by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
沿住下通行去搵飯食，就係新市街，有一間旅人熱推嘅吉列豬扒名店。Tabelog 爆四嘅名店，係此行評價最高嘅食肆。一點半黎到，怪不得排隊排到出門口，等左大約半個鐘終於有得入場。原來內裡都幾大，上下兩層，後方仲有半包箱形式嘅榻榻米座，每枱仲有布簾隔住，既舒適又夠私隱度。此行真係幸福，被安排到四人榻榻米座，行完兩個幾鐘熊本城正可以好好嘆番餐。
午餐時份黎度仲有特價午餐。柯打左一客ロースカツ定食同日替定食ひれかつと海老フライ定食。枱上有幾款調味料揀，配吉列炸物一定要用上芝麻，醬汁可選甜醬油味濃嘅和風醬，以及加量蕃茄醬酸味較重嘅洋風醬。自行將芝麻磨碎再加入豬扒醬，準備好靜候名物到來。
ロースカツ定食 ¥880
食物送上真係哇一聲，吸引到極點嘅吉列真係好引人胃口。豬扒包住金黃酥脆嘅外皮，炸皮同豬扒緊貼，融為一體無任何鬆脫。外皮炸得乾身，完全無多餘油份，就炸物黎講已經係高水平之作。里肌肉排有相當厚度，從切面可見豬肉仍保持肉汁同油脂，肉質非常柔軟，根本唔需要太多咀嚼。肉質新鮮，本身已有香甜鮮味，配合適量油脂更覺香味。不得不佩服炸物雖經油炸，但完全唔覺熱氣。沾上芝麻醬汁，多份芝麻香同甜酸味，真係好下飯。閒時夾一口鮮甜嘅高麗菜，增加清爽口感。香甜煙韌嘅白飯銷價不錯，可算係全程食白飯食得最多嘅一餐。麵豉湯亦非常濃甜，正好餐後一飲而盡。
ひれかつと海老フライ定食 ¥1080
炸蝦亦係高水準之作，大大隻蝦新鮮不在話下，食起黎鮮甜無比，非常美味。呢款配上豬肉好似有啲唔同，油脂略為少，但肉質仍然鬆軟，真係非常好味。
埋單外稅總計¥2116，百四蚊港紙實在超乎水準。無諗過吉列炸物係可以如此好味，炸物可以完全唔熱氣。食完咁豐富嘅一餐，完全唔覺喉嚨不適，可見其功力。Tabelog 爆四嘅質素的確相當吸引，真係好滿足難忘嘅一餐。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
黎到熊本城第一站係桜の馬場城彩苑。有桜の小路土產街同湧々座。進入城彩苑已經被佢嘅裝修吸引，木製屋仔配上紅雨傘，好有武士年代感。櫻之小路有多間食肆、土產店。雖然時間尚早，好多小店已經開始營業。
橫掂黎到，就買幾款小食試下，當做Brunch。竹輪芝士卷 (¥360) 竹輪內加入芝士，再整條沾粉漿炸脆，食起黎芝士味極濃。菅乃屋係創業二百年嘅馬肉名店，此行無特別安排馬肉料理，就以一條馬肉香腸 (¥120) 試下味，色水同味道都好似牛肉，唔覺得有乜特別啦。
好多旅人推介櫻之小路惕食天海草食嘅海膽可樂餅，原來海膽可樂餅都有幾款，係海膽嘅份量不同，呢款三倍份量海膽係城彩苑限定，一個¥390。可樂餅新鮮炸好熱辣辣，外皮鬆脆無過份油量，薄薄嘅炸皮下就係薯蓉，非常奶滑無粒粒，咬深一點就有橙黃色嘅海膽蓉唧出黎，可以用爆漿黎形容。味道好香，海味濃郁，質感滑到不得了，認真不錯。
