by admin | 1 月 20, 2013 | 尖沙咀, 拉麵, 日式料理
鳥華@尖沙咀
22/1/2013 19:00
雞白湯拉麵定食 ($94)
迷你免治雞粒飯，醬油味香甜，雞粒加蛋配搭唔錯。
湯頭果然雞味十足，湯頭算幾杰身，頗重骨膠原。味道香濃，似燉雞湯濃縮精華版， 鮮甜清潤，而且唔太油膩，亦唔口渴，整整一碗值得飲清光。, 麵條卷曲粗身狀，尚算彈牙，略嫌較為腍身，不過掛湯力不錯，啖啖雞味。雞肉叉燒反而無乜特別，基本上係燒雞肉切片，肉質都可以。配料有白蔥同唔知咩豆，略為少。
鳥華特製和風担担麵 ($73)
湯頭充滿海味，好似有蝦、魚嘅味道加少許辣味，算幾惹味。材籵有少量肉碎，半隻OK流心嘅蛋，麻麻地。
白雞湯的確非常OK，不過份量少，價錢略貴。
by admin | 1 月 13, 2013 | 拉麵, 日式料理, 銅鑼灣
博多一風堂@銅鑼灣
13/1/2013 18:00
在銅鑼灣希慎蘋果店訂情後，去一風堂作一個完美嘅句號。日本過江龍登陸香港，一夜成名，變成拉麵魔必須朝拜嘅人氣名店。
一風堂主餐牌提供五款湯底選擇，有普通版同特製版之分。價錢較貴嘅特製版配料更多，更豐富。
白丸元味特製版 ($88)
一風堂嘅原創拉麵，原味豬骨湯底。特製版有夠豪華，有兩塊日式叉燒、兩塊日式豬柳、木耳、芽菜、竹筍、紫菜、半隻半熟蛋。
湯底以豬頭骨、豬腿骨及豬手骨等熬超過十八小時以上煮成，白滑帶淺啡嘅色水實在討好。湯底非常忌廉咪，滑不溜口，膠質甚重。豬骨味道香醇濃厚，鮮甜無比，正是介紹所講嘅濃郁溫和。湯底調味適中，又唔會過份油膩，飲多多都唔怕，絕對係終極高水準之作，正是個人最期望嘅完美湯頭。
豬骨湯配上博多傳統風味嘅特幼麵條更係一絕。選擇硬麵，效果亦做到煙韌實在嘅質感，不過仍有再硬一點嘅空間。麵條非常幼滑，掛湯力一流，每啖拉麵都緊緊附上湯汁，滋味非常，可算係食過最好嘅麵條。
叉燒亦係高水準之作。特製版可以試到兩款唔同風味嘅叉燒，一款用豬肩肉做，另一種用豬腩肉做。豬肩肉叉燒係一般常見嘅款式，肉質腍滑，肉味香甜。另一個係類似五花腩嘅三層巴士叉燒，肥肉瘦肉相間，非常工整，肉質更加軟滑，幾乎入口即溶。不過個人略嫌腩肉太肥膩，普通版較為吸引。
半熟蛋嘅賣相亦係完美呈現，蛋白軟滑，蛋黃色澤橙黃，呈流心啫喱狀，黏口度十足，蛋味濃郁。不過呢隻蛋未經過汁煮處理，只用最原始味道出場。
味噌豬骨 特裝版($88)
另一款試下味噌湯底，係原味豬骨嘅基礎上加入味噌，味噌完全溶入濃郁嘅豬骨湯之中，湯底仍然保留豬骨嘅香味，滲透出味噌香甜濃郁嘅味道，更加惹味。不過湯面浮起粒粒脂肪精華，實在有點怕怕。麵條充分吸收味噌湯，味道更加香甜。叉燒似乎同白丸略為唔同，切法偏厚，不過一樣軟滑，吸收左味噌更為可口。
一風堂的確係拉麵界嘅王者，個人極為欣賞。
好多網友都會拎一風堂同豚王作比較。個人認為兩者嘅出品都係超水高準，不相伯仲。豚王嘅湯底係濃烈且豪邁，一風堂係香濃又溫和，可謂一剛一柔，兩者我都喜歡。
by admin | 1 月 6, 2013 | 土瓜灣, 麵食
譽麵坊土瓜灣
6/1/2013 15:00
的確好味。雖然炸粉略多，但沾上醬料味道超香，南乳味濃郁。果然係鎮店之寶。
