by admin | 4 月 9, 2014 | 2014大阪京都七天遊, 旅遊, 日本, 關西
大約3點到達嵐電總站北野白梅町駅，開始遊覽幾個京都著名景點。係嵐電駅行無幾遠就見到巴士站，搵岩經過金閣寺嘅巴士就上。京都巴士最好嘅係，站牌會見到巴士去到邊個位置，可以預計等車時間。車到後由後門上車，大約十幾分鐘就到達金閣寺道，落車前將早前買落嘅京都巴士一日券插入讀卡器，門票就會印上當日日期，今日內只需出示巴士券就可以享用掂行掂過嘅任搭放題。
落巴士後，跟指示行一段小斜路，好快就見到金閣寺嘅牌坊。一路行，已經感覺到人氣鼎盛。話晒金閣寺都係京都嘅代表景點，黎得京都點都要俾面一遊。金閣寺都係世界文化遺產，因為寺內主要建築舍利殿嘅外牆係用金箔裝飾，所以叫做「金閣寺」。下午三點幾陽光充沛，顯得金閣寺更加金。一個必取鏡頭係金閣寺同鏡湖池嘅池水相映，的確幾靚。入場門票¥400，其實只得一座金閣寺好睇，輕輕鬆鬆半個鐘完成。
離開金閣寺，前往附近嘅平野神社追櫻。搭巴士再步行一段路，好快就見到寫住「京都賞櫻名所」嘅指示。平野神社內有十幾個品種嘅櫻花，係京都觀賞櫻花嘅著名場所。平野神社亦出名夜櫻，紅燈籠再加上夜市攤檔，氣氛一流。雖然無緣睇夜櫻，但唔少攤檔都有開業，情境同卡通片一樣！
進入平野神社園內，見到櫻花林下一排排燈籠，非常有意境，相信夜晚燈籠著晒會有另一番風味。
近幾日係櫻花滿開期，平野神社嘅櫻花開足十成，真係好澎湃。亦有部份櫻花已落下，風吹起時仲有浪漫嘅櫻吹雪，花瓣滿地，呢個畫面絕對可遇不可求。平野神社的確係賞櫻名所，櫻花多，而庭園佈置好有氣氛，更重要嘅係無料開放，唔洗錢點會走雞，強烈推介嘅櫻花景點！
依依不捨地離開遍地櫻花，見時間尚早，臨時增遊西陣織會館。到達時間已經16:45，會館17:00關門，有十五分鐘時間要好好把握。會館有兩層展廳，介紹織布技術、和服展示等等，地下會定期舉辦和服花生騷，中間係產品專賣部。簡單睇過展覽，將時間放晒係掃手信，買左一個Hello Kitty袋仔、化妝鏡、磁貼做紀念。直到終止營業廣播準時5點離開。
參考
金閣寺 www.shokoku-ji.jp
平野神社 www.asahi-net.or.jp/~cr8y-httr/hirano
西陣織會館 www.nishijin.or.jp
by admin | 4 月 9, 2014 | 2014大阪京都七天遊, 旅遊, 日本, 關西
12:45 由竹林行番出最旺嘅商店街，真係好熱鬧好多人。嵐山商店街有七十幾間商店，有野買，有野食，用黎做午餐中轉站就最岩。
黎到嵐山有好幾樣美食係網友必食推介。第一站先去超人氣嘅豆腐名店嵯峨豆腐三忠，店仔細細好似一個涼亭咁，店外有一排木椅可以坐住食。叫左兩樣必點京都名物，にしんそば鯡魚蕎麥麵（¥450），一個ごま豆腐（¥380）。鯡魚蕎麥麵係新鮮熱辣，份量比想像中多，鯡魚似煙燻醃製過嘅魚，味道好濃好甘甜，蕎麥麵麥味重，口感煙韌，湯係清淡嘅鰹魚高湯，加上少少青蔥，簡單味美嘅京都麵食！另一味的確係新奇，芝麻豆腐口感唔似豆腐，似麻糬咁腍得黎黏黏的，好香芝麻味，加上醬油同Wasabi，感覺好微妙，但絕對入到口！
食完咸食，正好食下甜野，另一樣嵐山名物係古都芋，古都芋本舖就係三忠旁邊。古都芋一件¥150，叫左一白一黑試下。古都芋原來係類似蕃薯餅，薯蓉好幼滑，黑色嘅應該加左芝麻，但芝麻味淡淡的，分別不大。
