by admin | 7 月 29, 2012 | 上海菜, 中菜, 觀塘
忘不了拉麵小籠包@觀塘
18/8/2011 20:00
無啦啦，失驚無神，喺觀塘工業區多左個新商場，連谷歌地圖都未update得到個位置，團購已經出現。今次團購係東廣場嘅一間上海菜館，優惠價$98一個二人餐，有湯、有小食，又有粉麵，都幾吸引。
宋嫂魚羹
宋嫂魚羹呢個名成日聽，但一直都未試過宋嫂嘅手勢。呢個團購餐其中一個選擇有宋嫂魚羹，當然要叫黎試試。材料有魚肉絲、木耳、冬菇、竹筍等，名副其實一個酸酸地嘅芡湯，感覺似魚肉版嘅街頭碗仔翅。
蒜泥白切肉
一細小碟有四片鞋鞋地、唔夠腍嘅白肉，用厚身粉皮墊底，好彩粉皮質地還好，都算煙韌。但蒜泥醬汁少得可憐，而且香味欠奉，只係得蒜蓉嘅辣味。
醬汁蘿蔔
味道濃甜嘅醃漬物，蘿蔔好爽脆，第一次食有驚喜。
雪菜肉絲兩面黃
一碟非常、十分、極之多油嘅兩面黃，碟底嘅餘油應該可以炒多碟飯。用左咁多油，又唔覺得個麵炸得好香脆，反而係少少脆，多多硬。本身個麵又無乜味，淋面嘅加厚芡汁版雪菜肉絲，無啦啦加埋竹筍，有啲唔夾，味道麻麻。
糖醋魚片
魚塊都幾大塊，無雪味，但唔代表有魚味。肉質還好，但炸粉過厚。個醬汁酸酸甜甜，味道適中，但都係芡汁勁厚。
清炒河蝦仁
難得一碟較為深刻嘅小菜。幾十粒河蝦仁都係非常爽口彈牙，只用鹽輕輕調味，再加青蔥拌炒，好清爽嘅一個小菜。
小籠包
小籠包可算係上海菜館必點名菜。可能平時食開嘅小籠包質素已經唔錯，所以對比呢間，真係落差甚大。皮唔夠薄，頂尖接口位尤其甚硬。餡有肥豬肉，但肉質偏實，唔夠鬆軟。汁亦唔見多，湯味唔夠濃郁，亦無鮮味。平平地想試好野，不如去紅磡飽餃店俾$14食四粒，更皮薄、更多汁、更正啦。
宮庭桂花糕
一舊唔知乜糕，有桂花、有杞子，但無桂花糕嘅味道，微甜到可以用無味黎形容。
喺一個細商場，開間餐館唔大得去邊，眼見坐得迫夾、密質質都先得五、六十個位。一間細舖仔為左宣傳，要做團購，但出黎嘅成績都唔錯，喺兩個團購網一共賣左二千五百張。要喺短時間內，應付如此龐大嘅客量，相信小店都諗過度過。
眼見八點到場嘅客人全部都拎住團購券，感覺上小店暗地裡限制左團購客嘅入場時間，將團購客集中喺晚上八點後嘅時段先入座。咁師傅就可以採取大堆頭製作技術「瑪斯舖得純」，乜都唔洗諗，一次過製作十份相同嘅小菜。所以上菜快，客人唔洗等好耐，可以食完快快走，留位俾下家，實在聰明。
「瑪斯舖得純」唔係奉旨成功，因為大堆頭製作完成後，侍應密密送餐，餐檯有位當然唔客氣將小菜送上。但有感二人餐檯細細，唔夠位的話，食客們只好合作，盡快三扒兩撥收起幾碟，又或者左放右疊唧個位出黎，真係幾狼狽。
曾經有好幾次，御膳房嘅大佬炒菜仲快過傳菜， 即使侍應急步夾小跑，一手拎五盆，都追唔上廚房班大師傅嘅速度。原本新鮮熱辣嘅幾十碟小菜，只好放喺樓面櫃檯上，任由風吹雨打，風塵撲面。你係食客，你覺得點?
