Alva House＠沙田帝逸酒店
23/7/2023 11:30
官方做七折優惠，平到震，成人$400多，小童$270，即試！
款式選擇多，質素高，而且人唔多，可以唔洗排隊拎野食，慢慢歎。生蠔新鮮大隻好鮮甜，刺身都好新鮮。熱盤最好味係日式串燒，天婦羅。甜品雪糕勁多口味，又靚又好味。
22/6/2022 12:00
感謝老細周年聚餐，請全世界去帝逸食自助餐。聽聞都幾難Book，而且價錢唔平，真開心。
先拎幾款刺身、凍盆，樣樣都幾新鮮。三文魚相當鮮甜。
生蠔都要排一陣隊，即開生蠔都幾大隻，相當甜，食左幾轉。
熱盆選擇都好多，特別推介燒牛肉，都幾腍，幾夠牛味。仲有日式串燒。
一向食自助餐都主攻甜品部，選擇實在好多，小杯奶凍類特別好食，抹茶蛋糕都印象深刻。最後仲有迷你杯Haagen Dazs。
整體算相當唔錯，如果有優惠會想再試。
沙田石門 12/4/2023 11:30
呢間韓國燒烤自助相當抵食，午市時間連埋加一成人大約$200一位，仲要冇限時，有本事可以食足三、四個鐘。
燒烤肉類款式非常之多，牛、豬、雞、羊，每一款都有唔同嘅調味，仲有啲香腸、魷魚等嘅小食，仲有少量可以燒烤嘅菇菜。燒烤嘅肉類其實味道都差唔多，印象中比較特別嘅牛扒，肉質腍滑，個人最鍾意仲有豬大腸。
自助餐枱仲有好多款韓式前菜小食，主要係啲醃製過嘅餐前小食。仲有幾款蔬菜同埋沙律配料。
預先煮好嘅熟食都唔少款，各式煎炸熱氣嘢，飽肚嘅仲有炒粉麵等，款式多到拍得住一般自助餐。
食飽飽之後仲可以揀唔同嘅甜品，奶凍、啫喱糖相當不錯。新鮮豆腐花非常之滑，仲可以自助任家糖水黃糖。雀巢雪糕雖然普通啲，但勝在款式多。最緊要所有罐裝包裝飲品都係自助任飲。
環境闊落，帶小朋友都坐得舒服，職員都會經常幫你換鐵板，服務相當不錯。
都會海逸酒店 9/4/2023 12:00
適逢復活節有優惠，小朋友又可以自費參加甜品工作坊，就試吓呢一間嘅自助餐。
上邊一排全部都係食物嘅攤位，有唔少凍海鮮，仲有生蠔，生蠔唔算太大隻，但算幾鮮甜。旁邊仲有幾款冷盤同埋沙律。刺身款款都厚慘，非常新鮮鮮甜，旁邊仲有唔少日式小食同埋壽司。
熱食方面選擇相當多，除咗有廚房整好嘅世界各地美食之外，仲有一個粥粉麵檔，幾鍾意食佢嘅小雲吞，細細粒。仲有各式各樣嘅燒烤食品。
甜品選擇都非常多，期間限定復活節主題造型小食甜品，賣相都非常可愛。蛋糕類甜品都非常多，有爆谷同朱古力噴泉雪糕係movenpick，仲有新鮮即焗嘅疏乎厘等。
呢個自助餐相當受歡迎，仲有本地遊團體客，就人比較多，座位之間比較密
復活節期間小朋友可自費參加甜品工作坊，有甜品主廚教小朋友整白兔型cupcake，簡簡單單，製成品都幾得意，完成後仲有證書添。
Mr Steak@葵芳 27/12/2022 12:00
半自助餐非常之抵食，可以自選一個主菜，揀咗口切豬扒，令一個係火雞肉，兩個肉都非常好食。重點就係出邊嘅半自助餐任食，有一啲凍盤沙律都有唔少款式。仲有各式各樣嘅甜品同埋湯品，非常之豐富。
尖沙咀 20/11/2022 12:00
尖沙咀呢間餐廳有中午半自助餐。百零蚊一份午餐，套餐包括餐包，一份主菜，出邊仲有自助沙律吧。
主菜揀咗忌廉汁意粉，卡邦尼炒烏冬，蕃茄意粉，純粹普痛，始終主菜係自助沙律吧。有角色冷盤。例如中華沙律，冷豆腐，厚燒玉子等。最驚喜係有煙三文魚，仲有雞翼等，款式相當多。仲有好多迷你蛋糕、芝士蛋糕，食得飽飽。
花月庭＠旺角
17/7/2022 11:30
慶祝放暑假，一家大細食自助餐。鍾意花月庭位置方便，餐廳夠大，野食選擇夠多。自助午餐有八折，平均每人約＄370。食物櫃檯多，分門別類。
有即開生蠔每次每人限拎兩隻，唔算大隻，但勝在幾鮮甜，值得encore。
仲有各式凍海鮮，都算新鮮。
有幾款刺身，少量壽司選擇。試左三文魚都ok甜。
熱盆都好多選擇，湯品、肉類、蔬菜，仲有麵檔等。特別鍾意食海鮮燉蛋白，細細碗，小朋友都岩食。燒牛肉牛味都幾香，淋上燒汁不錯。
類品款式都相當多，揀左幾款蛋糕，最鍾意藍莓芝士蛋糕。新鮮即製嘅雞蛋仔都唔錯，外皮脆卜卜。特別鍾意奶凍類杯仔甜品，北海道牛乳同抹茶紅豆奶凍值得一試。
最後有movenpick雪糕，是日有六款口味。朱古力係最好味嘅，小朋友最鍾意自行加上唔同朱古力、糖做裝飾。
地方較大，相對食客都多，間中都排隊拎野食。幸好坐埋一邊自成一角，可以慢慢食。