by admin | 4 月 1, 2024 | 2024 復活節六人行台北之旅, 台北, 台式, 外賣, 小食, 甜品, 美食廣場, 麵包
1/4/2024 13:30
午餐後仲有少少時間，飛快地去酒店後的百貨店買幾盒口罩。Hello Kitty 又平又靚。
14:00 返到酒店執好行李，安頓好就等司機。
14:30 司機先生準時到達，著晒成套西裝，好禮貌。好呢架車仲大，仲舒服。上車時多位酒店職員仲出嚟幫手拎行李，歡送我哋。
15:15 已經到機場，車費NT$1,300，真係抵俾，舒服到全世界都瞓晒覺。
去到櫃檯既行李，都要排一陣隊，完成之後喺機場周圍行吓。首先有長榮航空Hello Kitty Check in Counter打卡位。做過功課，南北兩邊有展望平台，仲有手信街。仲有一個Lego機場展區。
16:30 差不多時間過關，雖然無優先通道，但整個流程都好快。人工櫃位過關基本唔使等。
馬祖新村
1/4/2024 17:15
之後行到近候機室，有一個類似美食廣場，買馬祖新村車輪餅。機場限定只得兩款口味，排隊都排咗一陣，人氣甚高。
NT$ 330/ 6件 兩款口味各三件。新鮮即製，熱辣辣，蛋糕蛋味重，好鬆軟。中間內餡流心爆晒出嚟，一款是好事花生，非常濃郁。另一款係古早奶油，未到微甜，香氣十足。
候機室附近仲有Hello Kitty遊樂室，裝修非常之可愛，可以俾小朋友玩一陣。
夠鐘登記，只得一部勁細嘅升降機，呢個比較麻煩，但係登記流程都好快。最後準時起飛離開台北。
機上座位都係舒適的，小朋友亦有扭計骰禮物。今日嘅飛機餐係麻油雞飯，份量唔少，雞肉幾滑，汁夠多，啱晒撈飯，味道不錯。除餐仲有零食小吃，蘋果汁等等。
20:00 準時返到香港，完成六日非常好玩嘅旅程。
by admin | 4 月 1, 2024 | 2024 復活節六人行台北之旅, Uncategorized, 台北, 台式, 快餐, 西餐, 麵包
麥味登 1/4/2024 09:00
今日係行程嘅最後一日，先check out 酒店，寄存行李。幫我哋辦手續嘅係日籍職員，似乎係高層，普通話都非常純正。一切冇問題可退回NT$2000信用卡按金。
搭捷運嚟到忠孝新生站，車站附近就有一間台灣老麥味登。店面唔太大，還好都仲有位坐。
原塊嫰雞起司蛋滿分堡+豆漿紅茶+菜脯蛋 NT$130
原塊燒雞真係勁大塊，仲有芝士雞蛋，非常豐富。配上菜脯蛋，係一個好台式嘅快餐。
黑胡椒豬里肌強滿分堡+可可牛奶+雞塊NT$130
豬肉里肌加咗黑胡椒，更加香口。可可牛奶味道濃郁，炸雞快香脆好味。
超厚牛肉起司蛋可頌+拿鐵+黃金脆薯NT$180
牛肉漢堡真係非常厚身，有肉汁，可頌麵包牛油味香，非常鬆軟，加上芝士蛋，仲有酸酸甜甜嘅醬汁，非常好味。
卡滋雞腿蛋丹麥+豆漿紅茶+菜脯蛋 NT$135
雞腿扒煎得香脆嫰滑，肉汁豐富，丹麥麵包牛油味香，非常不錯。蛋是重點，絕對值得加。
台西合壁，新鮮熱辣，味道好好，埋單共NT$575，抵食！
by admin | 3 月 29, 2024 | 2024 復活節六人行台北之旅, 台北, 台式, 外賣, 日式料理, 甜品, 麵包, 麵食
Mister Donut 29/3/2024 22:00
