20)
饅魚長長一片，饅魚肉雪白，邊位微焦，掃上濃甜蒲燒汁，就係我的最愛。饅魚好腍身肥美，魚香味濃，好滿足。

炸蝦卷 ($18)

炸蝦卷亦係元気另一名物，一定係新鮮即製。炸蝦仲係熱嘅，軟腍嘅飯，包住脆卜卜嘅炸蝦，口感非常豐富，而蝦肉仍然保持爽口鮮甜，不錯吃。

日式炸芝士年糕 ($22)

餐牌相片影到圓轆轆，咁可愛嘅樣子，都想叫一客試下。實物同相片差唔幾，好滿意。年糕新鮮炸起熱辣辣，外皮金黃色非常討好。咬開皮脆，中間煙韌嘅年糕，芝士就從缺口湧出，澎湃之極。清甜嘅年糕，配上濃郁嘅芝士，絕對係驚喜之作。

有人鄉下仔出城，懷住緊張又興奮嘅心情，坐左喺迴轉枱座位，體驗佢嘅第一次幫襯。茶，係自斟的，請先打開盒綠茶粉，按照指示加入一、兩匙茶粉，將茶杯按住靠牆嘅熱水器按鈕，熱水自動流出，加水到八成滿就夠。注意﹕請小心熱水，真的很熱的呵。

食壽司前，請先欣賞下杯茶。據講茶粉係日本靜岡縣研磨嘅綠茶，所以帶有淡淡嘅海苔香，比一般茶包更加濃郁好味。

正場時間，可以選擇迴轉帶上嘅壽司，睇住唔同顏色，大大少少嘅壽司轉來轉去，觀感一流。可惜款式唔夠多，而且部份壽司似乎放得太耐，無黎生氣，所以柯打入單會係一個更好嘅方法。幾欣賞呢度出單清楚仔細，埋單時check清楚先去俾錢，絕對無漏單。

今次元気初體驗只需要$140，因為可以使用恆生信用卡嘅Cash Dollar，原本二百多蚊嘅價錢，都唔算貴，而家仲扣左Cash Dollar，$140兩個人，抵! Cash Dollar真係邪惡。

一半一半甜品屋@大角咀
6/6/2012 18:00

難得星期三放假，睇完戲食埋個午餐之後，點都要嘆個甜品hea下時間。之前喺筍網買左兩張一半一半甜品屋現金券，$15當$32使，幾都抵。而早前亦都聽過呢間一半一半嘅大名，不妨一試。

Oreo朱古力層層杯 ($35，團購價$18)
朱古力杯係預先整好，以闊口膠杯盛載，最頂有唧成玫瑰型嘅鮮忌廉，輕輕灑上朱古力粉。忌廉相當厚身，好幼滑，味道濃郁，好重奶香味。味道係唔錯，但都唔洗起勢唧咁多，因為食落相當甜膩。鮮忌廉下面係慕思，似乎係咖啡加朱古力嘅混合味道，咖啡味夠濃，質地都好幼滑。主角Oreo出現喺第三層，只係加上薄薄一層Oreo碎，味道唔明顯，主角淪為茄呢啡。Oreo之下，係類似木糠布甸走木糠嘅慕思，又係鮮奶油嘅奶香味，甜到不得了。呢層軟慕思之下，係被咖啡、酒浸到腍晒，吸收晒日月精華嘅清蛋糕或疑似手指餅。酒香的確唔錯，濕潤香醇，但又係勁甜。呢杯嘅終點係一層一喱米高，經過雪藏，變得不再流質嘅純朱古力醬。呢隻朱古力醬並唔係特濃朱古力醬，而係普通不過，用黎塗吐司，齋甜無朱古力味嘅醬，味道一般。

呢個層層杯，超級厲害。食到第三層時，其實已經有些少頂唔順，頭三層嘅甜加膩，實在唔係一般甜魔可以抵受到。每層嘅味道都相當突出兼濃郁，混合一齊食真係有啲難度，互相搶味，搶到唔清唔楚。

魔鬼再現 ($38，團購價$21)
叫得做魔鬼，應該係甜魔又愛又恨嘅朱古力甜品。呢個甜品份量大得驚人，先黎四大個朱古力雪糕球。相信係普通牌子雪糕，味道一般，多甜少朱古力。雪糕配上朱古力脆米、朱古力波、朱古力捧，旁邊仲有五、六舊朱古力布朗尼，蛋糕脆脆地，麵粉味幾重，中間仲有朱古力粒，味道更甜。最後淋上朱古力醬，撈埋一齊實在甜得過份。更重點係，喺個咁甜嘅甜品上，仲要灑上糖粉，簡直係將甜度進一步提升。呢個甜品可以話集甜、膩、朱於一身嘅終極呈現。

