by admin | 12 月 2, 2011 | 太子, 港式
第一腸粉@太子
2/12/2011 12:30
唐唐話深水埗最出名嘅美食係腸粉…?!唐唐講緊邊間腸粉真係唔知啦，只知道「米芝蓮」選中嘅係邊間腸粉專門店。就剛好喺佢上報當日，有機會一試。
之前喺筍仔網買左$10一張團購券，可以試一款腸粉，加送豆漿一杯。原本都打算呢個星期當做下午茶，去食埋佢。點知今朝早就見到各大報章介紹新一期「米芝蓮」中選名單，呢間小店就榜上有名，而且仲俾傳媒勁煲佢開業不足一年就上榜呀，金馬獎影后德嫻姐、柏高先生都係座上客呀咁。所以立即決定，即時決定，即日解決左呢張券，以免佢日後更出名，人龍湧現，想食都無得食。
十二點幾去到，好彩等位只需一分鐘。小店地方真係淺窄，舖仔細細坐到廿多人，避免不了背貼背嘅情況。一間小店獨賣腸粉，附加兩、三款粥品同蘿蔔糕等，都咪話唔博。
豆漿﹕ 幾清甜，有豆味。正好作為等待腸粉到來嘅良伴。
蜜汁叉燒拉腸﹕ 腸粉講不上晶瑩剔透，只可以隱約見到叉燒嘅橙紅色，單靠外型，已經覺得腸粉皮唔薄，的確。白白嘅腸粉皮入口帶黏性，並無想像中咁幼滑順口。人地話配方唔同坊間喎。但我欣賞佢夠米香，即使有相當厚度，仍然非常軟熟，可能各有各食法。內餡嘅叉燒，唔知係咪特意，切得比一般大塊，存在感更好。叉燒入口亦軟腍，肥瘦適中。不得不提，腸粉豉油本身已經非常好味，甜甜咸咸，正好增加腸粉嘅香味。
招牌第一拉腸﹕ 招牌腸內餡包括菜甫以及豬肉燥，好特別好創新嘅配搭。作為腸粉亦唔錯，菜甫有爽口粒粒嘅口感，加上濃郁惹味嘅肉燥，正係好台式風味嘅感覺，比一般叉燒腸更吸引。
所有腸粉都係即叫即造，即使入座唔洗等位，但等食都需要付上相當時間。全店滿座嘅情況下，等兩碟腸粉大約等左超過二十分鐘。但腸粉送上嘅時候，係熱辣辣，非常新鮮。團購價$10一碟加送豆漿，絕對無怨言。
小店開張無耐，已經數度加價，一碟腸粉由原先嘅$15，每次加兩蚊，已經加到今時今日嘅$19。當日佢仲未上米記榜之時，唔知道有幾大吸引力，令人願意俾張廿蚊紙齋食一碟腸粉。但相信由今日開始，小店人氣越勁，人龍自然越長，加價亦係理所當然嘅事，到時肯定廿蚊都唔夠埋單。好彩，早食早著。Yeah!
