棉婚紀念@Lion Rock
帝京酒店Lion Rock @旺角
27/12/2016 11:00
環境不錯，有位放BB車。
半自助午餐，一份主菜、飲品。
沙律、冷盆、麵包、湯、甜品、雪糕自助，食物款式、質素比預期好。
假日原價$198，開飯網優惠85折，折實$188。
無限量供應勁多煙三文魚
香煎帶子扁意粉配海膽忌廉汁
香煎羊扒配黑醋煙肉炒椰菜、香草牛油汁
乳酪奶冰、朱古力慕斯蛋糕、藍梅芝士蛋糕、檸檬撻、Cupcake、三款Movenpick。甜品全部都不錯。
吉豚屋吉列豬扒專門店
吉豚屋吉列豬扒專門店@旺角
4/5/2016 12:00
香蔥辣味沙律醬吉列炸蝦雞扒飯 $55
炸蝦有兩大隻，仲有一塊雞扒。炸皮好乾身，應該係新鮮麵包糠，一啲都唔油膩，幾鬆化。蝦都幾新鮮彈牙，雞扒肉質都唔錯。沙律醬都幾辣，有啲頂唔順。自行狂行酸甜嘅豬扒醬都唔錯，更好就係日式芝麻醬，撈埋啲生椰菜更好味。
套餐仲跟埋飲品、湯。野菜豚肉湯真係唔錯，麵豉湯之上仲加左好多豚肉絲、蘿白、洋蔥等，非常足料。埋單再加一$61。
阿來泰式地道風味
阿來泰式地道風味@旺角
2016/3/4 13:
泰式炒金邊粉 $48
餸都算多，大蝦幾爽口、豆腐乾、花生碎、芽菜等。調味較為輕手，最後自行加酸辣醬。
新世紀美食廣場@旺角
新世紀美食廣場@旺角
24/2/2016 18:00
15/9/2013 12:00
24/2/2016 18:00
@泰國
泰式豬頸肉炒米粉 ($49)
幾夠鑊氣，乾身，足料，豬頸肉夠多，好多椰菜、芥蘭，蝦乾味重。
15/9/2013 12:00
15/9/2013 12:00
@一本日式蛋包飯
雙層芝士漢堡蛋包飯 ($58)
@星洲
星洲炸醬麵 ($36)
北京樓生日飯團
北京樓@旺角
14/8/2015 20:00
十二月靚太團陪我補祝生日，狂笑過一晚。臨食完就送上驚喜蛋糕，真係超開心。今次黎北京樓豪下，因為匯豐信用卡做Promo，有一個四人套餐做六折，野食又豐富，非常抵食。要提早BOOK位，頭圍要八點交枱，我地要傾計當然要八點入場，傾到打烊。
北京樓二小拼 (杭州芳香素腐方、七里莊酒糟醉雞)
前菜有兩小碟凍盆，素腐方即係腐皮素雞咁，用上魯汁，甜甜地幾入味。
醉雞都幾滑，酒香唔錯。
金湯瑤柱花膠海皇羹非常好味，勁足料，有瑤柱、花膠粒、仲有蝦、魚肉等，湯本身味道好夠濃，仲啖啖有餸，可惜無得飲多碗。
京爆明蝦球
蝦球沾左炸粉略為炸過，幸好粉漿唔算厚，炸左仲脆脆地。蝦味又無乜架啦，但質地好彈牙爽口，加左京爆醬，似係咕嚕醬，酸酸甜甜少少辣，醋味都幾濃，真係俾佢「俗」親。
烤北京填鴨
烤呢隻鴨要預四十五分鐘，所以都等左一陣。烤好後服務員會送上原隻全相俾你睇，之後就拎到櫃台再分屍，送到上枱已經變成一塊塊。雖然只係一食，鴨殼嘅肉唔關我地事，但淨係食皮份量都唔少。食嘅時候用一塊薄餅包住，加兩塊肉，加醬汁，再加蔥或者青瓜包好就食得。幾欣賞佢薄餅同鴨都仲係熱辣辣，鴨肉唔算肥，都幾腍幾多汁，唔錯。事後發覺，呢份野實在太大，隔離枱八個人都係食一客，我地四丁友食唔晒好正常，惟有打包。
上湯浸時菜
應該係溫室豆苗，其實算整得唔錯。但個人唔太鍾意呢種菜有陣草腥味。
無錫灌湯小籠包算OK啦。包皮都算薄，係個包頂接口位包得太厚，肉餡都幾多，肉汁都算多，可以倒滿一個湯匙，湯汁呈深黃色，味道都幾鮮甜。
香糟蔣腿蒸黃魚
睇名除左知道佢係一條黃魚，真係估唔到會咁樣上菜，造型都唔錯。原來佢條魚切開幾切，將冬菇、金華火腿、筍片夾入中間拎去蒸，所以造型都幾特別。少試一啖，魚肉幾入味，肉質都唔錯。
冰皮月餅
兩舊迷你冰皮月餅，應該係最基本綠豆餡，但係太飽無食到。
以上係四人套餐嘅野，其實份量都好多，分分鐘六個人食都仲得。
本身套餐折實$788，最後計埋啲茶芥加一，人均$220左右。其實唔理佢係唔係六折啦，總之一人二百零蚊，都算唔錯呀，真係食得好飽。所以話，有時套餐都幾抵食。
漁場台風
漁場台風@旺角
14/6/2015 12:00
荃灣台風係我最喜愛的拉麵店。旺角開左一間姐妹店，一定要支持。「漁場台風」同「台風」有唔同，漁場日間只賣沾麵，晚間只賣湯麵。漁場店面比荃灣店大，裝修好有特色，有好多日本明星、動漫公仔擺設，感覺更加輕鬆自在。
店方提供得意嘅宣傳版，教你如何正宗地食沾麵。漁場日間提供幾款沾麵。是次選擇魚介豬骨沾麵、芝麻沾麵。
魚介豬骨沾麵 ($83)
一碗係沾麵、溏心蛋、紫菜同檸檬。另有沾汁有叉燒、蔥、冬筍等配料。沾汁魚介味香，豬骨中有魚介香味，濃杰度一般，以拉麵湯黎講係超水準，但以沾汁黎講，濃度可略增會更好。拉麵方面，硬度適當，柔韌有彈力，略嫌溫度可以再降低。台風嘅溏心蛋一值都係不錯，水準保持。叉燒切為方型，肉質正常。值得推介係，食到一大半時，店員主動提供熱岩石加熱，即刻為變冷嘅沾汁重新注入熱力，溫度提升唔少，值得一讚。最後加上熱辣辣嘅清湯，提升沾汁嘅清香，都算唔錯。
芝麻沾麵($85)
沾汁再加上焙煎黑芝麻，但味道少有少提香，但未到好濃香程度。
總括來說，台風做拉麵係好出色，出乎意料嘅好，而沾麵都叫有水準，仍未算突出，但熱石誠意可加分。