by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
黎到太宰府，一出車站就見到表參道商店街，有幾家賣梅枝餅嘅小店、有賣雪糕、工藝品、亦有唔少賣土產零食。黎到一定要試下太宰府名物梅ヶ枝餅。
かさの家
人龍超長，呢間かさの家真係名店，就買一個黎試下 (¥120)。可以從門外玻璃窗見證梅枝餅製作過程。先用米糰包入紅豆餡，再兩面烤焗，表皮烤得微焦，餅皮上仲見到印上梅花圖案。新鮮出爐熱得燙手，外皮有啲似較為綿密煙韌嘅麻糬，薄薄嘅餅皮包住內餡，用上日本紅豆點都無得輸，味道好香甜，配茶正好。
かのや
見商店街有咁多間梅枝餅，想試下唔同家嘅出品，見呢間かのや都有唔少本地婆婆幫襯，又買一個黎試下 (¥120)。呢間唔同嘅係，的確係純手工製作，所以等候時間長些少。呢間嘅出品較為皮脆粉厚，豆餡亦算唔錯，但較鍾情於前者。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
柳川特盛きっぷ 包一餐和食，黎得柳川一定要試地道嘅鰻魚飯。套票包括幾家柳川出名嘅鰻魚飯名店，此行嘅目標係本吉屋。睇住地圖，由柳川駅行去本吉屋約十分鐘時間，沿路有指標牌引路。十點鐘黎到原來還在準備中，店員話十點半先開放入座，所以惟有行番轉頭，周圍影下相。「元祖本吉屋 本店」外型好特別，好似田野間一間稻草搭成嘅屋咁。
元祖本吉屋創業四百年，係一間本地人都係慕名而黎嘅排隊名店。傳統蒸籠鰻魚飯就係始創於1615年，直至而家都保留住初代師傅傳承落黎嘅獨家醬汁同料理技術。
十點半入店，已經聞到香香嘅鰻魚味，進入用餐區，坐上榻榻米，靜候四百年歷史嘅鰻魚飯。喺咁優美嘅用餐區，周圍影下相。室內仲擺放左女兒節裝飾，真係好靚。室內裝修雅緻，室外有修剪得整齊嘅庭園，黎到呢度食飯真係賞心樂事。
套票包括一客指定料理，就憑款式份量，得知呢客鰻魚料理正價¥3500。套票已包括呢份定食，實在太抵。せいろ蒸し定食有一客醬菜、籠蒸鰻魚飯同鰻魚肝湯。設計出四百年歷史嘅籠蒸鰻魚飯，係想讓客人同時品嚐到熱騰騰嘅白飯同鰻魚。做法係喺塗滿醬汁的白飯上，加一層剛烤好嘅蒲燒鰻魚，然後再蒸熱，最後加上蛋絲即成。咁樣料理嘅鰻魚飯邊有可能唔好食。
上菜時睇完蒸氣熱騰騰，已經好吸引。用紅色竹籠箱裝住，有滿滿一層鰻魚，配上金黃色蛋絲，睇見已經流口水。雖然係使用優惠套票，但眼見同其他食客相比，份量一樣咁多，絕無偷工減料。先講鰻魚，真係用心烤製，鰻魚外皮焦脆，有炭燒香味。鰻魚肉質肥厚，鬆化到入口即溶。咬開魚肉，就見到閃閃發光嘅油脂，魚味濃郁無腥味。鰻魚經多次浸潤於醬汁，鰻魚已經充分入味。加些少山椒，襯上微微椒香辣味，變成另一種美味。鰻魚底下嘅白飯已經唔係白飯，而係吸收晒濃甜醬汁同鰻魚汁嘅有味飯，每一啖都滋味無窮，而飯粒蒸得透，仍保留日本米煙韌嘅口感，同鰻魚簡直係絕配。閒時加一口酸甜嘅黃瓜，飲一啖清爽嘅魚肝湯，配一口日本綠茶，非常豐富滿足嘅一餐。絕對係有生之年食過最好食嘅鰻魚飯。
