by admin | 3 月 29, 2015 | 2015九州蜜月追櫻之旅, 九州, 旅遊, 日本
離開天神返歸，經過博多駅研究下搭車安排，為聽日行程做好準備。
臨走時，見到超人氣牛角包做緊減價促銷，即刻趁墟排隊。呢間il Fon del Mignon的確係超超超人氣，任何時候都有長長人龍，幸好夜晚促銷人唔算多，又有減價，當然要把握機會。促銷方式係一袋五個為單位，以秤重來計價錢，正常價錢大約每100g ¥190，夜間特價300g ¥300。有別於一般牛角包嘅口感，唔係香脆，而係好煙韌鬆軟，亦有點濕潤。朱古力味幾香，唔錯。
得知日本Haagen Dazs出名多款，此行目的希望試試唔同口味、又期間限定嘅Haagen Dazs。就係酒店附近嘅Family Mart買到オペラ(¥420)。面層朱古力醬加上金箔，相當豪華名貴。中間係朱古力、咖啡、蛋糕嘅夾層，仲有流心朱古力醬。味道認真濃郁，仲好幼滑，非常出色。
係天神超市買左佐賀士多啤梨，半價約¥160。一盒三粒志在試下，賣相雖好，但味道較酸。
by admin | 3 月 29, 2015 | 2015九州蜜月追櫻之旅, 九州, 旅遊, 日本
水炊き係著名博多鄉土料理之一，係有將近百年歷史嘅福岡鄉土火鍋料理。用帶骨雞肉熬出嘅高湯作為湯底，將雞肉嘅甜美充分溶入湯頭內，滋味清爽。配合高麗菜同菇類，係一款好健康嘅火鍋。最後亦可以最後放入白飯煮成雜炊完食。
黎到福岡第一餐就決定試下呢個九州版雞煲。網上搜尋過，知道「博多華味鳥」係水炊鍋名店，好味唔在講，論餐廳環境同服務都係無得頂，每席有專人負責料理。華味鳥之所以咁出名，係自設雞場，能夠培養優質「華味鳥」。但正宗水炊き料理一人前索價可高達¥5000，實在唔捨得。
原來呢間仲有兩間輕食分店「とり割烹 博多華味鳥」，就決定去天神分店一試。店面明顯無正店咁大咁豪華，但都充滿日式風味，志在一試博多嘅華味鳥絕對無問題。菜單除左水炊鍋外，仲有好多其他嘅雞肉料理，價錢仲非常親民，就算係豐富嘅套餐，價錢都係¥1000上下。
水たき華御膳 ¥1650御膳包括前菜、水炊小鍋、雞唐揚、自選丼飯、甜品，非常豐富。
水炊鍋雖然係一人前迷你版，但份量絕對交足貨。乳白色嘅清雞湯內，有兩大舊雞，仲有雞肉丸子、雞內臟、豆腐、蔬菜同菇類等。介紹話湯底係用上雞骨熬製五小時嘅雞湯，雞湯相當清甜，有別於九州乜都要濃郁嘅印象。雞肉非常新鮮，雞味濃郁，肉質細滑，沾些酸醋豉油更加能夠提出鮮味。由於雞無濃烈調味，好與壞一食就知，所以好強調雞本身嘅質素，華味鳥的確不錯吃。不得不提高麗菜吸盡湯汁非常清甜。自選該店名物親子丼，雞肉非常奶滑彈牙，加上蛋又煮得不錯，值得一吃。幸好雞唐揚唔會過份乾柴，可見雞肉品質唔錯。甜品似係柚子奶凍，非常清甜，奶味同柚子味平衡得宜。
因為華御膳已經嘆盡兩款名物，知道南蠻雞係宮崎必食，見呢度都有，又可以一試究竟。原來南蠻雞係炸雞扒配上他他汁，雞肉始終無水炊鍋嘅咁好，比較實肉，還好唔算鞋，而他他汁有非常多洋蔥，配上蛋白醬微酸，係好適合配飯。
呢餐全雞宴平平地算唔錯，水炊鍋的確值得一試，用最簡單嘅煮法，突出雞嘅優點。而親子丼亦的確唔錯，抵食!
