石澗日本料理
石澗日本料理@尖沙咀
2/8/2015 17:30
朋友提議買左呢個團購,團購介紹寫到好吸引咁,話酒店級日式放題,諗住平平地試下。團購買券連服務費,總數$193,計落又唔係平喎。同時段原價連加一 $220,即係平左三十蚊都咁大把。野食一般啦,款式選擇唔算多,味道都係咁啦。唔特別推介但照分享下野食。
基本野,有刺身、壽司、小食、炸物、串燒、日式料理、飲品等,以放題黎講,款式唔算多。
![](http://4.bp.blogspot.com/-dp8nH6C6SWA/Vb7iy8pYXJI/AAAAAAAAO8Q/lEc-a5DWSAo/s200/122.jpg)
前後3 Round壽司都係OK嘅,一口大小易入口。軍艦、鰻魚壽司同花之戀都係唔錯嘅,特別鍾意鰻魚芝士卷。
團購客送嘅一人一件鵝肝多士,個人唔食鵝肝,但多士係幾脆幾好味嘅。鹽燒雞軟骨正常,但部份燒得太燶,帶苦味。
變態人狂叫炸物,食到喉嚨痛。天婦羅蝦、蟹柳正常。忌廉薯餅唔錯,夠忌廉。一口芝士粒又幾好味喎,忌廉芝士炸左佢外脆內軟。最愛嘅芝士年糕,煙韌年糕配爆漿芝士餡。香芋栗子餅又幾好食,幾香甜,有粒粒栗子,呢個有驚喜。
整體黎講,野食係正常啦,燒野唔太掂,經常燒燶,但壽司算唔錯嘅。正價唔建議,有團購的話,可以試一次嘅,如果有兩個鐘或以上時限的話….
因為今行放題時間得個半鐘,17:30食到19:00,佢上菜速度係OK嘅,收碟清理都幾密。但放題時間實在唔夠,成件事好似打仗咁,一送上黎就食食食,直情衝鋒陷陣咁,好彩有兩位男士戰鬥力十足。今次之後,我決定以後唔會食時限得1.5hr嘅放題! 講完!