離開食店，繼續聞到廚房傳出濃烈嘅鰻魚味，實在回味無窮，真教人捨不得。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
チリンチリンアイス
長崎著名景點眼鏡橋除左睇眼鏡同搵心心石之外，另一特色就係婆婆嘅玫瑰花雪糕。婆婆們會推住一架流動雪糕車，喺橋附近擺檔。雪糕整成玫瑰花型相當特別。一枝¥150，淡淡嘅奶味、蜜糖味，口感似雪葩，口味其實就一般，志在影相都可以試試。
岩崎本舖
行完哥拉巴園落山路途會經過一條小街，除左有幾間長崎蛋糕名店外，仲可以試下長崎名物「角煮饅頭」。岩崎本舖得到長崎特產最優秀獎，長崎市內總有一間喺左近。行過隨便試食，一人一舊，試食嘅份量都幾乎有四份一個包。咁試完好食又唔怕再消費，買一個角煮饅頭 (¥400) 當下午茶。新鮮熱辣到燙手絕對無得頂，包係好似饅頭咁，再軟身濕潤一啲。中間夾住一塊厚切豚角，幾乎比包皮還大。三層豬腩層次分明，滷到入晒味，甜甜嘅醬油充滿住成塊豚肉，肉質鬆軟到入口即溶，又唔會過份油膩，食完一件更加開胃。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
ツル茶ん
由中華街行去思案橋都係幾分鐘，黎到呢間創業於1925年、九州最古老嘅喫茶店ツル茶ん食元祖土耳其飯。呢度好耐之前係報社，創辦人同國父有淵源，所以門口亦寫住「孫文先生故緣之地」。店裡面貼左好多坂本龍馬跟同中山先生嘅資料，亦有好多明人到訪嘅留影同簽名。店內有復古裝修，亦保留好多舊有擺設，另有一番風味。
昔なつかしトルコライス ¥1080
土耳其飯的確係Fusion菜，飯、意粉、沙律放喺同一碟。呢款招牌菜係咖哩吉列豬扒配番茄拿破崙意粉。勝在顏色鮮艷，賣相吸引，而且美味都唔錯。咖哩汁香得黎帶甜，豬扒炸得香脆，肉質不錯，唔鞋仲有肉汁。意粉汁番茄味勁濃，酸甜醒胃。而飯並唔係普通白飯，而係拌入牛油、洋蔥同粟米嘅有味飯，淡得黎有味，正好緩和口味。
フリカンデルトルコ ¥1080
另一味選擇左漢堡配黑椒意粉。牛肉漢堡非常唔錯，切開漢堡仲見到肉汁，而且肉質鬆軟有肉味，配上微酸嘅ドミグラスソース牛扒醬，不錯吃。而意粉就簡單用黑椒調味，不過不失。
埋單港幣$140有找，味道未算驚為天人，但勝在配搭有趣。看似九唔搭八，但正好感受長崎和洋融合嘅感覺。
by admin | 4 月 6, 2015 | 2015九州蜜月追櫻之旅, 九州, 九州美食合輯, 旅遊, 日本
黎到長崎第一餐，決定去台灣旅人認為長崎必食嘅名店「吉宗」。十二點未夠到達觀光通，就喺商店街轉角，就有一間始創於1866年、非常古色古香嘅食肆。Tabelog 3.54，為長崎排隊名店。
兩層木造嘅建築物，食店裝潢都好有傳統和式風味，似足日本時代劇傳統食店。入店後要先除鞋，除鞋係因為全店使用榻榻米。除鞋後服務員大哥會大力敲打木板，通知二樓嘅服務員接應安排入座。用餐區分為兩邊，一邊係和式席地而坐，亦可選擇洋式小矮櫈。黎得日本，當然要感受最傳統嘅榻榻米啦!
