by admin | 3 月 17, 2019 | 尖沙咀, 拉麵, 日式料理
三田製麵所＠尖沙咀
17/3/2019 12:00
帶住小B出街，好難食到拉麵。難得黎到尖沙咀，路過見到三田製麵所有BB櫈，好耐無食沾麵啦，對上一次仲係幇襯銅鑼灣店，所以唔洗諗直入。
濃厚豚骨魚介沾麵 $78
個人唔介意濃味，直接呷一啖沾湯，非常濃香，魚介味重，質地好厚好杰身。麵就係粗口，剛剛好掛滿湯。叉燒算腍滑，溏心蛋不錯。
蟹肉薯餅 $38
另外叫左一客薯餅小食，外脆唔算油膩， 中間係忌廉夾雜類似蟹肉的東西，味道係不錯嘅。
非常滿足的一餐。以後可以帶阿B來食拉麵了。
by admin | 11 月 25, 2018 | 尖沙咀, 自助餐放題, 酒店
喜來登酒店 The Cafe＠尖沙咀
25/11/2018 15:00
再來一次下午茶自助餐，補充非常吸睛的甜品部
15/7/2017 15:00
四位小朋友第一次聚餐，一於來個下午茶自助餐。想食乜就食乜，又坐得舒服。
第一輪梗係食冷盤，刺身4至5款，幾鮮甜，另附自助日式冷麵。
熱盤選擇都幾多，羊架推薦，幾香口鮮味。仲有其他小食類，煎炸、點心、酥餅等，樣樣都好精緻。
迷你漢堡係幾得意嘅，岩晒小朋友食。
仲有一個粉麵檔即煮湯粉同即炒意粉。
甜品bar蛋糕款式多，味道唔錯。食過咁多款，朱古力蛋糕、芝士蛋糕不錯。
仲有即製新鮮熱辣辣窩夫，加個雪糕就最正啦。
幾款馬卡龍。
M字頭雪糕 5至6款任選，一定要狂食啦。
朋友有VIP卡，優惠價$250，呢個質素係非常抵食。
by admin | 10 月 21, 2018 | 尖沙咀, 日式料理
日悅極尚日式放題＠尖沙咀
21/10/2018 12:00
近排幾多人推介嘅親子餐廳，係食日式自助放題。不過可以更抵嘅價錢，就係食定食啦。$60左右就有一份，包少少刺身，沙津，湯。真係非常之咁抵食。有三文魚刺身同赤貝，正常質素啦。
因為係自助放題，所以飲品係出面自己揀。定食就當然係一份就揀一款飲品啦。一般汽水、枝裝、紙盒裝飲品都有。放題來黎選擇都ok。
雜錦天婦羅配冷麵 $58
天婦羅份量都唔少野，大蝦、蟹柳、南瓜、薯仔等。冷麵夠冷已經可以，味道就真係普通貨色了，總算誠意搭夠。
豚肉生薑燒 ＄58
煮得入味，味道正常，豚肉夠多足夠送飯。
稱為親子餐廳，因為場內有一個小小嘅兒童遊玩。當日人少少，幾乎包場。幾樣遊樂設施，足夠2歲左右細B玩一餐，開心一輪。
假日出街消費，每個定食$60左右嘅價錢，食物味道正正常常，有得玩有得食，邊度搵？
by admin | 8 月 11, 2017 | 尖沙咀, 自助餐放題, 酒店
Park Café Park Hotel Hong Kong@尖沙咀
11/8/2017 15:00
一路都無為意呢間酒店，原來7月尾餐廳新裝修，推出左「仲夏綠茶派對」下午茶自助餐，好吸引，Facebook仲有八折優惠，就趁生日去試試。
餐廳新裝修好光猛時尚，一入門口就見到甜品吧，實在好吸睛。
刺身有四款，算新鮮。綠味冷麵不錯，日式蟹膏多士好味，但兩樣都係極限量，從來無refill。
綠茶炸芝士雞扒幾脆，中間有流心芝士，再加綠茶蛋黃醬味道不錯。
綠茶海鮮芝士酥盒外皮幾酥脆，中間有忌廉醬
港式車仔麵
綠茶朱古力心太軟即焗，非常新鮮熱辣，外皮微脆，切開中間超級流心，朱古力帶綠茶味，好濃郁，必食之選。
甜品選擇好多，款款都好吸引，而且仲超級綠茶。
綠茶忌廉蛋糕、綠茶泡芙、芒果綠茶蛋糕、
綠茶朱古力意大利芝士蛋糕，咖啡味好重，不錯
綠茶歌劇院蛋糕，朱古力味同綠茶味幾夾
亦有其他蛋糕選擇
焗乳酪芝士蛋糕，芝士味好濃，不錯
朱古力布朗尼、迷你果撻、合桃朱古力撻
綠茶意大利芝士杯
紅桑子雲尼拿慕絲杯，酸酸甜甜不錯
紅豆綠茶奶凍，非常綠茶，好滑
奶茶奶凍奶茶味好濃，不錯
臨完場先出場嘅，綠茶雪花冰，幾夠茶味。
貫徹綠茶主題，雪糕只提供綠茶口味一大款。
本餐原價$198，優惠八折再加一，約$180，價錢唔算平。熱盤選擇唔多，反而甜品就多到食唔晒，綠茶產品夠多，夠特別，味道又不錯。以下午茶黎講，不錯吃!