呢間甜品屋裝修非常可愛，色彩繽紛鮮艷，十足身處幼稚園。喺幼稚園食嘅甜品，絕對係小朋友最愛嘅甜到漏。但甜品賣相可愛，其實內裡非常可怕。先黎一個六級層層杯，一層一層挑戰你對濃烈、甜膩嘅極限。再黎一個魔鬼再現，測試朱古力魔嘅嚐甜級數。呢兩個甜品實在係挑戰甜魔嘅極限，連平時無甜不歡嘅我倆，都要舉手投降，講聲怕怕。
自問嗜甜嘅甜魔不妨挑戰下，分享心得，順面整個攻略。

 

超級杯裝連兩款配料 ($33，優惠價$13)
Crumbs特色係一杯乳酪分為三層，底層乳酪、中間加左配料、頂層再一層乳酪。超級杯比想像中大杯，有驚喜，足夠兩個人食。$33一杯好合理，而家只需$13，實在無話可說。

乳酪非常厚身，好有忌廉感，就好似比較實淨嘅軟雪糕，而且密度高所以溶化速度較慢。一眼睇到乳酪係完全零氣孔，所以幼滑度一流。算得上係咁多次乳酪體驗中，質感最好嘅一間。味道方面，佢較一般乳酪甜，酸度比較少，似係純正鮮乳酪嘅味道。乳酪唔酸，相對唔算清涼解渴，但溫度搭救，超級夠凍，所以入口一樣舒服。

配料選擇左自家焗製嘅肉桂曲奇味House Crumb，呢款配料可算係人氣必點名物。的確，唔錯。House Crumb就好似細細粒嘅曲奇餅碎，非常香脆乾身，亦有好香嘅玉桂味，係一款創新嘅味道，配乳酪都好合拍。放喺乳酪中層嘅係，另一款配料朱古力布朗尼，有足足五塊仔。Brownies一向比正常蛋糕甜，但佢嘅甜度，好令人接受。餅仔外皮超脆，中間濕潤，整塊嘅朱古力味都好豐富，比得上甜品餅舖嘅製作。

第一次試Crumbs，感覺非常良好。乳酪係好嘅，配料亦係好嘅。今次體驗亦都明白到，佢可以短時間內爆分店、永遠店前都堆滿人潮、開飯網一間分店可以有二百幾個好評嘅理由。

好佩服佢可以做得專、做得串。由頭到尾，只得一款原味乳酪，唔洗期望下星期有新嘅水果味，或者有日俾你見到有朱古力味。配料無想像中咁多選擇，亦只會提供指定大細杯裝乳酪，加一至兩款配料嘅組合。為左慳住荷包，每次頂多只捨得加多一至兩款配料，無辦法滿足各位想食水果併盆嘅欲望。店方採用落單即叫即整，唔好妄想佢會俾機會你自助式唧下部乳酪機，過下手癮。無須太多花巧，佢就係串得起。

@尖沙咀
15/4/2012 16:00

超級杯裝連四款配料 ($35，優惠價$15)
呢間分店，超級大杯裝加四款配料，只需要$35，俾多兩蚊雞，食多兩款配料，感覺上抵過銅鑼灣分店。最愛呢度嘅乳酪厚身得黎，又幼滑，酸酸甜甜得黎，奶味香亦十足。今次亦配上人氣王House Crumb、香濃嘅朱古力布朗尼、軟糯嘅麻糬，仲有朱古力粒粒。基本上跟足上次嘅美味配搭，絕無甩拖。味道一如以往的好，超滿足的說。

