by admin | 4 月 10, 2014 | 2014大阪京都七天遊, 旅遊, 日本, 關西
今日係影Pre Wedding嘅大日子。先食番昨日買嘅冬甩包，隔夜包黎講唔難食。
落去樓下Blue Jean買貓爪包(¥230)做零食，雖然壓到扁左，但其實味道唔錯。外皮脆脆似墨西哥皮，中間有忌廉餡。
第一站去大阪城，先喺大阪城外圍欄影外觀，草坪仲有櫻花隧道，再行入去影大石級同大阪城門牌。
大約用左兩個鐘時間，就駕車向京都進發，喺公路上嘅吉野家解決一行人嘅午餐。叫左個多牛細飯、一個香蔥大牛飯。
食飽後第二站係伏見稻荷大社，呢個地方無打算自己黎，今次就當到此一遊。先上稻荷大社嘅千本鳥居，真係好宏偉，雖然好多人，但都取到靚景。再去一個有小橋流水嘅地方，最後就係神社同大門牌。呢個地方比想像中大好多，取景元素好日式，值得期待。
最後趕得及係五點鍾左右到嵐山。今日真係好大風好凍，係嵐山食風食到傻左。嵐山取景包括櫻花林，河邊小黃花，草坪等。之後轉上校服影小橋，用故事式拍攝，呢個配搭真係好靚。
落太陽，就係嵐電廁所換晚裝去白川。影一影白川小屋街道，滑梯噴水池，唔知邊度搵黎嘅一條迷你木橋，仲有大石橋。今日嘅行程終於完成。番酒店，上房放低行李，就衝落去食晚飯。因為都幾累，決定晚飯去就近嘅梅田拉麵小路。
by admin | 4 月 9, 2014 | 2014大阪京都七天遊, 旅遊, 日本, 關西
最後一站安排係京都駅食晚餐，再上京都塔睇夜景。18:00到達京都駅，如介紹所言，京都車站本身已經係一個值得遊覽嘅景點。車站大堂嘅劃時代建築，比睇相更宏偉大型。一個車站可以容納伊勢丹百貨、地下街Porta同The Cube，相信認真行的確可以行足一日。
由於時間唔多，只選擇略略一遊，再努力搵食。車站十樓有拉麵小路，有八間日本各地嘅人氣拉麵。其中一間係網友熱推嘅德島東大拉麵。
離開拉麵小路，穿過SKYWAY空中步道可以行番去對面岸。仲有一個空中平台可以好清楚咁望到京都塔。
18:45 開始肚餓啦，按原定計劃晚餐試試傳統日本料理美々卯。就係京都伊勢丹11樓，上面有好多間食肆似乎都幾吸引，但既然有心水就唔好心大心細。美々卯可算係烏冬名店，係烏龍壽喜鍋嘅始創店，賣相的確好吸引，但份量似乎太多，所以最後放棄，選擇兩客賣相非常吸引，而且乜都有大雜錦定食。
最鍾意日本料理嘅賣相非常吸引，相機已經餵得飽飽。第一份係美々卯弁当¥2080。有六款小食、天婦羅、烏冬、白飯同甜品。開胃六小碟，有刺身、沙律、豆腐等。刺身新鮮不在話下，京都嘅豆腐真係好好味，豆味勁重而且質感軟滑。除左跟飯外，仲有一客迷你烏冬，可以試下傳說中達到百煮不爛境界嘅名物。烏冬果然不錯，甜味重，質感軟腍但不爛，吸收左湯底嘅味道，更加一絕。
另一客係花ゆばセット¥1770。以烏冬做主菜，配天婦羅、湯葉豆腐、季節香飯同甜品。呢個烏冬用木筒裝住，食法上有唔同。先倒出醬油，加入蔥、紫菜同芝麻混和，夾起烏冬點落去，形式似沾麵。烏冬加上醬油，係另一番風味。烏冬上仲加左豆皮，味道好清甜，豆味重，京都嘅豆製品真係比其他地方做得好。值得一讚，香飯真係好香好味。飯加上野菜、蝦米、雜菌一齊煮，飯煮到入晒味，菇味勁香。
