by admin | 6 月 3, 2012 | 尖沙咀, 旺角, 甜品, 銅鑼灣
Crumbs
30/10/2011 15:30
15/4/2012 16:00
3/6/2012 20:30
@銅鑼灣
30/10/2011 15:30
近日參加左新宣傳推廣手法，用睇廣告黎換銀兩，第一份禮物係換左$20 Crumbs現金券。
食完日式燒烤，買番杯黎清下口味，冷凍一下舌頭。
超級杯裝連兩款配料 ($33，優惠價$13)
Crumbs特色係一杯乳酪分為三層，底層乳酪、中間加左配料、頂層再一層乳酪。超級杯比想像中大杯，有驚喜，足夠兩個人食。$33一杯好合理，而家只需$13，實在無話可說。
乳酪非常厚身，好有忌廉感，就好似比較實淨嘅軟雪糕，而且密度高所以溶化速度較慢。一眼睇到乳酪係完全零氣孔，所以幼滑度一流。算得上係咁多次乳酪體驗中，質感最好嘅一間。味道方面，佢較一般乳酪甜，酸度比較少，似係純正鮮乳酪嘅味道。乳酪唔酸，相對唔算清涼解渴，但溫度搭救，超級夠凍，所以入口一樣舒服。
配料選擇左自家焗製嘅肉桂曲奇味House Crumb，呢款配料可算係人氣必點名物。的確，唔錯。House Crumb就好似細細粒嘅曲奇餅碎，非常香脆乾身，亦有好香嘅玉桂味，係一款創新嘅味道，配乳酪都好合拍。放喺乳酪中層嘅係，另一款配料朱古力布朗尼，有足足五塊仔。Brownies一向比正常蛋糕甜，但佢嘅甜度，好令人接受。餅仔外皮超脆，中間濕潤，整塊嘅朱古力味都好豐富，比得上甜品餅舖嘅製作。
第一次試Crumbs，感覺非常良好。乳酪係好嘅，配料亦係好嘅。今次體驗亦都明白到，佢可以短時間內爆分店、永遠店前都堆滿人潮、開飯網一間分店可以有二百幾個好評嘅理由。
好佩服佢可以做得專、做得串。由頭到尾，只得一款原味乳酪，唔洗期望下星期有新嘅水果味，或者有日俾你見到有朱古力味。配料無想像中咁多選擇，亦只會提供指定大細杯裝乳酪，加一至兩款配料嘅組合。為左慳住荷包，每次頂多只捨得加多一至兩款配料，無辦法滿足各位想食水果併盆嘅欲望。店方採用落單即叫即整，唔好妄想佢會俾機會你自助式唧下部乳酪機，過下手癮。無須太多花巧，佢就係串得起。
@尖沙咀
15/4/2012 16:00
超級杯裝連四款配料 ($35，優惠價$15)
呢間分店，超級大杯裝加四款配料，只需要$35，俾多兩蚊雞，食多兩款配料，感覺上抵過銅鑼灣分店。最愛呢度嘅乳酪厚身得黎，又幼滑，酸酸甜甜得黎，奶味香亦十足。今次亦配上人氣王House Crumb、香濃嘅朱古力布朗尼、軟糯嘅麻糬，仲有朱古力粒粒。基本上跟足上次嘅美味配搭，絕無甩拖。味道一如以往的好，超滿足的說。
@旺角
3/6/2012 20:30
超級杯裝連四款配料 ($35，優惠價$15)
今次係第三次試Crumbs，黎到旺角店叫番個超級杯。揀左糖不甩碎、朱古力布朗尼、麻糬同蜜桃。一如以往，底層送多一堆糖不甩碎墊底，上面再一層一層加上乳酪同其他配料，份量十足。乳酪仍然非常厚身實淨，超級滑溜。味道一流，微酸帶奶香。糖不甩碎即係放喺糖不甩上面嘅碎碎，有芝麻、花生碎同砂糖，加入乳酪離奇地夾，只不過無House Crumbs咁入口即溶，多幾分咬口。朱古力布朗尼有三大粒，朱古力特濃係OK的，但好似比較乾身實淨，唔夠鬆化。麻糬一樣軟腍煙韌，係試過咁多間乳酪店最高嘅質素，絕無投訴。最後加左一款蜜桃，好明顯係罐頭貨色，味道一般。總括黎講，呢杯乳酪都相當豐富，不過配料上似乎比銅鑼灣差啲啲。算啦，十五蚊一杯，已經好滿足。
by admin | 3 月 18, 2012 | 甜品, 銅鑼灣
Yogo Frozen Yogurt@銅鑼灣
18/3/2012 14:15
記得早年Froyo突然冒起時，第一次試食嘅就係呢間Yogo，感覺唔錯，從此愛上，兩個夏天都以Froyo解暑。團購又俾機會我回到原點，又可以錫住荷包，又可以試多次好味嘅乳酪。$15買到$40 現金券，抵食!