臨走前食埋個阿蘇牛奶軟雪糕 (¥300)，奶香味勁濃，仲好有膻味，香到直情好似牛油味咁，似忌廉感覺，口感幼滑，係食過最好味嘅牛奶雪糕。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
今次九州拉麵之旅，希望嘗盡九州各種特色拉麵。特意搜尋好多拉麵排名榜，呢間暖暮就係重點之一，全因佢得到「九州拉麵總選舉第一位受賞」呢個殊榮。比再要出名嘅一蘭、一風堂排名更高，點可以唔試，就決定五點鐘黎個黃昏餐。
半熟煮玉子ラーメン ¥730
拉麵送上時，已聞到香噴噴，賣相吸引，再加上熱騰騰嘅蒸氣，真係食欲大增。相機食過後，湯底仍然熱得燙口，值得加分。白滑嘅豬骨湯講得上好忌廉咪，但可見膠質頗重，極之幼滑柔軟。呷一口湯頭，果真不得了。湯底味道極濃，有著濃郁豬骨味，豬骨嘅香甜盡現，沒帶一點腥味。味道濃郁得正好，重口味得黎無過份咸。湯頭帶輕量油份，但仍算相當清爽油膩。拌入青蔥令湯頭多一味香味，配合得正好，達到點睛之效。
至於麵條方面，係直身幼麵，麵條本身已相當幼滑，師傅亦做到硬身要求，相當煙韌彈牙。拉麵有兩片薄薄嘅叉燒，半肥瘦全白肉，無經過醬汁滷煮，但浸泡喺湯底一段時間後，叉燒已經吸盡湯汁嘅精華，令本身已鮮甜嘅肉片，變得更加滋味。溏心蛋更加不得了，賣相討好不在話下，溏心程度亦控制得好好，保持到蛋嘅柔軟度，亦做得到出色嘅溏心啫喱效果。從色澤所見，已睇得出入味程度，蛋內外都食得出香甜醬油味，可算係試過最好食嘅味蛋。
ネギごまラーメン ¥680
呢款拉麵係人氣推介之選，喺拉麵嘅基礎上加入大量芝麻同青蔥，湯底頓時變得更具層次感。豬骨湯配上芝麻更加濃厚，再加上青蔥提香，配合得恰到好處。
好多人話暖暮同一蘭好似，的確佢地有幾分似，都係以濃而不膩嘅湯頭作賣點，再加入自家醬辣醬提味。但個人認為暖暮嘅出品較一蘭黎得細緻，每一款配料都有效提升拉麵嘅質素，真係非常出色，教人回味無窮。價錢方面更加感恩，只需七百日元就可以有如此高質素出品，實在抵讚。暖暮拉麵係此行最欣賞亦最鍾意嘅拉麵，絕對係博多推介之首選。「九州拉麵受賞第一位」實在名副其實，當之無愧。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
黎到太宰府，一出車站就見到表參道商店街，有幾家賣梅枝餅嘅小店、有賣雪糕、工藝品、亦有唔少賣土產零食。黎到一定要試下太宰府名物梅ヶ枝餅。
かさの家
人龍超長，呢間かさの家真係名店，就買一個黎試下 (¥120)。可以從門外玻璃窗見證梅枝餅製作過程。先用米糰包入紅豆餡，再兩面烤焗，表皮烤得微焦，餅皮上仲見到印上梅花圖案。新鮮出爐熱得燙手，外皮有啲似較為綿密煙韌嘅麻糬，薄薄嘅餅皮包住內餡，用上日本紅豆點都無得輸，味道好香甜，配茶正好。
かのや
見商店街有咁多間梅枝餅，想試下唔同家嘅出品，見呢間かのや都有唔少本地婆婆幫襯，又買一個黎試下 (¥120)。呢間唔同嘅係，的確係純手工製作，所以等候時間長些少。呢間嘅出品較為皮脆粉厚，豆餡亦算唔錯，但較鍾情於前者。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
