by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
ツル茶ん
由中華街行去思案橋都係幾分鐘，黎到呢間創業於1925年、九州最古老嘅喫茶店ツル茶ん食元祖土耳其飯。呢度好耐之前係報社，創辦人同國父有淵源，所以門口亦寫住「孫文先生故緣之地」。店裡面貼左好多坂本龍馬跟同中山先生嘅資料，亦有好多明人到訪嘅留影同簽名。店內有復古裝修，亦保留好多舊有擺設，另有一番風味。
昔なつかしトルコライス ¥1080
土耳其飯的確係Fusion菜，飯、意粉、沙律放喺同一碟。呢款招牌菜係咖哩吉列豬扒配番茄拿破崙意粉。勝在顏色鮮艷，賣相吸引，而且美味都唔錯。咖哩汁香得黎帶甜，豬扒炸得香脆，肉質不錯，唔鞋仲有肉汁。意粉汁番茄味勁濃，酸甜醒胃。而飯並唔係普通白飯，而係拌入牛油、洋蔥同粟米嘅有味飯，淡得黎有味，正好緩和口味。
フリカンデルトルコ ¥1080
另一味選擇左漢堡配黑椒意粉。牛肉漢堡非常唔錯，切開漢堡仲見到肉汁，而且肉質鬆軟有肉味，配上微酸嘅ドミグラスソース牛扒醬，不錯吃。而意粉就簡單用黑椒調味，不過不失。
埋單港幣$140有找，味道未算驚為天人，但勝在配搭有趣。看似九唔搭八，但正好感受長崎和洋融合嘅感覺。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
黎到長崎第一餐，決定去台灣旅人認為長崎必食嘅名店「吉宗」。十二點未夠到達觀光通，就喺商店街轉角，就有一間始創於1866年、非常古色古香嘅食肆。Tabelog 3.54，為長崎排隊名店。
兩層木造嘅建築物，食店裝潢都好有傳統和式風味，似足日本時代劇傳統食店。入店後要先除鞋，除鞋係因為全店使用榻榻米。除鞋後服務員大哥會大力敲打木板，通知二樓嘅服務員接應安排入座。用餐區分為兩邊，一邊係和式席地而坐，亦可選擇洋式小矮櫈。黎得日本，當然要感受最傳統嘅榻榻米啦!
吉宗係日本第一間販售茶碗蒸嘅店鋪，絕對係茶碗蒸元祖。好多本地人同旅人慕名而黎都係為左一碗蒸蛋，是日柯打一定非點不可。選擇左一客人氣御一人前、同日替角煮定食作為午餐。
御一人前 ¥1350
定食包括一碗茶碗蒸及三色飯，賣相非常靚。主角茶碗蒸好幼滑，表面同中間都無氣泡，成碗都蒸得好靚。入口更加不得了，蒸蛋雖然呈固體狀，但佢嘅柔軟度直情近似於濃湯。入口即化，蛋液自然滑入喉嚨，口感就好似薑汁撞奶一樣。食得出蒸蛋用上好多高湯，湯頭非常鮮味濃郁，無添加過份調味。加上好多高級配料，如白肉魚、雞肉、香菇、木耳、蝦、銀杏、魚板、烤星鰻等，非常豐富。無諗過茶碗蒸可以如此講究，如此美味。至於三色飯，三色配料係蛋絲、櫻花蝦鬆同雞肉鬆。賣相吸引不在話下，仲相當好味。味道偏甜，正好下飯。
角煮定食 ¥1080
特價嘅日替定食相當豐富，包括幾款前菜、沙律、一客細茶碗蒸、麵豉湯、豚角煮配白飯，仲有兩款甜品。豚角煮已經燉到入口即化嘅程度，雖然三層肥瘦相間，但係唔覺油膩感。豬肉本身甜味好足夠，加上鹹鹹甜甜嘅醬汁，正好下飯，加一點芥末仲可以增加層次感。
此餐埋單¥2430，港幣百幾蚊一餐已經感到相當豪華。此行一大得著係，完全顫覆左對茶碗蒸嘅傳統概念。再唔係定食嘅配菜，而係可以上枱作為主角一味。的確，仲相當飽肚滿足。