原味、士多啤梨味乳酪 ($42，團購價$17)
每次食乳酪必試嘅原汁原味真係唔錯，輕微酸味，乳香味夠，而且質感係超幼滑，零氣孔，冰涼得黎冰感唔重，絕對無沙冰feel。姐姐唧乳酪出黎嘅時候，已經睇到乳酪幾夠挺身，難得食到又滑又濃味嘅乳酪。士多啤梨味道亦夠香，酸甜適中，都相當唔錯。配料揀左原味麻糬，麻糬應有嘅軟綿同煙韌都充分表現出黎，加上濃甜嘅朱古力曲奇餅同朱古力針，令乳酪更加豐富可口。
呢間小店開業無耐，已經深受附近學生哥同上班一族歡迎。店方有四部乳酪機，共有八格乳酪，每次最少有五款口味選擇。由專人唧完乳酪之後，客人可以自行添加配料。配料整齊擺放，種類都有三十幾款。值得留意店方提供唔少坊間少見嘅健康材料，好似燕麥、果仁等，都幾多花款。同其他一樣，都係每100g盛惠$15的話，呢間質素感覺略勝一籌，難怪食過一次就念念不忘，值得推薦。
by admin | 3 月 18, 2012 | 小食, 港式, 銅鑼灣, 麵包
丹麥餅店@銅鑼灣
10/4/2011 13:00
18/3/2012 14:00
10/4/2011 13:00
一間傳統懷舊嘅餅店，賣緊大家童年時候嘅早餐食品。
熱狗 ($8)
一隻熱狗可以有幾好評?
長長地嘅豬仔包焗到熱熱。同西式嘅熱狗唔同，港式熱狗唔用芥末醬，改為一邊塗牛油，另一邊塗沙律醬。再加上一直喺爐邊烤緊嘅香腸，夾一夾，整個熱狗大功告成。食一啖就知，原來真係好味。首先新鮮即製一定唔會難食得去邊。再者麵包非常之鬆軟，仲有大陣甜甜嘅麵包味，係最香甜嘅餐包味道。熱力更將牛油同沙律醬溶入包中，最後配上熱辣辣、有肉味嘅香腸。一個得麵包、醬汁、香腸三個咁簡單嘅食材，已經集合晒所有好味嘅元素。
炸魚柳包 ($12)
麵包一樣焗到熱熱好鬆軟，魚柳炸得鬆脆，唔油膩。魚柳好新鮮，食到魚柳鬆軟嘅質感。茄汁同沙律醬同時出現，兩款醬汁加埋就係最原始嘅味道。食左呢個包之後，就覺得乜記物記已經唔入流。
每個包都只有好簡單嘅三個元素，冇任何生菜、酸瓜等配料， 係最原始、最簡單、亦都係好家庭式嘅風味。十蚊八蚊一個做下午茶或小食，係唔錯嘅選擇。妮啲思&鄭淘文，請大啖大啖食，啲汁流晒出黎先至過癮。
後記
18/3/2012 14:00
黎得銅鑼灣，唔想食太heavy，食個包包就最岩，今次一於試埋炸豬扒包先得。
炸魚柳包 ($13)
魚柳一樣咁新鮮，熱辣辣，脆脆地，配酸甜嘅醬汁真係好味。
豬扒包 ($13)
今次試埋好評嘅豬扒包，感覺上同澳門嘅唔同。包係鬆軟香甜嘅餐包，豬扒經過油炸，外皮脆脆地，肉質鬆軟，配上沙律醬同茄汁，係非常簡單，家庭式嘅包包。感覺上魚柳包更好味，因為豬扒味道較淡，肉味欠奉，被沙律醬同茄汁嘅酸甜蓋過。算啦，平平地，無計。
食呢個包，真係有啲捩(口棄)。首先，包係必須外賣拎走，好大機會係邊行邊食。醬汁同油喺雞皮袋滲出，食完之後成手油腍腍。不過好味無計，儀態不顧，大啖吔吧啦。
by admin | 1 月 22, 2012 | 上海菜, 小食, 銅鑼灣
上海香港麵家@銅鑼灣
22/1/2012 11:00
