Sick Burger
馬鞍山 19/12/2022 13:00
今日揀咗呢間外賣漢堡同朋友happy share。
招牌牛肉漢堡真係非常的澎湃，牛扒大大件，仲有生菜同埋洋蔥，再加上滿滿嘅芝士，非常好味。另外同朋友分享給，薯條粗身，洋蔥圈大大件新鮮即炸，非常香口。估唔到雞翼咁大隻仲啖啖肉。仲揀有一款沙律，除咗蕃茄同菜之外，仲有大大片芝士。價錢雖然略貴，但係真材實料。
Ocio
鑽石山 27/11/2022 12:00
至尊安格斯牛肉漢堡，非常之澎湃，麵包給鬆軟，中間嘅漢堡扒充滿肉汁，仲有濃郁嘅芝士。配菜仲有脆卜卜嘅薯條同沙律。
卡邦尼意粉，配料都非常多，忌廉味奶味幾香濃。
朱古力布朗尼窩夫買相實在太靚，窩夫上邊仲有一隻小蝴蝶裝飾。份量都好多，朱古力味幾香濃，入口仲暖暖地，BB加埋凍冰冰嘅雪糕，口感一流。
Sensory Zero
Sensory Zero@科學園
13/11/2022 13:00
今日嚟到科學園參觀展覽嘉年華，科學園餐廳都幾多，呢一間裝修比較靚，仲有Tatami座位坐。
痴_線朱古力咖啡：火爆嘅名字，原來實物真係的確好黐線，朱古力係多到滿瀉，朱古力咖啡上邊係黑白相間既朱古力碎，非常澎湃，非常甜。
大滿足早餐係非常豐富嘅早餐，除咗一般嘅香腸、炒蛋之外，仲有一塊貓頭形狀嘅焗喵喵多士。今餐包括一杯鮮乳酪，奶味香濃，酸酸甜甜。
巨。午餐肉芝士雙份日本滑蛋牛角包：真係非常之大件澎湃嘅牛角包，材料多到滿晒出嚟，大大塊芝士下面係兩大件厚切午餐肉，非常邪惡。
西京燒三文魚炒雜菜飯：非常之日式嘅風味，醬汁比較甜，仲有好多蔬菜，好健康。
和牛漢堡：份量非常之澎湃，高到十足，好好嘅黃牛用芝士包住，上面仲有一塊超級長嘅煙肉。小食仲有新鮮即炸，香脆嘅薯條。
法式貓多士配雲呢拿雪糕：得意嘅名字，有兩大塊貓形狀嘅西多士，配上雲呢拿雪糕同埋水果，非常香甜。
菜品嘅命明非常搞笑，所以睇餐牌都用咗唔少時間。
好味炸雞拼波波球
雞吧@石門
16/8/2022 17:00
今日黎石門玩到黃昏時間，買啲野食加餸先。一期就見到呢間主打炸雞嘅外賣店。一於試下。炸雞都有好多口味，突然選擇困難症，將呢個重任交俾女女。
半半炸雞L size $138
最後直接買大盒雙併，滿足貪心之人。小朋友揀左蜜糖牛油同車打芝士，每款有八件雞。雞新鮮炸起，脆卜卜，炸漿唔算多，最好係唔油膩，咬開中間肉質好滑，仲保持到肉汁，有驚喜。蜜糖果款蜜味好夠，脆皮吸收晒蜜糖，好夠甜。另一款係配上一大盒車打芝士醬，非常杰身嘅芝士醬，芝味極濃。
意式香草肉丸 $36×2
另外叫左兩份肉丸俾小朋友。十幾粒肉丸好澎湃。豬肉丸本身都好彈牙又有肉汁，醬汁係燒汁，小朋友都鍾意食。
雙色芋泥圓併地瓜球 $36
一盒有六大粒，粒粒都圓轆轆。外皮香脆，中間煙煙韌韌，包住甜甜嘅芋泥。另一款係一咬爆漿嘅地瓜球，蛋黃流沙唧晒出黎，有驚喜！
細細間店仔，充滿住炸雞嘅香味。拎到番屋企仲係新鮮熱辣，炸雞同兩款小丸子都風味十足。今次石門一行有意外收穫。