食完晚飯，都會廣場有間兒童機舖，仲可以坐車車，但價錢唔平。臨走時係車站見到日本No.1 甜甜圈專賣店Mister Donut。今期期間限定係Mister Donut x 一〇八抹茶茶廊日式雙茶饗宴。包裝靚，賣相靚。
抹茶蕨餅巧貝 NT$60﹕以薘鬆巧貝作為餅皮，擠上富含抹茶香氣的卡士達醬，中心放上帶有豆香的蕨餅，復刻一〇八大判燒風格。冬甩包本身煙韌鬆化，上面朱古力抹茶醬夠厚，十分香甜，味道濃郁。蕨餅煙煙韌韌，口感再提升。
焙茶蕨餅巧貝 NT$60﹕呢款換上焙茶卡士達醬，多一份茶香。
雙層抹茶波堤 NT$48﹕嚴選京都宇治一番茶，Q彈抹茶波堤散發淡雅清香，外層活裹茶味濃厚的抹茶可可沾醬，尾韻茶香繚繞。朱古力醬夠厚身，食得出啖淡抹茶香濃味。
焙茶巧克力波堤 NT$48﹕日本靜岡焙茶粉製成的可可醬，甘醇焙茶香氣與Q彈巧克力波堤搭配，交織出茶香與巧克力的誘人甜點。焙茶多一份茶香。
大狗麵線@UberEat 29/3/2024 22:00
無得去夜市食大腸麵線，唯有叫外賣，估唔到味道相當好。
大腸麵線 NT$75﹕外賣送到仲熱辣辣，湯汁夠杰，味道濃郁，材料都好多，大腸味道夠膻香，不錯。
小時候冬瓜茶 NT$30﹕清甜不膩。
冰鎮酸梅湯 NT$40
冰霖古早味豆花@UberEat 29/3/2024 22:00
黑糖刨冰NT$108﹕送到來竟然仲係超結冰，保溫非常好。冰底牛奶味真材實料，配料有芋圓、仙草、紅豆、布丁等，好豐富。每款材料味道對版，非常不錯。
by admin | 3 月 28, 2024 | 2024 復活節六人行台北之旅, BB Friendly, 台北, 台式, 旅遊, 飲品, 麵包
貓懶 28/3/2024 18:00
貓空有好多餐廳，都係自家經營，遍佈成個山頭。因為有大有細，擔心太夜山路漆黑，所以揀餐廳一定要近纜車站，最後就揀左呢間四爺品牌嘅貓懶。距離纜車站只係2至3分鐘腳程，一座大大嘅三樓村屋改裝成私房菜形式餐廳。先經過二樓就係四爺，宮廷式裝修太豪華，而三樓天台改裝半戶外位置就係貓懶。職員有提醒過今日天氣比較悶熱，但一上到黎個景觀已經值回票價。還好天氣唔算熱，間中有自然風，算幾舒服。
我地坐最外圍嘅一張八人大枱，靚景盡在眼前，可算一覽無遺。始終係戶外地方，枱椅都封塵係絕對理解，亦無投訴。餐廳提供台式料理，菜式選擇都好多，亦有好多茶飲。落單後好快就上菜。
鐵觀音鮮奶茶 NT$220﹕以一壺上配細杯細幾特別，份量都唔少，斟極都仲有。鐵觀音茶香味濃，奶味配合得宜，熱飲更有味道。
五彩小饅頭 NT$180﹕人氣必點一品，新鮮熱辣可愛小饅頭，有綠茶紅豆、南瓜、燕麥、芝麻、紅莓味，口感鬆軟，味道香，小朋友十分鍾意。
金字塔茶炒飯 NT$290﹕金字塔形做得好公整，炒飯炒得乾身有茶油，有蛋、蘿蔔等簡簡單單。
鐵板牛柳 NT$330﹕牛有牛味，帶好輕微辣，但口感比較韌，似乎熟左少少。
茶燻雞 NT$380﹕雞肉幾滑，有好香煙燻嘅味道，唔知呢種係咪就係茶燻。
蝦醬炒空心菜 NT$200﹕味道足夠。
茶人茶溪蝦 NT$300﹕ 原來係炸得好脆嘅蝦仔，真係非常香脆，個殼仲有少少硬，下面舖滿炸米粉，送飲品應該不錯。
全餐連加10%服務費，埋單NT$2,090。之前係Klook搵到優惠$98可以作NT$500消費金額，即差不多八折，最後一共買左四張。扣除現金券後補差價NT$90，實價即係港幣$98X4+$22.5 = $414.5。