by admin | 11 月 6, 2011 | 太子, 拉麵, 日式料理
大門橫丁@太子
6/11/2011 20:00
難得是日出街無帶Qpon，來一次久違了的付現金餐。要現金磅水更加要揀間好野，千挑萬選後，點中左位於通菜街嘅手打烏冬專門店，開飯網半百個好評得來不易。趁今日想食日本式，一於試下。
大門溏心手打烏冬 ($62)
初到貴境，點都要試下掛埋個名嘅招牌烏冬。呢款烏冬最適合貪心鬼，因為可以一碗過試齊此店各款名物食材。烏冬以熱鍋上菜，保持熱辣，秋冬時食越覺美味。點選人氣嘅蕃茄湯底的確唔錯，味道濃郁，酸酸甜甜，亦食到啖啖新鮮蕃茄肉，仲用埋洋蔥等材料增加湯頭嘅甜度，真係可以一滴不漏全碗飲晒。重點嘅手打烏冬算煙韌，惟有少許黏口，唔算非常滑身，但食得出麵粉天然嘅甜味，同蕃茄湯底好夾。
送烏冬嘅材料包括叉燒同豬軟骨，仲有溏心蛋一隻。兩塊半肥瘦叉燒採用厚切呈上，瘦肉部份肉味濃郁，脂肪甜而不膩。豬肉無加以燒烤，只用白煮，正好配合濃郁嘅蕃茄湯頭。豬軟骨煮得腍，但並非腍到溶晒果種，仲可以食到軟骨嘅爽脆，肉味唔錯，但瘦肉位略嫌鞋口。一大隻溏心蛋外皮呈啡黃色，睇得出經過長時間醬汁調浸，非常入味。蛋黃剛好係形固與未形固之間，非常理想嘅熟成度。配料仲有魚板、粟米同蜜豆等，俾足料。
一鍋烏冬，由湯底至烏冬，以至到材料及配料都落足心機，質素算係咁，難怪自信得連個大名都掛埋上去。六十幾蚊一鍋，價錢正常。如果有套餐，跟埋小食、飲品的話，條氣更順。
泡菜醬牛脷芝士撈烏冬 ($56)
一大pat芝士舖滿烏冬面，味道係濃郁嘅。頂層一湯匙泡菜，酸酸辣辣，獨食唔錯，撈埋芝士更加得意，就憑呢一味，就可以試驗到泡菜同芝士合體嘅化學作用。牛脷份量唔少，煮得非常腍滑，但就無左牛脷本身嘅爽口彈牙感覺。成個撈烏冬感覺新奇，非常有創意，但每樣材料都離奇地夾，味道好新鮮。
手打烏冬專門店嘅手打烏冬味道確實唔錯，但煙韌口感有待增強。整體黎講，已經算係咁。晚上八點時份略為等左十分鐘位，都算值得。每碗烏冬單價平均五、六十蚊，開價正路，質素亦正常。得閒行過想食烏冬的話，可以一去。
by admin | 10 月 30, 2011 | 太子, 甜品
Cheers Yogurt@太子
13/9/2011 18:30
30/10/2011 20:00
過左中秋節都仲未轉涼，FroYo繼續係我地嘅消暑良伴。團購又做勁抵優惠，$15買到$45現金券。咁抵，足足有七千人買左。先後兩次去食，亦見證住佢嘅興衰。
13/9/2011 18:30
原味、藍莓味乳酪，配椰果、芒果、蜜桃 ($47，團購價$17)
一張現金券夠食300g乳酪，由職員協助，好細心咁問你乳酪同配料嘅重量分配。選擇左100g原味加100g藍梅。乳酩幾幼滑，算結實。原味酸咪咪，但略嫌酸度未夠，可能因為藍梅味道更突出。藍梅味酸甜，並唔似出面嘅人工化學合成水果味，係好香甜，好新鮮嘅藍梅，可以話總結咁多次經驗，藍梅做得最好嘅一間。
今次配料破天荒採用水果配搭，其實有少少唔情願。因為當日客人都幾多，又唔想阻住後面，所以急急忙忙是但揀，揀左全部都係濕嘅配料。眼前只見到約有二十幾款水果，但唔見太多乾身配料，原來佢一樽樽周圍放，擺位唔夠集中，所以想食都搵唔到。好彩水果味道都唔錯，惟獨係芒果偏酸。
30/10/2011 20:00
原味、士多啤梨味乳酪，配朱古力麻糬、原味麻糬、Oreo ($45，團購價$15)
上次因為唔熟地頭，人又多，所以破天荒獨加水果。一向愛食乳酪多過愛食配料嘅我地，總覺得乳酪份量唔夠多。所以第二次見無乜人，金睛火眼搵番所有想食嘅乾身配料。
