酥大興·新國潮糕點
深圳太陽百貨 19/5/2024 14:00
東門麵包品牌，人氣仲勁過鮑師傅。點評買左幾張優惠券。
海苔肉鬆小貝貝 3.99元/個﹕每個都圓圓，肉松海苔唔算特別多。蛋糕比較實淨，中間沙律醬唔算太多，肉松味甜，可惜唔夠香脆，無乜特別。
虎皮麻薯肉松卷 14.8元﹕賣相不錯，虎皮紋都整得幾靚，外皮蛋香味十足。中間包住一舊好大舊嘅麻薯，口感煙煙韌韌，非常濃密黏口，肉槐海苔份量適中，給比下去，麻薯先係一大重點。
香親香愛·紫蘇烤魚·鴛鴦锅
深圳東門茂業大廈 19/5/2024 11:00
大廈10樓有好多間餐廳。今次點評免費試烤魚。我哋一行五人可以坐到梳化卡位，非常舒適。
原創紫蘇味烤魚
第一次食烤魚，估唔到個爐咁中，與開半切非常大條。烤魚再放喺湯入邊煮，有好多紫蘇葉，花椒等等，湯底本身鹹鮮味重，帶輕微辣味，用來撈飯正好。魚肉非常滑，鮮甜。骨比較大條，所以都好適合小朋友。火鍋配料選擇薯仔片、金菇，索晒湯汁非常好味。
餐廳仲有六大免費，白飯任添，仲有冰粉自由。黑白冰粉可以自由加配糖漿及配料，最鍾意山楂條，果凍。酸酸甜甜，非常好味。
打卡送恩施小土豆，薯仔大大粒，輕微炸過，再灑上辣粉。加單牛肉小串（12元）味道正常。最鍾意紅糖糍粑，煙煙韌韌，咬開中間有流心紅糖。
一次食烤魚非常有驚喜，有興趣再試其他品牌。
星滿杯
深圳東門 19/5/2024 10:30
一公升芋泥抹茶 29元
非常澎湃的一公升飲品，仲送一個Mini杯非常可愛。一公升裝份量的確多，2至3人分享都足夠。抹茶冰沙味道都幾香濃，非常冰涼。芋泥份量多，口感算幼滑，味道不錯，勁飽肚，性價比還算可以。
一公冬芋泥紫薯鮮奶 22元
唔明點解呢杯細咁多，鮮奶加上厚重嘅芋泥紫薯，味道微甜，紫薯味還好。個人對芋泥無特別偏好，是次只係為左打卡。
瀘溪河
深圳卓悅中心 15/5/2024 17:30
今期推介龍井口味，點評買龍井麻糬優惠3.99元有一少袋。麻糬口感煙韌，茶味相當香濃，中間仲有幾粒紅豆加甜味，不錯。
下午茶套餐15元x2份﹕每份下午茶有兩件海苔小貝加兩個焗烤千層撻，相當抵食。小貝肉鬆都算幾多，蛋糕唔算太腍，醬汁唔算太多，但總算幾平衡。千層撻皮幾鬆化，油香味濃，蛋漿蛋味濃郁，整體不錯。
深圳萬象天地 3/9/2023
蔥油味一口桃酥9.9元
見特價冇睇清楚就買，以為係平時嘅甜桃蘇，點知原來係香蔥鹹味。入口非常鬆化，鹹香味十足，蔥香美濃，非常驚喜。
深圳卓悅匯 27/8/2023 18:00
海鹽芝士爆漿麻糬 點評優惠20元 細細粒，一口一粒，我落去真係要爆漿，忌廉芝士唧晒出嚟，芝士味濃郁，忍唔住一粒接一粒。
生椰貝貝 點評優惠16元
一盒四個，外皮係椰絲，中間蛋糕夾忌廉，有椰果啫喱，椰味香濃不太甜。
綠豆冰糕 點評優惠9元 可愛造型，凍冰冰，味道香甜，入口即溶，有綠豆味。
松松小貝 點評優惠16元
一盒六個，表面舖滿海苔肉鬆肉，肉鬆較為腍身，蛋糕入口比較實淨，中間有唔少蛋黃醬，整體來說可以，但明顯鮑師傅好好多。
八合里
外賣@卓悅中心 15/5/2024 17:30
第二款外賣係八合里諗住比較岩小朋友食。外賣大約等半個鐘，打包得不錯，乾淨企理。
乾炒牛河 32元
牛肉都好多，口感非常腍，牛味香濃。仲有好多菜心，河粉質地煙煙韌韌，用左醬汁炒過非常香濃。另外有一包沙茶醬，入口好香甜又有花生香味，好輕微辣味，相當不錯。另一份辣醬就非常辣。
卡打送沙茶醬一樽，必取!
Floweriness
深圳景田婦兒大廈 15/5/2024 15:30
下午茶選擇呢間靚咖啡廳食三層架。
點評買券繽紛英式下午茶118.8元
有三層架點心拼盆下午茶配三杯飲品。賣相一流，瘋狂打卡。點心有一杯提拉米蘇，口感幼滑，咖啡、忌廉芝士味平衡不錯。芝士蛋糕味道濃，口感黏稠，不錯。黑松露野菌酥塔，黑松露味又好濃，野菌味又好夠，塔餅係曲奇皮，幾鬆脆，不錯。香芒蝦酥塔，蝦肉大大件，加上香芒忌廉奶香味重帶微酸。青醬面包烘得幾脆。雙魚麵包係吞拿魚配燒三文魚多士，加上沙律醬，配搭幾得意。火腿麵包係多士配煙火腿加生菜。牛酒果盞，一個餅皮上舖滿牛油果。另外兩款相應該係餐單上轉左款，一個雜果撻味道香甜。另一個係辣肉碎撻，肉碎香甜帶辣味，好刺激。
揀左三杯飲品都唔錯，賣相仲好得。巧克力生椰可可，熱的朱古力味同生椰配合得宜，味道濃甜。凍的雖然沖淡少少但味道仍然不錯。生打椰香芒有好多芒果肉，配椰汁係絕配。
另加9.9元有多一件芝士蛋糕配咖啡。簡單揀左冰美式咖啡味純香。
一個字靚，味道還不錯。香港呢個價錢一定食唔到。