全餐飯見證日落到天色變暗，最後全黑仲伸手不見五指。入夜後枱上只開左一盞小燈透出一絲絲光，好有情趣。黑到連餸都睇唔清楚，的確係幾難忘嘅體驗。餐廳環境一流，觀景一流，入夜後見到山下燈光。食物算可以，夜景無價，反正係香港絕無可能有呢個體驗。
by admin | 3 月 27, 2024 | 2024 復活節六人行台北之旅, 台北, 小食, 旅遊, 燒烤, 甜品, 飲品, 麵包
27/3/2024 16:00
終於都離開酒店開始我哋嘅旅程，先去寶雅百貨巡視一下，店舖相當大，絕對適合補給。朝頭早落酒店最近嘅「南京復興」捷運站。先係捷運站買行程所需嘅悠遊卡，開卡每張NT$100。另搵返兩張應該十幾年前嘅悠遊卡仲用得，實在太厲害。加值NT$1,000 ，應該夠晒呢個行程使用。
近近地第一站去「松山」，捷運只需要七分鐘。值得一提台灣實在太過親子友善，捷運第三至四卡係親子友善車箱，裝置比較可愛，非常適合帶BB車俾我哋。
16:30
饒河街夜市
福州世祖胡椒餅 NT$60
五點未到，「饒河街夜市」好多店舖仍在準備中。福州世祖胡椒餅已經開左，已排左幾個人，買兩個來試下。新鮮即整，熱到辣口，外面酥餅脆卜卜，中間肉好多腍而且勁有肉汁，好香胡椒味，調味夠濃郁又有辣味，認真不錯。晚飯後再經過，已見到打晒蛇餅排隊，排到出夜市牌坊外，人氣真係超勁。
優品娃娃親子遊樂園
台灣必玩抓娃娃機，呢間係Google得到4.9分好評，極高人氣嘅遊樂場。平日五點幾來到，人唔多，基本上可以任選機玩。第一次玩小試牛刀，小朋友都成功夾到零食，滿足感十足，越玩越上癮，繼續唱錢玩。玩過有標明新手機，爪力超強唔會鬆，只要對岩個位基本係必有收穫，成功出到幾次飲品。主要挑戰較易夾嘅薯片、零食類。最後玩左大約NT$800，半車仔戰利品，第一次玩算相當滿意。戰利品都唔差，即食士多啤梨雪條都好食。新貴派花生朱古力派超正。黎到台灣深深感受原來夾公仔真係會夾到野，有得玩有得食有得拎，大人細路都玩得開心!
赤焱厚子骰子牛中份 NT$300
場內有幾檔燒牛粒，呢檔係帥哥師傅，師傅即場燒烤，好似睇緊煙火Show咁，火光熊熊，非常浮誇。中份份量都唔少，牛扒切成少粒，牛味濃郁，熟成度適中，質素都算幾夠腍。基本有輕微咸味，一款加入玫瑰鹽帶甜香味，另一款加左檸檬椒鹽帶輕微酸味。
古早味香腸 NT$60
晚飯後再去，夜市係超多人，驚覺BB車係完全入唔到，幸好今日黃昏已來過。最後決定試埋台灣特色一口香腸，都要略為排一下隊。NT$60一份有六大粒香腸，即烤熱到爆，外皮脆皮，中間內餡唔乾，味道濃郁。
50嵐
50嵐都係台灣出名茶飲店品牌，揀左招牌No.1試一試。四季春珍波椰 NT$50﹕茶底清香，不太甜，配料相當多，爆珠波一咬爆汁，椰果香甜，仲有煙韌珍珠。
婆婆麻糬
係夜市路口見到婆婆手作芝麻花生麻糬，一盒NT$80，大大粒，外皮煙韌，中間內餡多到爆，花生味同芝麻味各有特色，非常香濃。
去台灣必行夜市，今行有老有嫰，只係黃昏入夜前來感受一下。入夜後真係非常熱鬧。
by admin | 3 月 24, 2024 | 外賣, 深圳, 麵包
深圳中洲灣 24/3/2024 16:30
豆乳春色菠蘿包 22元﹕大過小朋友個頭，非常夠份量，連店內最大嘅麵包食都差D放唔入。賣相靚，三色春日。中間幾鬆軟，淡淡豆乳味。外皮脆脆地。
豆乳紫薯 12元
質素幾好，但價錢略貴。