相隔一個半月，乳酩完全唔同晒。拎到上手已經見到乳酪呈粒粒冰狀，入口一啲都唔幼滑，就好似沙冰Smoothies咁，一粒粒，好明顯係水份過多，所以士多啤梨味非常薄弱，味道唔夠，而原味味道還算可以。但由十級好味嘅質素，一下子下滑咁多，真係非常失望。
今次全選乾身配料，Oreo落得夠重手，正好夠送晒成杯乳酪。麻糬算煙韌，甜甜地。仲有新鮮產品朱古力麻糬，只係原味加左少少朱古力味，其實無乜特別。
先後兩次去食，乳酪完全唔同晒，再食唔番新鮮、幼滑嘅質感。原本大好印象，喺一夜之間磨滅，高分直插谷底，真係唔知發生咩事。
因為第二次嘅失望經歷，相信我都唔會再去，但仍然想讚一讚佢地嘅營銷態度。做緊團購，明知個個客都係俾$45現金券，職員真係會落足心機磅足俾你，你話要幾重就幾重，職員每次唧完乳酪，甚至加完每款配料後都會小心過磅，所以能夠控制份量唔會超重，就算超重都唔會超得太過份，唔會乘機搶錢。
食過好味再翻轉頭，都能夠保住質素，繼續食得開心嘅，暫時都只有Tuttimelon同Yoppie。
by admin | 10 月 23, 2011 | 太子, 西餐
Live House@太子
23/10/2011 19:30
喺集購城用$58買左兩張團購券，去一間位於始創斜對面某一座大廈嘅地牢位置，真係行過N次都唔會留意到嘅酒吧式西餐廳試菜。
Rockn’ Roll ($42)
特式飲品有熱情果汁、檸檬汁同可樂。熱果汁其實係糖漿，搞唔勻沉晒底超甜，檸檬汁唔多覺，可樂似開左好耐走晒氣。以酒吧黎講，呢杯飲品幾失敗。
卡邦尼意粉 ($68)
唔知幾時開始，愛上左卡邦尼意粉。可能因為佢最傳統，材料簡單，可以食到廚師嘅手勢，的確呢碟意粉非常好。白汁濃稠度適中，非常掛麵。醬汁調味好，忌廉、蛋汁各自發揮出來。意粉有適當軟硬度，仍保持煙韌。材料簡簡單單，有煙肉、磨菇、少許洋蔥，整體味道剛好。可算係印象中最好嘅卡邦尼意粉之一。但份量略少，不出十啖已經完全KO。
法式香草烤羊架 ($128)
過百蚊一份羊架，有四至五舊，可算係份量正常。羊肉煮得七、八成熟，夠嫩夠腍，肥瘦適中，脂肪位嘅羶味更加係無得彈。調味清清地，只有鹽、胡椒同香料，加一層薄薄嘅燒汁，更顯羊肉本身嘅鮮味。兩個人分真係唔夠過癮，伴碟嘅薯條同脆玉瓜、茄子都唔放過，全部清晒。
環境、服務態度良好，食物亦唔錯，但出到門口總覺得唔夠飽，更帶點遺憾地離開。
吳順超之一﹕
不嬲都對呢類型嘅酒吧式餐廳興趣不大，買嘅時候係見到午餐好吸引，一心諗住$29平平地可以一試。點知booking時，佢突然限制左使用日子，話星期日午市唔用得。明明團購網話一至日適用，呢下已經有啲唔順氣。要用的話，惟有硬食星期日晚餐，改為每張券當晚市$100現金使用。
極不滿之二﹕
到場時坐左一枱約十人嘅大客，三枱二至四人，基本上唔係Full House。上菜速度未免慢得有啲過份。足足等左25分鐘先黎一杯飲品，45分鐘先將意粉送到，50分鐘羊架先出現。而當時嘅座位冷氣頗勁，食物好快已經吹到凍晒，等左咁耐想慢慢嘆都唔得。
憤怒鳥之三﹕
最後埋單$238，補差價$38，計番團購券，實價$96，食到意粉，又食羊架，價錢係抵，但以我嘅能力係可以更抵，就因為硬食晚餐，可以話失去晒預算，非常之唔順氣。
以$38呢個差價，其實大可以買多一張現金券，變相多一百蚊quota用，total $300兩個人已經好見使，叫多個意粉都仲得。以我慳得就慳嘅性格，平時喺購買嘅時候已經諗過度過計過數，按預計消費金額而決定買幾多張券，務求將差額補得越少越好。如果一早預計到要食晚餐，我絕對有理由相信會因應價錢去買多一至兩張券。唔洗就住就住，到離席時都未覺飽。
料理雖好，但因為唔心甘唔情願，總覺得有啲遺憾。
