by admin | 6 月 19, 2022 | BB Friendly, 兒童餐, 日式料理, 觀塘
丼丼屋@觀塘
19/6/2022 12:00
我地一家大細都鍾意食丼丼屋，食物選擇多，餐廳又BB friendly。不過都係岩岩先知原來觀塘呢間丼丼屋與別不同，係聯乘鳥開主題店。餐牌款式的確同其他分店唔同，多左幾款鳥開滿腹套餐。
名古屋鳥開親子丼定食 ＄135
先來一份基本款，最鍾意半熟滑蛋，用蛋汁同湯汁撈飯食，上面仲有隻生蛋黃提味。雞肉腍腍的，幾滑，幾入味。套餐跟湯、沙律、飲品等。自選小食要左刺身，有少少幾件，都相當新鮮。最鍾意呢個甜品，類似寒天果凍的東西，滑溜溜加上黑蜜汁好味。
唐揚雞兒童定食 ＄65
一睇餐具就知道同其他分店不同。呢度用上熊本熊餐盆，小朋友更加開心。主食有炸雞，相當Juicy。奄列中間有少少肉碎同蔬菜。南瓜同番薯甜甜的。食埋碗湯烏冬已相當肚。甜品仲有忌廉泡芺同蘋果汁，大滿足。
北海道名物炸雞丼定食＄92
今次期間限定係北海道名物炸雞丼，滿滿嘅炸雞，淋上醬油，好吸引。炸雞仍然維持脆度，中間相當Juicy，醬汁醬油味濃，令炸雞更加濃郁醒胃，送飯一流。
－－－－－－－
quote 丼丼屋
「北海道名物炸雞丼」源自東京、主打地道北海道料理的著名餐廳「ととバルnemuro」，此丼物曾獲「第7回日本全國丼連盟─新派多樣丼物部門金賞受賞」。作為深受北海道居民喜愛的名物料理，北海道炸雞（zangi）既是餐桌上常見的正餐配菜，亦是他們的下酒良伴。有別於唐揚雞（karaage）用麵粉、太白粉當麵衣油炸，北海道炸雞的雞肉會先用以醬油、大蒜和生薑製作的醬汁醃漬，裹上蛋液及麵粉後再油炸。為突顯食材美味，北海道炸雞外層裹的粉漿會比一般炸雞來得薄而脆，因此味道較一般炸雞濃郁，色香味俱全。
「北海道名物炸雞丼」選用無骨雞腿肉，以醬油、蒜、薑等調味料醃漬後裹以麵粉酥炸，使炸出來的雞塊既保持鮮嫩，亦鎖住了充盈的肉汁，細味每口，肉香滋味四溢。金黃外皮吃起來酥脆卻不油膩，脆皮在唇齒間咔嚓作響，香氣逼人。另由「ととバルnemuro」傳授秘製醬料配方，以醬油為基礎，再加入洋蔥、蘋果等材料製成帶天然果香的秘製醬汁，提升嫩滑肉質口感。配搭新鮮沙律菜使丼物吃起來多了一份清爽，加上底層的宮城縣產特A級「ひとめぼれ一見鍾情」米滿載食材精華，即成殊不簡單的正宗日式丼物滋味！
－－－－－－－－
呢間分店更加舒適，鳥開主題定食亦相當唔錯，值得Encore。
by admin | 5 月 23, 2022 | 主題樂園, 兒童餐, 快餐, 旅遊, 離島
火箭餐廳＠迪士尼樂園
23/5/2022 13:00
一家人黎迪士尼參加女女幼稚園畢業禮，之後玩足一日，午餐係火箭餐廳解決。
Klook買餐飲券，一套＄149，可以換一份＄140或以下嘅套餐加一枝雪條或爆谷。另外一套＄85，可以換一份兒童餐。
兒童套餐 ＄90 有細蘑菇雞扒包、粟米、一枝礦泉水。
炸雞籃套餐＄125
有兩大件炸雞、薯條、汽水，炸雞好脆卜卜，中間仲好Juicy，比相像中好喎。
香脆魚柳漢堡套餐 ＄130
魚柳好大塊，突晒出黎，都炸得幾脆，啖啖肉，配埋沙律醬同菜，味道不錯。
黎得主題樂園預左餐飲價錢係樂園價，同市區無得比，但求野食好味少少就算。呢幾個餐味道都可以呀。
by admin | 5 月 15, 2022 | 兒童餐, 大角咀, 日式料理, 甜品
たまご園@奧海城
15/5/2022 12:00
小朋友最鍾意食蛋，無意中發現呢間以蛋為主題嘅餐廳。裝修裡裡外外都係蛋嘅橙黃色，幾有趣。
士多啤梨奶昔 ＄48
靚靚嘅粉紅色配白色，小朋友最愛。奶味好夠，帶淡淡嘅士多啤梨味，夠晒凍。
特製5款玉子串燒 ＄78