旁邊仲有一間舖頭人氣名店京豆庵，最出名豆腐味雪糕，叫左一個混合口味（¥350）試埋芝麻味先。雪糕質感好厚實，真係好Gelato，豆腐味勁濃，芝麻味都不錯，值得推介。
簡單填肚後，計劃向嵐電車站進發，可以沿路遊覽商店街。有間賣織布製品公仔嘅嵐山ちりめん細工館值得一逛。
此行仲有一間雪糕名店京都嵐山サガパーSaga Par一定要食，就係某某食評網絡票選甜點唔知第幾名，反正就係好受歡迎嘅金獎名店。一場黎到，必試京都抹茶口味（¥300）。雪糕滑滑，抹茶味勁濃，難怪得獎！
行經一間小店，賣一串串嘅魚棒，一串¥200，一試無妨。呢間係出名食京都料理嘅良弥，其中一間輕食處，專賣小食甜品。呢枝係加左章魚嘅魚肉棒，口感不錯，魚味好香，仲有青蔥提味，抵食。
臨到達嵐電，又發現另一間名店。嵐山有嵯峨野可樂餅出名，但日本最出名嘅就係中村屋，人龍已經證明呢一點。隨便買左一個牛肉可樂餅¥100，的確唔錯，更加香脆，牛肉味更濃郁。真佩服日本人整咁多炸來炸去，但食落全無油膩感，亦唔覺熱氣！
飲飽食醉終於要離開嵐山，睇睇時間已經兩點。漫遊成個嵐山地區，的確可以用上大半日，就算Hea足整整一日，應該都不是問題，竹林附近仲有唔少神社寺廟。但我地偏愛精華遊，所以決定繼續跑行程。離開嵐山都可以搭巴士，但搭京福電鐵．嵐電算係嵐山其中一個特色，當然不能錯過。嵐電均一車票¥200，買好票後剛好趕得及上車。嵐電路線呈Y字型，由嵐山出發，得一個轉車站，落車後行過對面月台轉另一架車，就可以去到北野白梅町駅，非常簡單。櫻花季節仲有特別景點欣賞，就係北野線嘅宇多野駅、鳴滝駅之間，有一條櫻花隧道。電車路兩旁都係櫻花樹，櫻花多到好似隧道咁，成個影相構圖好靚，好多龍友會特登落車行一段路為左影呢張相。作為乘客，有幸搭到期間限定嘅櫻花車，仲見到窗外嘅櫻花，此行已經好滿足。
參考
嵐山商店街 www.arashiyama-kyoto.com/shop/arashiyama.html
豆腐茶屋 嵯峨豆腐 三忠 tabelog.com/kyoto/A2604/A260403/26017101
嵐山ちりめん細工館 www.chirimenzaikukan.com
京都嵐山サガパー www.donsarya.co.jp/sagapar
良弥 www.yosiya.jp/hondoori
嵐電 randen.keifuku.co.jp
by admin | 4 月 9, 2014 | 2014大阪京都七天遊, 旅遊, 日本, 關西
10:50 準備去搭小火車，去番嵐山駅搭JR幾個站去馬堀，車程大約10分鐘。出閘後已經有地圖指示去小火車車站嘅方向。沿住田園路旁行十分鐘左右，有櫻花滿開，又有一大片廣闊田園，非常舒服。
去到トロッコ亀岡駅，見到傳說中嘅木製車站，經過長長嘅木製斜路，到達車站月台大堂。上面已經好多人，好熱鬧，人人都好期待小火車出現。6號車發車時間係11：35，小火車於11：30駛入月台。今日實在太多人，又有旅行團，所以都搞左一段時間先迫到上車。
傳說中最佳座位係第五卡嘅雙號，因為第五卡係開放車箱，左右兩邊都無玻璃窗，睇風景更清楚，仲可以感受陣陣涼風。今日天氣唔錯，吹風都無乜問題。第五卡嘅氣氛亦好好，的確無揀錯，只係過隧道時比較凍。至於觀景方面，小火車沿住保津峽行駛，好風景嘅會見到保津峽，另一邊就會係山景。亀岡向嵐山方向的話，雙號位置頭三份二時間都會見到保津峽，後段會係山景。單號位置則相反，所以的確係雙號座位比較著數。