by admin | 3 月 29, 2015 | 2015九州蜜月追櫻之旅, 九州, 旅遊, 日本
食飽飽充滿能量，就番博多駅買埋JR Pass，解決明天之後五日嘅交通安排。還好外國人專用櫃檯唔算多人，又有專責服務員招呼，好快就完成整個購買過程。先寫好訂購表格，再寫埋指定席班次時間。講起就失策，竟然唔記得印JR班次表，好彩我係每日嘅行程開頭，已經寫好當日嘅班次，抄番出黎都唔洗好多時間。到櫃枱買好兩份JR九州鐵道周遊券(北九州五日版¥9260) ，核對清楚，確定黎緊五日行程都有位坐。
第一日行程只有半日，只能夠去一啲近近地嘅景點。適逢櫻花期，第一日就去福岡嘅大濠公園睇過夠。一入福岡地鐵就有種似曾相識，的確同大阪地鐵系統好相似。搭地鐵由博多出發，只需五個站就到達大濠公園駅，再行一短小路就到公園範圍。大濠公園係一個比大更大嘅公園，好多小朋友放假都會黎玩。櫻花季節仲有唔少攤檔，有燒麵、章魚燒等美食，仲有好搞笑嘅朱古力香蕉人、撈波波遊戲等，氣氛唔錯。
公園後方就係福岡城跡，剛好遇上櫻花祭有夜間開放實在太幸運。特別將行程編黎第一晚，正好善用夜晚時間欣賞夜櫻。福岡城跡唔少地方都掛上燈泡，櫻花都開得唔錯。櫻花祭期間，城內有三個景點係有料開放，當然櫻花同燈光效果會靚好多啦，但之前已經睇過史上最靚嘅二条城夜櫻，在此就無需特別花費，志在重拾賞夜櫻氣氛。
大約行左一個鐘左右，嘆完夜櫻就搭地鐵去福岡嘅最旺區天神。
第一站係天神地下街，係旅行團必去景點。其實呢條街都好出名，可算係福岡必到。黎到天神地下街大約八點，好多商店都準備關門。得知地下街有傳說中全日本得三間嘅Hello Kitty Store，最後搵唔到呢間，只搵到一間Sanrio Vivitix，唔知係唔係變左身。見商店都關門，就沿電梯上地面，行下Solaria Stage同Parco。
Solaria Stage 三至五樓係Incube家庭用品雜貨、地下層有Reganet超市，非常多野買。
Parco 一樓有The天神地產店，搵到九州限定Hello Kitty士多啤梨歐蕾。八樓有Kiddy Land鬆弛熊專門店。
係Mr. Donut買左一個期間限定ポン・デ・いちごミルク士多啤梨冬甩(¥151)，口感好有趣，唔係麵包，係煙煙韌韌好似麻糬嘅質地，配上麵包嘅味道。冬甩面塗上士多啤梨朱古力，味道好濃。兩層冬甩皮中間仲夾左士多啤梨牛奶醬，非常士多啤梨，不錯吃。
by admin | 3 月 29, 2015 | 2015九州蜜月追櫻之旅, 九州, 旅遊, 日本
九州係拉麵王國，計劃行程時點少得試試當地拉麵名店。第一間選擇去博多駅前嘅博多一幸舍。Tabelog 3.6，係博多區拉麵第三名。小店就係博多駅前，係正門出，過馬路進入商業區，就係某條小巷轉入去就見到。店仔細細，約有三十個位，五點幾時份可算係無乜客。喺自動售賣機買票，揀左一個黑ラーメン、一個味玉入り塩豚骨ラーメン。
味玉入り塩豚骨ラーメン ¥800
塩豚骨拉麵白湯非常清，豬骨味重，鹽味亦非常突出，但唔會過咸。雖然湯底唔算好忌廉咪，但足見膠質相當重，放一陣已經結成薄皮。值得一讚湯底可算係零份油份，細碎嘅蔥花正好作為提味，係一款濃而清爽香甜嘅湯頭。拉麵係幼身直麵，落單已無特別要求麵質硬度，估計送到時係普通軟硬。但食得出麵條相當幼滑，彈牙度已經不錯。叉燒半肥瘦，似薄切豬扒，白煮無特別調味，正正食到豬肉本身的甜味已經非常足夠。至於蛋係非常出色嘅溏心，雖然未經醬油煮過，但白洽蛋本身已帶咸味，好能突顯到蛋黃本身嘅味道。
黑ラーメン ¥750
黑拉麵湯被一層黑油蓋住，熱力充滿碗內。黑油似乎係黑蒜、麻油嘅混合體，芝麻味相當濃，完整蓋過左豬骨本身嘅味道，為重口味湯頭，個人較為喜歡前者。
兩碗拉麵各有特色，亦非常出色。完食。
by admin | 3 月 29, 2015 | 2015九州蜜月追櫻之旅, 九州, 旅遊, 日本
期待以久嘅九州之旅終於黎啦!
話說原定十一月去睇紅葉，但豪斯登堡嘅千陽號五月關門大吉，的起心肝要提早去，左度右度，終於決定三月尾出發。
今次帶左七小B出發。
第一次兩公婆同步出發外遊，係新港城搭八點幾嘅A41P，個零鐘就到機場。
將行李寄艙後，就過關，全個過程相當順利，唔算多人。
完成出境手續，去食個早餐先。試左呢間新野，外國炸雞專門店。
普普通通，無乜特別。
登機係45號閘口，打卡是指定動作。
是次九州行乘坐港龍航空，航班算唔錯，早起晏返，每人$5,000加$440稅，旺季黎講，唔算勁貴。去程KA380(11:20 – 15:40)，三個零鐘時間過得好快。上機無耐就送餐，睇一陣電視就落機。
港龍嘅飛機餐都算唔錯啦，最重要係有Haagen Dazs!!綠茶素麵、日式咖哩炸豬扒飯或魚柳配馬鈴薯及蜜糖豆。
日本時間四點前到達福岡機場。係國際航廈出發，先要搭免費穿梭巴士去番國內線航廈搵地鐵站。車程十幾分鐘，途中會穿過機場跑道，要開鐵絲網閘，都幾搞笑。終點站國內線航廈，落車後行前少少就見到地鐵站入口，福岡空港駅搭兩個站就係博多駅。趁假日買地鐵一日券¥520用盡佢! 適用於福岡全市三線地鐵，每程地鐵¥200起，搭到三程已經有賺!