by admin | 1 月 10, 2016 | BB Friendly, 兒童餐, 尖沙咀, 日式料理, 紅磡
尖沙咀
10/1/2016 13:30
吉列豬扒庵列咖哩飯 $73
標準設定係少辣，味道偏甜幾香。豬排炸得脆，麵衣唔算厚。炒蛋薄得黎夠嫰滑，蛋味幾香，不錯。
焗雞肉咖哩飯 $70
焗飯係200g所以幾細碟。望落唔錯可惜出品非常失望。飯好濕，痴得一舊舊。而咖哩粉亦撈得唔夠勻，一半飯食落無乜味，要自行加辣粉。幸好面層忌廉芝士夠多，雞肉亦可以，撈飯都無問題。
酥炸籃 $45
有2隻炸雞翼脾，炸得太乾。炸薯角幾新鮮，炸魷魚蘇粉夠薄，但太乾身略為硬。
by admin | 1 月 1, 2016 | 中環, 尖沙咀, 拉麵, 日式料理
豚王
1/1/2016 13:30
1/1/2014 18:00
1/1/2013 18:001/1/2016 13:30
＠尖沙咀唔睇唔覺，原來1月1日食豚王已經成為年度事件。今次終於有機會坐喺Bar枱，見證煮麵過程，咁至夠風味。
豚王 ($85)
賣相依然咁豐富澎湃，香氣一流。原味豚王湯底選擇多醬料，普遍油，口味正合心意。奶白色湯底入口順滑，豬骨味鮮甜濃郁，膠質豐富。首次試下加入1辣度嘅秘製辣醬，辣醬少辣，以香味為主，撈入湯之中又有另一種香氣，值得追加! 拉麵要求嘅硬度亦做到，質地實在而且煙韌。選擇肩肉叉燒，兩大片薄肉片，肉質非常柔軟，味道仲好甜。唔少拉麵店嘅叉燒係凍嘅，原來豚王會先將叉燒浸入熱湯翻熱，個人更鍾意呢種又暖又腍嘅版本。椰菜分量勁足，熟成度剛好，入口清甜。唔洗講，全碗豚王清得一滴不留。
黑王 ($95)
另一款必選係黑王。墨魚汁湯底仍然鮮甜，加入黑色嘅調味球，撈入大量味噌同肉碎，味道更豐富。選擇普通油分，的確重口味得黎亦好易入口。另外追加一隻溏心蛋 ($17) 好似略為退步，蛋白醬油味偏淡，但今次流心度不錯，還算可以。
1/1/2014 18:00＠尖沙咀
2013年1月1日嘅晚上，選擇左去豚王「開年」。六點鐘左右到達，已經排緊隊，真係誇張。
店仔細細，開放式設計，食野嘅地方係街邊行人路位置，的確好有日本街頭風味。
落單選擇左一個豚王，一個黑王。
豚王 ($80)
論香氣已經贏晒，豬骨味勁香。湯底呈奶白色，入口鮮甜濃郁，豬骨味勁濃。湯底幼滑又厚重，膠質豐富，有黏口嘅感覺。熱辣辣冬天食實在太好，飲完都唔覺得口喝，果然真材實料。選擇左硬身幼麵，白雪雪嘅直身麵條非常幼滑，好適合「雪」入口。要求嘅硬度亦做到，質地實在而且煙韌。麵條掛湯力超強，每一啖都吸收晒豬骨嘅香味。叉燒係兩大片薄身肉片，主要係瘦肉為主，但入口唔覺鞋，肉質柔軟。原裝版跟嘅配料包括木耳，亦可選青蔥或椰菜。椰菜分量落得慷慨，正好清清油膩感。
黑王 ($90)
黑王係以豚王嘅湯底作基本，加上濃濃的墨魚汁同香蒜油而成。名副其實，黑得可怕，成碗墨汁嘅程度。湯底豬骨味仍然濃郁﹛再加上濃郁嘅蒜味，墨魚汁色就夠黑，但未發現墨魚味，不過湯頭更加濃厚鮮甜。黑色的湯底上，再加上黑色嘅調味球。調味球似乎係味噌加肉碎，味道微辣，混合湯底之後，味道更具層次，真正重口味!
溏心蛋 ($15)
額外加配嘅溏心蛋，蛋黃略嫌過份凝固，不過蛋白滲透香甜嘅醬油味，而且軟滑度十足，算可以啦。
枱上仲有唔少配菜，加酸加辣自由處理，配麵亦唔錯。
八、九十蚊一碗麵，實在好貴。但八、九十一碗豚王，真係物有所值。份量十足，味道難以忘懷，已經值回票價。知道豚王人氣爆登，一直未有排隊嘅勇氣。今日終於一嘗，完全明白人氣鼎盛嘅原因。一試湯頭，已經完全被迷倒。食麵嘅時候充滿住矛盾嘅感覺，不自覺大啖狂食，但又擔心太快食完。完食後，豬骨嘅香味仍遺留於口腔之內，離開時候感受到無限滿足，又難離難捨，實在又愛又恨。
