by admin | 8 月 7, 2011 | 旺角, 甜品
Aliyoyo Frozen Yogurt Cafe@旺角
7/8/2011 14:30
又俾我捕到另一個秒殺勁抵優惠，又用五蚊雞食乳酪。
Aliyoyo地理位置唔好，話就話旺角區，但係旺角之中唔太旺嘅地區，難怪要做團購。
裝修可愛， 店內有幾隻得意公仔，特別之處係有枱椅可以喺度食，所以連個名都改做Cafe。
藍梅、益力多味乳酪，配木糠、白朱古力粒、彩針 ($39)
採取半自助型式，由職員幫你唧乳酪，自己加配料。同平時唔同嘅係，佢採用較高身嘅透明膠杯，直徑比其他乳酪店細，乳酪可以較集中向高空發展。
底層裝著益力多味乳酪，質感軟滑，似軟雪糕。但味道不夠酸，一丁點益力多味道都唔覺，反而似原味，重奶味，亦有啲似忌廉芝士味。面層加多些少藍梅試試味，味道明顯比益力多味好，淡紫色乳酪有淡淡嘅藍梅甜酸味。
配料之一嘅木糠，係非常乾身，唔小心係會食到氣咳。而白朱古力粒比黑朱古力甜，奶味較重，所以冇左朱古力嘅特濃苦味。加多些少彩針朱古力，純粹用黎點綴色彩。最唔滿意嘅係，十幾款配料之中，係冇麻糬!
一杯正價$39嘅乳酪，用團購券再補差價，只需$14。
而家乳酪店開到成街都係，可以話梗有一間喺左近。大家又唔會頂爛市，按重量計的話，差不多間間都係均一價$15/100g。
Aliyoyo以佢嘅地埋位置，難同大街大巷嘅店舖比。以乳酪嘅選擇同味道，唔夠突出，惟有搞新意思，整幾個位俾你邊涼冷氣邊嘆乳酪。
by admin | 8 月 7, 2011 | 拉麵, 日式料理, 旺角
八王子餃子@旺角
7/8/2011 13:30
試過佐敦八王子拉麵後，簡直係一試難忘。某日見到蜂買做八王子旺角餃子分店嘅優惠，諗都唔洗諗就買左兩張，一於再以平價食好野。
餃子拉麵 ($48，團購價$22)
呢碗拉麵岩晒貪心為食嘅人，可以一次過試齊餃子、味蛋同叉燒。
感覺上呢間嘅湯底同佐敦拉麵店有些少唔同。豬骨湯底質感一樣柔滑，相對油份比較少，所以冇咁油膩，但比較之下，豬骨嘅味道冇佐敦店咁超級濃郁。拉麵本身都係煙韌無比，軟硬度適中，亦都非常掛湯。三大塊日式叉燒仍然保持超高水準，有好香嘅炭燒味，肉質爽滑，而且脂肪均勻，入口即溶。溏心蛋一樣都係非常軟滑，蛋白、蛋黃都係半型固，但入味度不及拉麵店濃，似乎醃製時間不夠長。配料有齊昆布、魚板同青蔥，但最失望嘅係，唔見有爽脆嘅粟米。而八王子嘅招牌餃子，經過湯汁浸腍後，脆口不減，係香煎餃子以外嘅另一食法。整體黎講，食拉麵都係佐敦拉麵正店稍勝一籌，但餃子店呢碗拉麵都係冇令我失望，已經足夠讚好。
八王子餃子 (竹) ($52，團購價$22)
一碟太陽花型上菜嘅香煎餃子係此店嘅招牌菜。餃子煎得乾脆，但唔覺油膩。外皮超脆，一咬索索聲，但可能煎得太香口，一隻隻痴埋一齊，要打孖兩隻一齊食。咬開餃子皮，發現內餡不夠充實，有啲空虛。內餡有肉碎、雜菜等，調味似乎輕手左，味道不夠濃烈。特別嘅係，餃子餡似乎加左紫菜黎提味，味道比平時食到嘅有些少唔同。餃子汁係少少酸嘅醬油汁，餃子沾醬後，味道會好啲 。
以餃子專門店呢個名號，呢碟餃子似乎驚喜度不足。一食就覺得，大阪王將比佢還好十倍，似乎唔值上五十蚊價錢。而店舖欲以「餃子可以當飯食」黎宣傳其餃子嘅魔力，好似有啲唔夠氣。
