by admin | 4 月 12, 2014 | 2014大阪京都七天遊, 旅遊, 日本, 關西
今日最後一站係天王寺食晚餐。由通天閣步行去天王寺，唔係太遠，諗住等得車黎都行到，所以決定漫步街頭。
晚餐地點係天王寺站附近嘅新宿美食大廈，北極星蛋包飯。黎大阪食蛋包飯的話，一定首選北極星。北極星本店係道頓堀，但因為排唔到期，所以決定黎近近地嘅天王寺分店。天王寺分店雖然無道頓堀本店咁古色古香，係典型洋風裝修。
叫左一個人氣No.1最基本嘅雞肉蛋包飯¥720，另一個係No.2牛仔排蛋包飯¥980。
賣相非常討好，色彩鮮艷好吸引。蛋皮完完整整包住飯，蛋皮睇落好薄，切開黎睇原因唔係咁簡單，薄得黎仍然有層次，中間仲係流心程度，非常嫰滑，蛋味又夠濃。中間嘅飯亦相當唔錯，橙紅色嘅炒飯本身番茄味好夠，飯炒得粒粒均勻，仲有少量材料，單食個飯已經好正。再按喜好沾少許蕃茄醬，的確好好味。名店當之無愧。
另一個係牛仔排蛋包飯，醬汁番茄味減少，多分牛味，無咁酸，係另一種風味。
20:40 此行仲有一個願望，就係大阪另一個超人氣Rikuro老爺爺芝士蛋糕(¥648)。雖然梅田地鐵站已經有分店，但次次想買時已經太夜售罄。橫店天王寺站就有分店，食飽飽第一時間趕去。離遠已經有人排隊，排到一半時間就開始截人。店員仲派籌號計算仲有幾多個蛋糕剩。我地拎到第六號，去到隊尾應該唔多過二十，真係好險，注定有食神。
第一次排隊排得咁開心，一黎買到心頭好，另外仲可以見證住蛋糕嘅出生過程。個個芝士蛋糕新鮮出爐，脹卜卜好可愛，再印上老爺爺頭像，超人氣芝士蛋糕就出世，店員仲會搖鈴話俾大家知蛋糕出燈啦! 靚女姐姐仲不停叫口號宣傳，好有氣氛，去到臨收工都仲氣氛高漲真係日本人先做得到。放低換一個夢寐以求嘅蛋糕，今日實在夠飽無辦法即食，放一晚做第二日早餐。搭地鐵回程。
參考
北極星 www.hokkyokusei.jp
Rikuro www.rikuro.co.jp
by admin | 4 月 12, 2014 | 2014大阪京都七天遊, 旅遊, 日本, 關西
17:15 到達新世界，計劃先食個下午茶。
新世界最出名就係串炸，而當中最出名嘅店就係だるま，一個新世界有幾間分店，但間間都超多人。最後決定去橫綱，貪佢周遊卡有九五折，仲有和室Tatami坐。
串炸係大阪名物，將食物用竹籤串好，沾上粉漿再油炸，食嘅時間沾上醬汁，搭配高麗菜葉一齊食。鐵則一條﹕ 因為醬汁係共用，只可要沾一次，如果需要加醬，就可以沾高麗菜葉淋上去，反正菜係任食嘅。柯打左九串串炸，一杯啤酒。串炸包括牛、豚、魷魚、蝦、芝士、麻糬、洋蔥等。
串炸粉漿本身有味，除左麵粉嘅甜味外，仲有高湯味道。食物新鮮炸起，但唔算熱氣，亦唔油膩。中間嘅肉熟成度剛好，肉嫰有肉汁。洋蔥炸左之後好甜好味。醬汁好濃，酸咪咪，帶點醋酸味，酸味正好將油膩感降低。高麗菜整齊分好一片片，非常新鮮，味道清甜，沾醬後更加惹味。除左配串炸外，就咁送口食都相當唔錯。飲大啖啤酒，感受大阪生活。埋單用周遊卡有九五折優惠，總共¥1929。
新世界除左串炸之外，亦好出名食河豚。街頭掛上大大隻河豚招牌，幾得意。新世界大街之後有條小巷鏘鏘橫町，係一條好窄嘅古老街道，有串炸店，仲有棋社，好多老人家係度捉棋，絕對地道。
七點鐘左右上埋通天閣，換左門票(原¥700)之後就搭升降機上去。通天閣吉祥物會為人帶來好運，通天閣單張仲介紹左好多個開運方法，其實幾搞笑。其中一個係，升降機內天花板有吉祥物嘅公仔，出發同回程如果見到兩個唔同彩色嘅公仔，就會有好運。