年廿九最好嘅節目，莫過於行花市，今年一於趁墟過海行下維園，入場前先喺附近食個早點。一向少過海搵食，黎到銅鑼灣，只知道就近渣甸街比較多野食。原先想去車仔麵名店試試，點知晨早收爐大吉，最後求其是但搵間入場。
粢飯 ($15)
佢叫得做「粢飯大王」，無可能唔叫一份粢飯試試。睇住門口啲阿姐快手勁包，熱辣辣嘅粢飯就送到。粢飯用保鮮紙包住，對半切開成兩份，偷瞇到內餡材料唔算多，驚喜欠奉。米飯質地軟糯，唔太乾，飯包得勁厚身，相對內餡只得少少。材料有肉鬆、榨菜同油條。個人認為肉鬆係粢飯味道嘅靈魂，肉鬆唔夠多，唔夠香的話，成個粢飯都唔見得好有味道。而榨菜就貢獻左咸味同爽脆嘅口感。中間一大條油炸鬼就係香脆、香口、油香所在。但對唔住，大王呢個粢飯完全不行了。材料少得可憐，肉鬆無香味，只係榨菜得個咸字，連油炸鬼都唔新鮮，完全唔香脆，估計係放得耐左，變得又腍又韌。三樣材料完全唔配合，令粢飯只獨有咸菜味。咁同白飯包咸菜有咩分別?
生煎包 ($22)
暖暖嘅生煎包，皮並無乜煎香嘅痕跡，煎左等於無煎，所以唔期望食到脆底。包係韌韌地，香味不足，幸好有幾粒芝麻仔鎮住。好彩內餡都算係咁，肉餡調味唔錯，豬肉腍腍地，甜甜地，肉汁算幾多。
豆漿 ($8)
上海舖另一重點美味，應該就係豆漿。豆漿的確比其他食物較為突出，熱豆漿味道更加香濃，有淡淡豆香，味道唔太甜。
喺無做過功課嘅情況下周街搵食，店內嘅人流就係其中一個好有力嘅方向指標。眼見渣甸街幾間繼續營業嘅食肆中，呢間小店食客明顯比較多，而店前等外賣嘅人從未減退，估計呢間「粢飯大王」差極有個譜。原來呢間算係好出名嘅老字號上海舖，幾十人讚過好。可惜親身試過之後就覺得好一般，應該隨便搵一間豆品小店，都可以用更平嘅價錢，食到更好嘅質素，當然已經唔敢同台灣嘅阜杭豆漿比較啦。睇黎呢個大王都只係浪得虛名。
by admin | 10 月 30, 2011 | 日式料理, 日式燒肉, 自助餐放題, 銅鑼灣
和光鐵板燒日本料理@銅鑼灣
30/10/2011 13:15
難得喺谷旁掃到平野，以 $68享受原價$138嘅和光1.5小時日本燒烤，包一份一人前嘅指定套餐，再可以無限量追加任食鹽燒黑豚肉同甜品，真係幾吸引。
套餐包括前菜、一盆雜錦燒肉、另加白飯、麵豉湯任裝，甜品任食。
1. 前菜﹕ 係涼伴大豆芽菜同菠菜，味道清清地，清下口味都算唔錯。
2. 麵豉湯﹕ 可以任飲，但非常普通不過，一碗都飲唔晒，無需encore。
3. 薄燒安格斯牛扒﹕ 團購話係牛扒，完全feel唔到邊忽係扒，只見到四片薄切牛肉片。只需要底面來回微燒二十秒，就可以掌握到六成熟嘅最高境界。完成品有輕微牛肉味，油花比較少，所以肉質麻麻，好一般。
4. 法式香草羊扒﹕ 我地功力深厚，羊扒剛好燒到六、七成熟，中間仲有粉粉嘅肉色，但六成熟嘅羊扒，肉質並唔算太嫰。調味亦略嫌太輕手，香草味同鹽味都不足，還好羊扒味道夠羶。
5. 鹽燒薄牛舌﹕ 牛舌超薄切，口感良好，夠爽口，牛舌只用鹽調味，但亦夠入味，而且勁羶，味道唔錯，每份得兩塊實在唔夠喉。