是日優惠用$22買到食品券，可以喺六款拉麵、飯、餃子任選一款，只需要補回加一服務費。今次又可以用$27食到一碗高質素拉麵或者十二隻餃子。拉麵雖好，但不及佐敦店，而餃子確實係非常平庸。如果價錢一樣的話，我寧願選擇行遠少少，去佐敦店食過夠。
by admin | 7 月 31, 2011 | 小食, 旺角, 甜品, 荃灣
Beard Papa Sweet
17/4/2011 12:00 @旺角
31/7/2011 18:00 @荃灣
曾經誤以為佢叫麵包爸爸，原來佢係鬍子爸爸。每次行過呢間店，都聞到陣陣吉士蛋香味，好吸引，但眼見一個芭芙由$10加到$14，唔再捨得俾錢。團購燃點番呢個希望。
蜂買同Paypal合作，同鬍子爸爸推出破天荒優惠，六蚊雞可以買到廿蚊Q-pon，可以買任何Beard Papa’s同Coco Frans甜品。最後，狂掃左八張。
先後兩次去食鬍子爸爸。計過數，以補水最少嘅方法購買，務求以最抵嘅價錢食到，貫徹慳家嘅美德。每個芭芙價錢$13至$18不等，如一次過使用兩張現金券，每次有$40 quota，補番幾蚊，已經可以食到3個。
朱古力脆皮芭芙 ($14)、意大利芝士芭芙 ($16)、特濃吉士芭芙 ($14)
濃朱古力曲奇芭芙 ($14)、意大利芝士芭芙 ($16)、特濃吉士芭芙 ($14)
特濃吉士芭芙 ($14)﹕吉士芭芙係最原汁原味嘅版本，點都要試下。外型討好，脹book book，表面落左些少糖粉。芭芙外層脆脆，中間好鬆軟，有微凍嘅奶黃色吉士醬。吉士忌廉好滑，甜度適中，有好香嘅奶味，仲有雲尼拿味道。見到粒粒黑點就知道用左雲尼拿籽，香味更加突出。係唔係特濃，真係要比較過普通版先知，但吉士味道已經夠香濃，所以第二次都願意encore。
意大利芝士芭芙 ($16)﹕ 面層有微苦嘅可可粉，芭芙內層係芝士味同咖啡味忌廉，咖啡味好重，亦食到有少許酒味。Tiramisu應有嘅咖啡、芝士味都表現晒出黎。
朱古力脆皮芭芙 ($14)﹕
喺普通吉士芭芙之上，加一層香濃朱古力脆皮。
濃朱古力曲奇芭芙($14)
外型同意大利芝士芭芙差不多。芭芙面層加左朱古力曲奇皮，朱古力濃得黎有少許微苦，一粒粒口感更加豐富。
正價十幾蚊一個計，件頭都算大，三個芭芙兩人分，做下午茶係好足夠。何況而家用優惠券，差不多買一送二嘅價錢，實在係好滿意。而吉士醬落得一啲都唔吝惜，咬一啖，吉士醬就喺咀角唧晒出黎。食起黎有些少狼狽係在所難免，但不失為一種另類享受，亦係食芭芙嘅一種樂趣。
by admin | 7 月 18, 2011 | 旺角, 甜品
奧斯窩夫專門店@旺角
18/7/2011 14:00
格仔餅食得多，拉手團購今次召集甜魔，做高級格仔餅窩夫優惠。小店新開張唔係太耐，網上評語有好有唔好。$16一客窩夫加雪糕，見唔係太貴，可以一試。
奧斯窩夫&朱古力雪糕 ($38)
即係雙重朱古力，有朱古力曲奇碎同比利時朱古力醬。啡啡地色嘅窩夫，粉漿應該有加入了左朱古力，有些少朱古力甜味。面層嘅朱古力醬都幾濃，係帶點甘苦味嘅特濃朱古力，而曲奇相信係類似Oreo嘅朱古力餅碎，總之就係朱古力魔最心愛嘅配搭。
