by admin | 4 月 11, 2014 | 2014大阪京都七天遊, 旅遊, 日本, 關西
第四日最後一站係玩盡梅田周遊於免費設施，由於法善寺喝鈍關門，所以改為去藍天大廈分店。由梅田地鐵站落車，再喺GFO背面穿過地下隧道，行十分鐘左右就到達藍天大廈。藍天大廈有條食街滝見小路，裡面又係古早佈置，有好幾間遊客鍾意嘅食肆，其中一間就係喝鈍。
小店細細，放左好多昭和時代嘅裝飾品玩具。店員安排我地坐喺Bar枱前，可以睇到大廚嘅手勢。柯打左一客滑蛋豬排飯 (¥650)、一客咖哩豬排飯 (¥700)。
滑蛋豬排以鐵鍋上，豬排浸喺醬汁上仍然保持脆口，豬排肉嫰一啲都唔韌。醬汁甜甜，配上蛋液認真唔錯。另一客咖哩豬排飯，咖哩汁多到好似唔洗錢咁，豬排無再煮過所以更加脆口，欣賞佢炸得脆但一啲油膩感都無。咖哩汁好香甜帶輕微辣味，味道極濃郁惹味，真係試過最好食嘅咖哩! 食飽飲淡凍冷嘅麥杯，完美的一餐。埋單¥1350，港紙$100，真係平靚正。
食過豐富好味嘅一餐，行番去對面展望台大樓，搭升降機直上空中平台。黎到藍天大廈最頂層就係大阪第一拍拖勝地空中庭園。庭園地板舖滿彩色小燈，黑夜之中閃閃發光，靠住欄邊睇到大阪市夜景，真係好靚。
夜晚天氣真啲凍，逗留左好短時間就走。落番下層有室內場地，可以買杯飲品慢慢嘆，或者喺心心展板影張靚相留念。
行到大約九點半要去下一站，落番梅田地下街買小小甜品食下，買左人氣Krispy Doughnut，一個Original (¥160)，一個Caramel Double Nuts (¥210)。冬甩加左糖醬變得脆脆地，味道不錯，但唔算好特別。仲有行過見到好多人支持嘅八天堂，買左個Custard Cream Bun (¥210)，好似甜餐包加左吉士醬，凍食微甜，幾得意。
今日最後一站係Hep Five摩天輪，雖然商場已經關門，但觀覽車營業到22:45。全紅色嘅摩天輪係Hep Five地標，圓周唔算大，大約十五分鐘時間行完一圈，睇下大阪車站附近風景。橫掂周遊卡包嘅 (原¥500)，一去無妨。完成一日大阪周遊行，返酒店訓個靚覺。
參考
滝見小路 www.takimikoji.jp/shopnews/katudon.html
藍天大廈展望台 www.kuchu-teien.com/tc
Krispy Doughnut krispykreme.jp/index.html
八天堂 hattendo.jp
Hep Five www.hepfive.jp
by admin | 4 月 11, 2014 | 2014大阪京都七天遊, 旅遊, 日本, 關西
搭番勁方便嘅大阪地鐵，下午五點到達難波千日前道具屋筋商店街。一條短短嘅商店街，大部份都係買餐飲工具、食物模型。有唔少店舖仲用唔洗¥100價錢賣Made In Japan嘅筷子，好受歡迎，因為唔想同人迫所以無買。
繼續係大阪南遊走，行得累累地，不如食個甜品，就試道頓堀最出名嘅名點幸福一下。左穿右插終於搵到法善寺橫町呢條小街，夫婦善哉就係牌坊後面。網友話食過夫婦善哉單身找到好姻緣，夫婦幸福到不行。
小店係清一式獨賣一款幸福紅豆湯丸，配合勁和式嘅裝修，真係風味十足。紅豆湯丸特別之處係一人前份量會分成兩小碗，有人話要一個人獨享兩碗先算圓滿，亦有說法係兩人分享先會團圓幸福。今次到訪，老闆娘婆婆只為我地送上一客兩碗，二人分享咪更加好Feel。呢款簡單到不能再簡單嘅紅豆湯丸點解會出名到痴線? 小店有說明書介紹，全靠一部小說所賜，小說拍成電影，令呢間小店出左名，好多名人都慕名而來。
一人前份量(¥ 800)有兩細碗紅豆湯圓、一塊咸海苔。跟據食用說明，首先再食紅豆湯圓。日本嘅紅豆真係好好味，好甜好大粒。湯圓係一粒白色糯米粉團，煙煙韌韌幾好味。呢碗紅豆沙比正常再甜多一倍，食到最後真有點甜到漏嘅感覺，諗晒甜魔。第二步係處理咸海苔，細細一片海苔上面灑滿粒鹽，勁咸，但正好中和頭先嘅勁甜。最後係飲一啖麥茶清一清。非常神奇嘅一個勁甜、勁咸、勁清組合，配合巧妙嘅食用次序，呢個甜品真係唔錯，食完有好滿足嘅感覺。
帶住幸福滿足嘅感覺，繼續遊走道頓堀。下一站係大阪名物章魚燒。上次黎大阪試過赤鬼同第一，今次要試另一間くくる。くくる都係人氣名店之一，最出名係章魚腳大到飛晒出黎嘅重量級章魚燒，但為左留肚食晚飯，只選擇普通版。一客十粒¥550，唔係重量級都好夠大粒。外皮微脆，中間粉漿軟綿綿好有味道，章魚亦唔細舊! 加埋燒汁、沙律醬、海苔，正係好大阪嘅章魚燒!
