深圳親子一天遊
6/8/2019
楊記隆府·重庆江湖菜
Baby Boss
Cafe Kool
Cafe Kool @ 尖沙咀香格里拉
5/8/2019 12:00
生日黎食個自助餐，價錢唔算太貴，平日特別平。餐廳都幾闊落，食物選擇款式都多，冷盤刺身凍海鮮都好多選擇，幾款刺身全部厚切好鮮甜，仲有幾款唔同嘅壽司，日式冷麵都係值得一試。
熱盤中西式都有，仲可以自選意粉自行淋上半溶芝士。有即煮湯粉麵。中式點心都相當唔錯。
個人最鍾意嘅甜品蛋糕都非常齊全，焦焗布甸特別好食，仲有朱古力噴泉同埋即製嘅pancake，雪糕選擇都非常之多。
Dream Cafe
Dream Cafe＠旺角
4/8/2019 19:00
早排食過一間不錯嘅Cafe後，開始有舖癮繼續試Cafe，就貪佢坐得夠舒服，成晚流流可以晚晚hea，就算帶埋BB都可以悠閒慢慢食。就睇Openrice發現呢間Cafe相當多好評，今次就揀呢間黎試試。位置方便就喺朗豪坊隔離。
Cafe全梳化位，最鍾意坐得舒舒服服。揀左個二人餐，有餐湯、飲品、兩個主菜，已經非常豐富。
餐湯係南瓜湯，中間仲有一粒粒南瓜蓉，好夠味，BB都好鍾意飲。飲品揀左兩款特飲，一杯薄荷朱古力沙冰，一杯曲奇朱古力沙冰，兩杯都非常夠凍，冰打得幻幼細，味道仲好濃。
其中一款主菜係蕃茄忌廉海蝦燴意大利飯，賣相非常得，上面有好多隻蝦，非常彈牙。最鍾意個汁好濃味，帶蕃茄微酸仲有忌廉白汁中和番，非常好味。上面仲加左唔少黑椒多一份香氣。
另一主菜係澳洲羊架配牛肝菌燒汁，估唔到Cafe都可以如此高質素嘅羊架，賣相靚之外，煎得七成熟剛剛好，羊肉中間仲非常Juicy，肉質本身好腍，帶輕微膻味，正係個人最鍾意嘅味道。燒汁的確帶菌類味道，好香。下面仲有好幾舊炸薯角，新鮮熱辣，脆脆的，非常唔錯。
呢餐實在好滿足，難得係樓上Cafe都食到好味嘅西餐菜式，坐得舒服都係一大賣點。以呢個質素，價錢算是可以接受，值得Bookmark。
蝦麵店
蝦麵店@荃灣
4/8/2019 12:00
今日約左荃灣嘅朋友仔去會所玩，玩之前喺佢屋企附近食飽飩先。荃灣街坊介紹呢間蝦麵店抵食，就聽佢話試下。
中午時間黎到都幾旺場，等左一陣位。兩大一B叫一個二人餐試下。二人餐都相當豐富，包括兩括兩碗自選粉麵、兩樣小食、仲有飲品加甜品。
小食揀左一份炸魚皮，非常香脆，味道不錯。
另一款小食係類似併盆，有炸雞翼、五香滷肉卷、豆腐、串燒。份量相當多，最特別係肉卷，外皮脆脆中間係內碎加埋其他材料，口感好特別，五香味濃，又夠Juicy，好味。而串燒加沙嗲醬都非常惹味。
主菜揀左一款咖啡叻沙，自選配料係魚片四寶。湯底好有椰香，帶微辣。魚蛋、墨魚丸都夠彈牙。
福建滷麵湯底好濃味，杰杰的，材料揀左雞蛋雞絲，十足碗仔翅咁，BB都好鍾意。
最後甜品揀左亞參多士，烤得香脆，果醬酸咪咪。另一款香茅凍好清涼感覺，剛才食左d辣野即刻舒服晒。
套餐非常豐富。平常較少食檳城口味，今次一試覺得非常驚喜，味道獨特吸引，朋友仔果然無介紹錯。