米陀飯團
深圳皇廷廣場 28/4/2024 18:00
晚餐選擇買飯團外賣，先係小程序落單，去到即刻有得拎。
爆漿芝士飯團 17元：飯團新鮮即整，熱到新手，飯底係紫米比較實淨，切開一半見到材料非常多，呢款有芝士、火腿、菜脯、油酥、香鬆、生菜、沙拉醬，口感豐富。
原味飯團加牛肉 18元：另一款揀原味就無左芝士火腿，換滷蛋、菜脯、香菇、黃瓜，再另外加左牛肉，微辣更惹味。
18號酒館
深圳Cocopark 酒吧街 28/4/2024 17:00
黎到Cocopark搵個地方食下午茶，近排熱推得意嘅甜品，俾佢吸引左一試。位置難找，原來要出左商場外再行番入去酒吧街。裝修得意，還好空間夠大連BB車都放到。
打卡免費送乳奶杯，酸奶味道正合心意，酸奶上仲有好多乾果脆米，非常好食。
先買一份點評午餐打底 49.9元
牛油果香茅雞腿波奇飯配普士蜜桃烏龍茶﹕賣相唔錯，雞扒大大塊，調味惹味香濃，肉質都幾滑。唔知波奇飯係乜，食落就覺得唔錯，飯比較黏身，好多醬汁味道，仲加左肉鬆、紫菜、芝麻等，非常好甜好味。飲品係有氣烏龍茶，幾特別。
招牌鹽酥雞 45元﹕係福田區好評No.1，的確賣相唔錯，炸雞外皮脆脆，炸粉薄，雞啖啖肉，有肉汁，味道微辣，好惹味。
一起躺平鴨 38元﹕慕名而來一試，的確十分可愛。酸奶上仲有好多小餅乾、軟糖，舖成可愛嘅圖案。
吳莊
深圳領展中心城 28/4/2024 11:30
今次大众点评抽中一個非常正嘅二人餐，近近地就喺領展中心城嘅吳莊。中式門面，入邊裝修到好有風味，一個個卡位好似小包箱咁。
入座送上熱茶之外，仲有每人一碗雞蛋布丁，非常幼滑，有蛋味。
二人餐看似得幾樣餸，但係其實份量相當多，足夠四個人有餘。
酸梅汁 28元：估唔到一樽裝估計真係比1公升裝，四個人飲都非常足夠。味道夠濃，不錯。
石鍋豆腐19元：店員貼心建議可以做不辣版本，連小朋友都岩食。豆腐真係滑到不得了，醬汁香濃，放喺熱鍋上，熱到不停冒泡。
砂煲扁豆絲 34元：非常之夠鑊氣，扁豆切得好幼，好新鮮而且冇根。醬汁有肉碎等，好味咸鮮味，好惹味。
酸菜魚 78元：終於有機會試國內嘅正宗酸菜魚。非常大嘅一盤酸菜魚，份量澎湃。魚片非常多，每件都好滑，無骨。酸菜湯底，花椒味重帶微辣，伴菜仲有好多金菇，不錯。
麵包誘惑 33元：賣相非常之吸引，高高嘅麵包塔，原來高塔中空用雪糕堆滿，奶味香濃。麵包焗得香脆，好味。
環境，服務甚佳，食物味道非常高質素，係一個好高質素嘅霸王餐。正價都唔算貴，唔怪得咁多人排隊食。
楚采
深圳中航城君尚 21/4/2024 17:30
又抽中大眾點評零元探店。今次試呢一餐自己一定唔會俾錢食嘅湖江菜，只係貪佢幾高級，環境幾舒服，姑且試一次。
提子青檸汁：非常之大枝，提子味幾香，酸酸甜甜幾開胃。
蠶豆米拌鮮腐竹：作為一個餐前小食，冷盤，麻油味幾香，腐竹幾好味。
蕃茄絲瓜滑肉：非常多絲瓜，蕃茄，肉片幾滑，湯底係蕃茄湯帶好輕微辣味，撈飯也不錯。
沔陽蒸牛肉：就好似一個打碎咗嘅肉餅，仲有啲澱粉質，夾雜咗一絲絲牛腩，輕微辣味，味道可以，但有啲油。