Flames
Flames＠黃埔
14/8/2022 12:00
10/7/2022 12:00
今日想去黃埔玩，經Openrice搵到呢間餐廳勁多好評，訂位仲有七五折優惠。點知黎到仲有一個更優惠嘅優惠，原來假日叫一份Holiday Brunch就送一份兒童餐。最後買二送二勁抵。
黑松露卡邦尼扁意粉 ＄108
可以話係食過最好食嘅Carbonara，無懸念。意粉硬度剛好，忌廉味勁重，好香黑松露味，煙肉、雜菌、洋蔥嘅配搭，整體真係好好味。
葡式燒雞扒漢堡配薯條 ＄128
非常澎湃嘅一份漢堡，雞扒大到突番出黎，好吸引。漢堡仲有番茄、生菜等配料。將佢解體，雞扒有辣味，有肉汁，可惜麵包略為乾身。薯條都係非常多，新鮮炸起，脆到不得了。
迷你炸魚薯條配他他醬
迷你？真係迷你？一大碟你話係正常Size我都信。兩大件魚柳炸得香脆，粉漿唔厚，配上偏酸嘅他他醬，好味。
番茄肉醬扁意粉
呢份就合理Size嘅迷你意粉，但味道相當不錯。番茄味濃，肉醬亦相當多。
兒童餐一份原價＄68，一個迷你主菜加一個雪糕。細細碗兩個小雲呢拿雪糕球，口感較為黏身，唔似一般平價雪糕，有驚喜。
食物賣相，味道都係非常好，單叫一份Brunch一百零蚊，跟飲品已算非常合理。而家仲送多兩份兒童餐，就真係抵到離晒譜。一定會Encore！
靚靚日西料理
Sensu＠太古
7/8/2022 12:00
為慶祝生日，book左呢間好美味嘅餐廳。早排食過沙田店相當不錯，今次黎到太古呢間新店。野外露營做主題，門口就有打卡位。十二點開門原來已排緊隊，人氣甚高，好彩一早book左位，否則實有排等。
黑松露薯條 $48
新鮮熱辣辣，沾上黑松露沙律醬，帶少少酸味，不錯。
焗章魚燒風味薄餅麵包 $98
賣相吸引，麵包好鬆化牛油味香濃，加上海鮮配料，估唔到配上日式風味係咁夾。
朱古力咖啡 $48
拉花非常靚，咖啡味濃郁，帶朱古力味，味道平衡。滿意!
靛Indigo $68
期間限定嘅清爽飲品，大愛紫紅色，相當夢幻。有檸檬啫喱，藍色啫喱，西瓜，酸酸甜甜，爽爽口感豐富。
黑松露野菌扁意粉 $108
意粉上面大大單黑松露，香氣十足。意粉軟硬適中，配上黑松露忌廉汁，仲有好多雜菌。
脆脆吉列豬扒芝士歐姆蛋包飯 $148
豐富嘅飯，豬扒大大塊，外皮脆脆的，肉質鬆軟仲好Juicy。滑蛋脹卜卜，切開中間仍保留蛋汁，好嫩滑。據聞採用日本蛋，所以蛋味濃郁，包住中間嘅有味飯，非常適合小朋友。
抹茶提拉米蘇 $88
甜品方面特別出色，呢個提拉米蘇真係非常好味。蛋糕上面有三粒麻糬波波，淋上芝士奶蓋同灑上抹茶粉。切開後見到明顯三層，抹茶、忌廉芝士。入口即溶，充滿奶香及抹茶味。大愛!
食物賣相吸引，都值得相機食先，味道亦相當唔錯，上菜快，服務亦好，值得一試。
[/et_pb_text][/et_pb_column]
[/et_pb_row]
[/et_pb_section]