惟一值得讚嘅係，職員家教好好。無人偷懶蛇王之餘，做野亦爽快。但又因為餐館細細，經常唔小心四圍撞， 踢到櫈腳事小，好幾次仲斟茶倒瀉水。侍應們都會好誠心道歉，並唔係虛應。
一間好似打緊仗嘅上海菜館，店名叫「忘不了」，意義重大喎。今次團購$98一份二人餐，質素、份量，感覺上係正價價錢，其實唔太抵。味道唔會忘不了，真係唔太好食，亦都唔想浪費Ram。依稀記得嘅係，呢間菜館嘅八點開始，會展開一場廚房大佬同樓面傳菜嘅速度爭奪戰。
29/7/2012 20:00
忘不了真係忘不了。今日剛好約埋朋友去觀塘，搵食艱難。依稀記得有間菜館位置較為不便，相信唔會多人。的確，唔洗等位有得直入。
蒜泥白切肉 ($48)
忘不了小籠包 ($32) 煎鮮肉鍋貼 ($32)
上海粉年糕 ($52)
上海生煎包 ($32)
老重慶紅油龍抄手 ($28)
是次正價消費，感覺可以。選擇最傳統、最經典嘅包點餃子，的確最穩陣。而且做完團購之後，呢度回復平靜，吹水慢慢坐都係可以的。
by admin | 7 月 15, 2012 | 上海菜, 尖沙咀
周庄灶房@尖沙咀
15/7/2012 19:30
行尖沙咀咁耐，真係唔知廣東道有一座十幾層高嘅樓上舖大廈，裡面仲有唔少間餐廳。不過呢棟大廈非常細，即使餐廳佔據全層，餐廳內部都非常細，只有三、四十個位，地方窄窄地。是次優惠$138試江南京滬風味，菜單似乎幾多野食，真係食到飽飽。
太雕醉雞翼、鎮江水晶肴肉
先黎一個冷盤，雞翼幾大隻亦夠多肉，外皮有少許酒味，可惜肉中間欠奉，味道偏淡。第一次試水晶餚肉，原來係類似啫喱嘅肉凍，做得夠晶瑩通透，豬肉鹹香，幾似金華金腿。啫喱部份更加係入口即溶，凍冰冰幾好食，沾少許鎮江醋更加惹味。
手拍小黃瓜、四喜烤麩
另一個素食拼盤有小黃瓜同四喜烤麩。一向視小黃瓜為怪獸，小試一啖，原來都幾好味。小黃瓜細細條好爽脆，醬汁味道酸酸地非常開胃，仲滲透晒入青瓜裡面，最討厭嘅草青腥味被狠狠淹蓋，所以最後豪不客氣狂食。相信係計漢堡包嘅醃青瓜之外，呢款手拍青瓜係第二樣小妹可以接受嘅青瓜食品。四喜烤麩就好似豉油齋麵筋，無乜特別。
煙燻糖心黃金蛋
呢隻黃金蛋係呢店招牌菜，蛋黃呈半生熟狀態，黏黏滑滑的。黃白仍然軟綿綿。味道小甜有輕微酒香，煙燻味夠香，唔錯。
大嫂魚羹
材料幾豐富，胡椒味夠，一啲都唔腥，OK! 記得加醋。
菜肉雲吞、炸春卷
兩款都炸得香脆，菜肉雲吞足料，餡料多到爆出黎。春卷中間充滿肉汁，味道唔錯。
周庄麻香冷麵
冷麵類似烏冬般粗身，粉粉地，麻醬夠濃，仲有少許鮑螺絲同蟹柳絲，都唔錯。
梅乾菜紅燒肉
雖然阿姐話油多先好食，不過見到成碗都係油，真係有啲恐怖。梅乾菜乾到似茶葉枝，肉一半脂肪一半肉，味道偏淡，對唔住，唔識欣賞。
上海炒年糕
只用上湯清炒，無太多濃醬其實都唔錯。年糕幾煙韌，材料都算多。
餐飲送一杯豆漿，似乎自家製，幾清甜。另有甜品紅豆沙，明顯係開粉，啲粉都未溶晒，仲有一舊舊，不食也罷。
呢間小店真係小店，一入門口一眼望晒，大約有三十零個座位。不過食物算係可以的，讚一讚實物嘅賣相同團購宣傳相差唔多，好野! 而且職員超級客氣而且有禮貌。不過座落樓上舖，人流唔多，三十多個位絕對夠做。小店仲花左唔少人手落樓下派傳單，所以店中都幾多自由行嘅豪爽老闆，所以都幾嘈。試過就算吧，唔想同班老闆迫。
