麥記其實同我好遙遠，通常只會喺佢有新餐單嘅時候，先會開始考慮或者有可能去試一試。相信一年食嘅次數，由零至兩次不等。今次推動我破例探訪嘅，係十八件麥樂雞餐! 考慮左好耐，最後喺佢生命結束之前嘅一星期去食。真係好難得，所以要寫低。勁呀，為麥記寫評呀!

今次推出十八件雞餐，有蒜蓉辣椒、蜜糖芥末、芝士、芝麻四種醬。($38)

其實麥樂雞都係粉包雞肉嘅現成貨，只要炸得好，控油技巧掌握得到，呢件雞絕對唔難食。夜晚九點時份，呢間分店嘅麥樂雞都係新鮮熱辣，好脆口，更欣賞佢唔油膩，唔會一咬成啖油唧出黎，唔錯呀。

可能早前食過幾家貴價薯條，覺得麥記嘅薯條實在無得比，幼弱嘅薯條唔洗希望食到有薯仔味，只求炸得乾身，夠香脆就交足功課。

蒜蓉辣椒﹕酸辣嘅泰式辣醬，有濃郁蒜味。酸酸辣辣始終都係襯泰式小食，沾下蝦餅、春卷咪幾好，學咩人襯雞?!
蜜糖芥末﹕甜甜酸酸，非常開胃，亦好襯麥樂雞，係眾人最愛口味。但總覺得唔夠芥末味，甜酸味過勁
芝士﹕食到有洋蔥、煙肉味，幾似忌廉芝士味，但好肥膩，食兩、三件已經好膩
芝麻﹕有醋酸味嘅芝麻醬，似shabu shabu食牛肉嘅芝麻醬，如果多幾粒白芝麻相信會更香

四隻味之中，個人最鍾意芝麻味，但點都唔夠最普通綠色嘅甜酸醬好食。同其他人嘅意見一樣，都係甜酸醬先最襯麥樂雞。

聽聞有唔少朋友試過一人食晒十八件雞，食唔過十件已經相當辛苦，十八件簡直係玩命。 高登仔仲出埋挑戰十八件雞嘅全攻略，如此認真。佢地話早前出過九件雞，今次出十八件雞，相信下次有機會見到三十六件雞，大家要努力備戰。

因為只想試味，所以選擇兩個人小試一個套餐當宵夜，幾浪漫。

 雞絲粉皮 $28

31/5/2015 18:30

從馬鞍山群組得知新港城又開左間上海菜館，原來真係好旺場，六點黎到已經要等位四十五分鐘。
 

紅油抄手 ($38)
賣相係唔錯既，雲吞外皮薄薄幾滑溜，內裡菜肉餡都幾多，都有肉汁。紅油汁係醬油加辣油再加蒜泥，味道偏咸辣，無乜甜味。

三哥排骨菜飯 ($48)
係此店招牌菜，排骨熱辣上檯，份量唔少，菜飯用雞公碗裝住，都算大碗，飯面加上醬汁三選一，要左鎮江汁。豬扒較薄，粉唔算厚，炸得幾脆，肉質好鬆化軟腍，味甜有肉汁，係唔錯既。菜飯用上珍珠米，煙韌彈牙，加菜都幾多，好送飯。鎮江汁酸酸地好開胃。

招牌擔擔麵 ($30)
湯底由花生、麻醬、辣油、香料等製成，麵上鋪著肉燥同蔥花。湯底略嫌唔夠濃郁厚實，有微花生香味。麵質好腍好滑溜，掛湯都可以。整體唔算特出。
鮮磨豆漿 ($10) 唔算太甜、有豆味，似係自家製。