雜錦天婦羅雖然不及天婦羅名店咁厲害，但材料新鮮，香口唔油膩已經抵讚。時令甜品更因應櫻花季節改為櫻花餅，實在太好啦！櫻花餅其實係類似糯米丸裡面加上紅豆饀，糯米好似仲加入左櫻花嘅味道，非常好食。今餐埋單¥3850，折番港幣近三百蚊，係今個行程之中，最貴嘅一餐，但真係非常值得！
食飽飽準備今日最後一站：京都塔。沿路見到京都駅出名嘅流水電梯，上面仲用燈光射出圖案，咁都諗到，日本人真係好有心思。步出車站就見到京都塔已經著晒燈。
遇上中庭有噴水池燈光騷，雖然勁細，但燈光都幾靚。噴水池下方就有一間一百年歷史嘅麵包店進々堂，可惜見麵包賣得九九十十，最後放棄，另覓早餐吧。
京都塔同京都駅只有一條馬路之隔，地下係名店街，有好多手信、紀念品買。路口就係京都塔售票處，用自動販賣機買左兩張門票（¥770
）後，再經電梯上展望台。到中層就見到京塔嘅吉祥物。
京都塔雖然唔係好高，夜景算OK，總叫做京都著名景點，點都要俾面一黎，順面及個印仔。
是日由朝玩到夜晚九點終於回程。係京都駅前巴士站搭巴士出番河原町，再轉阪急返大阪，返到去成十點，真係非常十分極之充實嘅一日。
參考
京都駅 www.kyoto-station-building.co.jp
京都駅拉麵小路 www.kyoto-ramen-koji.com
美々卯 www.mimiu.co.jp
進々堂 www.shinshindo.jp
京都塔 www.kyoto-tower.co.jp
by admin | 4 月 9, 2014 | 2014大阪京都七天遊, 旅遊, 日本, 關西
大約3點到達嵐電總站北野白梅町駅，開始遊覽幾個京都著名景點。係嵐電駅行無幾遠就見到巴士站，搵岩經過金閣寺嘅巴士就上。京都巴士最好嘅係，站牌會見到巴士去到邊個位置，可以預計等車時間。車到後由後門上車，大約十幾分鐘就到達金閣寺道，落車前將早前買落嘅京都巴士一日券插入讀卡器，門票就會印上當日日期，今日內只需出示巴士券就可以享用掂行掂過嘅任搭放題。
落巴士後，跟指示行一段小斜路，好快就見到金閣寺嘅牌坊。一路行，已經感覺到人氣鼎盛。話晒金閣寺都係京都嘅代表景點，黎得京都點都要俾面一遊。金閣寺都係世界文化遺產，因為寺內主要建築舍利殿嘅外牆係用金箔裝飾，所以叫做「金閣寺」。下午三點幾陽光充沛，顯得金閣寺更加金。一個必取鏡頭係金閣寺同鏡湖池嘅池水相映，的確幾靚。入場門票¥400，其實只得一座金閣寺好睇，輕輕鬆鬆半個鐘完成。
離開金閣寺，前往附近嘅平野神社追櫻。搭巴士再步行一段路，好快就見到寫住「京都賞櫻名所」嘅指示。平野神社內有十幾個品種嘅櫻花，係京都觀賞櫻花嘅著名場所。平野神社亦出名夜櫻，紅燈籠再加上夜市攤檔，氣氛一流。雖然無緣睇夜櫻，但唔少攤檔都有開業，情境同卡通片一樣！
進入平野神社園內，見到櫻花林下一排排燈籠，非常有意境，相信夜晚燈籠著晒會有另一番風味。
近幾日係櫻花滿開期，平野神社嘅櫻花開足十成，真係好澎湃。亦有部份櫻花已落下，風吹起時仲有浪漫嘅櫻吹雪，花瓣滿地，呢個畫面絕對可遇不可求。平野神社的確係賞櫻名所，櫻花多，而庭園佈置好有氣氛，更重要嘅係無料開放，唔洗錢點會走雞，強烈推介嘅櫻花景點！
依依不捨地離開遍地櫻花，見時間尚早，臨時增遊西陣織會館。到達時間已經16:45，會館17:00關門，有十五分鐘時間要好好把握。會館有兩層展廳，介紹織布技術、和服展示等等，地下會定期舉辦和服花生騷，中間係產品專賣部。簡單睇過展覽，將時間放晒係掃手信，買左一個Hello Kitty袋仔、化妝鏡、磁貼做紀念。直到終止營業廣播準時5點離開。
