鳥山明＠荃灣
21/8/2022 12:00
今日黎愉景新城行街，俾小朋友自己揀午餐食咩。女女一見到麵包超人兒童餐即刻雙眼發晒。餐廳都相當大，在親子商場開餐，BB椅、餐具齊全，一家大細都坐得舒服。
吉列黑豚豬扒定食 ＄89
一客定食內容非常豐富，有沙律，麵豉湯。特別鍾意茶碗蒸，蒸蛋滑滑的，好多材料。炸豬扒都幾脆，炸粉非常薄，中間仲好Juciy，再以一細粒抹茶麻糬作結，非常不錯。
壽司定食 ＄134
再來一份更豐富嘅壽司定食。八件不同款式嘅壽司，件件都好鮮甜。一口大小，好想食多幾粒。跟套仲有一碗牛肉湯烏冬。牛肉相當腍滑，烏冬煙煙韌韌，食完飽晒。
兒童餐A ＄85
萬眾期待嘅麵包超人餐，同圖片100％ Match。食物非常豐富，炸蝦脆卜卜，厚燒玉子甜甜的、三件小蟹柳卷、一大碗粟米，仲有湯烏冬。蝦籽多到滿溢嘅蝦籽飯，加埋橙汁同啫喱糖。各式各樣，應有盡有。小朋友明顯開胃過平時。
埋單三百多蚊，好味，又食得飽飽，又開心。
Italian Tomato@馬鞍山
17/8/2022 16:00
平時行過Italian Tomato，見到蛋糕都好吸引，不過價錢略貴，唔係太捨得食。剛見到近排做夏之感謝祭優惠，＄188可以揀五件＄45或以下嘅蛋糕， 又幾抵喎。
五件蛋糕一齊放，靚靚。
揀左兩件期間限定嘅茉香桃脆，蛋糕底係朱古力味仲有朱古力忌廉，帶少少焦糖脆脆，上面有白桃乳酪慕斯，仲有兩片白桃，非常之清甜。
藍莓芝士撻外型好吸引，撻底幾結實，加埋吉士忌廉、藍莓忌廉，仲有好多粒大大粒嘅蓋莓，粒粒都好甜。
皇牌士多啤梨糕外型好靚，忌廉打得好奶滑，蛋糕清甜，可惜士多啤梨略酸，一般啦。
最後係芒果慕絲蛋糕，慕絲中間仲加左芒果醬，酸酸甜甜不錯。
第一次試呢四款蛋糕，三十幾蚊一件係幾抵嘅，不過想食嘅款式都揀晒，試一次就算了。
17/8/2022 13:00
今日去烏溪沙搵朋友仔玩，玩完後食個好味午餐，朋友推介呢間台式餐廳。
揀左全日套餐有主食、小食加飲品，都抵食喎。
點左酥炸豬扒紅燒湯台灣麵配滷水牛肚，另外叫左杯奶蓋抹茶。
炸豬扒相當脆，炸皮好薄，啖啖肉，不錯。台灣麵湯底幾香濃，仲有少少辣味，不錯。
牛肚細細碟，味道都ok，幾夠入味。
奶蓋抹茶係跟餐加＄25，淡淡抹茶味，奶蓋都係薄薄的，呢杯飲品就一般啦。
朋友食鹽酥雞，試食左一舊，都好脆，仲好Juicy，下次可以再試。
雞吧@石門
16/8/2022 17:00
今日黎石門玩到黃昏時間，買啲野食加餸先。一期就見到呢間主打炸雞嘅外賣店。一於試下。炸雞都有好多口味，突然選擇困難症，將呢個重任交俾女女。
半半炸雞L size $138
最後直接買大盒雙併，滿足貪心之人。小朋友揀左蜜糖牛油同車打芝士，每款有八件雞。雞新鮮炸起，脆卜卜，炸漿唔算多，最好係唔油膩，咬開中間肉質好滑，仲保持到肉汁，有驚喜。蜜糖果款蜜味好夠，脆皮吸收晒蜜糖，好夠甜。另一款係配上一大盒車打芝士醬，非常杰身嘅芝士醬，芝味極濃。
意式香草肉丸 $36×2
另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁，醬汁係燒汁，小朋友都鍾意食。
雙色芋泥圓併地瓜球 $36
一盒有六大粒，粒粒都圓轆轆。外皮香脆，中間煙煙韌韌，包住甜甜嘅芋泥。另一款係一咬爆漿嘅地瓜球，蛋黃流沙唧晒出黎，有驚喜！
細細間店仔，充滿住炸雞嘅香味。拎到番屋企仲係新鮮熱辣，炸雞同兩款小丸子都風味十足。今次石門一行有意外收穫。
Flames＠黃埔
14/8/2022 12:00
10/7/2022 12:00
今日想去黃埔玩，經Openrice搵到呢間餐廳勁多好評，訂位仲有七五折優惠。點知黎到仲有一個更優惠嘅優惠，原來假日叫一份Holiday Brunch就送一份兒童餐。最後買二送二勁抵。
黑松露卡邦尼扁意粉 ＄108
可以話係食過最好食嘅Carbonara，無懸念。意粉硬度剛好，忌廉味勁重，好香黑松露味，煙肉、雜菌、洋蔥嘅配搭，整體真係好好味。
葡式燒雞扒漢堡配薯條 ＄128
非常澎湃嘅一份漢堡，雞扒大到突番出黎，好吸引。漢堡仲有番茄、生菜等配料。將佢解體，雞扒有辣味，有肉汁，可惜麵包略為乾身。薯條都係非常多，新鮮炸起，脆到不得了。
迷你炸魚薯條配他他醬
迷你？真係迷你？一大碟你話係正常Size我都信。兩大件魚柳炸得香脆，粉漿唔厚，配上偏酸嘅他他醬，好味。
番茄肉醬扁意粉
呢份就合理Size嘅迷你意粉，但味道相當不錯。番茄味濃，肉醬亦相當多。
兒童餐一份原價＄68，一個迷你主菜加一個雪糕。細細碗兩個小雲呢拿雪糕球，口感較為黏身，唔似一般平價雪糕，有驚喜。
食物賣相，味道都係非常好，單叫一份Brunch一百零蚊，跟飲品已算非常合理。而家仲送多兩份兒童餐，就真係抵到離晒譜。一定會Encore！
芝麻綠豆@黃埔 14/8/2022 15:00
招牌芝麻糊，拼鮮奶燉蛋白，熱辣辣，鮮奶燉蛋白幼滑，奶味香。中間加左芝麻糊，黑白配。
冰品任選自由配搭，揀左士多啤梨西米冰。超級冰凍，水果都好多，非常適合夏天解渴。
另一款芒果西米冰都相當旁澎湃。