臨近黃昏時分，決定繼續玩盡周遊卡，坐道頓堀水上觀光船 (¥700)。上船位置就係唐吉訶德對出，先去櫃檯換船票，搭上18:30呢班船。觀光船由唐吉訶德出發，喺道頓堀河行走，會經過九條橋，穿過橋底嘅感覺好得意。船上有服務員用日、英、韓語講解、搞氣氛，輕輕鬆鬆渡過二十分鐘船程。
揀黃昏時間上船實在太好，回程時天色漸暗，河岸兩邊嘅大廣告版開始亮燈，變得好熱鬧，正好感受大阪繁華一面。
19:00落船搵飯食，原本打算去法善寺橫町試喝鈍豬排，點知去到店長話今日要關門。好彩事前做足功課，決定即時轉軚提早去梅田藍天大廈，因為果度另有分店!
參考
千日前道具屋筋商店街 www.doguyasuji.or.jp
夫婦善哉 www.sato-restaurant-systems.co.jp/zen_shop
たこ家道頓堀くくる www.shirohato.com/kukuru
道頓堀水上觀光船 www.ipponmatsu.co.jp/cruise/tombori.html
by admin | 4 月 11, 2014 | 2014大阪京都七天遊, 旅遊, 日本, 關西
15:00 離開大阪港，下一站係隔兩個車站嘅大阪府咲洲庁舎展望台。原價¥510，又係周遊卡包免費入場，離大阪港咁近不妨黎埋先走。返大阪港車站搭大阪地鐵去到總站宇宙廣場，再轉南港港城線，呢條線仲係用緊行車輥嘅舊色列車。
到達貿易中心前，黎到一個好商業嘅地區，地方真係好大。
咲洲庁舎展望台高度252米，今日天氣唔錯，睇風景非常清晰，真係一覽無遺。
展望台玻璃窗前有扶手平台，所以有畏高都唔係幾驚。
逗留左大半個鐘，決定回程返市區，準備去道頓堀搵食。
參考
大阪府咲洲庁舎展望台 www.wtc-cosmotower.com/observatory
by admin | 4 月 11, 2014 | 2014大阪京都七天遊, 旅遊, 日本, 關西
搭地鐵12:30到達大阪港駅，一出閘行無耐已經進入旅遊區。
經過小店雪花の郷，就試下名物さとの花焼き。落單後即炸熱辣辣，外層係類似蛋糕嘅餅，中間有輕微流心嘅紫芋蓉，唔太甜，¥100一細件一試無妨。
再行無耐就見到天保山嘅地標摩天輪。摩天輪嘅後方就係人氣最旺嘅Market Place。唔好講咁多，食左飯先。Market Place係一個兩層商場，有唔少買手信、精品嘅小店、仲有一個美食廣場。
商場地下仲有一條美食橫丁なにわ食いしんぼ横丁，主題係昭和40年前後嘅大阪，裝潢佈置非常復古有Feel。裡面有十幾間極具大阪特色嘅食肆。今餐醫肚嘅地點就係大阪名物自由軒咖哩飯。黎到大阪，點都要一試呢個特別的咖哩飯，左排右排之下，決定黎天保山分店食。柯野左最經典嘅名物カレー (¥750)，另一個係ハイシライス(¥750)。
名物カレー同平時食嘅咖哩飯好唔同。咖哩係同飯撈埋一齊，就好似咖哩版嘅意大利飯。少少辣，咖哩味勁香濃。食嘅時候加入生蛋同醬油撈勻，味道更溫和，非常惹味。另一個茄汁味雖然寞為普通，但味道夠濃好開胃。最後以一杯凍到無倫嘅冰水作結，正!