by admin | 4 月 5, 2015 | 2015九州蜜月追櫻之旅, 九州, 旅遊, 日本
今日七日遊選擇入住Hakata Green Hotel Annex。用後感覺非常良好，絕對值得推薦。
地點方便
今次旅程以博多為中心點，採取放射式移動，住博多周邊酒店係必然之選。初頭都有幾間酒店在候選之列，評估過後，都決定揀Green Annex，因為地點實在太太太好，因為酒店就喺博多駅隔離。經築紫口出，穿過EX-SIDE就見到，過條馬路就到，全程一分鐘腳程。方圓十米範圍已經有兩間Lawson，夜間買甜品樓下搞掂。至於搵食、買野去番EX-SIDE或Ming就搞掂。係方便到，唔介意中途先放低手信再外出血拼嘅程度。
服務周到
Green系酒店都唔細，Annex係一間小型商務酒店。接待處職員好有禮貌，英文就係一般，但都準備左翻譯指南同說明牌，指指點點都溝通無問題。每日出入，接待處職員都會禮貌打招呼，日日如是，佩服。可能酒店細，Check In算快速，而Check Out更係極速，還左房卡就得，完全無安排同事檢查房間，真係一手交一手就搞掂。臨走前寄行李亦相當安全，登記後行李會放入儲物間，唔會就咁放大堂。
房間企理 配套充足
就喺博多駅周邊，Green系酒店仲有1,2館，而Annex當然就係最新。明顯裝修設備都好新淨，非常時尚簡潔，好一間年青精品酒店。酒店唔大，十幾層，總共180間房。值得一提，酒店保安唔錯，要嘟房卡先可上樓。我地住八樓，兩邊翼，十零間房。出電梯轉角就係，走廊相當闊落光猛。由於網上訂房已經好滿，只能訂吸煙間。入房係有陣煙味，但房內有空氣加濕清淨機，開左一陣味道已經吹散，呢幾晚都唔覺辛苦。房間唔算大，同大阪新阪急咁上下，行李可攤開放床尾，仍有移動空間。房內都係時尚型格風，以黑、啡、白做主色。雙人床正常大，都算舒適，好容易適應。房間提供免費Wifi，原來仲有每房獨立Account，上網感覺非常良好。每日嘅打掃一齊都好整齊，補充物品絕唔慳。每日仲會送兩枝礦泉水，仲有包裝蒸餾咖啡。
洗手間非常型格新潮，估唔到原來都係一體成型，但裝修到同一般酒店無分別，呢個實在正。有齊沐浴露、洗頭水、牙刷等，真係乜都唔洗帶。
價錢
是次訂最平嘅雙人房，真係一個字抵! 一向都知道福岡酒店出名平，親身感受後覺得比抵更抵。六晚Semi Double不連早餐總數$4100，平均一人$2050，比上次大阪足足平千幾蚊。價錢黎講抵，就其地點可以慳到唔少車費，確係無得輸。
by admin | 4 月 5, 2015 | 2015九州蜜月追櫻之旅, 九州, 旅遊, 日本
一風堂赤丸新味 ¥278
日本7i獨家販售，真係要花啲時間搵下。打開有五包調味。湯豬骨味濃，口味幾似門市，夠厚身忌廉咪，加黑麻油提味，味道更香濃。秘醬辣醬少辣，能夠提香。麵質絕對唔係即食麵感，係切切實實嘅拉麵條，浸泡後口感都唔錯，比唔少拉麵檔質地還好。叉燒並唔係脫水版平野，浸軟後味道同口感都係正宗叉燒片，肉味幾甜。呢個拉麵$20有找，以杯麵黎講當然算貴，但質素等同一般拉麵，好有一風堂面市風味，正。
