by admin | 3 月 30, 2015 | 2015九州蜜月追櫻之旅, 九州, 旅遊, 日本
安排左今日係長崎一日之旅，八點未夠就起身，第一件事係去博多駅買早餐。博多駅有好多間便當專門店，便當實在太色彩繽紛，花多眼亂都唔知揀邊款好，係度都消耗左好多時間。咁岩係AMU EST嘅萬坊JR博多シティ店見到便當人氣嘅三味便當，就決定買一個。另外再買左個明太子飯團加餸。
今日第一日使用JR Pass，只需喺人工改扎口出示Pass，就可以自由進出。喺指示版前搵正確嘅月台就搭電梯上。進入JR月台，影車頭係指定動作。搭上08:56嘅JRかもめ，展開日本鐵路之旅。由於JR Pass已包指定席，當然要劃位坐得舒服啲啦! 的確，車箱非常闊落，好舒適。由博多去長崎車程約兩小時，風景就無乜啦，都係樹同屋。咁就慢慢嘆個靚早餐啦。
先講下個飯團，係博多明太子胚芽米(¥230)，紫菜包飯入面加左明太子，明太子係鱈魚子，好有海鮮味，腥味唔算重，加少少辣，食落都幾開胃。
¥1200 三味便當係一款九宮格便當，賣相的確好靚好吸引，而味道相當唔錯。係火車上食凍凍嘅便當，實在有番風味，估唔到咁驚喜，真正好味。呢個便當係以魷魚做主材料，總共有十七款小食，裡面有十四款都用上魷魚作材料。佢個名叫「上等いか三昧 辨當」，但食得出有唔止三種煮法。魚豆腐二色田樂係好甜嘅魚蛋。醬油菇漬物非常入味、魷魚甘辛煮即係魯汁魷魚，非常入味。魷魚筒包飯，飯煙煙韌韌不錯吃。好夠味嘅綠海草，加左蛋黃醬魷魚絲。有馬煮配醬菜有味飯。魷魚絲包住肉嘅燒賣、玉子燒都加左魷魚，非常香甜。魷魚炊御飯。白煮魷魚配檸檬汁。炸流心芝士魷魚波，魚味極濃，配芝士非常襯。
大約兩個鐘時間，終於到達長崎，係鐵路嘅盡頭。先去觀光案內購入稻佐山纜車券，一如傳聞，一張價值¥1230嘅纜車券，係呢度只賣¥980。咁著數只得一個風險，就係無得退票。但查過當日天氣咁好，纜車停運嘅可能性Tends To 0，絕對值得慳埋呢少少錢。
臨離開車站，喺Family Mart搵到期間限定嘅Starbucks Discoveries系列Sakura Latte (¥237)，係士多啤梨加入櫻花味嘅拿鐵，口感幼滑不在講，士多啤梨加櫻花味不造作，口味非常獨突。
by admin | 3 月 29, 2015 | 2015九州蜜月追櫻之旅, 九州, 旅遊, 日本
離開天神返歸，經過博多駅研究下搭車安排，為聽日行程做好準備。
臨走時，見到超人氣牛角包做緊減價促銷，即刻趁墟排隊。呢間il Fon del Mignon的確係超超超人氣，任何時候都有長長人龍，幸好夜晚促銷人唔算多，又有減價，當然要把握機會。促銷方式係一袋五個為單位，以秤重來計價錢，正常價錢大約每100g ¥190，夜間特價300g ¥300。有別於一般牛角包嘅口感，唔係香脆，而係好煙韌鬆軟，亦有點濕潤。朱古力味幾香，唔錯。
得知日本Haagen Dazs出名多款，此行目的希望試試唔同口味、又期間限定嘅Haagen Dazs。就係酒店附近嘅Family Mart買到オペラ(¥420)。面層朱古力醬加上金箔，相當豪華名貴。中間係朱古力、咖啡、蛋糕嘅夾層，仲有流心朱古力醬。味道認真濃郁，仲好幼滑，非常出色。
係天神超市買左佐賀士多啤梨，半價約¥160。一盒三粒志在試下，賣相雖好，但味道較酸。
by admin | 3 月 29, 2015 | 2015九州蜜月追櫻之旅, 九州, 旅遊, 日本
水炊き係著名博多鄉土料理之一，係有將近百年歷史嘅福岡鄉土火鍋料理。用帶骨雞肉熬出嘅高湯作為湯底，將雞肉嘅甜美充分溶入湯頭內，滋味清爽。配合高麗菜同菇類，係一款好健康嘅火鍋。最後亦可以最後放入白飯煮成雜炊完食。