平時食嘅格仔餅係軟軟嘅，西方嘅高級格仔餅應該係外脆內軟。新鮮熱辣嘅奧斯窩夫勉強都叫做到外皮脆呢個效果，但當放涼後，好容易將脆嘅感覺變成硬。而內軟呢個感覺並唔深刻，話鬆唔鬆，話軟唔軟，總之就唔係脆啦。
整體黎講，係一啲驚喜都冇。就係一舊脆脆地、硬硬地嘅蛋糕點左啲朱古力醬。味道唔算濃烈，口感唔係十分好，即使加左朱古力雪糕，都加分唔多。
朱古力雪糕夠凍，係有冰粒果種凍法，而味道可參考牛記。冰火嘅感覺係有嘅，但一啲都唔&joy-able，好想快啲食完快啲走。因為…好熱。
熱嘅唔係話件窩夫，而係堂食嘅地方。就喺果個唔知咩大廈入面，舖頭玻璃窗外有排立食位置。好熱、好熱，熱到焗桑拿咁。好想拿拿聲，一人一啖，快啲食晒閃人。如果真係有興趣試的話，強烈建議選擇外帶，用紙盒裝住，走去附近商場，涼住冷氣邊行邊食。
完成晒整份窩夫，都冇任何滿足之感。十六蚊，當跌左。
一個如此質素嘅格仔餅要花十六蚊，我都覺得唔值。咁就更加懷疑係唔係真係有人會用$32正價去買。$32喎…諗清楚。
by admin | 7 月 18, 2011 | 旺角, 有話說, 甜品
Mamma Mia Gelato@旺角
19/6/2011 14:00
18/7/2011 13:00
何謂Gelato正確發音都唔係好sure，只知道佢係意大利甜品，比普通雪糕更低脂低糖，更健康咁話。你買我買$30現金券只需$10，就買兩張試下呢款咁新奇嘅雪糕。
19/6/2011 14:00
Blueberry Cheese & Brownies ($35，團購價$15)
藍莓芝士乳酪 Blueberry Cheese
正正式式第一次食gelato，雪糕口感黏滑，綿密，相信正係gelato與普通雪糕不同嘅質感。普通雪糕比較冰感重同質地鬆散，而gelato係好軟滑，好creamy，帶啲黏性嘅口感。藍莓芝士乳酪係聽到職員推介俾旁邊師奶嘅款式， 一啖食落味道都唔錯。有淡淡嘅芝士奶味，酸酸甜甜藍梅味，味道就似食緊涼冰冰、軟滑但較淡口嘅藍梅芝士蛋糕。
朱古力班尼斯 Brownies
以我認識Brownies係比較硬身嘅朱古力蛋糕，點樣變成gelato呢? 口感一都係軟綿幼滑，以濃郁嘅朱古力做基礎，夾雜左朱古力脆餅同朱古力碎仲有少許果仁，一個非常濃烈、令朱古力魔一啖接一啖嘅味道。味道的確係唔錯，但連嗜甜嘅人士都覺得有啲過甜，好似甜得有點過份。
18/7/2011 13:00
Vanilla Chocolate & Tiramisu ($35，團購價$15)
一拎到上手，已經睇到啲雪糕係溶溶地，直情係流汁果個情況，似乎冷凍並唔足夠，所以一路食都溶得好快。
雲尼拿朱古力 Vanilla Chocolate
就係雲尼拿加朱古力片，雲尼拿係超奶超甜，朱古力片有朱古力濃味。係一款普通不過嘅味道，而都係偏甜。
意式蛋糕 Tiramisu
呢款味道不錯呀，有香香嘅咖啡味，而酒味都特別濃郁，食到一塊塊硬硬嘅係手指餅蛋糕，真係似足tiramisu嘅口感，亦係tiramisu嘅味道，但整體黎講都係超甜。
無何否認，兩次食嘅都係軟滑嘅雪糕，入口即溶，口感上的確唔錯。但以下有幾點係令我地好不爽嘅﹕
1. 除左藍莓芝士係正常味道外，其他三款口味都係超乎正常嘅甜度。自問甜味嘅接受度都幾強，都頂唔順果種齋甜嘅感覺，真係幾膩下喎。