吉宗係日本第一間販售茶碗蒸嘅店鋪，絕對係茶碗蒸元祖。好多本地人同旅人慕名而黎都係為左一碗蒸蛋，是日柯打一定非點不可。選擇左一客人氣御一人前、同日替角煮定食作為午餐。
御一人前 ¥1350
定食包括一碗茶碗蒸及三色飯，賣相非常靚。主角茶碗蒸好幼滑，表面同中間都無氣泡，成碗都蒸得好靚。入口更加不得了，蒸蛋雖然呈固體狀，但佢嘅柔軟度直情近似於濃湯。入口即化，蛋液自然滑入喉嚨，口感就好似薑汁撞奶一樣。食得出蒸蛋用上好多高湯，湯頭非常鮮味濃郁，無添加過份調味。加上好多高級配料，如白肉魚、雞肉、香菇、木耳、蝦、銀杏、魚板、烤星鰻等，非常豐富。無諗過茶碗蒸可以如此講究，如此美味。至於三色飯，三色配料係蛋絲、櫻花蝦鬆同雞肉鬆。賣相吸引不在話下，仲相當好味。味道偏甜，正好下飯。
角煮定食 ¥1080
特價嘅日替定食相當豐富，包括幾款前菜、沙律、一客細茶碗蒸、麵豉湯、豚角煮配白飯，仲有兩款甜品。豚角煮已經燉到入口即化嘅程度，雖然三層肥瘦相間，但係唔覺油膩感。豬肉本身甜味好足夠，加上鹹鹹甜甜嘅醬汁，正好下飯，加一點芥末仲可以增加層次感。
此餐埋單¥2430，港幣百幾蚊一餐已經感到相當豪華。此行一大得著係，完全顫覆左對茶碗蒸嘅傳統概念。再唔係定食嘅配菜，而係可以上枱作為主角一味。的確，仲相當飽肚滿足。
by admin | 4 月 5, 2015 | 2015九州蜜月追櫻之旅, 九州, 旅遊, 日本
今日七日遊選擇入住Hakata Green Hotel Annex。用後感覺非常良好，絕對值得推薦。
地點方便
今次旅程以博多為中心點，採取放射式移動，住博多周邊酒店係必然之選。初頭都有幾間酒店在候選之列，評估過後，都決定揀Green Annex，因為地點實在太太太好，因為酒店就喺博多駅隔離。經築紫口出，穿過EX-SIDE就見到，過條馬路就到，全程一分鐘腳程。方圓十米範圍已經有兩間Lawson，夜間買甜品樓下搞掂。至於搵食、買野去番EX-SIDE或Ming就搞掂。係方便到，唔介意中途先放低手信再外出血拼嘅程度。
服務周到
Green系酒店都唔細，Annex係一間小型商務酒店。接待處職員好有禮貌，英文就係一般，但都準備左翻譯指南同說明牌，指指點點都溝通無問題。每日出入，接待處職員都會禮貌打招呼，日日如是，佩服。可能酒店細，Check In算快速，而Check Out更係極速，還左房卡就得，完全無安排同事檢查房間，真係一手交一手就搞掂。臨走前寄行李亦相當安全，登記後行李會放入儲物間，唔會就咁放大堂。
房間企理 配套充足
就喺博多駅周邊，Green系酒店仲有1,2館，而Annex當然就係最新。明顯裝修設備都好新淨，非常時尚簡潔，好一間年青精品酒店。酒店唔大，十幾層，總共180間房。值得一提，酒店保安唔錯，要嘟房卡先可上樓。我地住八樓，兩邊翼，十零間房。出電梯轉角就係，走廊相當闊落光猛。由於網上訂房已經好滿，只能訂吸煙間。入房係有陣煙味，但房內有空氣加濕清淨機，開左一陣味道已經吹散，呢幾晚都唔覺辛苦。房間唔算大，同大阪新阪急咁上下，行李可攤開放床尾，仍有移動空間。房內都係時尚型格風，以黑、啡、白做主色。雙人床正常大，都算舒適，好容易適應。房間提供免費Wifi，原來仲有每房獨立Account，上網感覺非常良好。每日嘅打掃一齊都好整齊，補充物品絕唔慳。每日仲會送兩枝礦泉水，仲有包裝蒸餾咖啡。
洗手間非常型格新潮，估唔到原來都係一體成型，但裝修到同一般酒店無分別，呢個實在正。有齊沐浴露、洗頭水、牙刷等，真係乜都唔洗帶。
價錢
是次訂最平嘅雙人房，真係一個字抵! 一向都知道福岡酒店出名平，親身感受後覺得比抵更抵。六晚Semi Double不連早餐總數$4100，平均一人$2050，比上次大阪足足平千幾蚊。價錢黎講抵，就其地點可以慳到唔少車費，確係無得輸。