柳川特盛きっぷ 包一餐和食，黎得柳川一定要試地道嘅鰻魚飯。套票包括幾家柳川出名嘅鰻魚飯名店，此行嘅目標係本吉屋。睇住地圖，由柳川駅行去本吉屋約十分鐘時間，沿路有指標牌引路。十點鐘黎到原來還在準備中，店員話十點半先開放入座，所以惟有行番轉頭，周圍影下相。「元祖本吉屋 本店」外型好特別，好似田野間一間稻草搭成嘅屋咁。
元祖本吉屋創業四百年，係一間本地人都係慕名而黎嘅排隊名店。傳統蒸籠鰻魚飯就係始創於1615年，直至而家都保留住初代師傅傳承落黎嘅獨家醬汁同料理技術。
十點半入店，已經聞到香香嘅鰻魚味，進入用餐區，坐上榻榻米，靜候四百年歷史嘅鰻魚飯。喺咁優美嘅用餐區，周圍影下相。室內仲擺放左女兒節裝飾，真係好靚。室內裝修雅緻，室外有修剪得整齊嘅庭園，黎到呢度食飯真係賞心樂事。
套票包括一客指定料理，就憑款式份量，得知呢客鰻魚料理正價¥3500。套票已包括呢份定食，實在太抵。せいろ蒸し定食有一客醬菜、籠蒸鰻魚飯同鰻魚肝湯。設計出四百年歷史嘅籠蒸鰻魚飯，係想讓客人同時品嚐到熱騰騰嘅白飯同鰻魚。做法係喺塗滿醬汁的白飯上，加一層剛烤好嘅蒲燒鰻魚，然後再蒸熱，最後加上蛋絲即成。咁樣料理嘅鰻魚飯邊有可能唔好食。
上菜時睇完蒸氣熱騰騰，已經好吸引。用紅色竹籠箱裝住，有滿滿一層鰻魚，配上金黃色蛋絲，睇見已經流口水。雖然係使用優惠套票，但眼見同其他食客相比，份量一樣咁多，絕無偷工減料。先講鰻魚，真係用心烤製，鰻魚外皮焦脆，有炭燒香味。鰻魚肉質肥厚，鬆化到入口即溶。咬開魚肉，就見到閃閃發光嘅油脂，魚味濃郁無腥味。鰻魚經多次浸潤於醬汁，鰻魚已經充分入味。加些少山椒，襯上微微椒香辣味，變成另一種美味。鰻魚底下嘅白飯已經唔係白飯，而係吸收晒濃甜醬汁同鰻魚汁嘅有味飯，每一啖都滋味無窮，而飯粒蒸得透，仍保留日本米煙韌嘅口感，同鰻魚簡直係絕配。閒時加一口酸甜嘅黃瓜，飲一啖清爽嘅魚肝湯，配一口日本綠茶，非常豐富滿足嘅一餐。絕對係有生之年食過最好食嘅鰻魚飯。
離開食店，繼續聞到廚房傳出濃烈嘅鰻魚味，實在回味無窮，真教人捨不得。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
チリンチリンアイス
長崎著名景點眼鏡橋除左睇眼鏡同搵心心石之外，另一特色就係婆婆嘅玫瑰花雪糕。婆婆們會推住一架流動雪糕車，喺橋附近擺檔。雪糕整成玫瑰花型相當特別。一枝¥150，淡淡嘅奶味、蜜糖味，口感似雪葩，口味其實就一般，志在影相都可以試試。
岩崎本舖
行完哥拉巴園落山路途會經過一條小街，除左有幾間長崎蛋糕名店外，仲可以試下長崎名物「角煮饅頭」。岩崎本舖得到長崎特產最優秀獎，長崎市內總有一間喺左近。行過隨便試食，一人一舊，試食嘅份量都幾乎有四份一個包。咁試完好食又唔怕再消費，買一個角煮饅頭 (¥400) 當下午茶。新鮮熱辣到燙手絕對無得頂，包係好似饅頭咁，再軟身濕潤一啲。中間夾住一塊厚切豚角，幾乎比包皮還大。三層豬腩層次分明，滷到入晒味，甜甜嘅醬油充滿住成塊豚肉，肉質鬆軟到入口即溶，又唔會過份油膩，食完一件更加開胃。