離開Market Place，喺海遊館影張到此一遊。
再過去搭觀光帆船サンタマリア号。上船原價要¥1600，而家大阪周遊卡包左，梗係要一去! 13:45上船，準時14:00出發。
聖瑪麗亞號係以哥倫布發現新大陸嘅海船為原型製造出黎，由天保山港灣村出發，穿過港大橋，沿著大阪港周遊航，船程45分鐘。喺船內行圍行下影下相，下層有少少展覽，仲有間餐廳提供輕食。其餘時間就係船邊睇風景，幾舒服。
臨離開天保山前，去大觀覽車前影番張到此一遊。可惜呢段時間做定期維修無得上去，惟有影張相算。
天保山可算係一個旅遊區，由地鐵站開始，街上有好多小店、餐廳，近海仲有摩天輪、商場，又可以坐船，悠閒Hea左半日，值得一黎。
參考
雪花の郷 www.e-chanoma.net
大阪港マーケットプレイス www.kaiyukan.com/thv/marketplace
なにわ食いしんぼ横丁 www.kaiyukan.com/thv/marketplace/kuishinbo
自由軒 www.jiyuken.co.jp
觀光帆船サンタマリア号 www.kaiyukan.com/thv/cruise
by admin | 4 月 11, 2014 | 2014大阪京都七天遊, 旅遊, 日本, 關西
行程已經黎到中段。昨日影相太累，又因為上網方面出左問題，所以原定京都行程改為大阪周遊第一日，可以訓晏D起身。
大約10點先出門口，今日嘅早餐係百年老字號こころにあまい あんぱんや，Tabelog有3.35分，好評勁多，買個包包做簡單早餐都唔錯。各式各樣嘅麵包放晒出黎，個個都脹Bok Bok好得意，最後揀左期間限定嘅櫻花包（¥162），另一個就係日本傳統炸咖哩包（¥141）。
櫻花包中間係紅豆餡，仲有一D啫喱狀東東，應該係麻糬，帶有櫻花味。的確，日本紅豆配櫻花真係好好味。另一個炸咖哩包，外皮炸得鬆脆，中間有滿滿嘅咖哩肉餡，微辣味道好香，肉餡亦好好味。事實證明，永遠都係原裝正版先係最好!
邊行邊食完個早餐，向地鐵進發，途中又經過銀行，影個日景先。
今日第一站係大阪市立科學館，去西梅田搭地鐵最方便。搭地鐵時順面開通埋大阪周遊卡，地鐵任搭的確爽。由西梅田搭一個站就到肥後橋站，落車之後已經有好清楚指示去科學館嘅方法。大約行五分鐘左右就見到科學館。
大阪市立科學館 (原¥400)係大阪周遊卡包入場嘅景點，去售票處換票就入得。科學館樓高五層，每層都有唔同主題，包括天文學、生活科學、電力學同BB兒童科學。有好多設備俾你玩，其實都幾得意。可能今日係平日，全場無乜人，可以任玩任試。而且設施都保養得好好，玩得相當舒服，真係幾適合小朋友。
入口位置有一部機械人，係會玩扭計骰，都幾得意。大約行左一個鐘就離開，繼續下一站天保山。
參考
こころにあまい あんぱんや tabelog.com/osaka/A2701/A270101/27010364
大阪市立科學館 www.sci-museum.jp
by admin | 4 月 10, 2014 | 2014大阪京都七天遊, 旅遊, 日本, 關西
影完相真係幾累，唔想去太遠，就去酒店附近嘅阪急三番街店。裡面嘅拉麵小路有幾間好出名嘅拉麵店，今次嘅目標係以沾麵聞名嘅煮干しらーめん玉五郎。揀呢間純粹係Tabelog搜尋，原來呢間拉麵店分數高達3.46!
九點鐘時份仍然要排隊! 先喺販賣機買票，因為太肚餓，所以叫左一個中(¥850)、一個大(¥900)嘅沾麵。最後發覺白痴左。
入座後拉麵好快送上，一見到個份量，就嚇左一跳，眼見呢份咁多，以為係大盛，點知再黎多一份比大更大嘅，就知道出事，份量多到完全預計唔到! 另一個白痴嘅係，誤會左介紹圖片以為沾麵本身有叉燒同蛋，原來係要買票時再另點，或者直接柯打特製沾麵。好在入座後都可以即刻俾錢追加。¥300一份叉燒、¥100一隻蛋。
就沾麵黎講，的確好味! 麵條本身勁粗，蛋味、麥味重，掛湯度一流! 條麵瀝得好乾身，唔會有多餘水份溝淡沾湯。沾湯有好濃郁魚乾味，好鮮甜，再加入蔥，湯底真係勁濃勁香。沾湯入面已有少量叉燒粒同蛋片，叉燒粒味道唔錯，怪唔得好多男人就咁叫一個沾麵，其實唔洗加餸都得。後來追加嘅叉燒，有完完整整三大片，厚到成塊豬扒咁。肥瘦適中，肉味甜，浸落湯先食味道更佳。蛋中間溏心醬油味勁濃，亦係不錯。
專門店真係專門店，值得一讚沾湯熱到不得了，而拉麵本身都係微暖，全程食到最後，沾麵整體都唔會凍晒，呢個係沾麵好重要嘅一環。味道黎講認真不錯。而份量亦多得驚人，搞到浪費左一啲。其實真係小盛份量已經好夠! 飽飽回酒店去。
參考
煮干しらーめん玉五郎 tabelog.com/osaka/A2701/A270101/27059232/