by admin | 1 月 6, 2013 | 佐敦, 拉麵, 日式料理, 美食廣場
Ramen Champion@佐敦
6/1/2013 19:30
佐敦開左個拉麵主題嘅Food Court，實在太吸引。在場有六間日本拉麵過江龍，事前要先了解下每間拉麵店嘅特別同評語，以免到時出現選擇困難症。
無双﹕ 湯底清甜，湯頭也不算厚。拉麵粗身掛湯力強。叉燒厚切肉質鬆化柔軟，半熟蛋ok。
超男﹕ 豬骨湯香濃，配以大量蒜泥。特粗的麵條，配厚切日式叉燒，加勁量芽菜。
博多一幸舍﹕ 日本出名、2011年Ramen Champion冠軍。湯底膠質重，香濃不油。博多幼身白麵，叉燒薄切，份量較少。
東京忍者﹕ 白色湯頭，質感厚重而且油份頗重，豬骨味一般。叉燒肉味香濃但肥肉偏多。
常勝軒﹕ 沾麵始祖。
北海道毘沙門零﹕ 主打北海道味噌湯底。
做完資料搜集，最後選擇左「無双」同「超男」。入場時一人有一張智能卡，先去拉麵舖落單，再拎番個call機走，等食。
無双特製拉麵 ($88)
湯頭係雞骨加豚骨混合熬製嘅，所以較純豬骨湯清爽，較薄弱。不過豬骨味係有的，再多一點雞嘅鮮甜，可惜滿佈油脂粒，睇見怕怕。麵條略粗，煙韌度不算，掛湯力則一般。叉燒賣相不錯，不過略為乾身，入口的確有點鞋口，肉味偏淡，麻麻地。流心蛋賣相唔合格，好彩蛋白仍然柔軟，味道有的，但略咸，蛋黃過熟，個人唔鍾意。配料加上芽菜，再灑上黑椒，爽口清新，一般啦。
豬骨濃湯半熟蛋拉麵 ($98)
份量超多，男子漢之選。湯底較為清甜，豬骨味略嫌不足，自動加蒜，加點香辣就更好。麵條超粗，扁身偏硬，咬起來真係好累，而且飽濟。叉燒係厚切版，似港式叉燒，肉感十足。邊位燒過，帶點焦香。不過比較乾身，味道一般。半熟蛋外皮夠色水，可惜唔夠入味，溏心度正常。芽菜勁量，超級飽。
總括黎講，兩間店嘅質素一般。比起坊間嘅過江龍，水準確實有一段距離。以呢個價位黎講，真心覺得貴夾唔抵。如果有呢個筆直，我寧願食豚王。個人黎講，應該唔會encore。
by admin | 1 月 1, 2013 | 尖沙咀, 拉麵, 日式料理
萬豚屋
1/1/2013 12:30
二零一三年第一餐，當然要食好啲。選擇尖沙咀一間列入waiting list良久嘅萬豚屋。萬豚屋開業多年，好多人都唔介意排隊一試名物豚肉，連頭條搵食指南都有介紹，一直都好想試，今日終於的起心肝排隊。竟然一月一日嘅中午唔洗排隊，早起的鳥兒唔洗排隊。
石燒上級豚肉手打烏冬 (大骨濃湯) $62
用石鍋盛載熱辣辣，湯底仲翻滾著熱氣泡，睇見都興奮。豬骨湯底烏冬，加上四大塊厚切豚肉，仲有一隻蛋同菜苗。豬骨湯呈奶白色，味道略為清淡，但感覺到豬肉嘅鮮甜味，而且非常幼滑，膠質豐富，只係略嫌油份較多。烏冬白白滑滑，彈牙爽口，亦有好甜麵粉味，不錯。名物豚肉實在澎湃，四大塊肥瘦相間嘅五花腩盡現眼前，份量十足。肥肉入口腍滑軟嫩，唔洗多加咀嚼，簡直入口即溶。瘦肉爽口香甜，肉味濃郁。烏冬仲配上一隻生蛋，靠石鍋嘅熱力，生蛋已變成半熟蛋，程度剛好。配料仲有粟米同菜苗，正好解膩。
石燒上級豚肉手打烏冬 (咖哩湯) $62
咖哩湯底烏冬同原味版基本上一樣，只係唔知點解蛋變左半隻熟蛋。可惜湯底似係開粉款式，味道一般。都係食原味吧啦。
暖笠笠嘅石鍋烏冬，真係冬天良品。怪不得離席時人龍湧現。
