by admin | 3 月 31, 2024 | 2024 復活節六人行台北之旅, BB Friendly, 台北, 台式, 麵食, 點心
31/3/2024 16:00
原訂今日下午去郵政博物館，出到捷運站突然落大雨行雷，大風大雨到完全行唔到，最後只係附近便利店抖一抖，決定取消呢個行程，改去行商場。見有時間，返酒店有放低啲手信先。
轉場去忠孝復興商圈，途中發生小插曲，原來細佬跌左隻鞋仔，問左SOGO客服搵左一輪，原來跌左係捷運站月台，唔覺意留有歷史記錄。
今日咁多蝦碌，就食餐好。呢度最出名就係鼎泰豐。去到取票，職員已話預計等兩小時。平時食飯一聽到呢個時間係從來唔會有興趣繼續等。幸好中午餐火鍋好夠頂肚，決定照排。
中間時間周圍行，去商場行下Daiso掃貨，樓上兒童部仲有得坐車車，有位座，可以休息一陣。
鼎泰豐 31/3/2024 20:00
行左個半鐘左右，大約8點就去番附近，點知去到票號去得好快，坐多一陣已經到號。係店門外先放BB車。安排坐係長梳化位，六個人坐都好闊落。揀咗幾款必吃菜式。
小籠包 NT$150 : 賣相好靚，粒粒都白白滑滑，咬落真係多汁，皮薄，肉餡甜甜的。
雞肉小籠包 NT$150: 比較原味的話呢個較淡口。
蝦肉煎餃 NT$230: 外皮煎得好脆 ，加左薄薄粉漿，餃子中間蝦肉好爽口，香甜。
菜肉餛飩湯 NT$170: 皮較為厚，清淡口味
油豆腐細粉 NT$160: 清淡，細粉幾滑。
菠菜腐竹 NT$310
紅燒半筋半肉麵 NT280: 湯底幾香，帶微辣，牛展肉味幾濃，麵條粗身有咬口。
排骨蛋炒飯 NT$280: 飯炒得乾爽，蛋味香，排骨肉比較實，味道濃。
蝦肉紅油抄手 NT$210: 醬甜辣最惹味，蝦肉抄手皮薄肉甜，不錯。
連加一 NT$2134
服務非常好，有專屬服務員照顧，跟進上菜速度，見我地食得慢，主動幫忙要求減慢。味道的確不錯，價錢實惠。但如果都要等位真係要等成兩個鐘，除非已經安排空檔好活動，否則好難吸引要再來。
by admin | 3 月 31, 2024 | 2024 復活節六人行台北之旅, 台北, 台式, 火鍋, 自助餐放題
尬鍋 31/3/2024 13:00
諗住星期日喺西門町附近難搵食，決定用Google 訂位，訂左呢間人氣勁高，評分高達4.9嘅台式火鍋店。離外鐵路道園區前行十約十分鐘就到。餐廳門面都幾大，裝修新潮，仲有好多潮語佈置。可惜座位不足，只能坐四人枱，還好枱面非常夠大，仲可以坐梳化，都幾人舒服。每位成人要一個鍋，小朋友不足120cm，可以只加NT$88與成人共鍋及享用自助吧。所以一枱四鍋都夠晒數。
每個套餐基本包括火鍋湯底、一碟肉、米飯同自助吧任食，限時90分鐘。
雪花牛肉+石頭火鍋 NT$378
板腱牛肉+酒香薑煸麻油雞湯火鍋 NT$518
去骨雞腿肉+金銀蒜頭蛤蜊雞湯火鍋 NT$398
帶皮豬五花+金銀蒜頭蛤蜊雞湯火鍋 NT$438
日灑油蔥麵線NT$25、王子麵 NT$15×4、尬鍋海鮮拼盤 NT$158
