卡瑪王子
塘朗寶能環球匯 1/10/2023 18:00
難得去遠啲嘅商場，見到唔洗排隊嘅卡瑪王子，二話不說就買一堆麵包可以包辦全家明天嘅早餐。
點評券11元4個迷你腸仔包，靚靚仔仔，非常飽滿，麵包香甜鬆軟，腸仔味濃，咪睇佢細細隻，都係超高水準。
肉鬆小方 6.9元﹕舖滿紫菜肉鬆，中間係酥皮香脆，好味。
爆漿奧利奧 14.9元﹕賣相相當吸引，滿滿Oreo味，略甜。
最鍾意打包非常仔細，分類獨立包好。比較香港其實價格偏貴，但係質素係高嘅，而且款式獨特。
gaga
上梅林卓悅匯 1/10/2023 17:00
已經係口袋名單之列一段時間，終於有空間一試下午茶。
位置都相當多，人亦好多，好多搵到一張圓枱可以慢慢歎。
下午茶特惠1+1，59元
巧克力生乳蛋糕，朱古力味十分濃，微甘。
黑松露巴斯克蛋糕，芝士味濃，餅底脆脆地有D果仁，味道不錯。
飲品草莓烏龍、拿鐵亦係正常發揮。
其實一份下午茶就要近60，拍得住香港價錢，質素OK，但性價比一般。
親子友善日式餐廳
紅葉茶屋@尖沙咀
17/9/2023 11:30
今日一家大細出尖沙咀行街，帶埋BB出遊搵食都要諗過度過。就喺尖東帝國中心搵到一間新開嘅日式餐廳，估唔到非常適合帶小朋友，值得記錄一下。餐廳係日式裝橫，環境相當闊落，容許BB車直入，實在感恩。坐係近窗嘅卡位，仲有非常穩嘅BB椅同兒童餐具，非常適合帶B出街嘅家庭。餐單選擇相當多，各款日式定食，麵食同甜品等。睇相已經好吸引。
溫泉蛋卡邦尼烏冬 $92 賣相非常靚，擺盆有心思，選用器皿都好特別。卡邦尼烏冬奶香味非常濃郁，忌廉汁相當多，上面仲有唔少煙肉，一隻半熟蛋。估唔到西式醬汁加上烏冬配搭不錯。定食送上兩款小食，應該係牛蒡同醃蘿蔔。
牛肉壽喜燒定食 $138 大大碗牛肉壽喜燒跟飯，仲有麵鼓湯同餐前小食，相當豐富。牛肉相當多，肉質都幾腍滑，最鍾意甜甜嘅壽喜燒湯汁，最岩撈飯。
雪糕抹茶拿鐵 $25，叫定食隨餐加配飲品，$25大大杯絕對抵加。抹茶味相當濃，又有奶香，加上雲呢拿雪糕球，好味。
自選炸物盛合 $88 炸餃子 $38 自選炸物揀左炸生蠔鮮，鮮甜大大隻，不錯。豆腐魚餅有粟米蘿蔔魚肉等，好咪有營養，好適合小朋友。另外仲有兩件炸雞，脆皮薄薄的肉質都OK的。另外再加一客脆卜卜炸餃子。
紅葉甘之三味 $88 秋日期間限定，睇相已經好吸引，估唔到實物同圖片一樣都係好靚。一客甜品有三款，赤肉蜜瓜雪糕非常清甜，完全係水果天然嘅味道，非常驚喜。士多啤梨奶凍入口即溶好軟好腍，小朋友食唔停口。Tiramisu用木盒盛載，靚到不得了，紫色原來藍莓版本，甜中帶一點酸，幾特別。
抹茶蕨餅新地 $68 小朋友揀野食就係賣相行先，一睇就點中呢個靚靚嘅甜品。上菜時真係嘩一聲，大大一杯窩夫皮裝住巨量牛奶雪糕，雪糕應該加左焦糖醬，牛奶味帶點焦糖甜。仲有一個特濃抹茶雪糕。紅豆又係令人回憶日本風味，煮得軟爛仲甜度十足。最欣賞主角抹茶蕨餅，抹茶味重，帶一點甘苦味，口感煙韌。成個甜品就令我地回憶起當年宇治之旅。
幾鍾意呢間餐廳無論環境、食物，特別係甜品都充滿日本風情。雖然佢並唔係一間親子餐廳，但係異常地適合帶小朋友。係尖沙咀咁繁忙嘅地區中，一個非常適合一家大細食飯嘅好去處。
春水堂
沙田 9/9/2023 11:30
御品三品牛肉麵：紅燒湯底味道幾好，帶微辣。牛肉有半筋半肉，仲有牛肚，煮得幾入味。個人最鍾意牛筋夠晒腍，台灣麵口感煙煙韌韌。
黃金香酥雞 ：份量唔少，每件都炸得幾香脆，炸粉均勻，中間雞肉味道甜。
滷汁排骨便當：用便當盒裝住賣相幾吸引，其實就係一個三餸飯，除咗有塊豬扒之外，仲有好多蔬菜。
珍珠鐵觀音吐司：實物同相片賣相有啲距離，呢個比較普通。還好鐵觀音雪糕味道都幾香，鋪滿晒珍珠同埋黑糖漿。
Fuwa Fuwa
深圳萬象天地 3/9/2023 14:30
下午茶選擇食鬆餅。門口有非常多食物模型，舒芙蕾鬆餅口味都非常多，睇見都已經好吸引。
舒芙蕾餐 99元
揀左抹茶白巧克力舒芙蕾同乳酪草莓厚乳。賣相相當吸引，每一件舒芙蕾都脹卜卜，相當有高度。上邊林左一層忌廉加綠茶粉，另外仲有綠茶醬自己添加，配料有幾粒士多啤梨。舒芙蕾入口空氣感十足，蛋味都幾濃。舒芙蕾原味本身已經好食，醬料只係一個陪襯。
乳酪草莓厚乳就好似士多啤梨奶昔，酸酸甜甜相當開胃。
VIN Longing
深圳上梅林 27/8/2023 16:00
過嚟上梅林行街，行遠少少去到商業區，食個好味下午茶。咖啡廳坐得舒服，好適合消磨時間。
小店主打熱香餅班戟RMB58
擺盤賣相非常靚。你去食嘢先得喎，非常適合打卡。熱香餅蛋味濃，熱辣辣相當鬆軟，配上角色水果同埋蜜糖，非常好味。
可可冰淇淋熱香餅RMB 58
大大個雲呢拿雪糕，配上熱辣辣嘅鬆餅，冰火交融，仲有Oreo碎，好食！
賣相相當吸引，非常澎湃。
焦糖瑪奇朵 RMB38
咖啡味濃郁，奶香味重。