by admin | 8 月 14, 2011 | 太子, 甜品
四哥台式雪花冰專門店@太子
27/2/2011 16:00
14/8/2011 19:00
27/2/2011 16:00
今日我去了搵四哥食雪花冰。
黑白森林 ($35，團購價$20)
四哥話芝麻味係全港獨家，係唔係獨家就唔知，但都算係比一般牛奶、果汁、朱古力之外，比較少有特別嘅冰底。
冰底打得好靚，一絲絲得黎唔鬆散，整個堆得高高，齋睇已經吸引。芝麻味道好濃，就似食緊綿冰版嘅芝麻糊。入口即溶，好軟滑，涼冰冰。配料有火龍果同珍珠粉團，火龍果一向味道較清，配濃郁嘅芝麻冰竟然係唔錯。珍珠粉團甜甜地、煙煙韌韌，除左配奶茶之外，獨立食都唔錯。整體黎講唔算太甜，但芝麻味真係越食越上癮。
平時細細地食個冰都講緊要三四十蚊，今次筍仔網團購$15買$30現金券，補番$5，埋單$20。
抵食得黎，味道唔錯。但講緊雪花冰，除左台北最地道係最好之外，香港嘅Number 1 仍然都係元朗嘅綿綿冰。
後記
14/8/2011 19:00
另一個團購網又做優惠，只需$18就可以任選雪花冰一個。勁抵，唔買對唔住自己，點都要試多次。
黑馬皇子 ($37，團購價$18)
佢話係小朋友最愛，但相信朱古力魔都一樣喜歡。朱古力冰底加香蕉，再加棉花糖，完全係朱古力最佳拍檔。朱古力冰底夠濃味，仲要再加朱古力漿，點會唔夠? 團購$18絕對抵食。
by admin | 5 月 9, 2011 | 太子, 點心
一點心@太子
9/5/2011 12:30
終於一嘗米芝蓮一粒星食肆「一點心」。眼見幾次行過重重人牆堆住門口，開飯網有不下60個好評，報紙雜誌日講夜講。今次講真，期望幾高。等位30分鐘，加上運動完後的肚餓，對一點心既期望續步提高。
餐牌全部都係傳統廣東點心，選擇都算OK多。十零廿蚊一款，以點心專門店黎講，都係公價。
首輪挑戰最傳統既點心﹕燒賣、蝦餃、牛肉飯、雞絲粉卷、馬拉糕，都係一般茶樓都有，最common既點心。評語係普通過普通。連最基本既燒賣、蝦餃，都係一般貨色，可以話唐記包點$11一客有4大粒既燒賣，都足料過呢度。
腸粉乃茶樓點心最基本既食品，點都要試一碟。
oh no! 粉&厚皮，已經衰晒身為一條好腸粉最終極既錯誤。
大埔陳漢記既腸粉比佢好n倍，果種晶瑩剔透，滑一滑既粉皮，現上香香既醬油，係食一碟都唔夠。
第一round稍為好少少既，相信都係網友熱點既腐皮卷，算得上香口，皮薄餡靚。仲有牛仔骨、排骨，都叫做交足功課，香味十足，5分滿分我俾夠4分。
眼見食到半飽都未有驚喜之作，可能我地唔識貨，做唔夠research，叫錯野。OK比第二round佢平反。我地總結過隔離枱阿叔阿嬸有order過既點心，希望多人食=好食。又問埋傳菜阿姐有咩推介，正式進入round 2。
雞札、牛柏葉、鳳爪、菜苗餃、鮮竹卷、叉燒包、奶黃包。OK，算叫做合格有餘，比普通好啲啲，但未至於到達好好味呢個level。
仲有阿姐推介，日賣唔知幾多隻，新鮮出爐豐料糯米雞，好! 係唔錯既，配得起豐料呢個名。
一行四人食左約$260。一般質素，好評俾唔落手，頂多一個中評。
起碼以人均消費$60幾食一餐黎講，仲有好多其他選擇。
就以點心專門店黎講，都算不上係好評線之上。
如果咁既質素有一粒星，我只可以話我地一行四人同米記評審們既口味唔同。可能係外國人掛?! 定係當餐廳出左名後，要照顧更多既客人，質素不太如前? 好似係好多著名既小食肆都會出現既通病。係成名既代價?
如果係的話，我都好慶幸一啲我認為好食既餐廳未有上榜。起碼佢地會繼續努力保持水準，以博得街坊大眾既繼續支持，都抵我曲線好評下佢。
幾多粒星? 其實….重要咩?