2. 團購網口口聲聲介紹話以$30現金係足夠食到兩個雪糕球，換句話說，團購優惠花費十大洋就可以食到兩球，平均每球五蚊。實際上，試過兩間唔同嘅店舖，都冇任何一款味道係可以$30食到兩球。睇番早前嘅網友食評，的確有部份「紅點」特別版係會貴少少，其餘嘅味道係唔需要加錢。但我睇到嘅並唔係咁，正價兩球已經開價$35，好難唔令我聯想到，佢因為要招呼團購客而特登加價。雖然十幾蚊食個雪糕都係算抵嘅，係合理價錢。但原本期望$10食到兩球，而家要$15，雖則五蚊雞唔算係啲咩大錢，但計番條數，足足係原價值嘅50%。唔係話個五大蚊，而係呢個整整五十個巴仙會令人超級咁不爽。
3. 價目唔老實已經不爽，兩個雪糕球嘅晒史更令人下唔到啖氣。每個球直徑只有大約五厘米，分分鐘可能用三、四啖份量已經完全K.O.。Gelato真係咁矜貴﹖ 而佢都好識得轉移視線，提供一個比正常湯匙仲要細一半有多嘅超細膠匙羹，等你以為可以食多幾啖，但呢個把戲呃唔到我。
4. 網上好多人都有同樣嘅意見，話呢間店嘅姐姐仔態度麻麻。親身經歷，好明確，十分顯然，非常之咁肯定，我係贊成。好多人話每當拎張Coupon出黎俾錢，姐姐仔就會變臉、面黑兼發悔氣。雖然我嘅感受未到咁極端，但的而且確，Coupon人係會被冷落，姐姐們係會擺出一個唔多想serve你嘅態度，亦好想盡快打發你走。老實說，雪糕小店唔需要五星級酒店法國餐廳級數嘅服務，就算職員小姐連最基本唧出一副親切、歡迎你光臨嘅面容都懶的話，姐姐可以唔笑，唔同啲客講多謝，唔多講一句說話都好，唔代表可以用面黑黎趕客。公司做團購都係想做宣傳，即使係冇得賺，賺番個名氣同人氣都係一件好事。倒米、趕客嘅態度只會令客人唔好受，破壞公司嘅形象，口碑生意受損，冇得賺，仲要輸埋個招牌，為乜﹖
對我黎講，只論服務態度呢一個環節，佢今次做團購，係徹徹底底咁失敗。
黑名單-ed，File Closed。
by admin | 6 月 26, 2011 | 小食, 旺角
愛爾蘭瘋薯@旺角
26/6/2011 14:00
次次下午茶時間行過登打士街都見到幾間小食店前堆滿人潮，又買飲品，又買薯條。
今次買買dot com團購用$18一次過滿足晒兩個願望。
重量級瘋薯配瘋蜜芥末、酸忌廉
特登趁唔多人時食左先。金睛火眼睇住佢即叫即炸，保證新鮮。
又係肥肥嘅粗身薯條，而家潮興，無人再食瘦骨如柴嘅牙籤薯條架啦。
份量十足，薯仔味頗濃，薯條超脆，又熱辣，又熱氣。欣賞佢幾炸、幾熱氣都好，完全冇試過滴油，絕無油膩感覺。
好唔吝嗇，好唔客氣，兩大pat嘅梳士送俾你。一直都鍾意薯條配酸味汁，特別茄汁。今次無茄汁揀，試左呢個瘋蜜芥末同酸忌廉係大開眼界。
瘋蜜芥末係一種集甜、酸、芥之大成嘅汁。有蜂蜜嘅甜味、小許芥末嘅芥辣味，仲有些少酸味。平時熱狗都會用到，但將佢放喺薯條上，原來係絕配。改個名仔仲幾襯。
酸忌廉，係微微酸嘅奶油，有啲似淡芝士，係一種清爽嘅味道，仲可以突顯到薯仔味。
老實講，雖然瘋蜜芥末嘅香濃足以令佢做晒主角，但酸忌廉嘅清淡喺尾段發揮左重要嘅中和作用，將兩種汁撈埋一齊，係另一種食法。兩個人食晒成杯重量級薯條，係會有輕微飽，但完全唔覺膩。
青蘋果梳打，有粒粒嘅青蘋果味汽水
旺角掃街唔再篤魚蛋，食下薯條當下午茶小食，係一個不錯選擇。
趁而家做泡毛，$10一個細杯仔，可以試齊兩隻汁，試下無妨。