蠶豆米燒蝦球：大量譚豆煮小龍蝦，醬汁非常辣，小龍蝦都好多，但個人興趣不大。
楚采櫻花糕：賣相非常靚，淺粉紅色嘅花形狀糕點。饅頭包住中間粉紅色醬汁，都食得出花香咪味道，非常特別。
呢一餐自己一定唔會俾錢食，每樣菜式對個人嚟講都非常獨特，試過一次就算。
Luckin Coffee 瑞幸咖啡
中航城君尚 21/4/2024
抹茶好喝椰 12元
抹茶味非常濃，奶味亦非常香，帶輕微嘅椰汁味，估唔到呢個配搭咁好味。
龍華壹方天地 14/4/2024
椰王拿鐵 12.9元
賣相非常討好，咖啡下半係粉紅色椰漿。椰香味更濃，就係泰國椰子糖嘅香味，配合咖啡其實味道不錯，不過個人還是喜歡比較soft嘅生椰系列。
深圳KKone 24/3/2024
珞珈櫻花拿鐵 12.1元
春日限定櫻花拿鐵
瑞幸春日季，把春天的幸運送給你
粉紅色嘅拿鐵實在太靚，得到之後瘋狂影相打卡。咖啡一貫的好飲，加上粉紅色嘅糖漿，帶少少似草莓嘅甜味。上邊忌廉奶味香濃，又幼滑，我非常鍾意呢杯咖啡。
寶安壹方城 12/2/2024
今日黎到寶安壹方城，經過瑞幸咖啡，試一試期間限定新出品，龍年醬香巧克力，優惠價18元。？可以線上點單，唔使點等。每杯都有茅台酒。本身朱古力味相當濃郁，加上酒香，有啲似酒心朱古力味道，不太甜，感覺好過醬香拿鐵。
另外叫咗杯冰吸生椰拿鐵，咖啡味香，有奶味，加上少許椰香味及冰涼嘅口感，非常解渴。
塘朗寶能環球匯 1/10/2023
醬香拿鐵、生椰拿鐵
今日終於一試特別版醬香拿鐵，本身幾鍾意佢個咖啡底，奶味香濃，加咗茅台酒之後，帶少少酒香味，合埋一齊感覺有少少怪。
第一次是熱嘅生椰拿鐵，咖啡味同奶味都幾香濃，但係熱飲味道偏甜。個人比較鍾意凍飲。
益田假日廣場 3/9/2023
卓悅匯 27/8/2023
團購買到9.9元一杯咖啡。先後試過唔同分店，買過幾款口味都唔錯。
冰吸生椰拿鐵，奶香味十足，帶椰奶香味，仲有冰冰涼涼口感，相當過癮，好適合夏天。
生酪拿鐵原來係芝士味，咖啡本身好香，奶香味之餘加微微咸香，相當幼滑。
Elephant Ground
深圳萬象天地 21/4/2024 12:00
今日落大雨，打斷咗原定嘅計劃，轉場去萬象天地試吓呢一間人氣高嘅西餐廳。位置就係平台半戶外位置，選擇坐喺開機長枱，環境相當闊落，寫意。
精選親子brunch 258元
兒童餐：卡邦尼意粉、炒蛋、薯條、橙汁。卡邦尼意粉奶香味濃味道不錯。
慢煮牛腹肉三文治：份量非常澎湃，三文治鬆軟，中間夾咗好多唔同嘅配料，牛肉、生菜，醬料等等配合得宜。薯條新鮮即炸，粗身啖啖肉。
奶油草莓鬆餅：賣相討好，鬆餅係比較實淨嘅熱香餅，厚度十足，蛋香味牛油味濃。士多啤梨非常多，仲有士多啤梨醬同埋奶油，整體配合得好好，非常飽肚。
海鹽奧利奧蛋糕：估唔到呢件蛋糕咁大件，鬆軟嘅朱古力蛋糕，中間加咗鹽味奧利奧醬，再灑上餅碎。
卡布奇諾：咖啡味道不錯。
冰搖桂花烏龍茶：冰涼，味道比較清淡。
環境舒服，套餐非常豐富，賣相又靚，味道不錯，估唔到咁飽肚，非常滿足。