by admin | 4 月 8, 2012 | 上海菜, 尖沙咀
新滬點拉麵小籠包@尖沙咀
8/4/2012 19:00
發覺近來好多有啲背景、有啲名氣、攞過下獎嘅餐廳，都會搞團購。定係話，團購好有效咁推銷到間餐廳，令到啲團購買家覺得間餐廳好吸引? 就好似呢間上海菜館，由頂級名廚坐鎮，炮製正宗上海菜餚。團購價$128嘅二人七道菜晚餐，就可以一嚐名廚手藝。
雞絲粉皮
真係無乜特別，雞肉係霉霉地，粉皮唔算煙韌，惟一係麻醬好杰身濃味。
四喜烤夫
第一次試呢款冷盆小食，原來係類似齋麵根加左少許豆豆等材料。齋件咬落醬汁唧晒出黎，其實味道幾似滷水豉油齋。
宋嫂魚羹
一睇就覺得好芡汁，因為攪兩攪，轉個頭就變得水水。材料都好多，有魚肉、木耳絲、竹筍絲等。薑味、芫茜味重，但鮮味不足，必須要怒加黑醋調味。
豆漿
個人覺得呢杯豆漿非常好，豆味濃，少甜， 非常清涼解渴。
小籠包
皮OK薄、肉OK甜，味道OK，肉汁OK多，樣樣都OK啦
海皇雜菌炒拉麵
賣相就好似大排檔豉油皇炒麵，材料有蝦仁、蟹柳、魚肉、冬菇、白菜、雜蘑等，勁豉油味，啲麵都係咁。但驚喜就係有疑似飽魚片出現，口感、味道都極似，係唔係咁落本呀?
回鍋肉
菜都係咁，豬肉炒過火略韌，味道夠辣夠味，但勁油膩。
桂花糕
唔知點解呢個桂花糕可以切得咁核突，有個心型係完全唔成型的。有紅豆、桂花等材料，普普通通。
呢個套餐要$128 ，感覺上最好味嘅就係果杯豆漿，其他小食、小菜、小炒都係一般質素，理得佢係咩星級名廚。睇番餐牌，呢個餐真係要成三百蚊，實在唔值呢個價。百零蚊，試過就算啦，OOKK咁啦。三百蚊就唔會黎，廢事同啲豉油行爭位。
by admin | 3 月 2, 2012 | 上海菜, 大埔, 美食廣場, 麵食
東記上海麵@大埔
24/2/2012 13:00
2/3/2012 13:00
24/2/2012 13:00
生活喺大埔，係一件好值得高興嘅事，因為左右附近都有出名好食嘅餐廳。就近嘅大埔新街市熟食市場，已經有好幾間有能力吸引區外人士特登黎搵食嘅人氣名店。其中一間係專做豬扒、雞翼上海麵嘅小店。
豬扒拼菜肉雲吞幼麵 ($25)
此店菜單少到可以隨時背出黎，獨沽兩味，一係豬扒，一係雞翼。$25雙拼粉麵任選豬扒或雞翼，加配炸菜肉絲、雪菜肉絲、竹筍肉絲、牛丸、牛筋、牛腩、炸醬或者菜肉雲吞。亦都可以要淨豬扒、或淨雞翼，再唔係就豬扒拼雞翼，以上就係全個餐牌。
酥炸豬扒永遠都係隨後送到，因為係新鮮即炸。豬扒有肉有骨，大大塊，任何時候黎食都一定係酥脆到爆。外皮炸粉薄薄地，最欣賞佢炸得乾身，香口唔油膩。脆皮之下就係軟腍腍嘅啖啖肉，肥瘦適中，脂肪位更加嫩滑多汁。豬扒除左有甜甜嘅肉味外，仲加左唔少調味料，味道濃郁入味，蒜味特別香，惹味程度拍得住某大大雞扒。不過超級酥脆嘅代價，就係頂級熱氣，食到咁上下，惟有要浸下湯解熱，再唔係就即刻飲涼茶。
題外話，之前試過炸雞翼都唔錯，一樣新鮮熱辣，勁juicy夠味，不過個人都係偏愛炸豬扒多一點。
老實講，黎呢度食，真係志在豬扒或雞翼呢兩位主角，其他配料都係用黎送下麵。不過幾款材料之中，菜肉雲吞都有唔少支持者。一碗有四粒，雲吞皮夠薄，有菜、有肉，內餡粉粉腍腍，調味適中。而幼麵都幾彈牙煙韌，仲係咁易有多條菜，廿幾蚊碗真係抵食。
