韓國地道釜山炸雞

by admin | 10 月 10, 2024 | Blog, 外賣, 西餐, 韓國菜

釜山炸雞批薩

馬鞍山 10/10/2024 18:00

上次食過呢間炸雞非常好食，今次再來二訪，原來出咗新菜式。

炸雞二重奏 $219

上次試過五味炸雞，今次精選兩款口味雙拼，兩個味道都係小朋友最鍾意。炸雞仍然都係卜卜，啖啖肉。雙重芝味真係超級好食，芝士粉舖滿外皮，好香好甜，芝味十足。蜜糖芥末醬非常濃厚，酸酸甜甜，有醬汁比較濕潤。

皇者至尊比薩 $169

賣相好靚，材料豐富，舖滿豬肉粒、辣肉腸、粟米等，材料非常豐富。餅皮非常薄，芝士濃郁。可能焗得耐咗，餅皮有少少腍。而家買炸雞或者Pizza，就送一份小食，揀咗韓式熱狗，估唔到有四大件咁多，仲加咗茄汁同埋蜜糖芥茉，小朋友非常喜歡。

烤豬頸肉 $158

估唔到份量咁多，大大盒豬頸肉，食得出甜甜嘅韓式烤肉醬已經入晒味，灑上一啲芝麻更加香，而且肉質非常嫩滑。仲有一盒新鮮生菜，可以自行配搭上微辣嘅豆醬，更加惹味。仲有一款醬係有小蝦嘅海鮮味醬油，同埋勁辣又好食八爪魚。

焗芝士粟米 $45

最後加咗個芝士超多，勁濃厚，粟米粒係超級無敵咁甜，就係小朋友最鍾意嘅口味。

馬鞍山 14/10/2023 18:00

今日買外賣晚餐，小店就喺馬鞍山後街一個唔起眼嘅角落，一入門口就相當韓國感覺，原來老闆同廚師都係韓國人。效率非常高，外賣只需等15分鐘，兩大袋，分量十足嘅外賣新鮮整好。外賣包裝非常之好，仲有手套附上。打開包裝，實在太豐富，太澎湃啦！

五味炸雞 $239

主打韓國炸雞當然要試吓，呢一個五味炸雞，就啱晒選擇困難症嘅人，一次過試齊五種唔同口味。先食原味，外皮脆卜卜，中間仲有肉汁，唔油膩。炸雞仲有加左洋蔥蛋黃醬，洋蔥味濃帶微酸。蜜糖芥末醬更加重口味。甜辣醬好杰身，帶微辣好開胃。個人最鍾意雙重芝味，芝士粉舖滿外皮，好香好甜，芝味十足。

韓式烤肉PIZZA $169

首次試韓式Pizza，賣相好靚仲好大個，餅底有厚度，芝士超多做到拉絲效果，材料豐富，主要係肉粒、火腿粒等，醬汁係甜甜嘅韓式燒烤醬，味道不錯。

炸醬麵 $68

炸醬麵醬汁味道帶甜，配料有薯仔肉碎等，麵條粗粗地有啲似烏冬，口感煙韌，每條麵條都沾上醬汁。

芝士蛋卷 $108

超大份嘅蛋卷，煎得好靚好工整，略為實淨厚身嘅蛋卷，中層夾左芝士，加少少番茄醬美味十足。

估唔到係馬鞍山收埋左一間咁正宗嘅韓國餐廳。味道好，份量勁多。實在係外賣Party Food好選擇。

一汁一菜

by admin | 10 月 1, 2024 | Blog, 外賣, 日式料理, 觀塘

外賣@觀塘 1/10/2024 15:00

今日觀塘APM行街，見到呢間日式料理相當不錯，就決定買外賣返屋企食。

菜品選擇非常多，可以自由配搭唔同嘅套餐，自由度非常高。最後揀咗兩個和風定食 （主菜、湯/飲品、小菜、米飯）每份$75，都相當抵食。

北海道產甜粟米雞肉豆乳濃湯：非常之好飲嘅一碗湯，非常之濃厚Creamy，甜甜的，材料豐富，除咗有極大量嘅香甜粟米之外，仲有雞肉、西蘭花、紅蘿蔔等，淨係飲個湯已經大滿足。