通天閣觀景台其實好細，好快就行完一圈。通天閣唔算太高，但剛好夜晚時份大阪市建築物都開晒燈，觀景算OK啦。離開時已19:45，通天閣屝通著燈，再補多張靚相就離開。傳單係通天閣摺紙模型，返到香港慢慢玩。
參考
日本一の串かつ・横綱 www.4527.jp
通天閣 www.tsutenkaku.co.jp
by admin | 4 月 12, 2014 | 2014大阪京都七天遊, 旅遊, 日本, 關西
食飽飽繼續下半日旅程，下一站。
先去NHK大阪放送局，地下同九樓會開放俾公眾參觀。地下係兒童樂園，有好多吉祥物公仔可以俾小朋友嘗試上鏡同卡通跳舞。搭電梯上九樓仲有啲角色扮演嘅玩具，亦睇到落下拍攝電視節目嘅真實情況。
離開NHK，再去隔離嘅大阪歷史博物館，原來NHK同博物館係雙連共構。先去售票處換票，又係周遊卡包括嘅景點，價值¥600。由最高嘅十樓開始行，介紹奈良時代嘅難波宮殿，九樓講解中世紀嘅水都模樣，八樓係考古研習，有好多少遊戲介紹考古原理，我地係呢度玩左勁耐。七樓就係近代大阪，有市場街景模型，影相熱點! 想了解一下大阪歷史的話，呢個博物館絕對值得黎，有模型、有聲、有畫，更有好多遊戲，一啲都唔悶。入場仲可以拎一本遊戲冊，係每層搵番問題嘅答案再及印，一邊玩一邊做功課。
到下午三點半繼續一個勁近嘅景點，就係行過一條馬路嘅大阪城。入城之前入去西之丸庭園(原¥200)，其實只係一個大公園，無乜特別，不過搵到一個靚位影過去大阪城，取景唔錯架。橫掂周遊卡又包嘅，入黎影張相無妨。
到達大阪城，憑周遊卡換票上天守閣 (原¥600)。天守閣共八層，排隊等升降機嘅人好多，所以選擇行樓梯。最頂層可以睇到大阪風景，始終位置唔太高，又有鐵絲網包實，觀景其實一般。以下幾層多數係古董文物，無乜特別，而且又好多遊客，麻麻地好行，不過話晒係大阪地標，點都要黎一次嘅。
NHK、大阪歷史博物館就係谷町四丁目站，旁邊就係大阪城，一個車站可以去足三個景點，玩盡周遊卡價值¥1400，抵!
參考
大阪歷史博物館 www.mus-his.city.osaka.jp
大阪城 www.osakacastle.net
by admin | 4 月 12, 2014 | 2014大阪京都七天遊, 旅遊, 日本, 關西
完成大阪造幣局櫻花之旅，已經一點鐘要搵飯食。離開造幣局向南森町方向，去番天神橋。天神橋係大阪嘅壽司激戰區，梗係要食壽司，決定去天六相當出名嘅權太呂。
舖仔細細，全店十零個位都係Bar位。全店以木製裝修，正宗日本風情。
揀左兩份是日午餐，上にぎり1人折 (¥712)，八件加麵豉湯。
另一份まんぷく1人折 (¥712)， 有十二件壽司。
落單後，師傅係面前即整，係正宗嘅手握壽司。成品同相片幾乎一樣，色彩鮮艷，閃令令，好吸引。壽司飯上已經放左Wasabi，只需沾上少許豉油。壽司飯相當結實痴口，加上壽司醋，味道甜味帶微酸。每件刺身都非常新鮮，魚肉濃而且勁鮮甜。
值得一提第一次食海膽，原來好甜好香，好有海味。吞拿魚完全無根，魚味好濃，食過之後發覺比三文魚更好味。第一次試三文魚籽，咬開脆卜卜嘅外皮，中間嘅汁爆晒出黎，全個口都係海鮮味。跟餐嘅湯麵豉味非常濃郁，仲有一舊魚骨腩，少量豆腐同昆布，好好味。
試過呢餐後發現原來壽司可以咁好食! 壽司始終都係黎日本食最好。
參考
権太呂寿司 www.gontarosushi.com
by admin | 4 月 12, 2014 | 2014大阪京都七天遊, 旅遊, 日本, 關西
大阪有一年一度嘅櫻花盛事，剛好就係今次旅行嘅日子之內。大阪造幣局平時唔會對外開放，每年只會開放一個星期，俾遊人進入櫻花隧道賞櫻，今年限定開放日係4月11日至17日，當然要趁機構一去!