熟食市場有兩間都係靠豬扒、雞翼麵打響名堂嘅食肆，據講係出自同一世家，只不過係兄弟分開做。兩家都試過，感覺上都係呢間東記略勝一籌。只不過有時人太多，或者東記唔憂做放大假，都可以去對面嘅世記止下痕。
值得留意，此店只賣麵，不賣飲。勁熱氣要飲野的話，隔離舖仔會主動兜搭，一杯大約十零蚊，感覺上唔太抵，我會選擇落7仔買好過。同埋，要知道此店嘅潛規則，當食物到齊後，要即時俾錢，以防走數。
後記
2/3/2012 13:00
今日又黎幫襯，要試多次個雞翼做番個記錄。
雞翼拼菜肉雲吞幼麵 ($25)
東記另一個招牌就係酥炸雞翼。一份有四大隻，的確，隻隻都係非常大隻，絕對唔係雞仔。雞翼同豬扒一樣，外皮超脆，薄皮之下係啖啖肉。雞翼剛好熟透，肉質非常嫰滑，醃得入味，雞汁不停滴出。呢款雞翼無豬扒咁熱氣，食多幾隻都唔怕，真係試得過。
by admin | 1 月 29, 2012 | 上海菜, 中菜, 佐敦
皇之家大姊小籠包@佐敦
29/1/2012 20:00
記得早前食過不知所謂嘅出名上海菜，近排心思思想尋找最好味嘅上海菜。喺開飯網做下功課，佐敦有間幾好評嘅上海菜館，一於去試下。
南翔小籠包 ($12)
一份小籠包兩件起叫，每件小籠包扁扁圓圓，睇落外皮幾透薄，隱約見到內餡嘅豬肉同湯汁。夾起時即使蕩韆鞦都無穿底，可見外皮相當實淨。咬開略厚嘅摺口位，原來外皮一啲都唔厚，薄薄嘅外皮相當有彈性，所以用筷子都唔會夾穿。小籠包內充滿鮮味湯汁，可以裝滿一個湯匙。豬肉餡好軟腍，唔太肥膩，調味亦唔錯，再配埋個酸濃黑醋同薑絲，更加好味。
生煎鍋貼($12)
鍋貼用上比小籠包厚實嘅外皮，大大隻，煎得香脆，鍋貼底微焦，入口係脆脆地，煙煙韌韌嘅。肉餡都係豬肉加上椰菜等材料，口感比較爽口，相對無咁膩。鍋貼仍有豐富肉汁，的確唔錯。
生煎包 ($12)
生煎包底煎得香脆，可以同時享受兩種口感，焦嘅包底脆，白色嘅包皮軟熟，可惜包嘅味道唔夠香，如果加多啲椰香味，相信會更好。肉餡都係大同小異，最吸引之處，莫過於包皮吸收晒肉汁，做到包餡合一。
紅油抄手 ($28)
一客六大粒，醬油紅紅，上面仲有香蒜同青蔥。雲吞內餡有豬肉、菜同蘿蔔等，比較實。其實紅油抄手同一般雲吞都係咁上下，只不過醬汁調味比較特別。呢款醬汁味道少少甜，辣味係慢慢滲出嘅麻辣，可惜蒜蓉唔夠多，青蔥亦唔香，無乜特別。
回鍋肉炒年糕 ($40)
炒年糕醬汁非常濃厚，材料豐富，賣相好吸引。年糕厚薄適中，煮得煙煙韌韌，質地剛好。記得試過幾次唔掂嘅年糕，勁硬實、咬到牙軟又有，熟到過晒火位，腍到不似年糕又有，但呢個年糕真係控制得唔錯，而且越食越食到米香。年糕配料有椰菜、冬菇同豬肉等。豬肉係五花腩，切得比較厚身，稍為硬左少少，幸好醬汁入晒味，而椰菜都吸收晒醬汁。年糕用濃郁嘅醬油同蒜等伴炒，亦帶濃烈嘅豆瓣醬甜辣味，炒得好夠夠鑊氣，非常惹味。
豆沙鍋餅 ($18)
以豆沙鍋餅作為甜品最好不過，豆沙鍋餅係新鮮即製，入口非常熱辣。餅皮煎得超薄，亦夠香脆，食到有蛋香味，豆沙餡非常幼滑，甜味適中，豆亦香濃。
豆漿 ($8)
豆味正常，味道合格。
此店每款點心都相當精緻，每客只係兩件起叫，如果人少少，可以一人一隻，有足夠空間試多幾款，岩晒貪心人士。每款包點都只不過十零蚊，質素有保證，絕對唔貴。餐牌所見，一款炒粉麵飯大約三、四十蚊，午市仲送埋豆漿，實屬街坊價位。食客俾得街坊價錢，食物質素OK，而服務態度更加係親切有善，抵!
