外賣@深圳雅寶星河World Coco Park 25/8/2024 18:00
包裝非常不錯，乾淨企理。非常欣賞酸菜魚係密封錫紙包裝，可以保存到溫度，湯又冇倒瀉。
蒜泥白肉 42元：賣相非常不錯，白肉上面鋪滿蒜泥白肉本身香甜，口感爽脆，醬汁調味重口味，蒜味十足，加上辣油，非常刺激，每一片都夾咗青瓜，口感清爽，好算係印象中最好食嘅蒜泥白肉。
酸菜魚 60元：打開就見到魚肉非常多，每片都大大片，好鮮甜。湯底酸味十足，蒜味香濃，辣味唔重，更加啱個人口味。仲有好多金菇，酸菜，粉絲索晒湯汁，非常好味，送飯一流。仲有三色盆菜，香脆花生米、醬油豆腐乾、辣泡菜。
兒童餐 9.9元：有兩隻醬香雞翼，根本就係山姆燒雞嘅味道，非常入味，微辣。脆薯條，椰汁饅頭，另外仲有微甜八寶粥。
除餐奉送兩碗糖水，應該係桃膠雪耳糖水，微甜，杰杰地，非常多料，正好解膩。
估唔到呢個四川菜外賣咁好食，絕對值得encore。
深圳皇廷廣場 25/8/2024 18:30
點評抽中霸王餐，皇庭廣場近近地，試吓呢間妃予冰糖葫蘆。見到玻璃櫥窗好色彩繽紛，有好多唔同類型嘅水果冰糖葫蘆葫。霸王餐（原16元）包兩串小冰糖葫蘆，用個靚靚紙盒載住，外賣拎返屋企可以慢慢食。色彩繽紛，賣相好靚。士多啤梨配搭兩粒藍莓，冰糖外皮超級脆脆，非常香甜，士多啤梨好新鮮，咬開仲有好多果汁爆出嚟，酸酸甜甜，非常好味。另一串揀咗青提子，大大粒，冰糖脆脆之下，提子果汁更多，非常清爽。
深圳寶雅星河World Coco Park 25/8/2024 18:00
雅寶Coco world 新開的麵包店，香氣滿滿。 麵包款式相當多，價錢都幾優惠。
麻糬布甸包 （16.8元/4個）：細細個相當可愛，麻糬包味道不錯，但係比較腍身，布甸蛋味香，口感幼滑，不錯。
半熟芝士蛋糕（19元/4件）：有奧利奧口味和原味，口感濕潤，芝士味香濃，味道不錯。奧利奧版本味道都相當突出。
點評打卡送兩粒忌廉泡芙，外皮薄薄，中間忌廉餡非常多，味道微甜，奶味香濃，雪凍咗好似雪糕泡芙咁。
外賣@深圳雅寶星河Cocopark 25/8/2024 17:00
特登再嚟雅寶係因為中咗點評0元探店，有一個飯團套餐（原價50元），都幾豐富，外賣晚餐啱小朋友。
流沙雙蛋黃飯團：飯團新鮮即整，熱辣辣，材料非常多，紫米飯底，加上蛋黃之外，仲有好多肉鬆、生菜、青瓜等，醬汁亦夠多，味道不錯。
關東煮五串：自選魚蛋、金菇卷、魚板等，味道都類似，魚味幾香，索咗湯汁不加醬料清清淡淡都幾好味，小朋友好鍾意。
爆汁烤腸：熱辣辣，烤腸外皮脆卜卜，肉汁豐富，味道不錯。
手造米漿：米漿非常濃厚，微甜。
外賣@深圳雅寶星河Cocopark 10/12/2023 16:00
今日買兩個飯團做下午茶。飯團新鮮即製，拎上手時飯熱到辣手。揀咗兩個唔同味道。
黑豬香腸飯團 16元：基本飯團大塊紫菜包住好多飯，仲有好多醬菜、肉鬆等等。呢款加入黑豬香腸，香腸味都幾龍，輕微黑胡椒辣味，幾惹味。
爆漿芝士飯團 17元：呢款中間加左芝士，餡料多，芝士爆晒漿。
飯團非常飽肚，夠乾淨新鮮。
深圳雅寶星河World Cocopark 25/8/2024 16:00
悠閑下午茶（點評優惠56元）：下午茶相當豐富，一份畔尼黃金炸雞金黃鬆脆，肉汁豐富，沾上甜辣醬更加好味。椰子抹茶蛋糕呢個配搭非常特別，就係面層椰子味加上抹茶味蛋糕，在附送幾片提子。白色和綠色嘅配搭非常清爽，但係味道非常獨立，唔係好夾。餐飲包括一杯鮮椰冰咖啡，咖啡味不錯。
椰香冰芒爆爆珠冰沙 （點評優惠22元）：賣相非常靚，同宣傳相100% match。頂層係微甜鮮忌廉，加咗椰香片、抹茶餅碎，可自行加上桂花蜜糖。旁邊用新鮮芒果圍住，冰底係椰子味，相當清爽，中間有好多爆爆珠、紅豆、椰子奶凍，估唔到咁豐富。
餐廳細細間，裝修幾特別，周圍放左好多綠色植物，非常清涼夏日嘅感覺，最啱Hea時間。
深圳深業上城 25/8/2024 12:00
點評0元探店套餐 （原價130元）
小雞燉野生榛蘑：份量超多，雞肉入味，榛蘑香氣滿滿，冬粉吸收晒湯汁，送飯一流。
拔絲地瓜 ：賣相吸引，糖漿非常多，凝固咗之後脆卜卜，完整包裹每一件地瓜，地瓜肉本身好綿密，好香甜，兩者完美結合，外脆內軟，非常好味。
醬骨架 15元：骨架大大件，仲有唔少連骨嘅肉，煮得非常入味，肉質嫩滑。
京醬肉絲 49元：京醬肉絲大大碗，醬香濃厚，入晒未。配上清涼豆皮，加上各式香蔥蔬菜等等，濃味得來又相當清爽。
豬肉齊菜水餃 36元：水餃皮厚薄適中，材料豐富，加上醋和辣椒油調味唔錯。
環境舒適，坐一個半包廂，相當闊落，有BB椅以及兒童餐具提供。
