2014大阪京都七天遊之第七日 [7.1 一蘭拉麵早餐]

by admin | 4 月 14, 2014 | 2014大阪京都七天遊, 旅遊, 日本, 關西

黎到京阪遊最後一日，拾好晒利李，十點鐘就Check Out。將行李寄存喺酒店大堂，再去食個靚早餐。

黎到大阪，仲有一間拉麵未去朝拜，就係一蘭拉麵。由於實在太多野想食，終於決定安排喺早餐時段食一蘭拉麵，就學日本人拉麵當早餐。最近酒店嘅分店就係阪急東中央商店街，不過由酒店行過去都需時十五分鐘，係有啲遠，不過要食好野當然唔怕行啦。

 

買左拉麵券¥790，搵個靚位坐低。早晨時段人唔多，自閉位任揀。先落單圈出自己心水配搭，交俾服務員，好快就送上拉麵。
 

拉麵香氣十足，賣相不錯。呷一啖湯，湯底好清爽，但豬骨味好強勁，質感好幼滑，真正濃而不膩。選擇勁硬嘅直幼拉麵，比較鍾意拉麵煙韌彈牙，好有咬勁。一大片叉燒半肥瘦，食落幾有肉嘅鮮甜味。調味醬原來係辣醬，落少少的確有助提味，成個湯底更香濃，的確係一碗好麵。另加一雙半熟蛋¥120，只用鹽提味，雖然無乜特別但本身蛋香味十足，不錯。
 

非常欣賞呢碗麵，湯底一滴不留飲得清光，見到碗底嘅感謝字句。
食飽飽準備下一站去日清杯麵館。

參考

2014大阪京都七天遊之第六日 [6.5 京。二条夜櫻]

by admin | 4 月 13, 2014 | 2014大阪京都七天遊, 旅遊, 日本, 關西

庭園有好多棵櫻花樹，再由地面打燈上去照住樹頂。幸好二条城嘅櫻花好多都仲係滿開狀態，打左燈之後，櫻花更突出。喺黑夜之中睇櫻花，另有一番風味，景色好比聖誕燈飾。

臨離開二条城剛好遇上古箏表演，hea左一段時間。

今日係二条城最後一日夜櫻開放，九點鐘見證住二条城關門。
今次二条城夜櫻遊真係不枉此行，一開始黎到日本，都係日間先睇到櫻花，無諗過原來夜間類櫻感覺完全唔同。夜櫻若隱若現，配合周圍環境，氣氛更加浪漫。真係不枉特別安排夜旁二条城，呢個景點絕對為今次京都遊畫上完美句號。

2014大阪京都七天遊之第六日 [6.4 京都豪華晚餐]

by admin | 4 月 13, 2014 | 2014大阪京都七天遊, 旅遊, 日本, 關西

六點半又到晚餐時間，黎到先斗町嘅六傳屋晚餐。一入到先斗町，真係有種時空錯錯亂嘅感覺。天氣漸暗，小街嘅店舖都開左紅燈籠，超級鍾意呢種感覺。

 

黎到六傳屋當然要試下日中Fusion嘅擔擔麵。叫左一個白味噌擔擔麵¥850，另一個係黑胡麻擔擔麵¥850。

個人較鍾意白味噌果款。白味噌湯底勁濃味，甜味亦好夠，質感好忌廉咪，配上粗身麵條，再加上大量肉碎同白蔥，肉碎浸住喺湯裡面，充分吸收左湯嘅甜味，整體黎講係日式感幾重嘅麵。另一個係黑胡麻味，湯底改為用上黑芝麻加少許辣油，味道微辣，無咁忌廉咪，比較中式。

 

七點半到甜品時間，黎得京都，一定要試綠茶聖代。喺河原町見到好多間綠茶甜點，因為食物模型實在太靚，最後竟然搵錯舖頭。最後去左本家西尾八橋茶屋，不過錯有錯著，坐得幾舒服，而且已經夠好味。柯打左一個綠茶聖代(¥1200)，成品造型實在太靚啦，同相片有99%相似。份量都幾多，材料亦好好豐富。最頂有綠茶味Marcoon、薄脆、小丸子，再加上金薄。綠茶雪糕味道勁濃郁，配上勁甜勁好味嘅紅豆，仲有綠茶味嘅啫喱。聖代中層以綠茶清蛋糕分隔，最底繼續係綠茶雪糕，真係一個好豪華好好味嘅甜品。旁邊兩個日本女仔見到我地兩個人Share一份甜品，報以羨慕眼光，相信係日本人比較少同異性咁親密。
 
 

