萬怡酒店 MoMo Café@沙田
萬怡酒店 MoMo Café@沙田
27/11/2016 12:00
假日自助午餐原價$328，Promo七折優惠，折實$262
刺身非常新鮮香甜，仲有日式冷麵自加醬料非常正
甜品款式多，有豆腐花、桂花糕、朱古力噴泉、栗子奶凍、忌廉泡芙、麵包布甸、士多啤梨果撻、芝士蛋糕、Haagen Dazs等，朱古力、芝士系列尤其出色。
Super Nice Semi-Buffet @Kudos
皇冠假日酒店 Kudos@銅鑼灣
11/8/2015 11:30
今日生日要食好啲，揀左呢個團購，好似幾抵。五星級酒店半自助餐都係$160，仲要食足三個鐘。11:30黎到酒店，的確幾高級，餐廳係一樓，黎到時人流唔多。三個鐘食左好多野，就算最後投降，都可以飲下飲品，食下果汁，他他條條食個高級午餐。
半自助餐係包括一份主菜，外面自助吧可以任食，有前菜、沙津、刺身、甜品任食。團購價$160，另加服務費$23，$180左右價錢真係好抵。正價好似要$299，實在又太貴。
冷盆有煙三文魚、凍牛展、日式凍豆腐、番茄水牛芝士、凍火腿拼盆。
六款芝士
各式預製沙律
自助沙律吧
刺身有三文魚、鯛魚、吞拿魚、雜錦壽司
三款凍海鮮係蝦、青口同螺仔
自助焗麵包及兩款餐湯，一款係龍蝦湯，另一款西洋湯豬骨湯
麵檔
甜品有幾款布甸、三款蛋糕
兩款飲品係檸檬茶同薄荷特飲。水果有五款。
豆腐花、四款Haagen Dazs迷你杯
自助乳酪雪糕
餐廳唔算好大，11:30黎到，剛剛入座，無乜人
最鍾意煙三文魚，自加他他汁，另一款應該係煙吞拿都幾好味。
六款芝士，老公至愛，唔知有乜好食。
刺身都OK新鮮，自己食幾多夾幾多，Re-fill都幾快。沙律菜選擇唔算多，但菜都幾新鮮。
龍蝦湯味道不錯，夠濃味，又杰身，咁好彩仲撈到幾粒龍蝦肉。
食到咁上下，主菜就送到。每日有五款主菜，我地揀左
澳洲免治羊冧肉餡餅伴全麥中東包及鷹嘴豆醬配薄荷乳酪
話係肉餡餅原來係類似漢堡扒，切開肉餅肉汁豐富流晒出黎。食落有少少羊膻味，但調味較為清淡，淡淡地。中東包本身幾好味，外脆內軟，煙煙韌韌，麥味仲好香。配上三款醬，薄荷味幾香、番茄粒粒加些少香料粉、另一款本來食唔出咩醬，以為係薯仔蓉，淡淡地，有啲豆味，原來係鷹嘴豆醬，真係第一次食。呢份主菜幾有中東風味，個人就麻麻地，但老公好鬼鍾意，因為夠特別。
香煎西冷伴磨菇蓉及焦糖甜薯
我揀左呢款西冷，賣相非常吸引，西冷大大塊上面舖滿磨菇汁。
切開西冷，大約六成熟左右，個人最鍾意呢個熟度。西冷入口好腍，邊位少少筋都食得到。牛味唔太濃但都OK，幾Juicy。幾鍾意佢個磨菇汁，係粒粒碎磨菇，味道好香，仲食到好似有些少黑松露味。
食完主菜繼續自助狂食，幾款水果，順便拎埋紅酒燴梨，燴梨入晒味，紅酒味幾香，不錯。
最後到甜品時段，拎晒全部試一Round。
最鍾意法式焦糖燉蛋，味道非常香甜，面層焦糖勁脆，細細杯兩啖食晒，所以在食左三杯。
白朱朱古蛋糕都唔錯，朱古力味幾甜，中層係黑朱古力蛋糕。
芝士蛋糕味道夠濃，正常水準。第一次食紅蘿蔔蛋糕，質感有啲似香蕉蛋糕，幾鬆軟，味道係紅蘿蔔加上肉桂味，味道其實幾香，但個人麻麻地。芝麻奶凍睇落幾好，但入口唔夠味，有啲失望。青蘋果奶凍，係奶凍加青蘋果蓉層層疊，酸酸甜甜幾有趣。芒果布甸正常質素。
豆腐花味道OK嘅，可惜唔算太滑。麵包布甸有啲失望，淡而無味。反而西米焗布甸就幾香。
