酥小貢
4/4/2024 15:00
肉鬆小貝、麻糬、春團
囍儿甜糖水铺
深圳水圍 4/4/2024 15:00
大芋圓涼粉桃膠：桃膠煙煙韌韌，唔同唔同味道嘅。
芋圓芒果撈河：撈河係斑斕口味，口感幼滑，芒果酸甜，椰汁底非常濃郁。
芋圓牛奶綿綿冰：牛奶味冰底相當濃郁，淡淡奶味，綿綿冰打得好幼滑。上邊仲有一個大大個嘅牛奶味雪糕。
十幾二十蚊一碗真係相當抵食。
2024 復活節六人行台北之旅 第六日［6.4 旅程尾聲］
1/4/2024 13:30
午餐後仲有少少時間，飛快地去酒店後的百貨店買幾盒口罩。Hello Kitty 又平又靚。
14:00 返到酒店執好行李，安頓好就等司機。
14:30 司機先生準時到達，著晒成套西裝，好禮貌。好呢架車仲大，仲舒服。上車時多位酒店職員仲出嚟幫手拎行李，歡送我哋。
15:15 已經到機場，車費NT$1,300，真係抵俾，舒服到全世界都瞓晒覺。
去到櫃檯既行李，都要排一陣隊，完成之後喺機場周圍行吓。首先有長榮航空Hello Kitty Check in Counter打卡位。做過功課，南北兩邊有展望平台，仲有手信街。仲有一個Lego機場展區。
16:30 差不多時間過關，雖然無優先通道，但整個流程都好快。人工櫃位過關基本唔使等。
馬祖新村
1/4/2024 17:15
之後行到近候機室，有一個類似美食廣場，買馬祖新村車輪餅。機場限定只得兩款口味，排隊都排咗一陣，人氣甚高。
NT$ 330/ 6件 兩款口味各三件。新鮮即製，熱辣辣，蛋糕蛋味重，好鬆軟。中間內餡流心爆晒出嚟，一款是好事花生，非常濃郁。另一款係古早奶油，未到微甜，香氣十足。
候機室附近仲有Hello Kitty遊樂室，裝修非常之可愛，可以俾小朋友玩一陣。
夠鐘登記，只得一部勁細嘅升降機，呢個比較麻煩，但係登記流程都好快。最後準時起飛離開台北。
機上座位都係舒適的，小朋友亦有扭計骰禮物。今日嘅飛機餐係麻油雞飯，份量唔少，雞肉幾滑，汁夠多，啱晒撈飯，味道不錯。除餐仲有零食小吃，蘋果汁等等。
20:00 準時返到香港，完成六日非常好玩嘅旅程。
2024 復活節六人行台北之旅 第五日［5.6 宵夜］
返到酒店再嗌Uber Eat宵夜。
原火乍初@UberEat 31/3/2024 22:00
無骨鹽酥雞 NT$85: 口感比較實淨，味道濃郁
鮮炸魷魚 NT$85: 煙煙韌韌，味道幾香，呢個更好食。
雞米 NT$58
所有嘢炒埋一碟，賣相就一般，魷魚鮮甜煙韌算幾好。另外兩款較為實，一般。
冰霖古早味豆花@UberEat
黑糖刨冰 NT$108
材料非常多，芋圓、湯圓、仙草、花豆、布丁，夠晒冰凍，味道不錯。
2024 復活節六人行台北之旅 第五日［5.4 西門町遊］
31/3/2024 14:30
食完好好味嘅火鍋，向西門町出發，途經日間非常之靚嘅7–11 Hello Kitty主題店。全間店都係粉紅色，裏裏外外都係Sanrio嘅卡通人物。
今行選擇去聖瑪莉買鳳梨酥，包裝非常可愛，有得意嘅鳳梨仔。
鳳梨酥一口大小，出品相當認真。外皮鬆脆，中間鳳梨肉相當多，酸甜適中。
個人比較鍾意烏龍茶鳳梨酥，多一份茶香。
全場買滿NT$2000仲可以退稅，做手信一流。
2024 復活節六人行台北之旅 第四日［4.6 桃園回台北］
30/3/2024 17:00
係置地廣場玩完兩個親子景點，沿途行下華泰名品城，黃昏時間著左燈飾都幾靚。下午明顯人流多左好多，相信都係遊人臨離開台灣係度食埋放晚飯先走，原本打算去Movenpick Cafe已經完全爆滿。還好唔算太肚餓，選擇直接返台北先食晚餐。臨走前係商場車仔舖買左浪花可頌鯛魚燒NT$75，熱辣辣，外皮係酥皮脆卜卜， 中間爆多餡料，日式紅豆大大粒好香甜，另一款係香草卡士達蛋香味十足。
回程行番去高鐵站，將原本夜晚嘅回程票去人工櫃台改票，費用全免，好快就出到票，實在太方便。
桃園18:27 > 車次1322 > 台北18:44
20分鐘唔洗就到台北，事前睇過攻略有教經高鐵B3地下連道層就只需要前行一百米就到捷運閘口，實在太方便! 再坐捷運去番南京復興站附近搵食。