離開小店無耐，先發現去原來想去嘅茶寮都路里，見到排晒隊都預左有排等，不過試過八橋已經好滿足。最後買左一個期間限定櫻花味雪糕(¥370)當捧場。雪糕有淡淡櫻花香，上面灑上綠茶粉，質感好幼滑，不錯。

 

完一個咁豪華嘅晚餐，終於到今次京都行程嘅最後一站，搭巴士向二条城進發。

參考

六傳屋 tabelog.com/kyoto/A2603/A260301/26003016
本家西尾八橋茶屋 www.8284.co.jp/shop/chaya_menu.html

茶寮都路里 www.giontsujiri.co.jp

2014大阪京都七天遊之第六日 [6.3 京都櫻之散策]

by admin | 4 月 13, 2014 | 2014大阪京都七天遊, 旅遊, 日本, 關西

兩點鐘食飽後，搭巴士向銀閣寺進發。落車無耐就係哲學之道，哲學之道真係得個名，其實係一條細明渠，兩旁有櫻花。見過大阪造幣局櫻花隧道之後，哲學之道的確給比下去。反正順道，行下無壞，還好人唔多，仲有啲櫻花，散步都唔錯。
 

行左二十分鐘就到銀閣寺。門票 ¥500，有出名嘅銀沙灘，建築物雖然唔多，但外圍有好多樹木山水，遊左半個鐘左右都好舒服。

 

離開銀閣寺門口又有好野食，買左個櫻花泡芙¥400，泡芙加櫻花味果醬，再加雪糕。泡芙雖然唔係好脆，櫻花味醬真係好濃有櫻花味，雪糕係普通雲尼拿味，撈埋一齊都幾好食。

繼續京都散策，再沿哲學之道行去下站平安神宮。平安神宮中庭空間好大，鮮橙色嘅神宮好醒神，門外馬路係全日本最大嘅鳥居。平安神宮庭園係免費入場，再俾入場費就可以入神苑，但時間唔多所以無入去。

 

行經麥當奴，知道日本有期間限定嘅櫻花將軍漢堡。點知去到先知櫻花包已經賣晒，無緣試添。

慢步到達八坂神社，八坂神社係京都最人氣嘅無料賞櫻熱點，仲有夜櫻睇。入門口就見到八坂大燈籠，好多本地人喺圓山公園席地而坐野餐，好有氣氛。
 

園內仲開左好多小食攤檔，試左和牛串燒(¥400)，話係神戶和牛，師傅現場即燒。和牛食落幾有牛味，BBQ醬汁都幾岩味。

 

下一站係祗園、河原町商圈。祗園有條花見小路，就係最有機會見到日本藝伎嘅地方。雖然最後都見唔到藝伎，但呢條街好古色古香，有傳統茶屋、居酒屋，街尾仲有藝伎劇場，感覺一下氣氛都唔錯。

仲有一間人氣名店壹錢洋食，小店只賣一款食品，類似大阪燒餅嘅物體。 
 

因為店內都幾多人，所以選擇買一份外賣，去河邊坐喺岸上慢慢嘆。外賣包裝好特別，用舊報紙包住，好有Feel。
 

壹錢洋食燒餅(¥650)麵漿加左大量青蔥、包住半熟蛋、豬肉、竹輪、櫻花蝦、紅薑等等，材料好豐富，再加上勁濃味嘅燒汁，真係好好味。坐喺河邊，睇住流水，鴨仔游黎游去，呢個下午茶的確唔錯。

 

參考

銀閣寺 www.shokoku-ji.jp

平安神宮 www.heianjingu.or.jp
八坂神社 www.yasaka-jinja.or.jp
壹錢洋食 www.issen-yosyoku.co.jp

2014大阪京都七天遊之第六日 [6.2 食在錦市場]

by admin | 4 月 13, 2014 | 2014大阪京都七天遊, 旅遊, 日本, 關西

錦市場被稱為京都廚房，係京都午餐嘅不二之選。一點鐘搭巴士黎到錦市場，市場商店街嘅標誌就係又紅又綠嘅彩色玻璃天幕。商店街左右兩旁都有唔同類型嘅店舖，慢慢行邊睇邊食。

錦市場 こんなもんじゃ專買豆腐製品。細細粒一口大小嘅豆乳冬甩(¥250)新鮮即炸，甜甜地有微微豆腐味。豆乳雪糕(¥250)冰感十足，清甜有豆味，有啲似豆漿味嘅沙冰。
 