呢度無朱古力噴泉，只有預早整好嘅朱古力包餅乾條同棉花糖。
雪糕時間有自助任唧乳酪，超級冰凍，味道勁濃，超爽。
Haagen Daza有雲尼拿、香蕉、咖啡、朱古力味。
整體黎講，主菜係非常讚，中間嘅自助食品都相當唔錯。都知道半自助餐嘅自助食品唔算多，但款式都幾多元化。值得一讚，服務員非常有禮貌，而且收碟都好勤力，又可能平日時間人流唔多，基本上一食完放低刀叉，五秒後必有人收走隻碟。最抵嘅係，今餐午市時間係由11:30至14:30，食足三個鐘。梳化坐得舒服唔太迫，就算食飽投降，都仲可以飲下野慢慢坐。真係非常滿意嘅一餐。
石澗日本料理
石澗日本料理@尖沙咀
2/8/2015 17:30
朋友提議買左呢個團購，團購介紹寫到好吸引咁，話酒店級日式放題，諗住平平地試下。團購買券連服務費，總數$193，計落又唔係平喎。同時段原價連加一 $220，即係平左三十蚊都咁大把。野食一般啦，款式選擇唔算多，味道都係咁啦。唔特別推介但照分享下野食。
基本野，有刺身、壽司、小食、炸物、串燒、日式料理、飲品等，以放題黎講，款式唔算多。
前後兩碟刺身，有少少求奇，剛送上黎係OK新鮮嘅，刺身都幾厚切。但因為無冰底，刺身好快玩完。
前後3 Round壽司都係OK嘅，一口大小易入口。軍艦、鰻魚壽司同花之戀都係唔錯嘅，特別鍾意鰻魚芝士卷。
團購客送嘅一人一件鵝肝多士，個人唔食鵝肝，但多士係幾脆幾好味嘅。鹽燒雞軟骨正常，但部份燒得太燶，帶苦味。
雞翼又係燶嘅…
羊架燒得太燶又有苦味。好似仲衰過今朝K lunch。
一口牛，算係比較好嘅出品，牛肉唔乾乾，OK!
鹽燒牛舌配黑椒，不錯吃。
凍豆腐、炸生蠔、厚燒玉子
變態人狂叫炸物，食到喉嚨痛。天婦羅蝦、蟹柳正常。忌廉薯餅唔錯，夠忌廉。一口芝士粒又幾好味喎，忌廉芝士炸左佢外脆內軟。最愛嘅芝士年糕，煙韌年糕配爆漿芝士餡。香芋栗子餅又幾好食，幾香甜，有粒粒栗子，呢個有驚喜。
團購客每人送一杯哈根大師
整體黎講，野食係正常啦，燒野唔太掂，經常燒燶，但壽司算唔錯嘅。正價唔建議，有團購的話，可以試一次嘅，如果有兩個鐘或以上時限的話….
因為今行放題時間得個半鐘，17:30食到19:00，佢上菜速度係OK嘅，收碟清理都幾密。但放題時間實在唔夠，成件事好似打仗咁，一送上黎就食食食，直情衝鋒陷陣咁，好彩有兩位男士戰鬥力十足。今次之後，我決定以後唔會食時限得1.5hr嘅放題! 講完!
超高級市場第二擊
The Market@尖沙咀
24/5/2015 12:00
慶祝母親節、父親節自助餐。$488另計加一。
甜品部仍然都係最愛，真係好好味。
迷你海南雞飯，雞OK，油飯都唔錯。
最愛甜品一口大小，可以食晒全場。
焦糖布丁夠香夠甜，質地極滑。
最愛綠茶奶凍，茶味勁濃，濃得有少許甘味，質地勁滑。
朱古力蛋糕勁夠濃。
M字頭雪糕，夠濃郁，味道特別，勁食返本。
喇沙細細碗少試不錯，湯底蝦味、椰味出，微辣。都幾多料，有蝦、蛋、豆卜。
刺身夠新鮮，煙三文魚配他他汁超正。
帆立貝裝住忌廉焗雜錦海鮮，焗得好香，海鮮多料，不錯。
築地番本日式放題
築地番本日式放題@旺角
19/4/2015 19:00
晚市無限時段放題 $238另加一，款式幾多，質素又唔錯，OK!
超勁刺身拼盆
壽司款式多，賣相好吸引，非常整理。
焗蠔賣相唔錯，忌廉汁味道又幾好，配料算多。
E-Max Cocktail
E-Max Cocktail
10/1/2014 16:00
