尚聚德北京烤鴨
美團外賣@上梅林 27/8/2023 20:00
北京烤鴨一隻 （3-4人份）91元
美團打包外賣，有保溫袋包好，返到屋但仲係微暖。打開包裝，太豐富。兩大盒鴨肉、40片荷葉餅，仲有配料同鴨架。荷葉餅非常透薄但靭性十足，鴨肉連皮大大片，鴨肉味重，加上甜味濃醬料，青蔥同青瓜，整體調味不錯。份量相當足夠，一家四口非常飽足。
北上玩樂早返家，美團外賣真係一大發明，連片皮鴨都可以外賣返港，正！埋單85人仔，抵到爛！
鴨91元+可樂1元+打包費2元 – 紅包9元 = 85元
VIN Longing
深圳上梅林 27/8/2023 16:00
過嚟上梅林行街，行遠少少去到商業區，食個好味下午茶。咖啡廳坐得舒服，好適合消磨時間。
小店主打熱香餅班戟RMB58
擺盤賣相非常靚。你去食嘢先得喎，非常適合打卡。熱香餅蛋味濃，熱辣辣相當鬆軟，配上角色水果同埋蜜糖，非常好味。
可可冰淇淋熱香餅RMB 58
大大個雲呢拿雪糕，配上熱辣辣嘅鬆餅，冰火交融，仲有Oreo碎，好食！
賣相相當吸引，非常澎湃。
焦糖瑪奇朵 RMB38
咖啡味濃郁，奶香味重。
千藏日式燒肉專門店
深圳卓悅匯 27/8/2023 11:30
今日黎到上梅林卓悅匯，中午食日式燒肉。大聚點評買尊享超值2人餐185元。
二人餐非常豐富，前菜有生菜、泡菜、地瓜泥等，都可以再添加。地瓜泥好滑好香甜，不錯。燒烤有幾款肉類，美國安格斯牛五花薄薄地，非常腍有牛味。牛肋條牛味相當濃郁，微焦香味十足。雞腿肉都相當腍滑。只係豬五花略為少少乾柴。用生菜包好肉類，再按個人喜好添加調味料，味道不錯。值得一提調味料選擇好多，不同款式既胡椒、鹽、醬油、蒜蓉等。今餐非常豐富又好味。而家全程有服務員哥哥幫忙燒烤，服務相當不錯。
窰雞皇
美團外賣@福田岗厦店 20/8/2023 20:00
第一次試美團，外賣港人推薦最適合帶返香港嘅宵夜。外賣的上手信都有份量，打開包裝實在十分驚喜。先有唔同用途嘅手套、餐具俾得相當充足。
招牌窰雞 69.9元
外加保溫袋非常有用，仲有幾層錫紙包住，打開錫紙熱氣就攻上黎，用荷葉包住既雞，估唔到隻雞仲熱辣辣。依照食用說明手進行手撕雞。雞肉好嫰滑有肉汁，但總有一少部分略為霉，始終焗得比較耐。但雞肉相當入味，咸香得來帶一陣清香。錫紙底仲裝住滿滿嘅醬汁，最適合撈飯。
外婆菜拌飯 9.9元
有一啲粟米，菇類組成嘅有味飯，味道幾香濃，但係略為乾身。
保溫袋 2.8元 + 打包費5元 + 配送費 4.5元
聖馬可義大利西餐廳
深圳卓悅中心 20/8/2023 16:00
輕奢雙人下午茶 RMB 89
下午茶搵一間坐得舒服嘅餐廳，環境相當舒適有格調。點評買到二人餐優惠，上枱就見到非常之豪華嘅二人下午茶餐。圓形架上邊放上十幾款鹹甜小食及水果，仲配兩杯水果茶，賣相十分靚，實在好呃like。鹹點有吞拿魚多士、三文魚多士等；甜點有幾款小蛋糕及焦糖燉蛋，各樣味道都不錯。啱晒打卡呃Like!
尊寶比薩
深圳彩田萬佳店 20/8/2023 12:30
今日黎崗廈北一日遊，玩完波波就係附近食Pizza。附近係住宅區，無大型商場，所以都係一般小店，揀左呢個連鎖Pizza店評語不錯，即管試試。主打外賣，但店面都有幾張卡位可以堂食，尚算舒適。係大眾點評搶到超多優惠券仲非常抵食。
奧爾良烤雞比薩 19.9元﹕新鮮出爐熱辣辣，舖面芝士同配料，餅皮鬆化，意想不到好食。
2人必買爆款小吃2份 9.9元、單人專享下午茶 (包一份小食及汽水一罐) 7.9元、加入成為會員再送小食一份
點左唔同款或既小食，薯條、黑胡椒炸雞塊、深海鱈魚條等，都係新鮮熱辣。最好食係炸雞塊，香味十足，外脆內軟仲好Juicy。
最後再扣幾張點評優惠券，全餐只需要大約40元，一家四口食得飽飽。