福岡機場最出名嘅係機場同城市嘅距離係近到想像唔到。的確! 由機場出發，穿梭巴士連地鐵都係半個鐘唔洗。到達博多駅後，喺築紫口一出，過對面馬路就到酒店，真係超級方便。五點Check in 酒店，再換上輕便行裝，正式開始九州之旅。第一件事係醫肚。
by admin | 3 月 22, 2015 | 拉麵, 日式料理, 荃灣
拉麵台風@荃灣
14/2/2013 18:00
17/5/2013 13:00
1/12/2013 18:30
22/3/2015 12:00
14/2/2013 18:00
荃灣冒出一間極好評嘅街坊拉麵，大碗抵食又好味，終於編到入行程走一趟！
魚介豬骨湯拉麵 ($78)
配料有兩大片叉燒、半隻溏心蛋筍、白蔥、紫菜盛住精製魚介粉。台風拉麵嘅湯底以豬骨同雞骨做基本，質地超杰身，勁厚重，入口係黏口忌廉咪嘅質感，足見真材實料，膠質極奇豐富。味道亦夠香甜濃郁，店方指湯底用上豬骨、豬頭、豬油、雞骨、豬手、雞腳等，經過二十小時以上烹煮而成，啖啖都係精華所在，實在美味。將小店精製嘅魚介粉混和，再多一種海鮮甜味，味道更具層次感，非常討喜，值得一飲而盡。拉麵選用粗身曲麵，選擇嘅偏硬程度亦做到，麵質煙韌，有咬口，粗麵更有效掛湯，每一條麵條吸盡湯汁，一流嘅配搭。知道此麵係店方其中一大堅持，用上日本產小麥，據說係八間日本製麵廠中精選出黎。兩大片叉燒亦非常討好，睇見師傅小心將叉燒切開，特地分一片邊位加上一片中間位，讓食客食到兩種口感。的確，一片叉燒係肉感較重，一片係半肥瘦，各具特色，肉味亦夠香，個人較喜歡半肥瘦較為腍滑。至於溏心蛋亦係用心之作，蛋白腍滑，充滿醬油香味，黃蛋半熟非常黏口香濃，不錯！
伊台風 ($88)
此款伊台風係創作拉麵，以豬骨湯做基本，加上蕃茄蓉、新鮮蕃茄、生菜同芝士，再喺客人面前用火槍燒融，淨係呈現手法已經好吸引。豬骨湯加上蕃茄蓉，味道香濃，豬骨味並無被蓋過，加一點酸甜，更為清爽。配上微焦嘅芝士味，實在回味無窮。
價錢正常，不收加一。兩款拉麵份量其實頗多，比其他名店來得大方慷慨。味道係絕對好評！絕對值得一試！
不得不提此店嘅服務亦係超好，由拉麵師傅至樓面員工個個都態度一流，熱情細心有誠意，每一句歡迎光臨及多謝都係雄厚精神的，加上九十度鞠躬，絕對係日本式優質服務。幾位拉麵師傅都係日本人，睇住師傅煮麵，見證師傅嘅技術與細心，所以先做到一碗好拉麵。真心滿意呢碗拉麵，所以全碗清光，湯亦飲得一滴不留。臨走時同師傅講左一句「おいしい!」師傅立即以一個殺死人嘅笑容回應一句「ありがとうございます！」加一個深鞠躬。從佢嘅回應，感覺到師傅嘅滿足自豪，呢個表情真係好有型。
第二次食台風，一樣咁好味，真係超級好味，少有值得無限encore之選。
濃郁嘅湯底，配上煙韌彈牙嘅拉麵。除左叉燒片外，仲有叉燒碎，溏心蛋又正。
難忘濃郁嘅湯底，骨膠原超勁，拉麵煙韌彈牙。叉燒香甜腍滑，溏心蛋又甜又濃。超正!
湯汁濃縮左，醬油味道更強勁，叉燒更係大大舊，非常豪邁。
22/3/2015 12:00
今次初試沾麵，湯底都算唔錯，比拉麵湯底加濃多少少。
出品算非常唔錯，但始終都唔夠沾麵專門店咁好。
認真講，台風拉麵真係無得輸，原因係水準保持度非常高，去咁多次都係咁好味，而且價錢唔貴，飽足度十足。