參考
金閣寺 www.shokoku-ji.jp
平野神社 www.asahi-net.or.jp/~cr8y-httr/hirano
西陣織會館 www.nishijin.or.jp
by admin | 4 月 9, 2014 | 2014大阪京都七天遊, 旅遊, 日本, 關西
12:45 由竹林行番出最旺嘅商店街，真係好熱鬧好多人。嵐山商店街有七十幾間商店，有野買，有野食，用黎做午餐中轉站就最岩。
黎到嵐山有好幾樣美食係網友必食推介。第一站先去超人氣嘅豆腐名店嵯峨豆腐三忠，店仔細細好似一個涼亭咁，店外有一排木椅可以坐住食。叫左兩樣必點京都名物，にしんそば鯡魚蕎麥麵（¥450），一個ごま豆腐（¥380）。鯡魚蕎麥麵係新鮮熱辣，份量比想像中多，鯡魚似煙燻醃製過嘅魚，味道好濃好甘甜，蕎麥麵麥味重，口感煙韌，湯係清淡嘅鰹魚高湯，加上少少青蔥，簡單味美嘅京都麵食！另一味的確係新奇，芝麻豆腐口感唔似豆腐，似麻糬咁腍得黎黏黏的，好香芝麻味，加上醬油同Wasabi，感覺好微妙，但絕對入到口！
食完咸食，正好食下甜野，另一樣嵐山名物係古都芋，古都芋本舖就係三忠旁邊。古都芋一件¥150，叫左一白一黑試下。古都芋原來係類似蕃薯餅，薯蓉好幼滑，黑色嘅應該加左芝麻，但芝麻味淡淡的，分別不大。
旁邊仲有一間舖頭人氣名店京豆庵，最出名豆腐味雪糕，叫左一個混合口味（¥350）試埋芝麻味先。雪糕質感好厚實，真係好Gelato，豆腐味勁濃，芝麻味都不錯，值得推介。
簡單填肚後，計劃向嵐電車站進發，可以沿路遊覽商店街。有間賣織布製品公仔嘅嵐山ちりめん細工館值得一逛。
此行仲有一間雪糕名店京都嵐山サガパーSaga Par一定要食，就係某某食評網絡票選甜點唔知第幾名，反正就係好受歡迎嘅金獎名店。一場黎到，必試京都抹茶口味（¥300）。雪糕滑滑，抹茶味勁濃，難怪得獎！
行經一間小店，賣一串串嘅魚棒，一串¥200，一試無妨。呢間係出名食京都料理嘅良弥，其中一間輕食處，專賣小食甜品。呢枝係加左章魚嘅魚肉棒，口感不錯，魚味好香，仲有青蔥提味，抵食。
臨到達嵐電，又發現另一間名店。嵐山有嵯峨野可樂餅出名，但日本最出名嘅就係中村屋，人龍已經證明呢一點。隨便買左一個牛肉可樂餅¥100，的確唔錯，更加香脆，牛肉味更濃郁。真佩服日本人整咁多炸來炸去，但食落全無油膩感，亦唔覺熱氣！
飲飽食醉終於要離開嵐山，睇睇時間已經兩點。漫遊成個嵐山地區，的確可以用上大半日，就算Hea足整整一日，應該都不是問題，竹林附近仲有唔少神社寺廟。但我地偏愛精華遊，所以決定繼續跑行程。離開嵐山都可以搭巴士，但搭京福電鐵．嵐電算係嵐山其中一個特色，當然不能錯過。嵐電均一車票¥200，買好票後剛好趕得及上車。嵐電路線呈Y字型，由嵐山出發，得一個轉車站，落車後行過對面月台轉另一架車，就可以去到北野白梅町駅，非常簡單。櫻花季節仲有特別景點欣賞，就係北野線嘅宇多野駅、鳴滝駅之間，有一條櫻花隧道。電車路兩旁都係櫻花樹，櫻花多到好似隧道咁，成個影相構圖好靚，好多龍友會特登落車行一段路為左影呢張相。作為乘客，有幸搭到期間限定嘅櫻花車，仲見到窗外嘅櫻花，此行已經好滿足。