11:30到達天滿橋站，喺地鐵已經開始感受到熱鬧氣氛。一上月台簡直人頭湧湧，車站拉起好多指示牌引路，指示牌都唔洗睇，就跟住人流方向實無錯。
上到地面，正係百貨公司樓下，趁呢個星期嘅盛事特別開設攤位賣櫻花產品。離開百貨公司穿過一條橋，見到海岸兩旁嘅櫻花。
沿路越來越多小食攤檔、遊戲攤檔，就好似節慶祭典咁熱鬧。
終於黎到櫻花隧道嘅入口，櫻花開滿兩旁，櫻花分枝多到遮住陽光，形成一條隧道。陽光幾猛都好，但可以喺櫻花樹下遮蔭，實在係好奢侈，相信只有黎日本可以感受到。
造幣局可算係大阪首選賞櫻名所，以櫻花種類多，數量多見稱。剛好呢個期間係櫻花盛開期，櫻花澎湃到不得了，簡直歎為觀止。
曾經有猶疑過，怕多人太浪費時間，所以選擇放棄呢個行程，但親身去過後就覺得不柱此行
人多，櫻花比想像中多而靚，仲可以一次過見到唔同品種嘅櫻花。人雖然多，但好有規矩，大家亦好禮讓，行程比想像中順利好多。
大約行左大半個鐘，去到櫻花隧道嘅終點，見到有特色手信，亦係期間限定兼且地點限定，最後買左兩盒錢幣餅乾做手信¥500，完成一個令人難忘嘅景點。
參考
大阪造幣局 www.mint.go.jp/enjoy/toorinuke/sakura-osaka.html
by admin | 4 月 12, 2014 | 2014大阪京都七天遊, 旅遊, 日本, 關西
9:45出發繼續大阪周遊第二日，出發前先去新梅田食道街食個靚早餐，Tabelog搵到一間立食蕎麥麵店，係好多大阪上班一族嘅早餐之選。一向都鍾意去旅行感受地道風味，所以呢間小店絕對係早餐之選。潮屋就係食街一條小巷內，門外有食物模型展出左早餐款式。全部都係傳統日本早餐，一個飯團加一個麵嘅配搭。落單叫左兩款早餐各一，俾錢後，先係收錢櫃前揀一款飯團，再去櫃檯拎麵食。小店細細靠牆有一排面壁位，中間就係立食區。因為我地唔需要趕住走，所以選擇左面壁位。
一份有蕎麥麵、自選腐皮壽司。另一份有蕎麥麵加豆皮，再自選飯團。先講蕎麥麵，湯底勁清甜，好有魚乾海味，加少些青蔥提味，麵條煙韌帶麥味。腐皮壽司好好味，豆皮勁重甜味，包住壽司飯，估唔到咁簡單都可以咁好食。飯團亦都唔錯，中間包住啲醬菜，都唔錯。呢個早餐真係唔錯，好有傳統日本風味。埋單總數¥650，好味又抵食。
10:15離開小店，打算買一個大阪必試嘅芝士蛋糕Pablo。今行幾次遇著排隊或者關門，知道有分店係梅田站，終於決定一大早去買，再搵地方食。呢間小店真係難搵，終於明白咩叫迷宮，係地下街穿插搵左成15分鐘，終於搵到呢間夢之店。
俾¥800換一個新鮮出爐半熟芝士蛋糕。一路諗下邊度有得坐，最後決定直接去下站大阪今昔館嘅天神橋商店街附近。10:45 到達天神橋，正好有戶外空位可以坐低，慢慢享用呢個Pablo。
蛋糕外皮係酥皮撻皮，面層係橙黃色果醬，中間包住忌廉芝士餡。酥皮勁脆，切開蛋糕，中間嘅芝士餡半流質，急不及待要試一口。
果醬味道微甜少酸，類似芒果味。軟芝士忌廉仍然微暖，入口即溶好流滑，蛋味、奶味、芝士味好重，令人一口接一口。就算咁奶都唔覺膩，正好被果醬酸味中和，配合埋鬆脆唔油膩嘅酥皮，成個配搭得宜，食極停唔到口。食過之後，就覺得頭先行左十五鐘冤枉路都係值得嘅，絕到值得翻轉頭。直情係全世界最好味嘅芝士蛋糕，好評到咁，實在罕見。
歎完個食過全世界最好食嘅芝士蛋糕，行番去大阪今昔館，先知道博物館原來要換展覽，所以臨時閉館，白行一趟。還好可以即時提早下個行程，增加大阪造幣局遊覽時間。
參考
潮屋 www.kk-shioya.co.jp/location_shioya_umeda.html
Pablo www.pablo3.com