小火車一路行駛，見到河上唔同形狀嘅岩石，非常天然嘅風景。短短廿幾分鐘車程真係舒適寫意。仲間唔到見到有船仔經過，呢架船可算係保津峽一個豪華玩法，用兩個鐘時候泛舟遊覽保津峽，適合有時間hea遊嘅人士。
值得一提，小火車車長會一直做廣播，介紹沿途風景，亦會失驚無神唱幾句歌，好搞笑。
離開小火車站進入竹林，見到幾個嵐山常見嘅人力型男，向遊客介紹人力車遊嵐山嘅服務。再行前幾步已經進入竹林範圍，竹林裡空氣好到不得了，涼浸浸好舒服，身處竹林之中，真係好似世外桃園，宮崎駿動畫世界一樣。
竹林嘅盡頭就係野宮神社，出名祈求良緣同學業，仲有
日本神社牌坊最原始、最古老嘅黑色鳥居。完成小火車、竹林遊，向最熱鬧嘅嵐山商店街進發。參考
嵯峨野トロッコ観光鉄道 www.sagano-kanko.co.jp
野宮神社 www.nonomiya.com
by admin | 4 月 9, 2014 | 2014大阪京都七天遊, 旅遊, 日本, 關西
09:20 到達トロッコ嵯峨野售票處，按原定計劃坐11:35嘅6號車（票價¥620）
。可能職員知道我地係遊客，唔需要特別提出，佢好自然就安排第五卡坐席，仲要係雙數嘅A及B坐位，可算係全場最佳位置! Happy! 第一日到達機場完全忘記左買票呢田口，只好當日到場買，好彩錯有錯著，買到只限當日發售嘅第五卡開放車箱，實在不得不講句，早起鳥兒有著數！
參考
Saint Marc Cafe www.saint-marc-hd.com/cafe
Arinco www.arincoroll.jp
天龍寺 www.tenryuji.com
by admin | 4 月 8, 2014 | 2014大阪京都七天遊, 旅遊, 日本, 關西
17:15 落機到達大阪都已經下午，第一日行程選擇喺梅田地區遊走。先去附近嘅新梅田食道街醫肚。Google Map顯示腳程要三分鐘，但其實一出酒店轉個彎就係，真係勁近。大阪第一餐試試地道嘅大阪燒同炒麵，揀左一間參加過電視冠軍王嘅人氣名店きじ。
1969年創店嘅きじ可算係老字號。一般遊客因為旅遊書介紹，多數會去藍天大廈滝見小路店，但梅田食道街店更有老大阪風味。小店細細，木製裝潢配上淡淡暗暗嘅燈光，將焦點全部放係大廚嘅鐵板上。我地坐喺鐵板枱前，睇住鐵板上嘅美食真係食欲大增，全部新鮮即製呀。
食客多數係落班嘅西裝友，正真體驗到大阪人五點半嘅生活。店員知道我地係遊客，提供左中文菜單，仲安排左識國語嘅職員幫我地落單。點左一份炒麵，加一份大阪燒豚玉。先送上炒麵，好香口，有鑊氣，麵條夠煙韌，材料有椰菜豬肉等，味道較為清爽，如果醬油可以再多啲應該會更好食! 另一味大阪燒整得好靚，表面塗滿醬汁，仲有蛋黃醬同海苔。用迷你小鏟切開，外皮係脆脆的，中間嘅餡多到不得了，粉漿軟腍，加上又甜又爽脆嘅椰菜，仲有肉碎，配合得好好。不愧為大阪燒人氣名店! 埋單總數大約¥1370，物有所值。
18:15 食完下午茶就繼續下一站天神橋筋商店街。為左要完成滿步狀，決定由天七向天一方向行。天七起站係雜貨店西台，同老闆婆婆溝通過後，佢擔心我地去到天一終點間舖頭已經關門，所以決定照俾滿步狀我地，以免失望而回。婆婆實在太好人啦，我地一定會好好完成整段路程!
