by admin | 9 月 8, 2024 | 深圳, 甜品, 飲品
奈雪的茶@KKmall 主題店、東門1234
8/9/2024 11:00
深圳奈雪的茶，今次出嘅聯乘主題實在太給力，竟然係哈利波特系列。七月尾推出之後，過咗兩個星期先抽倒時間上嚟，發現部份產品已經售罄。今日特登嚟到KK Mall主題店打卡，下一站再去東門，終於儲齊大部份嘅產品。
四色主題飲品Get!
Gryffindor 紅：霸氣莓莓桃 21元：草莓味蜜桃味，非常香濃清爽。
Hufflepuff 黃：霸氣楊枝甘露 19元：芒果蓉非常多，仲有西米椰汁，西柚，完完全全就係楊枝甘露。
Slytherin 綠：霸氣羽衣甘藍奇異果 21元：奇異果酸甜，果肉非常多。
Ravenclaw 藍：霸氣芝士葡萄 19元：青提子酸酸甜甜，加上芝士奶蓋。
奧巧布蕾小貝 15.8元：9 3/4月台、校徽圖案非常之清晰。甜品係朱古力蛋糕，加上Oreo忌廉，味道濃郁。
芋泥椰椰銅鑼燒 14.8元：銅鑼燒本身非常香甜，內餡係厚厚嘅芋泥，加上椰子蓉，估唔到呢個配搭相當不錯。
提拉米蘇銅鑼燒 14.8元：咖啡味香濃，忌廉幼滑，非常不錯。
一杯飲品加聯名方巾套餐 35元，方巾原來好大塊。
兩杯套餐送金探子磁貼，金屬感十足，非常有質感。
霍格華茲玻璃杯 58元，深圳已經全線存貨，要麻煩人幫我喺東莞帶落嚟。
by admin | 9 月 1, 2024 | Blog, 四川菜, 小食, 港式, 紅磡, 美食廣場, 麵食
紅磡黃埔Aeon 1/9/2024 12:00
AEON美食廣場位置相當多，都幾多嘢食，今日揀呢間牛味非常香濃嘅店舖。
慢煮牛脷熱伴刀削麵 $57 好少地方有得食牛脷，呢度嘅牛脷份量相當多，口感不錯。刀削麵質地厚實，煙煙韌韌，揀咗招牌蔥油，醬汁甜甜，香蔥味濃郁，撈麵不錯。
沙茶鮮牛熱伴刀削麵 $57 鮮牛肉勁多，沙茶醬濃郁，少少辣啱啱好。呢款揀咗胡麻醬，撈埋青瓜同蘿蔔，非常之清爽。
粟米豚肉小雲吞 $48: 一大碗淨雲吞有20粒咁多，味道不錯，小朋友最啱。值得一提揀咗牛骨湯非常清爽，淡淡牛骨香味。
蒜泥白肉 $38 ：賣相不錯，白肉上面鋪咗厚厚一層蒜泥，加上醬汁同埋辣油，非常開胃。
埋單啱啱好$200 ，抵食又飽肚。
by admin | 8 月 25, 2024 | 兒童餐, 四川菜, 外賣, 深圳
外賣@深圳雅寶星河World Coco Park 25/8/2024 18:00
包裝非常不錯，乾淨企理。非常欣賞酸菜魚係密封錫紙包裝，可以保存到溫度，湯又冇倒瀉。
蒜泥白肉 42元：賣相非常不錯，白肉上面鋪滿蒜泥白肉本身香甜，口感爽脆，醬汁調味重口味，蒜味十足，加上辣油，非常刺激，每一片都夾咗青瓜，口感清爽，好算係印象中最好食嘅蒜泥白肉。
酸菜魚 60元：打開就見到魚肉非常多，每片都大大片，好鮮甜。湯底酸味十足，蒜味香濃，辣味唔重，更加啱個人口味。仲有好多金菇，酸菜，粉絲索晒湯汁，非常好味，送飯一流。仲有三色盆菜，香脆花生米、醬油豆腐乾、辣泡菜。
兒童餐 9.9元：有兩隻醬香雞翼，根本就係山姆燒雞嘅味道，非常入味，微辣。脆薯條，椰汁饅頭，另外仲有微甜八寶粥。
除餐奉送兩碗糖水，應該係桃膠雪耳糖水，微甜，杰杰地，非常多料，正好解膩。
估唔到呢個四川菜外賣咁好食，絕對值得encore。
by admin | 8 月 25, 2024 | Blog, 中菜, 外賣, 深圳, 甜品
深圳皇廷廣場 25/8/2024 18:30
點評抽中霸王餐，皇庭廣場近近地，試吓呢間妃予冰糖葫蘆。見到玻璃櫥窗好色彩繽紛，有好多唔同類型嘅水果冰糖葫蘆葫。霸王餐（原16元）包兩串小冰糖葫蘆，用個靚靚紙盒載住，外賣拎返屋企可以慢慢食。色彩繽紛，賣相好靚。士多啤梨配搭兩粒藍莓，冰糖外皮超級脆脆，非常香甜，士多啤梨好新鮮，咬開仲有好多果汁爆出嚟，酸酸甜甜，非常好味。另一串揀咗青提子，大大粒，冰糖脆脆之下，提子果汁更多，非常清爽。
by admin | 8 月 25, 2024 | 外賣, 深圳, 甜品, 麵包
深圳寶雅星河World Coco Park 25/8/2024 18:00
雅寶Coco world 新開的麵包店，香氣滿滿。 麵包款式相當多，價錢都幾優惠。
麻糬布甸包 （16.8元/4個）：細細個相當可愛，麻糬包味道不錯，但係比較腍身，布甸蛋味香，口感幼滑，不錯。
半熟芝士蛋糕（19元/4件）：有奧利奧口味和原味，口感濕潤，芝士味香濃，味道不錯。奧利奧版本味道都相當突出。
點評打卡送兩粒忌廉泡芙，外皮薄薄，中間忌廉餡非常多，味道微甜，奶味香濃，雪凍咗好似雪糕泡芙咁。
by admin | 8 月 25, 2024 | 中菜, 壽司, 外賣, 小食, 深圳
外賣@深圳雅寶星河Cocopark 25/8/2024 17:00
特登再嚟雅寶係因為中咗點評0元探店，有一個飯團套餐（原價50元），都幾豐富，外賣晚餐啱小朋友。
流沙雙蛋黃飯團：飯團新鮮即整，熱辣辣，材料非常多，紫米飯底，加上蛋黃之外，仲有好多肉鬆、生菜、青瓜等，醬汁亦夠多，味道不錯。
關東煮五串：自選魚蛋、金菇卷、魚板等，味道都類似，魚味幾香，索咗湯汁不加醬料清清淡淡都幾好味，小朋友好鍾意。
爆汁烤腸：熱辣辣，烤腸外皮脆卜卜，肉汁豐富，味道不錯。
手造米漿：米漿非常濃厚，微甜。
外賣@深圳雅寶星河Cocopark 10/12/2023 16:00
今日買兩個飯團做下午茶。飯團新鮮即製，拎上手時飯熱到辣手。揀咗兩個唔同味道。
黑豬香腸飯團 16元：基本飯團大塊紫菜包住好多飯，仲有好多醬菜、肉鬆等等。呢款加入黑豬香腸，香腸味都幾龍，輕微黑胡椒辣味，幾惹味。
爆漿芝士飯團 17元：呢款中間加左芝士，餡料多，芝士爆晒漿。
飯團非常飽肚，夠乾淨新鮮。
