by admin | 10 月 10, 2024 | Blog, 外賣, 西餐, 韓國菜
釜山炸雞批薩
馬鞍山 10/10/2024 18:00
上次食過呢間炸雞非常好食，今次再來二訪，原來出咗新菜式。
炸雞二重奏 $219
上次試過五味炸雞，今次精選兩款口味雙拼，兩個味道都係小朋友最鍾意。炸雞仍然都係卜卜，啖啖肉。雙重芝味真係超級好食，芝士粉舖滿外皮，好香好甜，芝味十足。蜜糖芥末醬非常濃厚，酸酸甜甜，有醬汁比較濕潤。
皇者至尊比薩 $169
賣相好靚，材料豐富，舖滿豬肉粒、辣肉腸、粟米等，材料非常豐富。餅皮非常薄，芝士濃郁。可能焗得耐咗，餅皮有少少腍。而家買炸雞或者Pizza，就送一份小食，揀咗韓式熱狗，估唔到有四大件咁多，仲加咗茄汁同埋蜜糖芥茉，小朋友非常喜歡。
烤豬頸肉 $158
估唔到份量咁多，大大盒豬頸肉，食得出甜甜嘅韓式烤肉醬已經入晒味，灑上一啲芝麻更加香，而且肉質非常嫩滑。仲有一盒新鮮生菜，可以自行配搭上微辣嘅豆醬，更加惹味。仲有一款醬係有小蝦嘅海鮮味醬油，同埋勁辣又好食八爪魚。
焗芝士粟米 $45
最後加咗個芝士超多，勁濃厚，粟米粒係超級無敵咁甜，就係小朋友最鍾意嘅口味。
馬鞍山 14/10/2023 18:00
今日買外賣晚餐，小店就喺馬鞍山後街一個唔起眼嘅角落，一入門口就相當韓國感覺，原來老闆同廚師都係韓國人。效率非常高，外賣只需等15分鐘，兩大袋，分量十足嘅外賣新鮮整好。外賣包裝非常之好，仲有手套附上。打開包裝，實在太豐富，太澎湃啦！
五味炸雞 $239
主打韓國炸雞當然要試吓，呢一個五味炸雞，就啱晒選擇困難症嘅人，一次過試齊五種唔同口味。先食原味，外皮脆卜卜，中間仲有肉汁，唔油膩。炸雞仲有加左洋蔥蛋黃醬，洋蔥味濃帶微酸。蜜糖芥末醬更加重口味。甜辣醬好杰身，帶微辣好開胃。個人最鍾意雙重芝味，芝士粉舖滿外皮，好香好甜，芝味十足。
韓式烤肉PIZZA $169
首次試韓式Pizza，賣相好靚仲好大個，餅底有厚度，芝士超多做到拉絲效果，材料豐富，主要係肉粒、火腿粒等，醬汁係甜甜嘅韓式燒烤醬，味道不錯。
炸醬麵 $68
炸醬麵醬汁味道帶甜，配料有薯仔肉碎等，麵條粗粗地有啲似烏冬，口感煙韌，每條麵條都沾上醬汁。
芝士蛋卷 $108
超大份嘅蛋卷，煎得好靚好工整，略為實淨厚身嘅蛋卷，中層夾左芝士，加少少番茄醬美味十足。
估唔到係馬鞍山收埋左一間咁正宗嘅韓國餐廳。味道好，份量勁多。實在係外賣Party Food好選擇。
by admin | 9 月 15, 2024 | 小食, 韓國菜, 馬鞍山, 麵食
15/9/2024 18:00
雞扒粟米石頭鍋珍珠飯 $68
熱辣辣，雞扒相當大塊，頭鍋珍珠飯材料都好豐富，除咗有大量嘅粟米，仲有好多紫菜，芽菜泡菜等等。另外可以按個人喜好加上甜醬油或者辣醬油。
韓式牛肉炒粉絲 $67
材料非常豐富，牛肉大大片，仲有好多蔬菜同埋冬菇，炒得幾香。
魔鬼芝士焗香腸 $38
非常邪惡嘅一個小食，香腸脆皮肉汁豐富，芝士非常濃郁。
by admin | 8 月 11, 2024 | Blog, 日式燒肉, 深圳, 燒烤, 甜品, 自助餐放題, 韓國菜
深圳上塘AT Mall 11/8/2024 12:00
點評抽中，半放題燒肉。在上塘站地鐵站一出就到。雙人拼盤肉類非常多，豬肉五花、不同部位的牛肉，仲有墨魚腸。賣相就不錯，但係每款只係簡單調味，燒熟之後冇乜味，肉質都比較實。即場寫點評再送多兩碟，只係食飽，味道麻麻。
出邊可以自助放題，多款冷小食，甜品，自助冰粉。本身唔吸引，感覺唔太新鮮。小朋友最鍾意台灣滷肉飯，味道香濃，醬汁豐富，特別好食。飯後食個凍冰冰雪糕，最好係汽水任飲，非常涼快。
by admin | 7 月 21, 2024 | BB Friendly, 深圳, 燒烤, 甜品, 韓國菜
深圳下沙泰然 21/7/2024 11:20
今日特登嚟到呢度食又韓國人主理嘅正宗韓國燒烤，全因為價錢實在太吸引，點評優惠價 298元，VIP只需138元。
