2024 復活節六人行台北之旅 第五日［5.6 宵夜］
返到酒店再嗌Uber Eat宵夜。
原火乍初@UberEat 31/3/2024 22:00
無骨鹽酥雞 NT$85: 口感比較實淨，味道濃郁
鮮炸魷魚 NT$85: 煙煙韌韌，味道幾香，呢個更好食。
雞米 NT$58
所有嘢炒埋一碟，賣相就一般，魷魚鮮甜煙韌算幾好。另外兩款較為實，一般。
冰霖古早味豆花@UberEat
黑糖刨冰 NT$108
材料非常多，芋圓、湯圓、仙草、花豆、布丁，夠晒冰凍，味道不錯。
2024 復活節六人行台北之旅 第五日［5.5 鼎泰豐 ］
31/3/2024 16:00
原訂今日下午去郵政博物館，出到捷運站突然落大雨行雷，大風大雨到完全行唔到，最後只係附近便利店抖一抖，決定取消呢個行程，改去行商場。見有時間，返酒店有放低啲手信先。
轉場去忠孝復興商圈，途中發生小插曲，原來細佬跌左隻鞋仔，問左SOGO客服搵左一輪，原來跌左係捷運站月台，唔覺意留有歷史記錄。
今日咁多蝦碌，就食餐好。呢度最出名就係鼎泰豐。去到取票，職員已話預計等兩小時。平時食飯一聽到呢個時間係從來唔會有興趣繼續等。幸好中午餐火鍋好夠頂肚，決定照排。
中間時間周圍行，去商場行下Daiso掃貨，樓上兒童部仲有得坐車車，有位座，可以休息一陣。
鼎泰豐 31/3/2024 20:00
行左個半鐘左右，大約8點就去番附近，點知去到票號去得好快，坐多一陣已經到號。係店門外先放BB車。安排坐係長梳化位，六個人坐都好闊落。揀咗幾款必吃菜式。
小籠包 NT$150 : 賣相好靚，粒粒都白白滑滑，咬落真係多汁，皮薄，肉餡甜甜的。
雞肉小籠包 NT$150: 比較原味的話呢個較淡口。
蝦肉煎餃 NT$230: 外皮煎得好脆 ，加左薄薄粉漿，餃子中間蝦肉好爽口，香甜。
菜肉餛飩湯 NT$170: 皮較為厚，清淡口味
油豆腐細粉 NT$160: 清淡，細粉幾滑。
菠菜腐竹 NT$310
紅燒半筋半肉麵 NT280: 湯底幾香，帶微辣，牛展肉味幾濃，麵條粗身有咬口。
排骨蛋炒飯 NT$280: 飯炒得乾爽，蛋味香，排骨肉比較實，味道濃。
蝦肉紅油抄手 NT$210: 醬甜辣最惹味，蝦肉抄手皮薄肉甜，不錯。
連加一 NT$2134
服務非常好，有專屬服務員照顧，跟進上菜速度，見我地食得慢，主動幫忙要求減慢。味道的確不錯，價錢實惠。但如果都要等位真係要等成兩個鐘，除非已經安排空檔好活動，否則好難吸引要再來。
2024 復活節六人行台北之旅 第五日［5.4 西門町遊］
31/3/2024 14:30
食完好好味嘅火鍋，向西門町出發，途經日間非常之靚嘅7–11 Hello Kitty主題店。全間店都係粉紅色，裏裏外外都係Sanrio嘅卡通人物。
今行選擇去聖瑪莉買鳳梨酥，包裝非常可愛，有得意嘅鳳梨仔。
鳳梨酥一口大小，出品相當認真。外皮鬆脆，中間鳳梨肉相當多，酸甜適中。
個人比較鍾意烏龍茶鳳梨酥，多一份茶香。
全場買滿NT$2000仲可以退稅，做手信一流。
2024 復活節六人行台北之旅 第五日［5.3 尬鍋］
尬鍋 31/3/2024 13:00