只不過晚市時份幫襯，呢個抵會變得無咁抵，因為每位需收茶芥五大蚊，可惜茶係普通不過嘅茶水，另外再多謝加一服務費。今餐即刻由原本$130變成$154，呢啲心理關口真係有啲難過，所以得番五十分抵，話晒食少左兩籠小籠包喎!
by admin | 1 月 22, 2012 | 上海菜, 小食, 銅鑼灣
上海香港麵家@銅鑼灣
22/1/2012 11:00
年廿九最好嘅節目，莫過於行花市，今年一於趁墟過海行下維園，入場前先喺附近食個早點。一向少過海搵食，黎到銅鑼灣，只知道就近渣甸街比較多野食。原先想去車仔麵名店試試，點知晨早收爐大吉，最後求其是但搵間入場。
粢飯 ($15)
佢叫得做「粢飯大王」，無可能唔叫一份粢飯試試。睇住門口啲阿姐快手勁包，熱辣辣嘅粢飯就送到。粢飯用保鮮紙包住，對半切開成兩份，偷瞇到內餡材料唔算多，驚喜欠奉。米飯質地軟糯，唔太乾，飯包得勁厚身，相對內餡只得少少。材料有肉鬆、榨菜同油條。個人認為肉鬆係粢飯味道嘅靈魂，肉鬆唔夠多，唔夠香的話，成個粢飯都唔見得好有味道。而榨菜就貢獻左咸味同爽脆嘅口感。中間一大條油炸鬼就係香脆、香口、油香所在。但對唔住，大王呢個粢飯完全不行了。材料少得可憐，肉鬆無香味，只係榨菜得個咸字，連油炸鬼都唔新鮮，完全唔香脆，估計係放得耐左，變得又腍又韌。三樣材料完全唔配合，令粢飯只獨有咸菜味。咁同白飯包咸菜有咩分別?
生煎包 ($22)
暖暖嘅生煎包，皮並無乜煎香嘅痕跡，煎左等於無煎，所以唔期望食到脆底。包係韌韌地，香味不足，幸好有幾粒芝麻仔鎮住。好彩內餡都算係咁，肉餡調味唔錯，豬肉腍腍地，甜甜地，肉汁算幾多。
豆漿 ($8)
上海舖另一重點美味，應該就係豆漿。豆漿的確比其他食物較為突出，熱豆漿味道更加香濃，有淡淡豆香，味道唔太甜。
喺無做過功課嘅情況下周街搵食，店內嘅人流就係其中一個好有力嘅方向指標。眼見渣甸街幾間繼續營業嘅食肆中，呢間小店食客明顯比較多，而店前等外賣嘅人從未減退，估計呢間「粢飯大王」差極有個譜。原來呢間算係好出名嘅老字號上海舖，幾十人讚過好。可惜親身試過之後就覺得好一般，應該隨便搵一間豆品小店，都可以用更平嘅價錢，食到更好嘅質素，當然已經唔敢同台灣嘅阜杭豆漿比較啦。睇黎呢個大王都只係浪得虛名。