餐廳非常大，地道韓式佈置，坐喺梳化卡位都非常闊落。入座後職員送上前菜10小碟，仲一米長有機蔬菜拼盤，非常澎湃，影相一流。泡菜酸酸辣辣好新鮮，雞蛋非常厚實仲加咗雜菜，薯蓉打得綿密，小朋友都好鍾意。海帶湯非常冰涼， 入口帶酸，估唔到咁開胃。
熱菜有一款韓式拌飯，非常有鑊氣，材料好豐富。泡菜煎餅材料非常多，泡菜微辣，夠晒刺激。
燒烤肉有三款，先來首爾1993牛五花，薄薄一片，油花非常靚，口感嫰滑，調味甜甜的，非常好味。牛排肥瘦適中，牛味香濃。五花肉就較為平實，給比下去了。配燒肉跟三款沾汁，韓式辣醬，不辣的豆醬及椒鹽口味。另外仲有一碗石鍋海鮮包肉醬，熱辣辣，只係加咗肉碎，蝦仁嘅咸香豆醬，點肉非常之惹味，用新鮮蔬菜包起，多一份清爽。最後以兩個圈烤菠蘿作結，菠蘿非常香甜多汁， 正好解膩。
臨走仲有自助雪糕，簡單三款，雲呢拿，士多啤梨及抹茶，仲有鬆脆雪糕筒，鍾意食乜嘢味道都可以。打卡仲送飲品一罐。
餐廳環境好，BB椅及兒童餐具齊全，仲有圍裙送贈。服務一流，全程有服務員幫烤，仲不留意你嘅需要。食物賣相一流，味道都十分好，分量充足，呢個套餐足夠一家四口食飽飽，呢個價錢絕對超值。據聞仲有韓服體驗，可惜當日關閉冇得試。絕對有興趣再來。
by admin | 7 月 15, 2024 | Blog, 壽司, 外賣, 沙田, 韓國菜
K Chef Story 沙田中心 外賣 15/7/2024 18:30
沙田中心新開韓式炸雞試菜！
外賣包裝靚到咁，返到屋企仲暖笠笠，又靚又實用。
雪霜芝士炸雞 無骨全隻 $188
打開靚靚嘅紅色包裝盒，大大件炸雞上面舖滿芝士，非常吸引。炸雞外皮脆卜卜，唔油膩，炸漿薄薄的，無骨雞肉大大件，肉味本身甜甜地。本身原味炸雞已經唔錯，再加上勁澎湃雪霜芝士粉，多一份鹹甜味，芝士味濃郁，芝味無窮，連小朋友都好鍾意。
燒牛肉紫菜飯卷 $55
色彩繽紛，賣相非常得，除咗甜甜嘅牛肉之外，仲有好多雞蛋絲、蘿蔔絲等。好食又好睇。
韓式炒粉絲 $52
份量唔少，材料多，肥牛肉片大大片，粉絲煙煙韌韌，麻油香十足。
估唔到外賣店包裝可以咁高檔，又好睇又好食。
by admin | 6 月 30, 2024 | 2024 珠海長隆飛船樂園, 中菜, 外賣, 小食, 日式料理, 珠海, 甜品, 韓國菜, 飲品, 麵包
30/6/2024 18:30
返酒店補給之後，就搭十分鐘的士去市區中央匯。原來所謂嘅商圈都係地舖為主，並非商場，舖頭唔多，仲有好多都執咗。
古春堂@中央匯 30/6/2024 19:30
冇乜嘢食，唯有搵甜品食下又可以坐下。呢間古春堂食係老字號非遺涼茶。
琥珀桃膠椰奶15元：桃膠都相當多，椰奶微甜，好滋潤。
糯糯芋泥大滿貫 19元：污泥味道幾香，應該仲有豆腐花，椰汁西米等，幾粒芋圓煙煙韌韌，口感不錯。
嫰仙草大滿貫 18元：非常豐富，有好多芒果、紅豆，一粒粒小丸子，下邊仲有好多仙草。
十幾蚊一碗糖水，平靚正。
由於呢個地方唔太適合坐低堂食，最後決定買幾樣外賣返酒店食。
漢江里炸雞
蒜香醬油、雪花奶酪雙拼 45.88元、煙燻威士忌脆脆雞 12.88元、韓式年糕2.1元
炸雞份量唔少，外皮脆脆的，蒜香醬油味甜甜的，另外一款係雪花奶酪芝，上面鋪滿芝士粉，芝味濃郁，甜甜的。煙燻威士忌唔係太食到咩味道。年糕煙煙韌韌，口感不錯，加配價實在太抵。連埋包裝運送費70元，都幾抵食。
太阪町
章魚小丸子11元：小丸子賣相不錯，味道對板，餡料豐富，醬汁同埋鰹魚片都夠多，估唔到平平哋出品唔錯。
超值三件套 23元：有六粒小丸子、一個經典滷蛋飯團、一杯珍珠奶茶，相當抵食。飯團材料都好豐富，滷蛋特別好食，小朋友都好鍾意。
瑞可爺爺
起司酪酪 6.2元：其實係一塊多士，上邊放咗唔同嘅芝士烤焗，未到鹹鹹甜甜，估唔到相當不錯。
車打芝士蛋糕 24元：蛋糕上面有老爺爺的圖案，大大個可以切做好多塊。蛋糕本身鬆軟，除咗打咪仲有微微芝士香，中間再夾左兩層車打芝士，多一份咸香味，估唔到咁好食。
