茶力的小怪獸
深圳萬象天地 12/11/2023 12:30
卡士豆花珍珠奶茶 26元
揀左最基本既招牌款式，係豆花加上奶茶再加珍珠。豆花本身幾滑，有豆味，仲有唔少珍珠，跟一向食開既差不多，算幾彈牙。奶茶本身奶味唔算特別濃，係奶味偏重，算相當合口味。得意既名字，得意既包裝，值得打卡。
陶陶居
深圳萬象天地 12/11/2023 10:30
成功抽到大眾點評免費試食二人餐。今日重臨萬象天地，一樓半戶外嘅平台就見到陶陶居。
咁早嚟到人流都已經唔少，好彩唔需要等位。興幸坐係一張靠邊卡位非常之闊落，見中間圓枱比較貼近較為迫。坐低先飲啖普洱茶，清香錯。
點評送既二人餐已經非常豐富，但係熱菜需要11點後才供應，只好先叫幾個點心填下肚。
黑魚子香菇燒賣 36元：燒賣啖啖肉，好實在，菇味香濃。
流沙奶黃豬豬包 29元：賣相非常可愛，新鮮熱辣，流沙奶黃爆曬出嚟，唔太甜，味道不錯。
回味荔灣艇仔粥 33元：餸都非常多，有魚肉、疑似鮑魚絲、豬皮等。粥底本身好綿好夠味。
陶陶居大蝦餃﹕係點心四大天王之一。蝦餃超級大粒，起碼比平時酒樓食大1.5倍，非常飽滿。餃皮都算薄，蝦非常之多而且爽口。
明爐香滑靚葡撻﹕新鮮熱辣，皮非常酥脆，蛋非常幼滑，入口即溶，不太甜。
紅燒乳鴿﹕外皮脆卜卜，內有肉汁，啖啖肉。
惹味秋葵煎牛肉粒﹕賣相一流，材料非常多，牛肉超級腍，蒜味十足，好香口。
啫啫生菜煲﹕連煲上菜相當澎湃，熱辣辣，有蝦乾帶點鹹鮮味。
乾粉牛河﹕非常大碟，賣相一流，入口有鑊氣，餸料牛肉都非常多。
食物水準十分高，新鮮熱辣味道好。服務亦一流，服務員非常多，自動自覺。其實點心價錢非常可觀，一籠燒賣都近40元，但係就免加一，價錢同香港比較差不多，但深圳食一定質素更佳。
杭州小籠包
美團外賣@福田 22/11/2023 18:00
薄皮小籠包 (7個) 13元﹕超驚喜高質素出品! 皮非常薄但都無穿，肉餡比較腍身，充滿肉汁。配上秘制醬汁係咸甜醬油，加微酸加辣，辣得好過癮。
鮮肉小籠包 (8個) 12元﹕係饅頭麵包皮包住鮮肉，包皮本身幾香，肉相當腍，但肉汁就被包吸晒。
鮮肉蒸餃 (8個) 12元﹕餃皮比小籠包略厚，包的肉餡大致相同。
雞蛋煎餃 (8個) 18元、雞蛋煎包 (8個) 18元﹕﹕在煎餃或包嘅基礎上加上大大塊蛋皮，相當飽肚。
雞蛋火腿鴛鴦粉 21元﹕係米粉配河粉，份量都唔少，餸料主要有菜、蛋等，火腿略為少，但整得炒得幾香口。
普通包裝，返到屋企微暖，加熱食會更好。每款十幾蚊有呢個質素實在超值，值得回購。
食物94+配送費6+餐盒12 = 112元，再扣減優惠實付83元。
京廣德北京烤鴨
美團外賣@深圳笋崗 15/10/2023 18:00
美團外賣包裝都相當乾淨企理，三四人餐大約$100。今次包裝冇輔大保暖袋，所以嚟到香港溫度都係微暖。鴨肉兩大盒，肉比較多，但略為有點鬆散。荷葉餅相當薄，口感煙韌。加上龍田嘅醬料同埋青蔥等，味道都可以。但印象中冇第一次食嗰間咁好食。
Tim Hortons 天好咖啡
深圳筍崗寶能環球匯15/10/2023 16:00
點評夏日嗨吃單人餐 29.9 肉桂提子貝果、蜜核烏龍茶。貝果煙韌韌，肉桂味好多，提子帶點酸提味，不錯。
點評超值雙人餐 49.9 巧克力華夫、蛋香牛肉芝士可頌、膠原爆珠草莓椰、拿鐵。華夫朱古力味相當濃，可以自行加上芝士醬，味道更有層次。最欣賞可頌熱辣辣，本身牛油味香，芝士半溶加牛肉相當不錯。草莓椰奶香味濃，爆珠微酸，口感得意。拿鐵咖啡味濃，奶亦充足。
點評多巴胺司康球禮盒 12元4粒 巧克力、莓莓、雙椰、桃杏。細細粒類似小蛋糕，鬆鬆地，味道不錯，各個味道都食得出。
綠茶餐廳
筍崗寶能環球匯 15/10/2023 11:30
媽媽生日北上食好野，印象中呢間綠茶嘅裝修係非常有特色。星期日中午上來人唔多，可以坐一個小偏廳自成一角，仲有靚靚嘅裝修。
石鍋雞湯豆腐 35元﹕熱辣辣石鍋，豆腐嫰滑，配湯好易入口。
招牌粉絲裹蝦 38元﹕即席料理將生蝦燘成熟，滿滿蒜蓉配上索晒醬汁嘅粉絲，蝦都係爽口彈牙，非常高質素。
龍井茶香脆皮雞 48元﹕雞係脆皮的，肉質算嫰滑，可惜不見龍井茶香。
招牌石鍋沸騰飯 38元﹕上菜仍然沸騰，熱力非常，餸料都多，撈飯一流。
面包誘惑 32元﹕賣相吸引，麵包脆脆地，配上雪糕，冰火交融。
生日面﹕送嘅生日面竟然如此豐富，大大隻蝦仲有唔少配料，份量亦非常多。
兒童餐﹕有三個小朋友自動送上三份兒童餐，有甜甜南瓜米粥，可愛嘅流沙熊仔包，小朋友非常開心。
江南綠茶餅﹕賣相吸引招牌必食，類似麻糬煙煙韌韌，芝麻夠香。
菜品單價非常優惠，仲送呢樣果樣，最後埋單191元，5個大人加3個小朋友食得飽飽，呢個價錢呢個質素實在太難以至信。環境超乎預期嘅靚，仲有古箏即場演奏。服務員多，服務態度一流。要大大力推介!
