不好食的FB

by | 10 月 23, 2012 | 快餐, 旺角, 西餐, 麵包

Freshness Burger＠旺角
23/10/2012 19:00

Groupon$55 二人漢堡餐

牛肉芝士鮮堡、脆魚鮮堡、和風薯格、和風薯角
新鮮的確新鮮，熱辣的確熱辣，但點解難食左咁多，完全無左當年嘅驚喜？
食老麥算數吧啦！

Mi最愛的叉蛋麵

by | 10 月 21, 2012 | 拉麵, 日式料理, 沙田

Misocool@沙田
21/10/2012 20:30

Misocool，配型格裝修，有別於一般傳統拉麵店。菜單更多元化，由拉麵、便當，到Fusion菜式，以及乳酪甜品都有。 團購$69一個日式套餐，包括叉燒拉麵或日式咖喱吉列豬扒飯，多一客餃子同特飲，似乎相當吸引，值得一試。

秘製日式咖喱吉列豬扒飯

賣相確實討好，連白飯都裝得靚靚。主角吉列豬扒炸得熱辣辣、金黃酥脆。薄薄嘅炸粉香脆唔油膩，中間嘅肉肥瘦適中，仍然保存到少量肉汁，尚未至於乾柴，只可惜肉味欠奉。至於咖哩係典型水果感超重嘅日式咖喱，甜味之後，到達喉嚨丁先滲出一點辣。咖喱味相當濃厚，連伴菜嘅紅蘿蔔都腍到爛，相信用上唔少蔬菜水果熬製，並非開粉貨色。配上豬扒、煙韌度十足嘅日本米飯一齊食，反而咖哩味更為突出。
招牌叉燒拉麵
另一款叉燒拉麵更為討好。有三大塊叉燒，配上半隻溏心蛋，仲有唔少粟米粒、芽菜、筍等，非常豐富。奶白色嘅湯底係九州豬骨湯，比特濃豬骨湯輕身。豬骨味之外，再加上奶香味，口感更為幼滑，忌廉咪。比一般的更為香甜，而且唔油膩，個人更加喜愛，最後全碗飲清光。至於拉麵係粗身麵，彈牙的確彈牙，但咬落就變得粉粉粒粒，煙韌度大減。而且浸耐左變得腍身黏口，確實失望。不過主角叉燒真係好味到無得頂。三大片叉燒相當厚身，達四肥六瘦嘅黃金比例，口感超級爽口，肉味頂級香甜。叉燒本身除左甜味之外，亦有香甜嘅日本醬油味，以少許咸味帶出肉嘅鮮甜。將叉燒沈浸喺豬骨湯之中，肉嘅甜味更加提升，值得一讚。至於溏心蛋亦相當出色，熟成度可算係完美，蛋白仍然軟腍，蛋黃呈半熟嘅啫喱狀，黏口非常，蛋香亦充足。可算係個人好喜歡嘅一碗拉麵，叉蛋麵正是本人最愛嘅配搭。
嫲嫲餃子
一碟有六隻餃子，團購餐絕無偷工減料。餃子皮非常薄，底層煎得焦香脆口，餡料係豬肉、菜等，味道正常，唔算突出。
鮮雜果香橙賓治
以香橙、菠蘿同檸檬等調成嘅雜果賓治，味道幾清新，酸甜開胃，解渴一流。

值得一試。

牛角堡配Kawaii Menu

by | 10 月 7, 2012 | 九龍灣, 小食, 快餐, 日式料理, 麵包

Sora ti.te.mo Cafe@九龍灣
7/10/2012 15:00
是日行下Mega Box，見到呢間餐廳仔嘅Menu非常吸引。聽聞佢嘅牛角酥非常唔錯，見下午茶平平地，一於試下。
芝士蛋沙律牛角堡+香辣焗薯角 ($29)
雖然賣相同宣傳相片實在無得比，不過牛角包比想像中好味。熱辣辣嘅包包牛油味夠香，而且非常鬆化，一層一層的，加上芝士、蛋沙律，真係唔錯，不過餡料比較少。至於薯角都係熱辣辣，仲啖啖肉，輕微辣味幾惹味。
雜菌濃湯烏冬 ($22)
烏冬就麻麻地，湯係忌廉濃湯，似係罐頭貨色，淡淡地，材料亦唔算多。
下午茶跟埋飲品都係廿零三十蚊，真係抵食。下次要試試和風薄餅同燒飯丸先。值得一提，呢間小店嘅出品都係迷你版、細細件，岩晒女士們。而且Menu實在整得好靚，唔客氣拎走一份。