by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
煮干しらーめん玉五郎 阪急三番街店
其中一晚就係梅田嘅阪急三番街店食宵夜。裡面嘅拉麵小路有幾間好出名嘅拉麵店,今次嘅目標係以沾麵聞名嘅煮干しらーめん玉五郎。揀呢間純粹係Tabelog搜尋,評分唔低,各地區都有唔少分店,可算係人氣沾麵品牌。
![](https://3.bp.blogspot.com/-gSVKp38AKpU/U22S80X93dI/AAAAAAAAIds/pUU-sBNrd-Q/s1600/10325638_10152024738550636_3402599298199634854_n.jpg)
黎到嘅時間已經係九點鐘,呢個時份仍然要排隊,真係咁強? 先喺販賣機買票,因為太肚餓,所以叫左一個中(¥850)、一個大(¥900)嘅沾麵。最後發覺白痴左。
![](https://4.bp.blogspot.com/-fuQm3fW3-_0/U22TH7sw3_I/AAAAAAAAId8/8iuHT1nFVE4/s1600/10246765_10152024738410636_6597866760485741623_n.jpg)
入座後拉麵好快送上,一見到個份量,就嚇左一跳,眼見呢份咁多,以為係大盛,點知再黎多一份比大更大嘅,就知道出事,份量多到完全預計唔到,日本嘅沾麵真係俾得太過慷慨。另一個白痴嘅係,誤會左介紹圖片以為沾麵本身有叉燒同蛋,原來配料係要另點。好在入座後都可以即刻俾錢追加,¥300一份叉燒、¥100一隻蛋。或者直接柯打特製沾麵,有齊所有配料唔洗煩。
![](http://2.bp.blogspot.com/-uEpQmbmZpiQ/U22S81seofI/AAAAAAAAIdo/tibyTtC_58U/s320/10277166_10152024738835636_6922844725893145874_n.jpg)
就沾麵黎講,的確好味! 麵條本身勁粗,蛋味、麥味重,掛湯度一流! 條麵瀝得好乾身,唔會有多餘水份溝淡沾湯。沾湯有好濃郁魚乾味,好鮮甜,再加入蔥,湯底真係勁濃勁香。沾湯入面已有少量叉燒粒同蛋片,叉燒粒味道唔錯,其實唔洗加餸都得。後來追加嘅叉燒,有完完整整三大片,厚到成塊豬扒咁。肥瘦適中,肉味甜,浸落湯先食味道更佳。溏心蛋又係唔錯,蛋黃近乎橙紅色,溏心度不錯,又非常入味,醬油味勁濃。
值得一讚沾湯熱到不得了,而拉麵本身都係微暖,全程食到最後,沾麵整體都唔會凍晒。味道認真不錯,而份量亦多得驚人,最多都食剩左一啲,浪費左師傅嘅心血,真係唔好意思。味道黎講真係好正,又抵食,推介。
一蘭 梅田店
黎到日本,仲有一間拉麵未去朝拜,就係一蘭拉麵。雖然道頓堀都有分店,但呢間都好多人,而且道頓堀實在太多野想食,終於決定安排喺早餐時段去梅田店食,就學日本人拉麵當早餐。
![](http://4.bp.blogspot.com/-jMPKZ6XgsNw/Vb9_jiS27VI/AAAAAAAAPBw/FY8Bma4vRF4/s320/2014-04-14%2B09.07.52.jpg)
十一點未夠黎到,先買拉麵券,一碗¥790,搵個靚位坐低。早晨時段人唔多,自閉位任揀。先落單圈出自己心水配搭,交俾服務員,好快就送上拉麵。
![](https://3.bp.blogspot.com/-nJUM2TifjQQ/U9oobHgX3aI/AAAAAAAAJiQ/TF5m7oi6Oec/s1600/2014-04-14+09.10.56.jpg)
拉麵香氣十足,賣相不錯,十足十宣傳相咁。呷一啖湯,湯底好清爽,但豬骨味好強勁,質感好幼滑,真正濃而不膩。選擇勁硬嘅直幼拉麵,比較鍾意拉麵煙韌彈牙,好有咬勁。一大片叉燒半肥瘦,食落幾有肉嘅鮮甜味。調味醬係辣醬,落少少的確有助提味,成個湯底更香濃,的確係一碗好麵。另加一雙半熟蛋¥120,只用鹽提味,雖然無乜特別但本身蛋香味十足,不錯。幾鍾意呢碗麵,湯底一滴不留飲得清光,見到碗底嘅感謝字句。一蘭喺日本唔算超班,但黎得日本都不妨試一次嘅,感受下正宗自閉食拉麵。
![](https://1.bp.blogspot.com/-oKcVS9_Cg-Y/U9oobdPPJ3I/AAAAAAAAJiY/A-nvrJlqrw8/s1600/2014-04-14+09.20.28.JPG)
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
潮屋 梅田店
此行係住梅田,所以每日出發前都要搵早餐食。新梅田食道街有靚早餐,喺Tabelog搵到一間希3.53嘅立食蕎麥麵店,原來係好多大阪上班一族嘅早餐之選。一向都鍾意去旅行感受地道風味,所以呢間小店絕對係試食名單之列。潮屋就係食街一條小巷內,門外有食物模型展出左早餐款式。全部都係傳統日本早餐,一個飯團加一個麵嘅配搭。落單叫左兩款早餐各一,俾錢後,先係收錢櫃前揀一款飯團,再去櫃檯拎麵食。小店細細靠牆有一排面壁位,中間就係立食區。因為我地唔需要趕住走,所以選擇左面壁位。