每個鍋底都有少許分別，最鍾意金銀蒜頭蛤蜊雞湯，湯底勁多蒜非常濃，仲好多蛤蜊，粒粒甜鮮，之後可以自由加湯都係有味雞湯，非常正。
每碟肉份量都超多，大大碟，賣相十分好。雪花牛肉雪花非常靚。板鍵最有牛味，雪花肥瘦適中，油香豐富。雞腿肉都幾滑。豬五花略為肥少少，滿滿油香。
自助吧先係最開心，蔬菜菇類超多，樣樣都好新鮮甜。火鍋配料有唔同類型魚蛋、香腸等，不得不提最好味係印左名店嘅魚腐，味道鮮甜爽口，果真招牌菜。旁邊仲有自助醬料，首推沙茶醬，味道濃郁。飲品有冬瓜茶，清涼解渴，仲有各式汽水。最開心係軟雪糕自助，豆乳味極濃，根本就係冰左嘅維他奶。少試芋頭味都好香甜。仲可以自由加配料，小餅乾、朱古力、黃豆粉、麻糬實在大愛，非常開心。
最後埋單連加一 NT$2,302，店員仲話今日什麼女王節仲有九折優惠，實價NT$2,050。味道一流，真係非常抵食。
by admin | 3 月 31, 2024 | 2024 復活節六人行台北之旅, 台北, 台式, 小食, 飲品
興安四海豆漿 31/3/2024 08:30
今日早餐想再飲豆漿，行遠少少試另一間傳統豆品店。離遠都見到排緊隊買食物。小店用餐空間都大，有張長檯適合我地，旁邊仲可以放BB車。
豆漿 NT$25﹕豆味香濃，都幾幼滑，但感覺上不及上次間洪記。
米漿 NT$25﹕第一次試深啡色米漿，味道勁濃，有點烘烤味道，唔太岩個人口味。
蒸餃 NT$8X6﹕餃子飽滿大大著，菜肉餡都幾多，味道不錯。
招牌酥皮蛋餅 NT$35﹕係傳統蛋餅再加上酥皮煎，多一分香脆油香。
肉鬆蛋餅 NT$35﹕蛋餅味道幾好，肉鬆都俾得足夠。
小籠湯包 NT$90﹕賣相相當不錯，皮唔算太薄，勝在有味肉有肉汁。
韭菜盒 NT$45﹕大大隻，外皮香脆，韭菜夠多。
咸蛋飯團 NT$45﹕大大個飯團，咸蛋油炸鬼肉鬆等相當足料。
品質味道尚算不錯，個人更喜歡洪記。
by admin | 3 月 30, 2024 | 2024 復活節六人行台北之旅, 台北, 台式, 外賣, 小食, 麵食
吉品勝口味@UberEat 30/3/2024 22:00
蚵仔大腸麵線夠杰身，湯汁都幾濃，蚵仔算飽滿，略嫌大腸唔夠油香。感覺上上次大狗麵線更好食。
蚵仔煎加蛋粉漿非常腍滑，蚵仔算飽滿，不過不失。
臭豆腐﹕炸得香口。
埋單NT$320
by admin | 3 月 30, 2024 | 2024 復活節六人行台北之旅, BB Friendly, 中菜, 台北, 台式, 旅遊, 素食
不葷主義@南京復興 30/3/2024 19:45
今晚晚餐完全未Plan過，印象中酒店附近都唔少野食，首選係呢間素食專門店，Google評分高達4.9分，係台中相當知名的素食餐廳，更被譽為「素食界鼎泰豐」。原來全場做訂位，但無辦法訂，只能取後補籌，職員話都要等大半小時。等左一陣，經理話有客訂左檯無黎，可以安排我地入座，有感覺經理見我地係遊客，有特別安排，實在太感恩。