黎到福岡第一餐就決定試下呢個九州版雞煲。網上搜尋過，知道「博多華味鳥」係水炊鍋名店，好味唔在講，論餐廳環境同服務都係無得頂，每席有專人負責料理。華味鳥之所以咁出名，係自設雞場，能夠培養優質「華味鳥」。但正宗水炊き料理一人前索價可高達¥5000，實在唔捨得。
原來呢間仲有兩間輕食分店「とり割烹 博多華味鳥」，就決定去天神分店一試。店面明顯無正店咁大咁豪華，但都充滿日式風味，志在一試博多嘅華味鳥絕對無問題。菜單除左水炊鍋外，仲有好多其他嘅雞肉料理，價錢仲非常親民，就算係豐富嘅套餐，價錢都係¥1000上下。
水たき華御膳 ¥1650御膳包括前菜、水炊小鍋、雞唐揚、自選丼飯、甜品，非常豐富。
水炊鍋雖然係一人前迷你版，但份量絕對交足貨。乳白色嘅清雞湯內，有兩大舊雞，仲有雞肉丸子、雞內臟、豆腐、蔬菜同菇類等。介紹話湯底係用上雞骨熬製五小時嘅雞湯，雞湯相當清甜，有別於九州乜都要濃郁嘅印象。雞肉非常新鮮，雞味濃郁，肉質細滑，沾些酸醋豉油更加能夠提出鮮味。由於雞無濃烈調味，好與壞一食就知，所以好強調雞本身嘅質素，華味鳥的確不錯吃。不得不提高麗菜吸盡湯汁非常清甜。自選該店名物親子丼，雞肉非常奶滑彈牙，加上蛋又煮得不錯，值得一吃。幸好雞唐揚唔會過份乾柴，可見雞肉品質唔錯。甜品似係柚子奶凍，非常清甜，奶味同柚子味平衡得宜。
因為華御膳已經嘆盡兩款名物，知道南蠻雞係宮崎必食，見呢度都有，又可以一試究竟。原來南蠻雞係炸雞扒配上他他汁，雞肉始終無水炊鍋嘅咁好，比較實肉，還好唔算鞋，而他他汁有非常多洋蔥，配上蛋白醬微酸，係好適合配飯。
呢餐全雞宴平平地算唔錯，水炊鍋的確值得一試，用最簡單嘅煮法，突出雞嘅優點。而親子丼亦的確唔錯，抵食!
by admin | 3 月 29, 2015 | 2015九州蜜月追櫻之旅, 九州, 旅遊, 日本
食飽飽充滿能量，就番博多駅買埋JR Pass，解決明天之後五日嘅交通安排。還好外國人專用櫃檯唔算多人，又有專責服務員招呼，好快就完成整個購買過程。先寫好訂購表格，再寫埋指定席班次時間。講起就失策，竟然唔記得印JR班次表，好彩我係每日嘅行程開頭，已經寫好當日嘅班次，抄番出黎都唔洗好多時間。到櫃枱買好兩份JR九州鐵道周遊券(北九州五日版¥9260) ，核對清楚，確定黎緊五日行程都有位坐。
第一日行程只有半日，只能夠去一啲近近地嘅景點。適逢櫻花期，第一日就去福岡嘅大濠公園睇過夠。一入福岡地鐵就有種似曾相識，的確同大阪地鐵系統好相似。搭地鐵由博多出發，只需五個站就到達大濠公園駅，再行一短小路就到公園範圍。大濠公園係一個比大更大嘅公園，好多小朋友放假都會黎玩。櫻花季節仲有唔少攤檔，有燒麵、章魚燒等美食，仲有好搞笑嘅朱古力香蕉人、撈波波遊戲等，氣氛唔錯。
公園後方就係福岡城跡，剛好遇上櫻花祭有夜間開放實在太幸運。特別將行程編黎第一晚，正好善用夜晚時間欣賞夜櫻。福岡城跡唔少地方都掛上燈泡，櫻花都開得唔錯。櫻花祭期間，城內有三個景點係有料開放，當然櫻花同燈光效果會靚好多啦，但之前已經睇過史上最靚嘅二条城夜櫻，在此就無需特別花費，志在重拾賞夜櫻氣氛。
大約行左一個鐘左右，嘆完夜櫻就搭地鐵去福岡嘅最旺區天神。
第一站係天神地下街，係旅行團必去景點。其實呢條街都好出名，可算係福岡必到。黎到天神地下街大約八點，好多商店都準備關門。得知地下街有傳說中全日本得三間嘅Hello Kitty Store，最後搵唔到呢間，只搵到一間Sanrio Vivitix，唔知係唔係變左身。見商店都關門，就沿電梯上地面，行下Solaria Stage同Parco。