![](https://2.bp.blogspot.com/-68HTZz7ATws/U5mE1Cd9MxI/AAAAAAAAIq4/T6UH2OdMrOI/s1600/2014-04-12+08.54.54.jpg)
![](https://2.bp.blogspot.com/-4mA0XFd3r44/U5mE1E50ABI/AAAAAAAAIq0/bBTMd13Fr3k/s1600/2014-04-12+08.54.36.jpg)
一份有蕎麥麵、自選腐皮壽司。另一份有蕎麥麵加豆皮,再自選飯團。先講蕎麥麵,湯底勁清甜,好有魚乾海味,加少些青蔥提味,麵條煙韌帶麥味。腐皮壽司好好味,豆皮勁重甜味,包住壽司飯,估唔到咁簡單都可以咁好食。飯團亦都唔錯,中間包住啲醬菜,幾香口開胃。呢個早餐真係唔錯,體驗到日班上班一族嘅早餐,趕頭趕命得黎都要食好野。埋單總數¥650,好味又抵食。
![](https://2.bp.blogspot.com/-yeVWykCrcCk/U5mE1ER7Q2I/AAAAAAAAIqw/GWZjvhP4PD4/s1600/2014-04-12+08.56.28.JPG)
こころにあまい あんぱんや
另一日嘅早餐係こころにあまい あんぱんや,Tabelog有3.35分,係當地人熱推嘅麵包老店,唔講唔知原來仲係百年老字號,勁。各式各樣嘅麵包放晒出黎,個個都脹Bok Bok好新鮮,最後揀左期間限定嘅櫻花包(¥162),另一個就係日本傳統炸咖哩包(¥141)。
櫻花包中間係紅豆餡,仲有一D啫喱狀東東,應該係麻糬,帶有櫻花味。的確,日本紅豆配櫻花真係好好味。另一個炸咖哩包,外皮炸得鬆脆,中間有滿滿嘅咖哩肉餡,微辣味道好香,肉餡亦好好味。呢度嘅麵包最好係新鮮,做足百年就知
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
りくろーおじさんの店 JR天王寺駅店
此行仲有一個願望,就係大阪一個超人氣Rikuro老爺爺芝士蛋糕(¥648)。雖然梅田、難波等都有分店,但次次想買時已經售罄。剛好黎到天王寺站發現有分店,即刻要買番一個。離遠已經見到好多人排隊,排到一半時間就開始截人。店員仲派籌號計算仲有幾多個蛋糕剩。我地拎到第六號,去到隊尾應該唔多過二十,真係好險,注定有食神。
![](https://1.bp.blogspot.com/-rgAxGzMZmyI/U9jQrIDU40I/AAAAAAAAJY8/LnVn34I2wmo/s1600/2014-04-12+19.52.09.jpg)
第一次排隊排得咁開心,一黎買到心頭好,另外仲可以見證住蛋糕嘅出生過程。個個芝士蛋糕新鮮出爐,脹卜卜好可愛,再印上老爺爺頭像,超人氣芝士蛋糕就出世,店員仲會搖鈴話俾大家知蛋糕出爐啦! 靚女姐姐仲不停叫口號宣傳,好有氣氛,去到臨收工都仲氣氛高漲真係日本人先做得到。終於買到一個夢寐以求嘅蛋糕,可惜今日實在夠飽無辦法即食,惟有放一晚做第二日早餐。
放左雪櫃一晚,都無乜走樣喎。芝士蛋糕非常鬆軟,蛋糕底好清甜,奶味蛋味好重。舖底嘅提子乾先係靈魂所在,加多一分酸甜提子味,配合得剛好。蛋糕實在太大個,要分幾餐食。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
雪花の郷 大阪店
安排左行程去天保山,一出閘行無耐已經進入旅遊區。街上有好多精品店、餐廳。經過一間甜品小店雪花の郷,最出名做雪花冰嘅,但今次黎到係另有目的,就試下名物さとの花焼き。落單後即炸熱辣辣,外層係類似蛋糕嘅餅,中間有輕微流心嘅紫芋蓉,唔太甜,¥100一細件一試無妨。
再行無耐就見到天保山嘅地標摩天輪。摩天輪嘅後方就係人氣最旺嘅Market Place。唔好講咁多,食左飯先。Market Place係一個兩層商場,有唔少買手信、精品嘅小店、仲有一個美食廣場。商場地下仲有一條美食橫丁なにわ食いしんぼ横丁,主題係昭和40年前後嘅大阪,裝潢佈置非常復古有Feel。裡面有十幾間極具大阪特色嘅食肆。
![](https://4.bp.blogspot.com/-mQt4JcYLs8c/U5g0Qw5umII/AAAAAAAAIkg/obhjqHrUKtA/s1600/2014-04-11+11.36.56.JPG)
自由軒 天保山店
今餐醫肚嘅地點就係大阪名物自由軒咖哩飯。黎到大阪,點都要一試呢個特別的咖哩飯。安排到嘅當然要去難波本店,可惜唔太就腳,最後決定黎天保山分店食。柯野左最經典嘅名物カレー (¥750),另一個係 ハイシライス(¥750)。
名物カレー同平時食嘅咖哩飯好唔同。咖哩係同飯撈埋一齊,就好似咖哩版嘅意大利飯。少少辣,咖哩味勁香濃。食嘅時候加入生蛋同醬油撈勻,味道更溫和,非常惹味,呢個配搭真係好特別。另一個係牛肉飯,茄汁味雖然較為普通,但味道夠濃好開胃。最後以一杯凍到無倫嘅冰水作結,正!
