by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
壹錢洋食
祗園、河原町可算係京都遊必經之路，的確呢度真係好多好野食。當中數最深刻嘅就係一間人氣名店壹錢洋食。淨係個門面已經殺左好多張相，非常特別。小店只賣一款食品，就係類似大阪燒餅嘅物體。因為店內都幾多人，所以選擇買一份外賣，去河邊坐喺岸上慢慢嘆，仲有風味。
就拎住外賣坐喺河邊，睇住流水，鴨仔游黎游去，呢個杜點的確唔錯。外賣包裝好特別，用舊報紙包住，好有Feel。
壹錢洋食燒餅(¥650)麵漿加左大量青蔥、包住半熟蛋、豬肉、竹輪、櫻花蝦、紅薑等等，材料好豐富，再加上勁濃味嘅燒汁，真係好好味，而且都好飽肚。
六傳屋 先斗町店
晚餐時間就去左食街先斗町，揀左六傳屋。一入到先斗町，真係有種時空錯錯亂嘅感覺。天氣漸暗，小街嘅店舖都開左紅燈籠，超級鍾意呢種感覺。
黎到六傳屋試下日中Fusion嘅擔擔麵。叫左一個白味噌擔擔麵¥850，另一個係黑胡麻擔擔麵¥850。
白味噌湯底勁濃味，甜味亦好夠，質感好忌廉咪，配上粗身麵條，再加上大量肉碎同白蔥，肉碎浸住喺湯裡面，充分吸收左湯嘅甜味，整體黎講係日式感幾重嘅麵。另一個係黑胡麻味，湯底改為用上黑芝麻加少許辣油，味道微辣，無咁忌廉咪，比較中式。個人較鍾意白味噌果款。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
錦市場被稱為京都廚房，係京都午餐嘅不二之選。一點鐘黎到錦市場，市場商店街嘅標誌就係又紅又綠嘅彩色玻璃天幕。商店街左右兩旁都有唔同類型嘅店舖，慢慢行邊睇邊食。掃街掃一圈，食品類型幾多，食勻人氣食品其實都夠飽。
こんなもんじゃ
錦市場 こんなもんじゃ專買豆腐製品。細細粒一口大小嘅豆乳冬甩(¥250)新鮮即炸，甜甜地有微微豆腐味。豆乳雪糕(¥250)冰感十足，清甜有豆味，有啲似豆漿味嘅沙冰。
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
美々卯 京都伊勢丹店
京都嘅晚餐試試傳統日本料理美々卯。就係京都伊勢丹11樓，上面有好多間食肆似乎都幾吸引，但既然有心水就唔好心大心細。美々卯可算係烏冬名店，係烏龍壽喜鍋嘅始創店，賣相的確好吸引，但份量似乎太多，所以最後放棄，選擇兩客賣相非常吸引，而且乜都有大雜錦定食。
最鍾意日本料理嘅賣相非常吸引，相機已經餵得飽飽。第一份係美々卯弁当¥2080。有六款小食、天婦羅、烏冬、白飯同甜品。開胃六小碟，有刺身、沙律、豆腐等。刺身新鮮不在話下，京都嘅豆腐真係好好味，豆味勁重而且質感軟滑。除左跟飯外，仲有一客迷你烏冬，可以試下傳說中達到百煮不爛境界嘅名物。烏冬果然不錯，甜味重，質感軟腍但不爛，吸收左湯底嘅味道，更加一絕。
另一客係花ゆばセット¥1770。以烏冬做主菜，配天婦羅、湯葉豆腐、季節香飯同甜品。呢個烏冬用木筒裝住，食法上有唔同。先倒出醬油，加入蔥、紫菜同芝麻混和，夾起烏冬點落去，形式似沾麵。烏冬加上醬油，係另一番風味。烏冬上仲加左豆皮，味道好清甜，豆味重，京都嘅豆製品真係比其他地方做得好。值得一讚，香飯真係好香好味。飯加上野菜、蝦米、雜菌一齊煮，飯煮到入晒味，菇味勁香。
雜錦天婦羅雖然不及天婦羅名店咁厲害，但材料新鮮，香口唔油膩已經抵讚。時令甜品更因應櫻花季節改為櫻花餅，實在太好啦！櫻花餅其實係類似糯米丸裡面加上紅豆饀，糯米好似仲加入左櫻花嘅味道，非常好食。今餐埋單¥3850，非常值得！
by admin | 4 月 16, 2014 | 2014大阪京都七天遊, 旅遊, 日本, 關西, 關西美食合輯
此行有去京都嵐山，行完竹林再出最旺嘅商店街係必去之地。嵐山商店街有七十幾間商店，有野買，有野食，用黎做午餐中轉站就最岩，黎到嵐山有好幾樣美食藉得推介。
豆腐茶屋 嵯峨豆腐 三忠
超人氣嘅豆腐名店嵯峨豆腐三忠，店仔細細好似一個涼亭咁，店外有一排木椅可以坐住食。叫左兩樣必點京都名物，にしんそば鯡魚蕎麥麵（¥450），一個ごま豆腐（¥380）。鯡魚蕎麥麵係新鮮熱辣，份量比想像中多，鯡魚似煙燻醃製過嘅魚，味道好濃好甘甜，蕎麥麵麥味重，口感煙韌，湯係清淡嘅鰹魚高湯，加上少少青蔥，簡單味美嘅京都麵食！另一味的確係新奇，芝麻豆腐口感唔似豆腐，似麻糬咁腍得黎黏黏的，好香芝麻味，加上醬油同Wasabi，感覺好微妙，係好食嘅。