天神橋筋商店街係日本最長嘅商店街，成條街橫跨三個地鐵站距離，全程有2.6公里，由七丁目行到一丁目差不多要用上一個鐘時間。商店街有成八百間店舖，好多都係舊式家居小店，體驗到傳統大阪街坊生活。雖然六點幾有好多小店已經關門，但食肆仍然人氣鼎盛，特別係壽司舖，因為呢度係有名嘅壽司激戰區。
沿商店街行試左兩樣日本傳統小食，丹波屋嘅醬酒味糯米小丸子 (¥70)，煙煙韌韌嘅糯米丸加上醬油，少少咸少少甜，味道好搞笑。
鳴門鯛燒本舖嘅鯛魚燒 (¥150)外脆內軟，香甜好味嘅紅豆多到滿瀉。
邊睇邊行，大約行左一個鐘，終於到達一丁目終點! 將滿步狀頒俾自己先!
20:00 又到晚飯時間，今晚選擇食鰻魚飯。名代宇奈とと出名平靚正，最平嘅鰻魚飯只需要¥500，¥500有得食鰻魚飯的確吸引。柯打左一客¥500鰻魚飯，另一客加左蔥同溫泉蛋嘅鰻魚飯 (¥800)。雖然價錢平，但鰻魚俾足一大塊，而且鰻魚仲係肥厚有肉地。日本嘅鰻魚真正係炭火燒烤，所以炭香味十足，鰻魚本身一啲都唔腥，醬汁好濃郁，細蔥香味極濃而且好甜好脆，送飯一流。值得一提，日本嘅飯除左比較煙韌外，飯粒本身已經好夠甜味。飲埋杯清涼麥茶，非常完美嘅晚餐！
20:30 完成天神橋滿步之旅，第一日嘅尾門係視察梅田附近環境，為之後幾日嘅鐵路行程做好準備。唔少網友話梅田係一個迷路熱點，因為梅田的確好大，地面有大百貨，地下有鐵路同地下街。一個地區已有幾條鐵路線，可算係交通樞紐。喺梅田搭車轉車，的確需要啲時間搵路。所以特別要預留第一日晚實地參察。
地下街有清晰指示，基本上唔睇地圖，憑感覺憑肉眼更容易搵到目的地。大概對鐵路嘅入閘位置有概念，就進擊梅田地面。途徑《半澤直樹》東京中央銀行大阪西支店，點都要影番張相先。
之後去左Yodabashi Umeda，淨係賣電器都唔知幾多層，樓上仲有Jump Shop同唔少食肆。慢慢行的話，相信都hea到半日。22:00 返酒店，為第二日京都之旅做好準備。
參考
きじ大阪燒 tabelog.com/osaka/A2701/A270101/27000297
天神橋筋商店街滿步狀 tenjin123.com
名代宇奈とと鰻魚飯 www.unatoto.com
by admin | 4 月 8, 2014 | 2014大阪京都七天遊, 旅遊, 日本, 關西
2014年4月8日開始我地嘅大阪京都七日遊。今次有幸出國嘅Hello Kitty係以下呢六隻再加一對日本結婚Kitty & Daniel。
08:30 到達機場。出發前早兩日喺網上Check in 國泰，去Counter寄行李拎埋Boarding Pass。出發前先去大家樂食個早餐。
09:45 到達閘口，網上Check in時揀左67A同68B位，原來呢個位真係闊落好多! 對腳伸長都仲有空間，出入去洗手間都唔會影響到人，呢個真係正位! 唔同嘅係，電視同枱分別收埋左椅下同手把位內，拉出黎就用得。唯一唔好就係枱仔比較細，同埋無得將手提行李放喺座位下，不過呢個絕對唔係大問題!