6. 意大利香草雞﹕ 四件雞肉係用綠色唔知咩汁醃過，就係所謂嘅意大利香草汁。雞經過燒烤後，雞皮微微焦脆，雞肉入口幾嫩滑，肉汁豐富，都算唔錯。
7. 鹽燒鯖花魚﹕ 團購餐單無寫到嘅神秘貴賓，相信係用黎取代左祕製魷魚鬚。兩件鯖花魚都算幾大件。魚皮同邊位燒到香脆，能夠鎖住肉汁，魚肉比較紮實，只用鹽黎調味，味道簡簡單單。
8. 鹽燒黑豚肉﹕ 可以任點任食，無限量追加嘅豚肉，睇落脂肪比較多，燒過後肉質入口即溶，肉味亦夠濃，只需加鹽同胡椒已經相當唔錯。最後兩個人總共追加左八碟，即係三十二塊，但質素一碟比一碟差，一碟比一碟鞋。
9. 甜品﹕ 所謂無限量追加嘅甜品係忌廉泡芙。泡芙細細粒，似喺雪櫃拎出黎，裡面嘅忌廉仲係硬硬地，冰凍凍，似雪糕泡芙。總數叫左十四粒，一啖一粒做甜品唔錯。
套餐仲跟白飯任裝，基本上一碗已經好夠食，相信無人咁傻仔添飯掛。
最後，不得不讚下個沾醬，味道好香好濃，甜甜地，配燒肉認真唔錯。
一向都知道，日式燒烤價錢唔平，而家計埋加一，午餐半任食都係$75一位，包飽，價錢真係抵。食物唔算得好突出，但亦唔算差，不過不失咁啦。有團購的話，的確值得一試。
偷瞄到晚市燒烤放題開價二百幾蚊，都係大路公價，呢個價錢，相信仲有更多更好嘅選擇。
溫馨提示，訂座嘅時候，職員竟然話團購只會做到十月三十一日，之後餐廳會裝修，但自己都唔知自己裝修幾耐。職員亦勸籲團購客一係就早啲食，一係就問番谷旁安排退錢。如果佢咁都講得出口的話，十一月一日餐廳仲存唔存在都係一個問題，想試就睇緣份啦。
日式燒烤最happy之處，莫過於自燒自食，要控制火喉，燒到合適嘅熟成度，真係幾考功夫。食材本身質素好係其一，醃得出色係其二，燒得恰到好處係其三。所以燒肉好唔好食嘅責任，並唔係只在於餐廳。名副其實係餐廳、食客通力合作嘅一件大Project。
by admin | 7 月 10, 2011 | 壽司, 日式料理, 銅鑼灣
築地銀壽司@銅鑼灣
10/7/2011 20:00
日本大地震後都冇懼幅射，勇闖幅射國，食日本料理當然係冇有怕。
集購城又一勁抵優惠，$48當$150現金券狂食築地銀壽司。據聞築地銀壽司喺日本東京有多間分店，主打創意壽司，又極具人氣，而家足足有三折優惠，唔買對唔住自己呀。
首輪先叫左幾款好評熱點嘅小食同壽司。
1. 香脆雞軟骨 ($34) ﹕新鮮即炸，勁脆、超香口，雞軟骨都好爽脆，好味。但一小碟價錢偏貴，可能每粒價值兩蚊呀。
2. 三文魚三味盛 ($24)
2a. 三文魚壽司﹕ 三文魚幾肥美鮮甜。值得留意，壽司飯味道係唔錯，甜味適中，亦都好軟熟。但可能太過軟熟，用筷子夾起時有鬆散跌飯嘅情況出現，睇黎師傅要握多手啦。
2b. 洋蔥蛋黃醬三文魚壽司﹕ 喺新鮮嘅三文魚上加蛋黃醬及洋蔥絲，估唔到組合離奇地夾。生洋蔥少少辣度同酸甜蛋黃醬令三文魚味道更濃郁。
2c. 火炙蛋黃醬三文魚壽司﹕ 將三文魚微微燒香，火炙過嘅刺身暖暖地，帶多份焦香味，令魚肉質更軟熟，其實我幾鍾意。
3. 火炙岩鹽檸檬三文魚壽司 ($9)﹕ 放棄蛋黃醬，改為用岩鹽同檸檬，呢件壽司係要連檸檬食。食落口檸檬嘅酸味爆發出黎，再加上岩鹽提味，令魚更鮮甜，再經火炙勝在多一分焦香。相信檸檬同岩鹽嘅組合，同新鮮刺身配搭起黎會更加好味。