諗住星期日喺西門町附近難搵食，決定用Google 訂位，訂左呢間人氣勁高，評分高達4.9嘅台式火鍋店。離外鐵路道園區前行十約十分鐘就到。餐廳門面都幾大，裝修新潮，仲有好多潮語佈置。可惜座位不足，只能坐四人枱，還好枱面非常夠大，仲可以坐梳化，都幾人舒服。每位成人要一個鍋，小朋友不足120cm，可以只加NT$88與成人共鍋及享用自助吧。所以一枱四鍋都夠晒數。
每個套餐基本包括火鍋湯底、一碟肉、米飯同自助吧任食，限時90分鐘。
雪花牛肉+石頭火鍋 NT$378
板腱牛肉+酒香薑煸麻油雞湯火鍋 NT$518
去骨雞腿肉+金銀蒜頭蛤蜊雞湯火鍋 NT$398
帶皮豬五花+金銀蒜頭蛤蜊雞湯火鍋 NT$438
日灑油蔥麵線NT$25、王子麵 NT$15×4、尬鍋海鮮拼盤 NT$158
每個鍋底都有少許分別，最鍾意金銀蒜頭蛤蜊雞湯，湯底勁多蒜非常濃，仲好多蛤蜊，粒粒甜鮮，之後可以自由加湯都係有味雞湯，非常正。
每碟肉份量都超多，大大碟，賣相十分好。雪花牛肉雪花非常靚。板鍵最有牛味，雪花肥瘦適中，油香豐富。雞腿肉都幾滑。豬五花略為肥少少，滿滿油香。
自助吧先係最開心，蔬菜菇類超多，樣樣都好新鮮甜。火鍋配料有唔同類型魚蛋、香腸等，不得不提最好味係印左名店嘅魚腐，味道鮮甜爽口，果真招牌菜。旁邊仲有自助醬料，首推沙茶醬，味道濃郁。飲品有冬瓜茶，清涼解渴，仲有各式汽水。最開心係軟雪糕自助，豆乳味極濃，根本就係冰左嘅維他奶。少試芋頭味都好香甜。仲可以自由加配料，小餅乾、朱古力、黃豆粉、麻糬實在大愛，非常開心。
最後埋單連加一 NT$2,302，店員仲話今日什麼女王節仲有九折優惠，實價NT$2,050。味道一流，真係非常抵食。
2024 復活節六人行台北之旅 第五日［5.2 鐵路部園區］
31/3/2024 10:45
捷門北門站一出就到台灣博物館鐵路部園區。門票成人NT$100，兒童NT$50。門票卡設計好靚，值得打卡。
園區其實就係一個戶外嘅空地，一區區有唔同遺跡，其中有一座比較大嘅室內博物館。裝置好多都係實物原大，都幾特別。小朋友就最鍾意去兒童區，有迷你小火車坐，仲有砌火車鐵路，互動小遊戲等。內面仲有一個相當舒適嘅母嬰室。
戶外仲有一個好有格調嘅紅磚牆，影相都幾靚。行到12:30就離開。
2024 復活節六人行台北之旅 第五日［5.1 興安四海豆漿］
興安四海豆漿 31/3/2024 08:30
今日早餐想再飲豆漿，行遠少少試另一間傳統豆品店。離遠都見到排緊隊買食物。小店用餐空間都大，有張長檯適合我地，旁邊仲可以放BB車。
豆漿 NT$25﹕豆味香濃，都幾幼滑，但感覺上不及上次間洪記。
米漿 NT$25﹕第一次試深啡色米漿，味道勁濃，有點烘烤味道，唔太岩個人口味。
蒸餃 NT$8X6﹕餃子飽滿大大著，菜肉餡都幾多，味道不錯。
招牌酥皮蛋餅 NT$35﹕係傳統蛋餅再加上酥皮煎，多一分香脆油香。
肉鬆蛋餅 NT$35﹕蛋餅味道幾好，肉鬆都俾得足夠。
小籠湯包 NT$90﹕賣相相當不錯，皮唔算太薄，勝在有味肉有肉汁。
韭菜盒 NT$45﹕大大隻，外皮香脆，韭菜夠多。
咸蛋飯團 NT$45﹕大大個飯團，咸蛋油炸鬼肉鬆等相當足料。
品質味道尚算不錯，個人更喜歡洪記。