一次過滿足五個願望，試到五款口味。玉子係非常軟滑，甜味十足。上面分別放左番茄仔、海藻醬、親子三文魚、明太子沙律同蟹肉。
芝心雞漢堡兒童餐 ＄88
兒童餐份量都好多，材料好豐富！一大塊雞肉漢堡好鬆軟，咬開中間芝士唧晒出黎，味道不錯。配菜仲有可愛嘅八爪魚白腸、脆卜卜嘅薯條、蔬菜。最後有兩粒忌廉泡芺。
燉牛肉蛋包飯 ＄118
賣相仲靚過Menu，旋風蛋整得好靚。大大粒燉牛肉排滿，牛肉非常腍，連BB都食得到。燒汁濃厚，撈埋飯一齊食不錯。
士多啤梨梳乎里班戟 ＄78
兩大件梳乎里班戟蛋香味重，非常鬆軟，入口即溶。沾一沾士多啤梨果醬非常好味。
環境都靚，有特色，早啲到可以坐到蛋形圓梳化位，小朋友都好鍾意。可惜係，咁適合小朋友嘅餐廳居然無BB椅，家長要自行安排啦。
by admin | 3 月 27, 2022 | BB Friendly, 兒童餐, 沙田, 西餐
Parkview＠沙田
27/3/2022 12:00
帶兩個小朋友出街食飯都要揀啲較為舒適闊落嘅餐廳，新城市廣場樓下嘅餐廳好多都可以坐出Open Area，方便我地泊BB車，今日就食Parkview。
叫咗個兩個套餐，跟湯同飲品，再加一份兒童餐。
香草醬忌廉汁意瓜帶子意粉$128
就係兩大粒帶子煎得幾香，香草醬忌廉汁幾特別，仲有啲瓜同菇一齊炒。出面比較少食到青醬。
藍青口海鮮墨魚汁意大利飯 ＄158
墨魚汁落得好夠，飯底帶咸香。除左青口，仲有蝦同帶帶子，都足料。
兒童餐 ＄78
揀左日或蛋包飯，有蛋包飯、有堆沙律、炸雞兩件同埋薯條，餐飲有橙汁。蛋包飯有啲失望，只係一塊蛋皮包住白飯。炸雞同薯條都可以嘅。
兩份主食係唔錯嘅，略嫌兒童餐無乜特別。價錢都算合理。
by admin | 1 月 2, 2022 | BB Friendly, 兒童餐, 日式料理, 甜品, 馬鞍山
L.D.K. by Ufufu Café＠馬鞍山
2/1/2022 12:00
小朋友最鍾意黎呢間餐廳
小朋友最鍾意黎呢間餐廳，因為野食又靚又好味，兒童餐仲有玩具送。
吉列豚肉佐咖哩蛋包飯 ＄148
吉列豚肉炸得好脆，蛋都好嫰滑，日式咖哩偏甜口味，所以小朋友都食到。
海老野菌忌廉汁意粉 ＄132
忌廉汁奶香味重，大蝦都好爽口，不錯。
兒童餐 ＄78
有齊小朋友最愛嘅元素，香腸八爪魚、吉列大蝦、九州風炸雞、炸薯條、蔬菜、意粉、布甸，最緊要係仲有小禮物一份。其實就略為熱氣左小小，簡中食一下好啦。
宇治抹茶蕨餅芭菲 ＄78
抹茶雪糕好濃茶味，最鍾意蕨餅QQ的，不錯。
草莓家族乳酪芭菲 ＄78
小朋友揀嘅草莓口味，酸酸甜甜。
甜品賣相一流，好吸引。
食物係唔錯，價錢略貴，間中一次ok的。
by admin | 7 月 26, 2021 | BB Friendly, 兒童餐, 港式, 西餐, 親子餐廳, 馬鞍山
Whizbo Kids Cafe 25/7/2021 12:00
疫情期間太少出街玩。今日趁小公主生日，去親子餐廳盡興一下。
預約左11：00 － 13：45呢場，只設最低餐飲消費。成人最低消費＄180，3歲或以上＄80，3歲以下免費。即係我地有＄440 budget。
今日有套餐，＄138包主菜及餐湯。揀左小食拼盆。
有黑松露薯條、炸花枝丸、津蔥圈。份量都唔少，味道正正常常啦。
兒童套餐 ＄128，可以揀一款特式便當，揀左炸雞。賣相幾得意，深得小朋友歡心。
菠蘿香腸星星薄餅 ＄98，造星相當吸引，配料都豐富。
焗葡國雞飯 ＄108
味道正常，就唔好期望太多。玩至上，食都係其次，食得飽，ok既。
餐廳唔算大，就非常BB Friendly，內設洗手、廁所，BB椅。玩樂區有波波池、滑梯、繩網、模式超市廚房等。。。就小朋友黎講已夠好玩。
