觀塘海濱匯 18/8/2024 12:00
香草紅酒汁燴牛面肉配黃薑蕃茄飯 $118
牛面肉都好多件，仲有啲薯仔，紅酒汁非常濃郁，牛肉煮到腍晒，入晒味。黃薑蕃茄飯本身已經有美味嘅香氣，加埋紅酒汁，非常下飯。
卡邦尼薄餅 $168
大大個薄餅焗得啱啱好，上邊嘅芝士微焦，賣相好靚。有別於平時食開嘅蕃茄醬汁，呢個薄餅用上香濃忌廉汁，材料非常豐富，有好多芝士、煙肉，最特別係有幾隻鵪鶉蛋，一咬開就爆汁，蛋香滿滿。
迷你炸魚薯條兒童餐 $78
上次食過今次繼續要encore嘅炸魚薯條，一樣都係香脆可口，魚柳新鮮熱辣。
餐後追加兩份甜品，其中一份係士多啤梨芝士蛋糕，士多啤梨味香甜，芝士味濃郁。另一件係藍莓芝士蛋糕，芝士蛋糕嘅基礎上鋪咗酸酸甜甜嘅藍莓，非常好味。
觀塘海濱匯 4/8/2024 12:00
喺牛頭角行過去海濱匯起碼15分鐘，全程露天冇瓦遮頭熱到死。餐廳就喺商場一樓，其實玻璃窗望到海，環境都幾舒服。位置同Flames正對面，其實咪又係同一個老闆。
Brunch menu
八安士紐西蘭肉眼扒 $188 賣相幾靚，做到要求嘅七成熟，牛膻味幾香，肥瘦適中，口感不錯。配菜揀咗蔬菜。
葡式燒雞扒漢堡 $128 大大個漢堡，雞扒超級大塊。麵包本身幾香，葡式燒雞帶微辣，但呢個味道比較亞洲風味，個人就麻麻哋，幸好雞扒充滿肉汁，加咗蕃茄同埋生菜，平衡不錯。
假日兒童餐免費，每份$78，只需比加一服務費，超抵。迷你炸魚薯條，不過不失。薯條新鮮即炸，粗身好味。夏威夷薄餅呢個份量，一啲都唔迷你，薄餅有驚喜，餅底鬆軟，菠蘿超甜，大大塊火腿，醬汁夠多，不錯。
加$35要咗Tiramisu，大大杯，忌廉夠滑，蛋糕級晒咖啡， 夠濕潤，夠濃味，整體不錯。埋單$440。
位置的確麻麻，估唔到人流都幾旺，似乎都係呢個買一送一好大吸引力。
Flames @觀塘鴻圖道 28/7/2024 12:00
早幾年幫襯過黃埔分店非常鍾意呢間餐廳，剛發現原來觀塘都開咗分店，今日來觀塘行街，就決定喺度午餐。
兒童餐迷你炸魚薯條 $78
估唔到兒童餐嘅迷你炸魚薯條都咁大份，好好奇咁正常size會多成點呢？三大件魚柳炸得香脆，粉漿薄薄的，啖啖魚肉，好實在，配上偏酸味嘅他他醬，好味，小朋友最鍾意。薯條都係非常多，新鮮炸起，脆到不得了。兒童餐仲有一杯蘋果汁，實在太抵食。中
黑松露醬蘑菇牛肉漢堡 $158
非常澎湃嘅一份漢堡，賣相好吸引。漢堡包烘得鬆脆，牛肉漢堡非常厚身，牛味香濃，咬落肉汁流晒出黎。配料仲有番茄、蘑菇、生菜，好清爽，正好解油膩。醬汁係帶微酸嘅黑松露醬，整體嚟講，相當不錯，好飽足。
海鮮香草茄醬薄餅 $188
特別送上一個鐵架放起Pizza，非常吸睛。餅底較厚身好鬆化，上面鋪滿芝士，大大隻蝦，魷魚圈，仲有一大片煙三文魚，實在太豐富。
午餐每份都送餐飲，埋單$460左右。食物選擇唔少，小朋友最鍾意嘅漢堡、Pizza同香口野都有，份量仲相當多，以上三款已經非常豐富，兩大兩小食到捧住個肚走。雖然喺觀塘地鐵站行過嚟有少少距離，但勝在環境舒適，又提供BB椅，全套兒童餐具，非常適合一家大細，會encore！
炑八韓烤親子餐廳@觀塘
18/6/2023 12:00
慶祝父親節。
$158 每位兒童入場費包一份兒童餐，揀咗一款小兔蛋包飯，一份蝸牛紫菜包飯。每份兒童午餐賣相都非常之得意可愛，份量都足夠。蝸牛壽司造型實在太可愛。
韓國公主裙蛋包飯城堡賣相都相當及正，立體感十足，但播放味道都不錯。
每位成人最低消費$150 ，揀咗幾款燒烤同埋幾款熱食。
芝士無骨炸雞$158、蜂蜜牛油味$118，炸雞炸得香脆，啖啖肉，唔油膩，調味都落得足夠。
燒烤揀咗牛舌$138、韓牛前胸肉$158、厚切五花腩$138、烤豬五花$118。有爐邊雞蛋無限任加，仲有各式韓式小食、生菜都可以添加。
王牌士多啤梨乳酸梳打$48