4. 日本產特製極品鰻魚 ($18)﹕ 鰻魚發燒友必點鰻魚壽司，個名都霸氣過人，而且外型非常討好。鰻魚燒得深啡色，邊位少少焦。掃上閃令令嘅鰻魚燒汁，放喺個木製壽司板上，非常之吸引。但食落口就出事，鰻魚燒得太乾，唔夠軟熟，到達偏硬、鞋口嘅境地，雖則味道都係算OK，但都唔值得再encore。
5. 火炙蛋黃醬魷魚壽司 ($9)﹕ 平時食開純白色，煙煙韌韌嘅魷魚，今日任人宰割，先浸汁再火炙。多份燒烤味外，配上蛋黃醬同燒汁，味道更具層次，而且肉質更加煙韌爽口。
6.火炙蛋黃醬蟹肉捧壽司 ($7)﹕ 任人宰割嘅主角輪到蟹柳，相信蟹柳唔係高水準材料，較鬆軟，且鮮味欠奉，只好借蛋黃醬味道搭夠。
7. 蔥花極品吞拿魚腩軍艦 ($17)﹕ 師傅將吞拿魚腩切到蓉晒，再加埋蔥花放入軍艦上。吞拿魚一向比三文魚味道更清淡，係唔係極品我唔知，切到蓉埋一pat嘅魚肉絕對食唔出鮮味，係極品的話好似有點浪費。
8. 雜錦天婦羅 ($49)﹕ 大蝦三隻、蓮耦、南瓜、蕃薯等炸成天婦羅。極品嘅天婦羅應該係乾脆俐落、唔油膩。恭喜呢度做到咁嘅效果，天婦羅偏硬身，浸一浸淡甜嘅醬汁可以稍為溶化面層嘅脆漿，更易入口。隻隻蝦都好新鮮彈牙、蕃薯南瓜都充滿甜味，呢客天婦羅認真唔錯。
到左單尾，係時候實際啲填飽個肚，選擇兩款麵食，填滿肚皮。
9. 三文魚烏冬鍋 ($59)﹕ 有幾舊三文魚，加幾條菜，幾粒菇同烏冬，放落啲唔知咩湯度煮。成鍋都唔知咩黎，好在有火爐熱住，夠熱辣。而菜浸左湯之後好腍好入味。烏冬尚算煙韌滑，但味道不足。
10. 天婦羅烏冬 ($69)﹕ 食過天婦羅好味，都唔介意encore多客，今次配埋冷烏冬。天婦羅一樣係超水準送到，雖則烏冬唔算十分之煙韌，但冷食的話更加清爽。惟一敗筆係冷麵汁偏淡口，即使落左wasabi都提唔起個味。
11. 炸蝦碎手卷 ($9)﹕ 壓軸登場，驚喜無限。九蚊一客，炸天婦羅蝦咁好? 冇! 天婦羅蝦嘅切碎版?都冇! 咁炸蝦毛有啦掛? 當然都係冇! 原來係用炸天婦羅蝦所用到嘅粉漿，炸成一粒粒，再用紫菜包成嘅手卷。好一個炸蝦碎，佢冇呃我，個名改得岩，係我地會錯意，終極地雷也，狠狠的中招!
以上嘅價錢全部係一件計，以壽司單件計，平均要十幾蚊一件，其實唔平呀。去超市，或者而家超hit嘅爭鮮外帶壽司，都只不過係$3一件。但四、五倍嘅價錢，有五蚊嘅新鮮，有五蚊嘅好味，同三蚊嘅創意，真係要值十幾蚊的。
特別欣賞呢間店舖嘅火炙系列，係擺脫左一般食壽司冷冰冰嘅框架，一種暖暖、焦香嘅新口味。可能你話熱食，食唔出材料本身嘅鮮味，但只要細心揀素材，選擇適合熱食嘅類型，係不失為一個新派口味。鍾意鮮味嘅，不妨齋食刺身吧啦，冇需食壽司。
埋單總數要$375。呢個價錢除左換黎一個地雷外，仲有幾款好味嘅壽司同一級捧嘅天婦羅。坐喺一個靜局梳化卡位，睇住出面魚缸啲魚仔游來游去，另加靚仔哥哥親切服侍，寫意。何況而家團購幫你慳左一筆，二人前埋單只需$171，足足平左兩百蚊，平均八十幾蚊一位，閒時晚餐豪一次都唔過份吧。