參考
嵐山商店街 www.arashiyama-kyoto.com/shop/arashiyama.html
豆腐茶屋 嵯峨豆腐 三忠 tabelog.com/kyoto/A2604/A260403/26017101
嵐山ちりめん細工館 www.chirimenzaikukan.com
京都嵐山サガパー www.donsarya.co.jp/sagapar
良弥 www.yosiya.jp/hondoori
嵐電 randen.keifuku.co.jp
by admin | 4 月 9, 2014 | 2014大阪京都七天遊, 旅遊, 日本, 關西
10:50 準備去搭小火車，去番嵐山駅搭JR幾個站去馬堀，車程大約10分鐘。出閘後已經有地圖指示去小火車車站嘅方向。沿住田園路旁行十分鐘左右，有櫻花滿開，又有一大片廣闊田園，非常舒服。
去到トロッコ亀岡駅，見到傳說中嘅木製車站，經過長長嘅木製斜路，到達車站月台大堂。上面已經好多人，好熱鬧，人人都好期待小火車出現。6號車發車時間係11：35，小火車於11：30駛入月台。今日實在太多人，又有旅行團，所以都搞左一段時間先迫到上車。
傳說中最佳座位係第五卡嘅雙號，因為第五卡係開放車箱，左右兩邊都無玻璃窗，睇風景更清楚，仲可以感受陣陣涼風。今日天氣唔錯，吹風都無乜問題。第五卡嘅氣氛亦好好，的確無揀錯，只係過隧道時比較凍。至於觀景方面，小火車沿住保津峽行駛，好風景嘅會見到保津峽，另一邊就會係山景。亀岡向嵐山方向的話，雙號位置頭三份二時間都會見到保津峽，後段會係山景。單號位置則相反，所以的確係雙號座位比較著數。
小火車一路行駛，見到河上唔同形狀嘅岩石，非常天然嘅風景。短短廿幾分鐘車程真係舒適寫意。仲間唔到見到有船仔經過，呢架船可算係保津峽一個豪華玩法，用兩個鐘時候泛舟遊覽保津峽，適合有時間hea遊嘅人士。
值得一提，小火車車長會一直做廣播，介紹沿途風景，亦會失驚無神唱幾句歌，好搞笑。
離開小火車站進入竹林，見到幾個嵐山常見嘅人力型男，向遊客介紹人力車遊嵐山嘅服務。再行前幾步已經進入竹林範圍，竹林裡空氣好到不得了，涼浸浸好舒服，身處竹林之中，真係好似世外桃園，宮崎駿動畫世界一樣。
竹林嘅盡頭就係野宮神社，出名祈求良緣同學業，仲有
日本神社牌坊最原始、最古老嘅黑色鳥居。完成小火車、竹林遊，向最熱鬧嘅嵐山商店街進發。參考
嵯峨野トロッコ観光鉄道 www.sagano-kanko.co.jp
野宮神社 www.nonomiya.com
by admin | 4 月 9, 2014 | 2014大阪京都七天遊, 旅遊, 日本, 關西
09:20 到達トロッコ嵯峨野售票處，按原定計劃坐11:35嘅6號車（票價¥620）
。可能職員知道我地係遊客，唔需要特別提出，佢好自然就安排第五卡坐席，仲要係雙數嘅A及B坐位，可算係全場最佳位置! Happy! 第一日到達機場完全忘記左買票呢田口，只好當日到場買，好彩錯有錯著，買到只限當日發售嘅第五卡開放車箱，實在不得不講句，早起鳥兒有著數！
參考
Saint Marc Cafe www.saint-marc-hd.com/cafe
Arinco www.arincoroll.jp
天龍寺 www.tenryuji.com