消費都唔平，勝在有兒童遊樂區有波波池，有得食有得玩，消磨半日都算可以。
5/5/2019 13:00
新開親子餐廳賣廣告賣得咁行，搞到我都心思思趁下墟。
餐廳位於觀塘，地點實在太唔就腳，出左地鐵站仲要行近十五分鐘，唔係有什麼特別係絕對唔會行過黎。約左5月5日一點場，提早少少到已見一家大細排隊等入場。
一入場就見到兒童遊樂區，靚係的確幾靚，但地方唔算大，波波池、廚房玩具等，總算應有盡有。入場第一件事就係幫小朋友租韓服，兩歲碼嘅碼岩岩好。韓服仍好新淨，影相幾靚。
睇睇餐牌，之前廣告所賣嘅套餐已經瘋狂加價，睇落唔太抵食，最後決定散叫幾種過下口癮。另外，隨餐奉送前菜尤其泡菜係不錯的。
甕配韓牛五花肉 $168
只係叫左一款燒烤食品，兩大條五花肉，調味不錯的。燒烤來講，反而最突出係爐邊泡菜蛋同芝士粟米，無限任添，而且味道非常好味，絕對係MVP之選。
蜂蜜牛油炸雞半隻 $88
炸得幾香口，仍有肉汁，味道還好，薯條都非常新鮮熱辣。
韓式炒粉絲 $78
配料夠多，味道不錯，幾有鑊氣，又夠大碟，抵食。
荔枝梳打 $36
味道是不錯的，也夠大杯。
觀塘裕民坊 2/4/2023 12:00
午餐選擇非常多，午餐配沙律、味噌湯、茶碗蒸蛋、飲品，相當抵食。
滑蛋吉列豬扒飯定食 $64﹕豬扒大大件，非常澎湃，醬汁夠多撈飯不錯。
北海道三色各生飯 $84﹕賣相靚，材料豐富，有三文魚、白身魚、帶子等，魚生都係厚切，非常新鮮鮮甜，仲加上蟹子點綴。
雜錦天婦羅配牛肉烏冬：賣相討好，天婦羅有幾款口味，湯烏冬正正常常。
丼丼屋@觀塘
19/6/2022 12:00
我地一家大細都鍾意食丼丼屋，食物選擇多，餐廳又BB friendly。不過都係岩岩先知原來觀塘呢間丼丼屋與別不同，係聯乘鳥開主題店。餐牌款式的確同其他分店唔同，多左幾款鳥開滿腹套餐。
名古屋鳥開親子丼定食 ＄135
先來一份基本款，最鍾意半熟滑蛋，用蛋汁同湯汁撈飯食，上面仲有隻生蛋黃提味。雞肉腍腍的，幾滑，幾入味。套餐跟湯、沙律、飲品等。自選小食要左刺身，有少少幾件，都相當新鮮。最鍾意呢個甜品，類似寒天果凍的東西，滑溜溜加上黑蜜汁好味。
唐揚雞兒童定食 ＄65
一睇餐具就知道同其他分店不同。呢度用上熊本熊餐盆，小朋友更加開心。主食有炸雞，相當Juicy。奄列中間有少少肉碎同蔬菜。南瓜同番薯甜甜的。食埋碗湯烏冬已相當肚。甜品仲有忌廉泡芺同蘋果汁，大滿足。
北海道名物炸雞丼定食＄92
今次期間限定係北海道名物炸雞丼，滿滿嘅炸雞，淋上醬油，好吸引。炸雞仍然維持脆度，中間相當Juicy，醬汁醬油味濃，令炸雞更加濃郁醒胃，送飯一流。
－－－－－－－
quote 丼丼屋
「北海道名物炸雞丼」源自東京、主打地道北海道料理的著名餐廳「ととバルnemuro」，此丼物曾獲「第7回日本全國丼連盟─新派多樣丼物部門金賞受賞」。作為深受北海道居民喜愛的名物料理，北海道炸雞（zangi）既是餐桌上常見的正餐配菜，亦是他們的下酒良伴。有別於唐揚雞（karaage）用麵粉、太白粉當麵衣油炸，北海道炸雞的雞肉會先用以醬油、大蒜和生薑製作的醬汁醃漬，裹上蛋液及麵粉後再油炸。為突顯食材美味，北海道炸雞外層裹的粉漿會比一般炸雞來得薄而脆，因此味道較一般炸雞濃郁，色香味俱全。
「北海道名物炸雞丼」選用無骨雞腿肉，以醬油、蒜、薑等調味料醃漬後裹以麵粉酥炸，使炸出來的雞塊既保持鮮嫩，亦鎖住了充盈的肉汁，細味每口，肉香滋味四溢。金黃外皮吃起來酥脆卻不油膩，脆皮在唇齒間咔嚓作響，香氣逼人。另由「ととバルnemuro」傳授秘製醬料配方，以醬油為基礎，再加入洋蔥、蘋果等材料製成帶天然果香的秘製醬汁，提升嫩滑肉質口感。配搭新鮮沙律菜使丼物吃起來多了一份清爽，加上底層的宮城縣產特A級「ひとめぼれ一見鍾情」米滿載食材精華，即成殊不簡單的正宗日式丼物滋味！
－－－－－－－－
呢間分店更加舒適，鳥開主題定食亦相當唔錯，值得Encore。