今次嘅飛機餐有茄汁魚柳配炒飯，醬汁酸酸甜甜都幾開胃。另一個螺絲粉就一般啦。
14:30 今日天氣好而且大風，比預計時間早左成半個鐘到達關西空港，賺左!
落機第一件事係坐無人駕駛列車去入境大樓。今日入境程序都好順利，好快就完成。接埋行李就過稅關檢查，原來真係會問問題架! 順利過關出到客運大樓一樓。
第一件事先去KAA Travel Desk大阪市遊客指南中心買Pass。Pass絕對係慳家恩物，起碼交通費有包底，部份景點仲有優惠! 喺KAA入手「大阪周遊卡」，「阪急二日券」，「京都巴士一日券」。
- 大阪周遊卡二日券 (¥3000) : 非常抵用嘅一款大阪旅遊套票，需連續兩日使用。套票包含28個景點可免費入場，仲可以任搭大阪地鐵。景點都係幾值得去嘅人氣景點，¥3000可以豐富到兩日行程，真係勁抵。
- 阪急二日券 (¥1200) : 任選兩日阪急電車放題。我地會有兩日由大阪去京都，每程阪急原價要¥400，兩日總共四程來回已經要¥1600，而家包底價¥1200，夠食多一客章魚小丸子!
- 京都巴士一日券 (¥500) : 遊覽京都主要景點交通為巴士，以每程¥200左右計，搭三次已經回本，玩京都一日，分分鐘要搭五、六轉車，一日任搭實在太抵啦!
買完套票就出發去大阪市區，對自由人黎講，最方便嘅方法就係搭鐵路或者利津木巴士。雖然酒店樓下已經係巴士站，但我地都偏愛鐵道遊，所以選擇搭南海電鐵。到達關西空港駅，喺南海電鐵售票處買「大阪出張一日券」，入閘準備搭15:35南海電鐵特急Rapi:t β。
- 大阪出張券 (¥1500) : 包括一張Rapi:t β車票及大阪地鐵一日券。Rapi:t優惠價都要¥1100，¥1500有埋地鐵券夠包晒第一日嘅交通費
入左閘先記得忘記左一個行程就係去JR綠色窗口買嵯峨野小火車票。不過網友指其實櫻花旺季嘅預售車票應該一早爆滿，都預左要買當日票。反正唔買預售仲有驚喜 (見第二日遊記)。
科幻感十足嘅Rapi:t β真係非常正，座位甚至比飛機椅更舒服。全車指定席，職員仲特登將旅客編埋同一卡，相信係以免影響本地人士。三十五分鐘就到達難波，按地下街指示好快就去到地鐵御堂筋線，再繼續向梅田進發。
一早有心理準備梅田係一個極大嘅迷宮，幸好無迷路，仲覺得地下街嘅指示非常清楚，乜都唔洗諗跟路牌行就可以到達目的地，比行路面更容易。只係拖住行李下下要搵電梯比較麻煩，不過行程都相當順利。
16:45 到達酒店。今次六晚都入住位於梅田嘅大阪新阪急酒店，貪佢位置好，亦有好多好評。幫我地Check In嘅職員英文相當好。我地獲編最高層10樓嘅10113號房，上房放低行李簡單整理就立即出發跑行程。
參考
大阪周遊卡 www.osaka-info.jp/osp/cht/index.html
阪急二日券 www.hankyu.co.jp/en/hankyu_tourist_pass.html
京都巴士一日券 www.city.kyoto.lg.jp/kotsu/page/0000028337.html
大阪出張券 www.nankai.co.jp/traffic/otoku/trip