山頭火豚骨 ¥278
打開有四包材料。湯係鹽豬骨味，味道幾濃唔算油膩，鹽味較為突出，相對湯頭較為清爽。麵質唔錯，煙煙韌韌，質地幾好。叉燒浸軟後味道同口感都係正宗叉燒片，肉味幾甜。旭川風仲多左一粒酸梅，幾特別。
by admin | 4 月 5, 2015 | 2015九州蜜月追櫻之旅, 九州, 旅遊, 日本
白色士多啤梨 ¥990
小粒甜王 ¥580
大盒甜王 ¥990
Calbee じゃがりこ ¥98~108
博多櫻小雞 ¥1000
Hello Kitty Blendy Stick ¥
門司港限定香蕉¥620、長香蕉蛋糕¥540
博多通 (¥)，博多人氣手信第一名。皮非常薄，奶味重，中間係豆容煉奶味好濃，味道偏甜，粉粉幼滑，有麻糬感覺。
八女茶朱古力 (¥1200 ) 蛋白薄脆曲奇超鬆脆牛油味，茶朱古力 茶味濃
士多啤梨小雞 ¥550 牛油蛋糕加士多啤梨糖霜
Royce Pure Chocolate ¥700
Royce 薯片朱古力 ¥700
Sanio Hello Kitty 圍巾 ¥1500
by admin | 4 月 4, 2015 | 2015九州蜜月追櫻之旅, 九州, 旅遊, 日本
今早收到港龍通知，本班機會延誤半個鐘至17:15。真好，已經偷多半個鐘行街。由博多駅去機場，其實都好方便。拎左行李後，落地鐵站，由博多搭車去福岡空港只係十分鐘時間，出左地鐵站，就係國內線航廈。因為時間尚早，決定參觀下國內航廈，有幾間土產店，餐廳等。無耐，又收到港龍通知，班機再延至17:45，時間更充裕。行左一陣，就搭穿梭巴士去國際線航廈，三點未夠就到，真係守時嘅好旅客。國際線航廈有巨型山笠模型，喺大堂行下土產店，買左少少手信。
網友講到話福岡空港係排隊排隊再排隊，已經有心理準備，Check In要先排隊過行李X光。但旅客唔多，都唔洗點排隊，過程非常流暢。時間太多，周圍行下，國際廈比較多餐廳，可能人真係唔多，空間好廣闊。
由於港龍班機延誤，航空公司送上每人¥500補償，可以喺登機大堂內嘅餐店使用。
最後Hea到四點左右，進入登機大堂。裡面有更多免稅店，規模幾大，幾多野買，唔怪得呢度多人咁多。掃貨之前，先去醫醫肚，就用¥500現金券，補少少錢，換左一客熱狗同一枝蘋果汁。熱狗味道正常，蘋果汁幾好飲。
之後黎過瘋狂大掃貨。買左好多Royce朱古力、補充九州人氣土產、又買左啲Hello Kitty精品。最後用埋果張現金券，¥510買左一杯軟雪糕。呢個雪糕喺長崎哥拉巴公園見過，唔知有乜特別，當時無試，咁岩又有機會試，原來都唔錯。軟雪糕真係非常軟，軟到近溶嘅質地，忌廉感好重，奶油味重，非常香。最特別嘅原來係個筒，係蛋白餅，又香又脆，不錯吃。
到17:15終於有得登機，要同福岡さようなら。飛唔夠一陣，又到開餐時間。呢個航程真係非常緊密。
味道一般啦，記得去程果餐好似好味啲。可能呢班係加班機原故，好多材料都唔齊，飲品又唔齊，似乎都得罪好多客人，延誤真係麻煩。
三個半鐘嘅航程完成，返到香港。終於完成七日蜜月之旅。一時唔係太適應香港又熱又濕嘅天氣，好想好想留喺日本耐啲。日本，的確係一個百去不厭嘅地方。