座位係半圓型梳化卡位，六人坐都好舒服。餐廳環境清雅，係比較新潮嘅素食店。菜單全素食，估唔到菜色選擇都咁多。
絲瓜湯包 NT$130﹕不愧為有素食界鼎泰豐名譽，著名嘅湯包出品勁有保證。除左皮薄，估唔到素食都可以做到咁湯汁豐富，中間係絲瓜絲好香味。
松露炒飯 NT$350﹕香氣十足，炒飯乾身，蔬菜加上松露等材料，非常好味。
糖醋雞丁 NT$320﹕賣相吸引，醬汁酸酸甜甜，素雞煮得香口，入口真係非常似肉，有汁又好味。
桂花魚翅 NT$450﹕初頭唔知係什麼東西，原來係用煲上，大量蔬菜炒菇類加上素翅，仲有雞蛋炒碎，香氣十足，味道有層次。
客家煎豆腐 NT$320﹕豆腐有豆味，煎得香口入味，加上好多薑絲，香香辣辣。
淡淡的幸福 NT$350﹕原來係蛋主題嘅料理，職員仲好細心，幫我地將七味粉分開，唔怕辣親小朋友。原來係將蛋白同蛋黃分開烹，再加入菇菌配料同醬汁，杰杰地，充滿濃烈蛋味，非常飽足，唔到簡簡單單咁好味。
花生豆花 NT$80X2﹕台灣傳統甜品，豆花豆味濃，花生煮得腍晒，清爽不甜。
埋單連加一NT$2,431，唔算平，但味道的確不錯，亦相當有驚喜，估唔到素食都可以咁出神入化。而且服務超級好，職員親切友善，非常關心每枱的用膳情況，亦細心考慮小朋友的需要，實在非常周到。怪不得人氣咁勁。
by admin | 3 月 29, 2024 | 2024 復活節六人行台北之旅, 台北, 台式, 外賣, 日式料理, 甜品, 麵包, 麵食
Mister Donut 29/3/2024 22:00
食完晚飯，都會廣場有間兒童機舖，仲可以坐車車，但價錢唔平。臨走時係車站見到日本No.1 甜甜圈專賣店Mister Donut。今期期間限定係Mister Donut x 一〇八抹茶茶廊日式雙茶饗宴。包裝靚，賣相靚。
抹茶蕨餅巧貝 NT$60﹕以薘鬆巧貝作為餅皮，擠上富含抹茶香氣的卡士達醬，中心放上帶有豆香的蕨餅，復刻一〇八大判燒風格。冬甩包本身煙韌鬆化，上面朱古力抹茶醬夠厚，十分香甜，味道濃郁。蕨餅煙煙韌韌，口感再提升。
焙茶蕨餅巧貝 NT$60﹕呢款換上焙茶卡士達醬，多一份茶香。
雙層抹茶波堤 NT$48﹕嚴選京都宇治一番茶，Q彈抹茶波堤散發淡雅清香，外層活裹茶味濃厚的抹茶可可沾醬，尾韻茶香繚繞。朱古力醬夠厚身，食得出啖淡抹茶香濃味。
焙茶巧克力波堤 NT$48﹕日本靜岡焙茶粉製成的可可醬，甘醇焙茶香氣與Q彈巧克力波堤搭配，交織出茶香與巧克力的誘人甜點。焙茶多一份茶香。
大狗麵線@UberEat 29/3/2024 22:00
無得去夜市食大腸麵線，唯有叫外賣，估唔到味道相當好。
大腸麵線 NT$75﹕外賣送到仲熱辣辣，湯汁夠杰，味道濃郁，材料都好多，大腸味道夠膻香，不錯。
小時候冬瓜茶 NT$30﹕清甜不膩。
冰鎮酸梅湯 NT$40
冰霖古早味豆花@UberEat 29/3/2024 22:00
黑糖刨冰NT$108﹕送到來竟然仲係超結冰，保溫非常好。冰底牛奶味真材實料，配料有芋圓、仙草、紅豆、布丁等，好豐富。每款材料味道對版，非常不錯。