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
橫綱
新世界最出名就係串炸,而當中最出名嘅店就係だるま,一個新世界有幾間分店,但間間都超多人,真係連龍尾都望唔到。因為唔想浪費時間,最後決定去另一間都薄有名氣嘅橫綱,貪佢周遊卡有九五折,仲有和室榻榻米坐。
![](https://4.bp.blogspot.com/-omqs2rjVzOc/U5mMn-9WR4I/AAAAAAAAIvI/XzNMtSgEqdk/s1600/2014-04-12+16.41.11.jpg)
串炸係大阪名物,將食物用竹籤串好,沾上粉漿再油炸,食嘅時候沾上醬汁,搭配高麗菜葉一齊食。鐵則一條﹕ 因為醬汁係共用,只可要沾一次,如果需要加醬,就可以沾高麗菜葉淋上去,反正菜係任食嘅。柯打左九串串炸,一杯啤酒。串炸包括牛、豚、魷魚、蝦、芝士、麻糬、洋蔥等。
![](http://4.bp.blogspot.com/-iPkoki2p6Xg/U5mMqt4EcXI/AAAAAAAAIvk/bziVU-Jgt4U/s320/2014-04-12+16.59.36.JPG)
串炸粉漿本身有味,除左麵粉嘅甜味外,仲有高湯味道。食物新鮮炸起,但唔算熱氣,亦唔油膩。中間嘅肉熟成度剛好,肉嫰有肉汁。洋蔥炸左之後好甜好味。其他款式都唔錯。醬汁好濃,酸咪咪,帶點醋酸味,酸味正好將油膩感降低。高麗菜整齊分好一片片,非常新鮮,味道清甜,沾醬後更加惹味。除左配串炸外,就咁送口食都相當唔錯。飲大啖啤酒,感受大阪生活。埋單用周遊卡有九五折優惠,總共¥1950。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
天神橋筋商店街係日本最長嘅商店街,成條街橫跨三個地鐵站距離,全程有2.6公里,由七丁目行到一丁目差不多要用上一個鐘時間。商店街有成八百間店舖,好多都係舊式家居小店,體驗到傳統大阪街坊生活,仲有人氣鼎盛嘅食肆,特別係壽司舖,因為呢度係有名嘅壽司激戰區。
権太呂すし 天六店
喺壽司激戰區裡面,隨便搵間食質素已經夠好,今行揀左一間権太呂試下。舖仔細細,全店十零個位都係Bar位。全店以木製裝修,正宗日本風情。
![](https://2.bp.blogspot.com/-4V3xMHzcGDA/U5mKZCRroPI/AAAAAAAAIuI/-ecbMj82a6M/s1600/2014-04-12+12.03.54.jpg)
揀左兩份是日午餐,落單後,師傅係面前即整,係正宗嘅手握壽司。成品同食物模型幾乎一樣,色彩鮮艷,閃令令,好吸引。壽司飯上已經放左Wasabi,只需沾上少許豉油。壽司飯相當結實痴口,加上壽司醋,味道甜味帶微酸。每件刺身都非常新鮮,魚肉濃而且勁鮮甜。
小妹其係唔多敢刺身,怕唔新鮮太腥,但黎到日本係乜都夠膽試。今次係第一次食海膽,原來好甜好香,好有海味。吞拿魚完全無根,魚味好濃,食過之後發覺比三文魚更好味。又黎第一次試三文魚籽,咬開脆卜卜嘅外皮,中間嘅汁爆晒出黎,全個口都係海鮮味。跟餐嘅湯麵豉味非常濃郁,仲有一舊魚骨腩,少量豆腐同昆布,好好味。試過呢餐後發現原來好味嘅壽司真係可以好好味!
上にぎり1人折 (¥712),八件加麵豉湯。另一份まんぷく1人折 (¥712), 有十二件壽司。
宇奈とと 南森町店