Solaria Stage 三至五樓係Incube家庭用品雜貨、地下層有Reganet超市，非常多野買。
Parco 一樓有The天神地產店，搵到九州限定Hello Kitty士多啤梨歐蕾。八樓有Kiddy Land鬆弛熊專門店。
係Mr. Donut買左一個期間限定ポン・デ・いちごミルク士多啤梨冬甩(¥151)，口感好有趣，唔係麵包，係煙煙韌韌好似麻糬嘅質地，配上麵包嘅味道。冬甩面塗上士多啤梨朱古力，味道好濃。兩層冬甩皮中間仲夾左士多啤梨牛奶醬，非常士多啤梨，不錯吃。
by admin | 3 月 29, 2015 | 2015九州蜜月追櫻之旅, 九州, 旅遊, 日本
九州係拉麵王國，計劃行程時點少得試試當地拉麵名店。第一間選擇去博多駅前嘅博多一幸舍。Tabelog 3.6，係博多區拉麵第三名。小店就係博多駅前，係正門出，過馬路進入商業區，就係某條小巷轉入去就見到。店仔細細，約有三十個位，五點幾時份可算係無乜客。喺自動售賣機買票，揀左一個黑ラーメン、一個味玉入り塩豚骨ラーメン。
味玉入り塩豚骨ラーメン ¥800
塩豚骨拉麵白湯非常清，豬骨味重，鹽味亦非常突出，但唔會過咸。雖然湯底唔算好忌廉咪，但足見膠質相當重，放一陣已經結成薄皮。值得一讚湯底可算係零份油份，細碎嘅蔥花正好作為提味，係一款濃而清爽香甜嘅湯頭。拉麵係幼身直麵，落單已無特別要求麵質硬度，估計送到時係普通軟硬。但食得出麵條相當幼滑，彈牙度已經不錯。叉燒半肥瘦，似薄切豬扒，白煮無特別調味，正正食到豬肉本身的甜味已經非常足夠。至於蛋係非常出色嘅溏心，雖然未經醬油煮過，但白洽蛋本身已帶咸味，好能突顯到蛋黃本身嘅味道。
黑ラーメン ¥750
黑拉麵湯被一層黑油蓋住，熱力充滿碗內。黑油似乎係黑蒜、麻油嘅混合體，芝麻味相當濃，完整蓋過左豬骨本身嘅味道，為重口味湯頭，個人較為喜歡前者。
兩碗拉麵各有特色，亦非常出色。完食。
by admin | 3 月 29, 2015 | 2015九州蜜月追櫻之旅, 九州, 旅遊, 日本
期待以久嘅九州之旅終於黎啦!
話說原定十一月去睇紅葉，但豪斯登堡嘅千陽號五月關門大吉，的起心肝要提早去，左度右度，終於決定三月尾出發。
今次帶左七小B出發。
第一次兩公婆同步出發外遊，係新港城搭八點幾嘅A41P，個零鐘就到機場。
將行李寄艙後，就過關，全個過程相當順利，唔算多人。
完成出境手續，去食個早餐先。試左呢間新野，外國炸雞專門店。
普普通通，無乜特別。
登機係45號閘口，打卡是指定動作。
是次九州行乘坐港龍航空，航班算唔錯，早起晏返，每人$5,000加$440稅，旺季黎講，唔算勁貴。去程KA380(11:20 – 15:40)，三個零鐘時間過得好快。上機無耐就送餐，睇一陣電視就落機。
港龍嘅飛機餐都算唔錯啦，最重要係有Haagen Dazs!!綠茶素麵、日式咖哩炸豬扒飯或魚柳配馬鈴薯及蜜糖豆。
日本時間四點前到達福岡機場。係國際航廈出發，先要搭免費穿梭巴士去番國內線航廈搵地鐵站。車程十幾分鐘，途中會穿過機場跑道，要開鐵絲網閘，都幾搞笑。終點站國內線航廈，落車後行前少少就見到地鐵站入口，福岡空港駅搭兩個站就係博多駅。趁假日買地鐵一日券¥520用盡佢! 適用於福岡全市三線地鐵，每程地鐵¥200起，搭到三程已經有賺!
福岡機場最出名嘅係機場同城市嘅距離係近到想像唔到。的確! 由機場出發，穿梭巴士連地鐵都係半個鐘唔洗。到達博多駅後，喺築紫口一出，過對面馬路就到酒店，真係超級方便。五點Check in 酒店，再換上輕便行裝，正式開始九州之旅。第一件事係醫肚。