@旺角
3/6/2012 20:30

超級杯裝連四款配料 ($35，優惠價$15)
今次係第三次試Crumbs，黎到旺角店叫番個超級杯。揀左糖不甩碎、朱古力布朗尼、麻糬同蜜桃。一如以往，底層送多一堆糖不甩碎墊底，上面再一層一層加上乳酪同其他配料，份量十足。乳酪仍然非常厚身實淨，超級滑溜。味道一流，微酸帶奶香。糖不甩碎即係放喺糖不甩上面嘅碎碎，有芝麻、花生碎同砂糖，加入乳酪離奇地夾，只不過無House Crumbs咁入口即溶，多幾分咬口。朱古力布朗尼有三大粒，朱古力特濃係OK的，但好似比較乾身實淨，唔夠鬆化。麻糬一樣軟腍煙韌，係試過咁多間乳酪店最高嘅質素，絕無投訴。最後加左一款蜜桃，好明顯係罐頭貨色，味道一般。總括黎講，呢杯乳酪都相當豐富，不過配料上似乎比銅鑼灣差啲啲。算啦，十五蚊一杯，已經好滿足。

紅蔥頭@旺角
3/6/2012 19:00

記得早前試過紅蔥頭一次，印象OK，特別對果隻紅蔥頭公仔印象深刻，總覺得佢似火雲邪神多啲。喺筍仔網用$40買到$80現金券，雖然套餐又唔得，又要加一，其實唔係十分之太抵，不過家陣啲團購可以話吸引力近乎零，所以少少優惠都好過無。買左兩張團購券，夾埋有$160購買力，散叫餐牌上各式單品，最後叫左兩個主菜加一個小食。

蕃茄醬雞胸肉墨汁意粉 ($52)
姚生是日扭計，堅持「我要食墨魚麵!」，只好屈就等佢自己食一份。一送上黎，賣相已經唔多掂，連未食過墨魚汁意粉嘅姚生，都覺得顏色唔對版。據了解，墨汁意粉有兩種做法，一種係直接將墨魚汁加埋落麵粉裡面，變成一條條黑色嘅意粉。另一種做法係將墨汁煮成意粉醬，拌入意粉再煮，所以食完之後，牙齒立即變黑，得左。一般嘅墨魚汁意粉應該係黑過墨汁、黑過墨豆、黑到反晒光嘅顏色。但呢碟墨汁意粉只係水泥灰色，真係唔多開胃。而且意粉質地極度有問題，唔煙韌都算，而且係極度脆弱，好容易斷開一節節散晒，味道亦只係普通不過。呢個墨汁意粉拌上蕃茄醬，蕃茄醬只係齋甜，有少許洋蔥粒，似係罐頭蕃茄醬開水煮成，味道麻麻，淡淡地。主角雞胸肉反而OK，唔算嚡口。不過呢碟野完全唔熱，感覺不良。

法式保雲蘇羊扒配薯蓉 ($82)
保雲蘇羊扒係網友推介嘅一味，總算無叫錯。八十二蚊一份，份量都幾多，有三大件連骨羊架加一件肉。羊扒之下係一個高高嘅薯蓉塔，薯蓉有少許火灸燒焦嘅痕跡，但係都係唔熱嘅，不過味道適中，都OK幼滑。羊扒用香草、黑椒醃過，上面塗左芥末醬，再舖上麵包糠烤焗，所以有粉粉粒粒嘅口感。羊扒肥瘦適中，燒得剛好七成熟，中間呈現粉紅色，肉汁豐富，再配上蒜蓉汁，味道都唔錯。

蜜味BBQ燒豬仔骨 ($42)
燒豬仔骨都係熱點菜式，我地叫左價值四十二蚊嘅小食份量。眼睇豬仔骨就燒得唔錯，上面仲塗左薄薄嘅燒汁。豬仔骨有五、六條骨，入口略為乾身硬實，無乜肉汁，唔太入味，無預期中咁好。反而Cheese Pizza果排豬仔骨仲好過佢十倍。

都唔知話呢間紅蔥頭係西餐廳定茶餐廳好。事關佢裝修的確幾西式，有啲格調，亦提供西式菜式，可惜質素連茶餐廳都不如。埋單總數一百九十幾，團購價大約百一蚊，但食物真係麻麻地，正價仲係偏貴。無可否認個羊扒係唔錯嘅，但連西餐最基本嘅意粉都搞唔掂，先黎一款水泥色意粉，再黎一個乾柴豬仔骨真係唔多掂當。衰啲講句，連最基本動作，食物要新鮮熱辣，呢個原則都做唔到，實在好有問題。一入到呢間紅蔥頭，個經理表現出唔多like嘅表情，仲三番四次問我地有冇訂位，似乎唔多歡喜團購客。咁唔鍾意做團購，咁不如唔好做啦。不過就算再有團購，相信我都唔會再黎，後會無期。