厚燒玉子：三大件玉子燒賣相同味道都相當對板，口感紮實綿密，味道甜甜的，真正日本口味。

和風雞肉燴厚揚豆腐：炸豆腐上淋上醬油雞肉碎，甜甜的，非常開胃。雖然叫小菜，但份量一啲都唔少。

自家製野菌醬燒和牛漢堡：和牛漢堡一大塊，牛味相當濃郁，肉汁豐富。加上醬汁味濃，仲有好多菇，呢個主菜非常好味。

野菌味噌豆乳雞扒：雞扒大大件，味噌味香，送飯一流。

值得一提，日本米飯的確係幾好味香甜。

最後仲有一杯凍蜜桃紅茶，茶味香濃，飲得出蜜桃的酸甜味。

個人一向鍾意日本料理，呢個外賣幾啱口味，幾有日本家庭式風味。

麵屋豬一

by admin | 9 月 29, 2024 | Blog, 拉麵, 日式料理, 深圳, 甜品

深圳卓越Intown 29/9/2024 18:00

點評抽到零元探店，麵屋豬一份拉麵套餐。一碗拉麵加可爾必思，另外再買一個一人套餐，一碗拉麵加中華海草 48元。

主打豚骨湯拉麵有四款湯底，揀咗豚骨王，墨王拉麵。

豚骨王係豬骨濃湯，白白嘅湯底，入口非常之順滑，豬骨味香濃。拉麵揀咗偏硬，口感煙靭，叉燒薄薄的，幾香甜。溏心蛋印咗可愛嘅公仔，蛋黃做得不錯，可惜蛋白略嫌不夠醬油味道。拉麵配料都係應有盡有，而呢個價錢嚟講相當抵食，仲有啲豚王嘅影子。

另一款係黑色拉麵，似乎加咗墨魚汁同芝麻，味道更加鹹鮮，蒜蓉味更加香，係一款更加重口味嘅湯底。

每位奉送一粒日式大福，作為餐後甜品。隨餐嘅中華海草都非常清涼，可爾必思非常解膩。

呢間分店環境明顯較闊落，仲有四人枱可以坐。

Bageland 貝果嶼

by admin | 9 月 29, 2024 | Blog, 小食, 深圳, 西餐, 飲品, 麵包

深圳新洲 29/9/2024 17:00

抽到大眾點評0元探店，開發一個新嘅站點，從來未嚟過呢個小區，沙尾站落咗車之後都仲要行10分鐘。小店就係一個籃球場小巷嘅後邊，一個神秘嘅後花園咁。餐廳內外裝修好有格調，好多打卡位，非常靚。正中間就有個大大嘅月球，不論光或暗都好，整個佈局都好靚。

今次送嘅套餐係一份自選貝果加芝士醬及飲品。另外再單點一個貝果三文治套餐（88元）。老闆娘見我哋有額外消費，自動幫我哋將普通咖啡升級做特飲。

入座就送上一份餐前小食，桂花蜜糖車厘茄。車厘茄非常新鮮，滿滿果汁再充滿着蜜糖嘅甜味，蜜糖還帶一點桂花香，估唔到呢個配搭咁好食。

葡萄肉桂貝果配巧克力黑芝麻奶酪醬：暖暖嘅貝果口感煙煙韌韌韌，帶肉桂香，仲有唔少提子乾，非常適合小朋友嘅口味。黑色醬料實在太濃郁，充分食得出朱古力、黑芝麻、芝士三者味道。貝果塗上醬料後，完全係另一道料理，滋味無窮。

萬物生長抹茶生椰拿鐵：上枱一刻完完全全展示出萬物生長嘅自然生態。飲品嘅味道都相當不錯，草系抹茶粉味道香濃，木系朱古力亦係濃郁口味。飲得出咖啡都係精選過，似乎係店方推薦嘅巴西之光咖啡，口感非常幼滑，味道香濃，有牛奶巧克力嘅味道，帶一點夏威夷果仁嘅香氣。呢杯仲加上椰香味同埋抹茶味。賣相好得之外，味道仲非常驚喜。

美式超級雙拼三文治：三文治嘅斷面非常吸引，呢個揀咗芝麻貝果，貝果面層芝麻非常多。漢堡扒大大片，肉汁豐富，加咗塊類似薯餅嘅東西喺中間，有香脆嘅口感，仲有好多新鮮蔬菜，菠蘿帶一點酸甜清爽，醬汁充足，貝果中間好濕潤，非常之豐富嘅三文治。另外仲有一小碗粟米粒，非常香甜。

貝果甜心熱可可：朱古力味相當濃郁，上邊仲有一層厚厚嘅鮮奶舖，仲加咗薄脆，非常好味。