 
京都亦好出名醃菜，試食過都幾好味。

人氣名店魚板，買左兩款黎試，魚味好濃，幾彈牙，口感唔錯，唔會得舊粉
 

超出名嘅三木雞卵，買左隻原味雞蛋卷(¥700)，價錢比預計中貴，雖然係凍食，但幾好食。外皮好實在，切開中間真真正正一層一層，味道好香，蛋味之外，仲有乾魚湯味，好甜好有味道，又有口感嘅厚燒玉子。
 
 

行經見得意買左串特大條魚板(¥400)，中間仲有勁濃味嘅流心芝士，不錯吃。掃街掃一圈，食品類型幾多，食勻人氣食品其實都夠飽。

錦市場嘅終點就係錦天滿宮，最出名嘅就係有Hello Kitty御守。揀左一個俾錢後，大師即場作法祈福，就作為送俾自己嘅手信。
 

參考

錦市場 www.kyoto-nishiki.or.jp

2014大阪京都七天遊之第六日 [6.1 爺爺的早餐, 京都清水寺]

by admin | 4 月 13, 2014 | 2014大阪京都七天遊, 旅遊, 日本, 關西

今日8:45起身食個靚早餐，就係昨晚買番黎嘅老爺爺芝士蛋糕。放左雪櫃一晚，都無乜走樣喎。芝士蛋糕非常鬆軟，蛋糕底好清甜，奶味蛋味好重。舖底嘅提子乾先係靈魂所在，加多一分酸甜提子味，配合得剛好。蛋糕實在太大個，只係食左一半，留番今晚。

今日安排左去京都，第一站係清水去。先搭阪急到達烏丸，再轉巴士到達清水通。希望不走回頭路，選擇喺茶碗坂行上山，回程由清水坂走。早上嘅茶碗坂真係好寧靜，街上好有卡通片日式風情。茶碗坂嘅店舖都係賣陶藝茶具碗具，慢慢行慢慢睇，相當悠閒。
 

大約行十五分鐘就上到清水寺嘅入口仁王門。清水寺實在係一個熱門旅行景點，旅客好多。

俾¥300買左門票後進修寺內，清水寺有部份正進行維修，但影響唔係太多。經過幾個堂，三重塔，到達本堂，同最著名嘅清水舞台。舞台風景都好靚，景觀廣闊，一望無際。好難想像整個舞台都係全木製，無用過一根釘。離開舞台行過山邊小路，係影舞台最清楚最靚嘅地方，可惜已經無乜櫻花，相信秋天黎影紅葉會更加靚。

 

再行一段小路就到左熱點地主神社，以求姻緣聞名，裡面有好多唔同嘅祈福參拜方法，又有開運姻緣石等，細細地但幾特別幾多野睇。

沿著山路落山，到達音羽の瀧，就係最出名飲聖水嘅地方。人實在好多，睇完就算。臨到出口前，就係清水舞台嘅底部。由下向上望，睇到舞台嘅木柱，真係不得不讚嘆日本建築嘅威力。
 

大約11:30離開，由清水坂下山。一出仁王門就有一檔小食店，見到有好多人幫襯，就試一杯綠茶雪糕¥350。綠茶味幾濃，算不錯。
 
傳統小食京都餅，外層係煙韌糯米粉皮，中間包住唔同餡料。行前幾步就有一間非常出名嘅手信店，西屋八橋。最後竟然用左好多時間，因為店家提供好多試食，又有綠茶飲，淨係試食都食到飽左。雖然又食又拎，但味道的確唔錯，最後都買左好多黎做手信。計番條數，禮盒裝係最貴，佢仲有五件裝嘅普通包裝(¥250)其實最抵，既然都係自己食，決定買普通裝，試多幾個款仲好，最好買左櫻花味、綠茶紅豆、鹽味、黑胡麻，買左總共十二包，¥3000落樓。沿路有好多家買餅嘅小店，但都係八橋最多人幫襯，實無買錯啦。
 

清水坂仲有好多小食，試過一樣綠茶白朱古力餅，真係好好食，不過價錢略貴，唔捨得買。
 

迷你燒米餅¥50，一舊類似飯團嘅東西，煙煙韌韌，有醬油香味，包住塊紫菜提味。

仙貝幾脆幾香口，不過味道淡淡地，相信醬油味會好食啲。

 

途中轉角位就係七味家，年老字號名店，就係七味粉。

仲有一間買蒟蒻香皂，香皂真係好似蒟蒻咁軟腍腍好滑，洗完手隻手變得好滑。

 

行呢條街真係好開心，有得食，有得飲，食飽仲有得洗手。

最後行番落清水通搵巴士搭，去錦市場

參考

清水寺 www.kiyomizudera.or.jp